السلام عليكم اخواني انا متابع الموضوع من فترة لكن حبيت اجمع اسئلتي كلها مرة واحدة
اولا بياناتي: اخوكم عمره 33 سنة بكالوريوس كيمياء دفعة 98 ومعايا دبلوم دراسات عليا وماجستير في العلوم 2006
لدي سنة واحدة خبرة في الكيمياء من سنة 2000 وبعدين تفرغت للدراسات العليا
في سنة 2004 غيرت المجال واشتغلت في الترجمة وحاليا عندي خبرة حوالي 5 سنوات في الترجمة عربي – انجليزي
بالنسبة لمهنة الترجمة شغلي كان فريلانس
Freelance
لكن اقدر اجيب شهادات خبرة بالاربع سنوات من مكاتب الترجمة اللي اشتغلت معاها في مصر وخارج مصر
بالنسبة للغات الانجليزي مستوى متقدم محادثة وكتابة وكنت امتحنت التوفل من فترة واخدت 570
بالنسبة للفرنسي انا كنت في مدرسة فرنسية من الطفولة وعندي دبلوم لغة فرنسية اخدته مع شهادة الاعدادية بتسع سنين دراسة للغة الفرنسية زائد دراسة الفرنسي في المرحلة الثانوية ومع شوية تكثيف للجهد هنقول هوصل لمستوى متوسط
بالنسبة للمدام هي ليسانس اداب وعمرها 29 ومعاها خبرة سنتين في مجال الترجمة وايضا فريلانس
مستوى الانجليزي متقدم ومستوى الفرنسي مبتدئ
مفيش اولاد
بعتذر عن الرغي الكتير لكن حبيت اوضح كل النقاط عننا
حاليا انا قررت البدء في مشروع الهجرة ولسة هبدأ من اول الخطوات بس معلش لو ممكن تلخصوا الخطوات في نقاط بسيطة اكون شاكر جدا
بالنسبة للأسئلة الأخرى
هل خبرة الفريلانس مقبولة؟ في حالة وجود شهادات خبرة وصحيحة؟ ومفيش مانع طبعا من التواصل مع أي من اصحاب العمل لتأكيد صحة المعلومات مع العلم ان معظم المكاتب من خارج مصر
اية نوعية الوظائف المتاحة اللي الواحد ممكن يبدأ بيها هناك بالنسبة ليا وللمدام؟
هل من السهل العثور على مهنة في مجال الترجمة (عربي - انجليزي)؟
هل من الأفضل تعديل المسار والتركيز على مهنة الكيمياء مع العلم ان مفيش غير سنة خبرة واحدة مرة عليها اكتر من خمس سنوات؟
هل المدام بتحضر معايا المقابلة بتاعة سوريا؟
هل من السهل العثور على وظيفة ولو حتى مؤقتة بمجرد الوصول الى كيبك؟
ما هو الحد الادنى للمبلغ اللي الشخص لازم يجي بيه كيبك؟ انا بسأل من الناحية العملية اللي بالفعل هيحتاجه
ما هو متوسط المصاريف الشهرية لشخصين؟
متوسط تكلفة الانترنت الشهرية ؟ وما هو افضل طرق الاشتراك واوفرها؟
هل من الممكن في المستقبل استدعي امي كزيارة مثلا؟ هل في شروط محددة لكدة من حيث الدخل وخلافه؟ وهل لازم اكتب اسمها في الابلكيشن الاولاني والا مش شرط؟
بعتذر جدا لو في اسئلة مكررة بس انا عايز احدث اجابات لاني لسة هبدأ المشوار
الشكر لكم مقدما
بالنسبة للتقديم والاوراق والابليكشن المداخلة فى الصفحة10 فيها كل الاوراق والابليكشن وخلافة ومراحل التقديم ودفع الفلوس وكيفيتها
بالنسبة لبروفيلك الكلى كويس جدا ومبشر جدا بس تشدوا شوية فى الفرنساوى انت والمدام
الخبرة مادامت يمكن التحقق منها وواقعية يمكن احتسابها وكونها من خارج مصر تزيد من فرصتك ولا تقلل منها بس المهم التحقق من الخبرة زى ما اتفقنا
بس موضوع خبرة الفرى لانس دى بصراحة مش عارف هيحسبوها ازاى وهيشيكوا عليها ازاى يعنى معنى كدة انهم هيتصلوا بكل الشركات اللى اشتغلت معاها طيب ما تقدرش تجيبها من مكتب واحد او بمعنى اخر ترتب شهادات الخبرة زمنيا فى الفترة من كذا الى كذا مع مكتب كذا وهكذا كى يمكن احتسابها عمليا لان هتواجهك صعوبة انك هتكتب كام ساعة عمل فى الاسبوع وهتحسبها ازاى وبعدين مين المعيار اذا كان انت ليك اكتر من مدير ومين هيمضى شهادة الخبرة لو فيه امكانية فصلها وترتيبها زمنيا بيتهيالى هيكون افضل واكثر واقعية
اى حد بيشتغل فى شغل الكاجوال الى ان يعادل مؤهلة وهو طبعا مجال الخدمات
الترجمة ليها نقابة يعنى لازم تتطلع ترخيص ممارسة المهنة منها ودة مشوار طويل ومش سهل خاصة انك مش خريج ترجمة اصلا
طبعا الافضل التركيز على مجال الكيمياء بالرغم من صعوبته بس لسبب بسيط انك مؤهلك فى الكيمياء يعنى هتحتاج معادلة فقط اما الترجمة هتدرس من الصفر بالنسبة للخبرة العبرة للخبرة الكندية اكثر بمراحل من الخبرات السابقة فى الوطن الام يعنى شهر واحد فى كندا خبرة احسن من10سنين براها
طبعا المدام جزء لايتجزأ من التقييم وهتدرس اللغة تماما زيك وتكون جاهزة بس طبعا بمستوى اقل شوية
الشغل فى الفترة الحالية صعب شوية ودة بشهادة بعض الاصدقاء هناك نظرا للظروف الاقتصادية الا ان المؤشرات تنبؤ بانفراجة قريبة
المبلغ 4000دولار كندى دة اللى لازم تاخدة معاك وهتمضى علية اما عمليا كل مازاد كان احسن طبعا
المصاريف مقدرش افتى فيها لانى مجربتش
الاب والام بتعملهم اسبنسور بس دة ليه شروط متعلقة بدخلك وعملك والا تتقاضى من الحكومة بدل بطالة وان يكون دخلك ثابت وفى حدود معينة يعنى فيه ضوابط للموضوع
فى الفيدرال طبعا بتكتب اسماء كل عائلتك الكبيرة(الاب-الام-الاخوة) اما فى كيبك بتكتب عائلتك الصغيرة انت والزوجة والاولاد ان وجد
تحياتى
مساء الخير يا شباب
أخيرا كملت كل أوراقى و هقدم لهجرة كيبك بعد العيد مباشرة إن شاء الله بس فيه كام نقطة كده
أول سنه عندنا فى الشركة بتعتبر تحت الإختبار و الشركة مبتدفعش تأمينات فيها على الموظف الجديد غير لما يكمل سنة بنجاح يعنى أنا إشتغلت اربع سنين بس برنت التامينات مطلعهم 3 سنين بس انا اتصدمت و اتخانقت معاهم فى الشركة فعملولى شهادة الخبرة باربع سنين و كدتبوا فيها ملحوظة ان اول سنه كانت خارج التغطية بتاعت التامين
ايه رايكم ارفق برنت التامين دلوقتى و لا ممكن يلخبطلى الدنيا و موظف الهجرة يقيمنى على اساس 3 سنين بس بدل اربعة
تانى حاجة انا شغلى فى مجال بعيد عن شهادتى يعنى الشغل فى العلاقات العامة والشهادة محاسبة الشهادة معداش عليها خمس سنين بس يمكن لما تيجى المقابلة يكون خلاص الخمس سنين عدوا هما بيحسبوا الخمس سنين دول من تاريخ الحصول علىالمؤهل لتاريخ التقديم و لا منتاريخ المؤهل لتاريخ الانترفيو ؟؟
تالت حاجة كشف حساب بنكى بمبلغ 4000 دولار كندى لشخص مفرد مقدم لوحدة كفاية ولا لا ؟؟
الف شكر للجميع و عذرا للإطالة
مفيش مشاكل فى الخبرة مدام الشركة نفسها معترفة بالفترة اللى ساقطة من التامينات بس خلى الشركة تنوه انك تحت التمرين فى السنة دى يعنى تذكر سبب عدم التامين عليك عشان يبقى الموقف واضح
وفيه حل تانى افضل من وجهة نظرى انك تبدأ الخبرة والتامينات مع بعض وانت قدامك لايقل عن 9شهور عن المقابلة يبقى برضة دخلت فى 4سنين شغل عند المقابلة وتاخد الدرجةالنهائية فى الخبرة وتبعد بعد كدة عن مضايقات الفيدرال فى حتة الخبرة
هيحسبوا من تاريخ التقديم طبعا لان الملف بيتقيم نظريا من تاريخ التقديم
بس طبعا لعدم ممارستك للمهنة ممكن يكون فيها كلام يعنى متعتمدش عليهم اوى هى دايما بترجع لمستشار الهجرة اللى بيعمل معاك المقابلة
4000حلوين اوى وزيادة عن المطلوب بشوية كمان
تحياتى
Read more: https://www.almatareed.org/vb/showthr...#ixzz1OVcYnqeg
الاستاذ الفاضل / السيد منير
شكرا جزيلا على الاهتمام وسرعة الرد
بالنسبة لخبرة الفريلانس كل اللي هقدر ادرجه في الشهادة هو فترة التعامل بيني وبين المكتب وعدد المشاريع (الصفحات) اللي قمت بيها ومجالات الترجمة
طبعا صاحب المكتب (CEO) هو الشخص المسئول وهو اللي هيقوم بالتوقيع وختم الورق مع ارقام الاتصال الخاصة به والايميل
مع العلم ان جميع الخبرات سليمة بدون أي احتيال وهي خبرات كويسة جدا على ما اعتقد
وهحاول ارتب الشهادات زمنيا مع المكاتب بتسلسل السنوات وخاصة ان في بعضهم ما زلنا على تعامل حتى الان
معلش ممكن حضرتك تديني امثلة على الشغل الكاجوال دة ونظامه والعائد الشهري منه
هل عند حضرتك فكرة عن طريقة معادلة المؤهل (ماجستير العلوم) بما يتناسب مع كيبك؟
هل من الافضل التقديم فورا والا الانتظار بعد قائمة 16-10؟
وهل اذا تقدمت باعتباري احد الوظائف اللي في القائمة (كيميائي) هل ممكن يقبلوني في هذا المجال مع العلم انني لم اعمل في هذا المجال الا سنة واحدة وكانت من اكثر من خمس سنوات؟
وهل في هذه الحالة يكون من الافضل لي ان اقدم فيدرال هروبا من شرط اللغة الفرنسية لكيبك؟
ايضا سمعت من بعض الأخوة انه من الافضل القيام بكشف طبي سريع قبل الشروع في اجراءات الهجرة؟ فما هي الامراض التي تعتبر عائق او قد ارفض بسببها طبيا؟
شكرا جزيلا لتعاونك.
طيب ستف على قد ما تقدر شهادات خبرتك عشان تبقى سهله فى المقابلة ان تكون عامل قوى فى صالحك
الشغل الكاجوال ياباشا اللى مش عايز معادلة فى نطاق الخدمات يعنى-فى مطعم-فندق-بنزينة-كدة يعنى وهو طبعا ساعتةب9دولار يعنى يادوب
كيبك مبتشترطش الخبرة فى المجال زى الفيدرال بس فى المقابل الفرنساوى يكون كويس
على حد علمى لازم تعادل البكالوريوس الاول وبعد كدة تعادل مافوقه لان هو الاساس
طبعا التقديم بسرعة افضل قبل تغيير القوانين
ماهو الفيدرال عايز خبرة من ناروديوتيز زى ما الكتاب بيقول وايلتس بس مضمون مية فى المية
كيبك عايزة فرنساوى ومش مضمونه مية فى المية لان كيبك هى المقابلة بس ليس الا
الامراض التى تمنع على حد علمى هى الامراض الجنسية زى الايدز والزهرى والامراض المزمنة المكلفة بس بصراحة معرفش ولا حالة اترفضت بسبب الكشف الطبى
تحياتى
Read more: https://www.almatareed.org/vb/showthr...#ixzz1OVce4BX5
استاذ سيد كل سنه وانت طيب وكل االاخوة
سوال لو تكرمت انا دلوقتى شغال فى السياحه من 2002
حتى الان بسى فى الخليج منهم سنه وكام شهر محاسب فى مصر ومعايا شهاده خبره بكدا وتامينات هل فى المقابله هخد ال5 درجات بتاعت اليسته ولالا انا خريج تجاره محاسبه 2001
والسنه وشويا الخبره بتاع محاسب كانت من فبراير 2008 الى مايو 2009
ايه رايك يمشى الموضوع ولالا
شكرا
كدة من حقك قانونا انك تاخدهم يا استاذ محمد لان الخبرة فى المحاسبة فى اخر خمس سنين يسبقوا الطلب بس طبعا لازم تقنعها انك محاسب محترف من خلال مناقشتها معاك فى الديوتيز بتاعتك فى الشركة وانك بتعمل تقارير محاسبية وميزانية والكلام الكبير بتاع المحاسبين
بالتوفيق ان شاء الله
Read more: https://www.almatareed.org/vb/showthr...#ixzz1OVckpH1y
استاذ سيد عايز نصيحتك انا الان معايا خبره اكتر من 5 سنين ونصف فى السياحه
واصلا انا محاسب خبره سنه وكام شهر بس دلوقتى انا راسلت الاوردر بتاع المحاسبين
وبعتوا ليا الرد وجهزت كل حاجه بالنسبه للوظيفه دى بسى المشكله ان الممحتحن هيركز معايا على السياحه لانى مازلت واكتر خبرتىفيها
وطبعا المجال دا مش ليه اوردر تقريبا ولا حاجه
ياريت تقولى اعمل ايه لما الممتحن يسالنى اعمل ايه علشان الاقى شغل فى المجال دا واكون جاهز ليه ولا اقول للمتحن انا هشتغل كامحاسب انا محتار ادخل ازاى ليه بالاجابه لو سوال كان بطريقه دى لانه ممن يسالنى سوال يلخبط بين الوظيفتين دول
ايه رايك؟
طبعا دة موضوع محير جدا اختلاف مجال الخبرة عن مجال التعليم لكن
المفروض تبدأ طبعا بالمحاسبة لان انت مؤهل دراسيا فيها يعنى هناك هتعادل شهادتك بس انما عشان تشتغل فى السياحة لابد تحصل الاول على دبلوم العمل فى السياحة وبعدين تشتغل فى المجال دى جزئية
الجزئية التانية ممكن تقول مبرارتك بكل صراحة انت ليه فضلت السياحة عن المحاسبة لان وضع المحاسبة فى مصر مش قد كدة يعنى ظروف سوق العمل هى السبب مش قدراتك العلمية فى المحاسبة هى السبب
الجزئية التالتة حاول تستشف هو لو حاول يوجهك لمجال معين امشى معاه اهم حاجة السى اس كيو الشغل هناك دة موال يطول شرحة يعنى وافق عليك محايبة ماشى سياحة ماشى
الجزئية الرابعة حاول انك تحول نطقة ضعفك لنقطة قوة انك ممكن تشتغل مؤقتا فى السياحة فى فترة المعادلة للمحاسبة وكدة تشتغل مؤقتا وانت بتعادل شهادتك
واخيرا ودة الاهم كل دى اسباب احنا بناخد بيها اما القدر فهو نافذ نافذ لو ربنا كتبهلنا محدش هيقدر يحوشها ولو ما اردش مش هنروح كندا لو معانا الفيزا حتى
تحياتى وبالتوفيق
Read more: https://www.almatareed.org/vb/showthr...#ixzz1OVcvStYw
أساتذي ومعلمي مسيو سيد منير :.
أغلي تحية وسلامات لشخصكم الكريم
معلش يا باشا السؤال ده مهم جداً جداً فياريت تقدح زناد فكرك وترد لنا عليه الرد الشافي العافي بإذن الله
السؤال : لو واحد كان مقدم فيرال قبل كيبك وطبعاً ذكر الكلام ده في الأبليكيشن وسأله الممتحن ليه ؟
وهل ممكن يفيد في الرد أنه يقول أنه ماكنشي يعرف الفرق بينهم أو أنه كان فاكر إن كيبك بتاخد بال nominee زي ولايات كتير في كندا وهوه مايعرفشي حد يزكيه في كيبك
ويحاول يأكد للممتحن أنه ممكن يمضي علي إقرار حالاً بأنه لن يغادر أراضي كيبك ويقيم في كندا وأنه علي أستعداد أنه يكون في الأقرار ده أنه لو عمل كده تلغي تأشيرته يكم ده يطمن الممتحن شويه وعلي فكرة حته أني ماكنتش أعرف الفرق دي صحيحة وكمان أنا كنت أيامها مستوايا ضعيف في الفرنسي وبصراحة أستسهلت كندا علشان الفرنسي وخصوصاً إن في الأبليكيشن بتاع الفيدرال كنت كاتب أني مستوي مبتدأ في الفرنسي علشان أرفع درجاتي
معلش يا باشا السؤال ده يكاد يكون أهم سؤال أكيد هتسأله في المقابلة وبالتالي الرد أهم شيء في التحضير للمقابلة دي
عايز يا باشا الردود الجميلة اللي أتعودنا عليها من حضرتك وخد وقتك في التفكييييير
طبعاً ده مايمنعشي من مشاركة باقي الأخوة الأعضاء وعرض مقترحاتهم وبكده الفايدة تعم
شكراً جزيلاً
بمنتهى البساطة يا دكتور احمد قول الصدق بس
هيطلع من لسانك الى قلب الممتحن
الناس دى بتفهم كويس جدا اللى بيجى دوغرى معاهم وبيحترموا الصدق والصراحة
قول اسبابك الحقيقية من غير زيادة ولا نقصان هيصدقك من غير كلام مش محتاج تبتكر اسباب مش واقعية لانه مش هيصدقها وكمان ممكن يبقى عدائى معاك لو فهم انك بتحاول تخدعه
على راى دكتور قناوى الصدق منجى
والفيصل على صدقك واخلاصك لكيبك هو مستواك فى اللغة الفرنسية ومعلوماتك عن الاقليم
يعنى كل ما تجود فى الفرنسية وتعرف عن كيبك معلوماتها وقيمها وتؤمن بها وتحاول توصل الاحساس دة للمتحن هيصدقك من غير ما تذكر اسباب التحول من الفيدرال الى كيبك
وممكن كمان ميسالكش انت كنت مقدم فيدرال قبل كدة ولا لآ
هو يحكم بموضوعية على مستواك وجاهزيتك للهجرة الى كيبك
ودة مش صعب عليه ان يميز واحد عايز كيبك بجد وواحد واخدها كوبرى لكندا
متقلقش ومتحطش الموضوع دة فى دماغك
ركز فى اللغة والمعلومات على كيبك وبس والباقى دة بتاع ربنا وحده سبحانه وتعالى
بالتوفيق ان شاء الله
Read more: https://www.almatareed.org/vb/showthr...#ixzz1OVdoWHS3
يا مسيو سيد كلامك طبعاً صح مية في المية فعلاً الصدق منجي وفراولة كمان لكن برده دي حاجة هاتقلق أي ممتحن من الشخص اللي مقدم كيبك وعلشان كده هيلف ويدور في الأسئلة لما يتأكد منها وخصوصاً إن الكل شهد بإن بتوع كيبك خايفين من إنها تكون كوبري لكندا بعد اللستة الجديدة للوظايف أنا عايز بس منك بناء علي اللي قلتهولك لأنه هوه ده الموقف بصراحة أنك تكتبلي بأسلوب سهل وسلس الرد بالفرنساوي وأهوه دماغ مع دماغ تانية تكون الأفكار مرتبة بشكل أفضل وخصوصاً إنك أدري منا بالناس دي وبدماغهم
مع خالص تحياتي وشكري
ماشى يا باشا انا تحت امرك
بس حتة معرفش الفرق بين كيبك والنومنى مش مبرر لان الكاتيجوريز بتاع الهجرة معروفة ومشروحة بالتفصيل على موقع السى اى سى يبقى مش من صالحنا نقول معرفش دة حتة
الحتة التانية بتاع انك تمضى اقرار يلزمك الاقامة فى كيبك عشان تثبت حسن النية دة برضة مش هو اللى هيشفع لك عنده لسبب بسيط جدا انك فعلا بتمضى على اقرار الاقامة فى كيبك عند تقديم الملف فى الفيدرال وبلاش تسبق انت بالشك وتوجيه الانظار الى نقطة ضعفك انك قدمت كيبك بعد رفض الفيدرال
انت بس ابعتلى رسالة على الخاص انت عايز تقول اية فى النقطة دى وانا هاقراه وافهمه واعرف وجهة نظرك وبعدين امنتجه بشكل ملائم عشان فى النهاية انا عايز تفكيرك انت اللى يوصل وعلى لسانك انت عشان يبقى صادق وانت مقتنع بيه وانت بتقوله وبالتالى يصل بسهوله للمتحن
انا والله مش ببخل عليك بس عايز نشتغل ونفكر صح
منتظر الرسالة يا باشا
وان شاء الله مش هيكون فيه اى مشاكل والموضوع هيبقى تمام باذن الله
واحب اقولك ان المستشارين ان كان واحد شكاك هتلاقى تسعة كويسين جدا وبيتعاملوا بانسانية ورفق وذوق وكفاية ان الناس دى هموا الوحيدين اللى لسة فاتحين بابهم لينا فى وقت العالم كله مبيعترفش بينا ولا يهموا امرنا من قريب او من بعيد
وانا كلى ثقة انك ناجح باذن الله
Read more: https://www.almatareed.org/vb/showthr...#ixzz1OVeP5ehI
