جميل... كدا المفروض حسبنا السكور بتاعنا بايدينا و فهمناه ماشى ازاى... مافيش مانع بأه نجرب نحسبه فى اى موقع زى دا مثلاً https://www.cic.gc.ca/english/immigra...d/crs-tool.asp او دا https://www.ruichenlaw.com/eecalc/ و التانى دا انا باعتبره احسن لأنه بيعرض السكور بتاعك خطوة بخطوة بعد ما تجاوب كل سؤال. جرب معاهم اكتر من مرة وغير فى اجاباتك و استكشف... لو زودت سنين خبرة هتستفيد ايه و لو زودت تعليم او لغة تانية هتفرق معاك اد ايه .. و يا ترى لو اللغة الأساسية اتحسنت شوية (الأيلتس عند اغلب الناس) هتعمل ايه؟ و كل تغيير فى كل مهارة بيفرق ازاى؟ و فى كمان ال come to Canada tool هنا https://www.cic.gc.ca/ctc-vac/ee-start.asp و دى ليها اكتر من ميزة و عيب ف نفس الوقت.. انها بتعمل كل حاجة .. بتحسب سكور ال FSW و سكور ال EE. و بعد ما بتخلص بتديك النتيجة و بتديك معاه reference code . الكود دا مفيد لو انت كنت بتكتب بياناتك الحقيقية و الكاملة انك ممكن تستخدمه فى عمل بروفايل الاكسبريس انترى EE و توفر على نفسك ادخال البيانات من اول و جديد (فى خلال 30 يوم فقط.. بعدها الكود هيتلغى اوتوماتيك سواء استعملته او لأ). لكن ممكن لو مش عاوزه خلاص انساه ولا كأنك شفته. عادى و ابدأ من الأول و جرب بيانات تانية. و ممكن فى كل الأحوال تعمل بروفايل ال EE من غيره اساسا. عادى ما تخليهوش يعمل لك ازمة خالص. عيب الأداة دى بأه انها علشان تعمل كدا بتطلب كل البيانات اللى بتدخل فى عمل البروفايل. يعنى مش بس هتسألك سكورك كام فى الأيلتس او التيف.. لأ دى هتطلب منك رقم الشهادة و تاريخ الأمتحان. مش بس هتسألك على شهادتك الجامعية انت و زوجتك/زوجك .. لأ دى هتطلب بيانات شهادات التقييم بتاعة WES او غيرها..و هكذا. العيب التانى انها لو لقت لسبب ما انك ما ينفعش تقدم هتقولك not eligible و خلاص.. سواء بسبب بيانات ناقصة او انك دخلت رقم او كتبت حاجة غلط.. مش هتعرفك السبب و هتسيبك تضرب راسك ف الحيط! و بعد ما تخلص رحلة التجربة و الاستكشاف دى يا ريت يكون كتبت ملاحظاتك و نتايجك فى ورقة صغيرة و نقعد نتأمل فيها كدا مع بعض و نشوف ممكن نستنتج منها ايه؟ اظن اى حد عدى على الكلام اللى فوق دا و قراه بتمعن ممكن ممكن يوصل لنفس الاستنتاجات اللى جاية دى: اولاً: النظام الجديد مش محتاج تسرع و جرى ف اى اتجاه و خلاص.. لازم كل خطوة تاخدها تكون عارف بتاخدها ليه و هتكلفك كام و هتستفيد من وراها ايه. ثانياً: الوقت عنصر مهم بس مش دايماً فى ايدك.. ممكن تبقى مجهز كل حاجة و تقعد بالشهور مستنى.. مافيش اى داعى للاستعجال طالما لسا ما وصلتكش دعوة. ثالثاً: و دا الأهم.. اعرف ايه اللى انت محتاجه عشان تبدأ و ايه اللى ممكن يتأجل لبعدين. و دا اللى الناس دايما بتسأل عليه. و اللى المفروض تكون عرفته من نفسك دلوقت.. بس انا هاقوله بردو اعمل ايه علشان ابدأ؟ اول حاجتين هما تقييم الشهادات (مش المعادلة) ليك و لزوجتك/زوجك و امتحان اللغة الاساسية (ايلتس او تيف) ليكم انتم الاتنين. و المشوارين دول يستحسن انك تمشى فيهم مع بعض بالتوازى علشان تكسب وقت. و كل ما تخلصهم بدرى كل ما ممكن تبدأ بدرى لأن من غير ارقام الشهادات دى مش هتعرف تعمل بروفايل الEE اصلاً. تقييم الشهادة مش بياخد مجهود (غالباً) و مافيهوش تعب و محاولات بعكس اللغة. انت بتعمل ابلكيشن اونلاين مع WES و تدفع المصاريف و تبعت لهم الورق المطلوب وخلاص. كمان شهر بالكتير هتلاقى شهادات التقييم وصلتك. بس كدا. انما اللغة دى حاجة تانية خاااالص .. و علشان كدا انا خليتك تقرا ال 3 بوستات اللى فاتو دول و تفهم نظام حساب الدرجات. كل ما اللغة زادت كل ما تلاقى سكورك بيقفز قفزات كبيرة و فرصك فى تلقى دعوة بتتحسن اكتر و اكتر. و يمكن اللغة هى اكتر حاجة تعرف تحسن بيها فرصك لأنها الحاجة الوحيدة اللى ف ايدك! العمر دا متحدد خلاص و بيقل مع الوقت ، و سنين الخبرة اهى ماشية بردو زى العمر كدا ، و التعليم صعب تشتغل عليه و تاخد شهادة جديدة سواء دبلومة او ماستر او دكتوراه... مش اقل من سنة او اتنين شغل علشان تاخدهم. يبقى فاضل ايه؟ اللغة! على حسب اجتهادك و شغلك عليها ممكن مستواك يرتفع ( و سكورك يرتفع معاه) زى ما انت عاوز. و فى الوقت اللى انت عاوزه. و دى هى النصيحة اللى الزملاء هنا بيدوها لأى حد جديد بييجى يسأل اعمل ايه. بنقوله اشتغل على اللغة الأول و الباقى سهل. و انت دلوقت عرفت ليه. الفرق بين CLB 7 وCLB 9 فى اللغة الاساسية ممكن يديك 65 نقطة زيادة .. و لو عندك لغة تانية ممكن تحسنها و تاخد منها نقط بردو لحد 24 نقطة لو وصلت فيها ل CLB 9 هى كمان. و طبعا لو متزو ج يبقى زوجتك/ زوجك لازم يشتغل بردو على اللغة الاساسية علشان تحصلوا النقط دى. بعد ما تعدى العقبتين دول الباقى كله سهل و يخلص ف ساعتين زمن. كل اللى هتحتاجه ارقام الشهادات و بيانات الأسرة مع كوباية شاى بالنعناع (او نسكافيه) و قعدة روقان ف اى نادى او كافيه (لو مش بتعرف تركز فى البيت) و هتعمل بروفايل ال EE و ال GC Key و ال جوب بانك و كل حاجة. و ده اللى هنحاول نشرحه فى المشاركات القادمة ان شاء الله. يا رب يكون حد استفاد بالكلام اللى فات دا .. و استأذنكوا هاغيب اسبوع لظروف العمل و هارجع نكمل مع بعض ان شاء الله. رجاء بس لو فى استفسارات او اسئلة نخليها فى التوبك التانى هنا https://www.almatareed.org/vb/showthread.php?t=672914 او لو فى توبك المستشار المجانى هنا https://www.almatareed.org/vb/showthread.php?t=15771 علشان بس يفضل التوبك دا متسلسل و الناس ما تتوهش فيه كتير. و دائماً و ابداً النصيحة التى لا تنتهى صلاحيتها هى " اقرا الجايد ... اقرا الجايد .. اقرا الجايد" هتلاقى فيه كل حاجة انا قلتها و كل حاجة انا ما قلتهاش و كل حاجة اتعدلت بعد ما البوست دا اتنشر و كل حاجة ف اى حاجة عن اى حاجة... فقط محتاج صبر و تركيز و صبر و ورقة و قلم و شوية صبر كمان https://www.cic.gc.ca/english/immigra...tion-guide.asp https://www.cic.gc.ca/english/immigra.../candidate.asp https://www.cic.gc.ca/english/immigra...ed/profile.asp اشوفكم على خير و بالتوفيق للجميع ان شاء الله
