اقتباس المشاركة الأصلية كتبت بواسطة M,Nagib طيب اشرحلنا اللى حضرتك خايف منه بالتفصيل اصل انا دماغى لفت ومابقتش فاهم حاجه اولاً عيد سعيد على الجميع وان شاء الله العيد الجاى يكون كل الناس وصلت للى بتتمناه و معلش آسف انى انفعلت شوية ف ردى اللى فات... بس التهريج اللى الناس دى عاملاه مستفز فعلاً! دلوقت الموضوع ببساطة و تسلسل منطقى هو كالآتى: هى ايه اكبر مشكلة بتواجه اى مهاجر ؟؟ الشغل طبعاً ليه؟ لأن اغلب او كل الناس اللى بتروح بيبقى مؤهلاتها و خبراتها غير معترف بيها و بالذات المساكين اللى زى حالاتنا (Regulated) لأنه مش بس مطالب انه يثبت لصاحب العمل كفائته و يقنعه يثق فيه و يشغله.... لأ. دا كمان مطالب انه يخضع لهيئة تنظيمية تانية ...ليها شروطها و متطلباتها لوحدها اللى غالباً ما بتكون حاجات محتاجة مجهود ووقت (و تكاليف) مش قليلة خالص... و دا بيشكل عبئ مضاعف على المهاجر الجديد اللى بقا مطلوب منه مش بس يصرف على نفسه و أسرته من الفلوس اللى جايبها معاه... لأ كمان يصرف على كورسات او امتحانات او دراسة او خلافه ف نفس الوقت فبيبقا زى اللى بيجرى ف سباقين ف نفس الوقت... عاوز يجيب اى شغل عشان يعرف يعيش (مجرد يعيش) و عاوز بردو يركز ف مذاكرته و دراسته و معادلته عشان يعرف يدور على شغلانه كويسة تناظر اللى سابها فى الدخل او على الأقل تناظرها فى التخصص و المجال. يعنى حتى لو ما جابتش فلوس زى اللى فاتت (دا وضع اغلب اللى جايين من الخليج) يبقى على الأقل بيكتسب خبرة ف مجاله ليها اهمية و الى بيوصل كندا و معاه عرض عمل ف مجاله دا بيعتبر دخل من البوابة الذهبية! و عشان كدا بتلاقى ال Job Offer دا عامل زى كارت الجوكر فى حساب نقط التقديم: 10 نقط على الأوفر نفسه + 5 كمان فى الAdaptability + ما يطلبش منك Proof of Fund و فوق كل دا حتى لو الكاب بتاع النوك بتاعك اتملى او ما كانش فى الليستة اساساً مش مهم... اهلاً و سهلاً بيك و تقدم زى الباشا!!! حاجة كدا ولا فى الأحلام و فى المقابل اسأل اى حد هتلاقيه بيقولك ال10 نقط بتوع ال Job Offer دول انساهم حالص و شيلهم من حساباتك... ليه يا عم؟ الرد دايما انه شبه مستحيل و احصائياً الغالبية العظمى من اللى بيقدم و معاه Job offer بيكون مقدم من جوا البلد. يعنى هو اساسا موجود و شغال بس ب Work Visa. اما اللى برا البلد ففرص حصوله على الأوفر شبه معدومة اولاً... اللى هيشغلك دا يعرفك منين؟ و يعمل لك انترفيو ازاى؟ و هل يثق ف خبرتك ولا لأ؟ اكيد طبعاً لأ. لأنه انت حتى بعد ما بتوصل البلد مش بيثق ف خبرتك و بتضطر تشوف المشوار المر اللى حكيت عليه قبل كدا. دا طبعاً غير موضوع الشهادات و التعليم! و فوق كل دا الLicense فهمنا ليه ال Job Offer دا حاجة شبه مستحيلة؟ تمام. طيب نيجى بأه للى بيقولو من النهاردة مش هنسمح لحد يقدم الا لما يبقى معاه Job Offer... اعرض نفسك و مؤهلاتك يا حلو و لما يبقى صاحب عمل يقبلك و يعرض عليك انك تشتغل يبقى تقدم زى الشاطر و احنا هنخلص ورقك ف 6 شهور بس!!! الرد الطبيعى هو (حمرا)! واضح طبعاً ان الناس دى يا اما (آسف على التعبير) عايشة ف مية البطيخ و مش عارفة اللى بيجرا للمهاجرين على ما يعرفو يلاقو شغل زى اللى سابوه. و اللى هما قبلوهم على اساسه بالمناسبة يا اما هما عارفين كويس قوى و بالطريقة اللطيفة دى بيقفل الباب قدام كل الفئات اللى كانت بتعانى لحد ما اوضاعها تستقر... و طبعا كلنا عارفين ان الغالبية العظمى من المهاجرين العرب و الشرق اوسطيين و الآسيويين و كل من هو ليس غربى المنشأ (مش اوروبى او امريكى يعنى) بينتموا للفئة دى فكدا بقا الوضع ان اللى من الناس اللى اتقفلت قدامهم السكة مش هيفتحها له غير حد من مواطنيه جوا البلد يرضى يديله جوب اوفر... و طبعا دا باستثناء العرب لأن زى ما كلنا عارفين نسبة مش قليلة من العرب اللى فى البلد و اوضاعهم مستقرة مش هيرضى يساعد حد عربى زيه. بدليل انهم كتير بيدوا اصواتهم فى الانتخابات للمحافظين علشان يقفلوا الباب قدام المهاجرين اللى زيهم (اسألوا الكنج هوبا ف الموضوع دا) يبقى الحل التالت اللى قدام الناس ايه؟ انا تحاول تجيب جوب اوفر بأى شكل و لأى شغلانة... يعنى بدل ما كنت بتروح البلد و بعدين تيجى تدور على شغل تاخد رد من اتنين: يا اما Overqualified يا اما No Canadian Experience فتضطر تشيل من مؤهلاتك و تخبى اى ماجستير او دكتوراه معاك من الريزومى و تنسى انك كنت دكتور استشارى و رئيس قسم او مهندس سينيور او سكشن هيد او لييد ديزاينر و تبدأ تدور على كاشير او سيكيوريتى او ريسبشنست علشان تعرف تعيش لحد ما تقدر تعادل او تدرس و بعدين تشوف شغلانه ف مجالك بس من مرحلة اقل بكتييير ... Entry level يعنى و تستحملها على ما تاخد الرخصة و بعد كل دا (4 او 5 سنين فى المتوسط) تبدأ حياتك تظبط و تقدر تدور على شغل يماثل اللى انت سبته. بدل ما كنت بتعمل الفيلم دا و مسلسل التنازلات دى واحد ورا التانى و انت جوا البلد، هتضطر تعمله و انت لسا ما قدمتش! و تعرض مؤهلاتك و تطلب Entry level و انت رئيس قسم او اقل كمان و تنزل بمستوى طموحك درجة ورا التانية لحد ما حد يرضى بيك و يديك اوفر! دا لو حصل طبعاَ دى القصة زى ما انا شايفها و متوقعها بالتفصيل... عارف انها سوداوية اوى... بس انا دايما و بطبيعة شغلى متعود احسب حساب ال Worst Case Scenario يمكن اكون مبالغ.... بس الواقع ان فيه حاجات اسوأ كمان انا ما قلتهاش لسا و يا ريت تردوا عليا و نتناقش لو فيه اضافة او تعليق على كلامى و يا رب اطلع غلطان! تحياتى
