أول مشاركة هاتكلم فيها عن رحلة كفاحي المتواضعة في مشوار الهجرة.. وهاقتبس أجزاء من مشاركات سابقة كنت كتبتها هنا في المنتدى قبل كده..
بدأت التفكير الجدي في الهجرة في 2012 وكانت معلوماتي عن الهجرة ساعتها صفر بمعنى الكلمة.. ناس معارف أدوني موقع محامي مشهور في
كندا متخصص في مجال الهجرة (ديفيد كوهين وموقعه
كندا فيزا) دخلت على الموقع وبعت لهم ردوا عليا قالولي اني ممكن أهاجر (التقييم المبدأي المجاني) وبدأت معاهم المشوار.. ساعتها كانت الهجرة الفيدرالية قافلة والمتاح فقط هي
كيبيك .. هم قالولي كده وأنا وافقت .. كيبيبك
كيبيك إحنا يهمنا.. جهلي بأمور الهجرة كان لدرجة اني ماعرفش إيه
كيبيك دي وانها المقاطعة الفرنسية الوحيدة في
كندا.. وده اللي اكتشفته بعد كده لما ابتدوا يطلبوا مني الطلبات عشان يعملوا لي الملف.. طالبين شهادة فرنساوي ليا ولزوجتي.. طيب والانجليزي؟ لأ ليك انت بس ومش عاوزين اكتر من 6 في الأيلتس.. انما الفرنساوي كل ما تزود يبقى أحسن .. قلت مش مشكلة .. نمتحن فرنساوي.. سألت على الامتحانات الموجودة والمتاحة وعرفت ان الامتحان الأشهر والمتاح في مدينتي -الاسكندرية- هو TCF .. وعرفت ان المركز الفرنسي بيعمل كورسات تحضير قبل الامتحان.. قلت تمام.. حجزنا الكورس والامتحان.. ورحنا أول حصة في الكورس.. وكانت الصدمة الشنيعة.. احنا كنا دارسين فرنساوي في المدرسة كلغة تانية وكنا متصورين ان عندنا مبادئ اللغة اللي هتخلينا نقدر نمشي في الكورس.. اكتشفنا ان مستوانا في الفرنساوي ميييييح .. وان الكورس محتاج ناس على مستوى جيد من اللغة ومحتاجة بس تحضير للامتحان وبالتالي أدركنا اننا مستحيل نكمل في الكورس ومستحيل أكتر ندخل الامتحان اللي كان باقي عليه شهر ونص تقريبا.. دورنا وبحثنا لحد ما لقينا مدرسة private أخدنا معاها كورس مكثف لمدة 3 شهور تقريبا.. وأجلنا الامتحان شهر ونص كمان ودخلنا الامتحان.. ربنا وفقنا توفيق غير عادي وجبت سكور أكتر من اللي كنت متوقعه والمدام كمان جابت سكور كويس .. نسيت أقول اني كنت بدأت بالانجليزي قبل الفرنساوي (قلت أخلص من المضون الأول) وامتحنت الأيلتس وجبت الحمد لله سكور كويس يضمن لي الحد الأقصى من الدرجات الممكنة للانجليزي.. كملنا ورقنا.. بعتنا الملف في شهر مايو 2013 .. في الوقت ده كان الفيدرال فتح .. كنت متردد ساعتها طب أكمل في
كيبيك وابعت الفايل ولا أحول على الفيدرال.. الFeedback اللي كان عندي في الوقت ده (من كذا حد) ان
كيبيك أضمن..
كيبيك أسرع .. الفيدرال كان طالب 300 شخص بس في كل وظيفة (وظيفتي كانت منهم بس كنت شاكك اني هالحق ابقى ضمن ال300.. وكنت محتاج أعيد الأيلتس لأني كنت دخلت أكاديميك وهم عاوزين جينرال) قلت خلاص ما بدهاش خلينا في
كيبيك.. وتوالت المفاجآت أو الصدمات بمعنى أصح.. في الوقت ده كنت ابتديت اتعرف على
المطاريد وأقرأ فيه.. عرفت ان زمن المعالجة في
كيبيك بقى بالتلات وأربع سنين ..
كيبيك في الوقت ده كانت تحت حكم بارتي
كيبيكواه Parti Quebecois الحزب العنصري اللي بيبالغ في الاعتزاز بالهوية الفرنسية ل
كيبيك وبيطالب بالانفصال عن
كندا واللي سياساته تجاه الهجرة سياسات سلبية انعكست على طول مدة معالجة الملفات والتعنت في المقابلات ورفض الكثيرين، ثم بإصدار تعديلات على قواعد الهجرة صعبت من شروط التقديم بسبب زيادة الاسكور المطلوب للفرنساوي وبالمناسبة التعديلات دي طلعت بعد ما قدمت بشهور وقللت نقاطي وان كانت فضلت معدية الحد الأدني المطلوب.. المهم انتظرت كثيرا وكثيرا.. ولا جديد يحدث في الملف.. في ابريل 2014 الحزب اياه عمل انتخابات مبكرة في
كيبيك بهدف الحصول على أغلبية مريحة تمكنهم من تمرير القوانين المنيلة بنيلة اللي كانوا ناويين عليها (هم كانوا مشكلين حكومة أقلية) بس أداروا الحملة الانتخابية بغباء وكسب الليبراليين الانتخابات وشكلوا حكومة.. اتوقعنا الدنيا تمشي بقى بس طبعا حتى لو توجهات الليبراليين أحسن فيما يخص الهجرة فالموضوع محتاج وقت عشان يبتدي يبان أثره خاصة مع تراكم طلبات الهجرة عندهم..
في مايو 2014 الفيدرال فتح تاني.. وبشروط أحسن .. المرة دي طالبين 1000 في كل وظيفة.. ووظيفتي موجودة برضه..
كيبيك ماشية بسرعة السلحفاة .. الناس اللي مقدمة في 2011 لسه ماردوش عليها.. اترددت كتير في التقديم عشان مقدم في
كيبيك.. بعت للزفت المحامي اللي لاهف مني فلوس أد كده.. خوفني.. قال لي الملفين ممكن يترفضوا لو عرفوا انك مقدم هنا وهنا.. ده غير انك لو قدمت فيدرال هناخد منك أتعاب تانية.. فضلت كام شهر متردد لحد ما قررت في أغسطس (بعد الاستخارة واستشارة بعض أعضاء المنتدى الله يبارك لهم) اني هاقدم بنفسي من غير محامي.. فصصت مواضيع الفيدرال اللي على
المطاريد لدرجة إني بقيت خبير فيها في خلال شهرين (بعد مابقيت خبير في
كيبيك في نفس ذات الوقت).. دخلت أيلتس تاني .. وقيمت الشهادات.. وظبطت الأوراق المطلوبة.. وقدمت على فيزا كريدت عشان أدفع بيها.. كنت مستني نتيجة الأيلتس وكارت الفيزا.. النتيجة طلعت والكارت لسه.. وخايف الوقت يعدي والكاب يتملى خاصة ان وظيفتي من الHot NOC's (مهندس ميكانيكا).. فكرت أعمل شيك.. لقيت اني محتاج أجمع دولارات كندي من السوق وهي أصلا مش متوفرة بسهولة.. وأروح البنك عشان أعمل الشيك.. استتقلت السكة دي.. واستعنت بصديق.. عنده كريدت كارد من زمان واستعملته أكتر من مرة في شرا حاجات من ع النت.. وأكد لي ان الكارت ده قوي جدا وعمره ما اترفض في أي معاملة جوا مصر ولا بره مصر.. قدمت وفضلت منتظر.. منتظر.. منتظر.. مافيش حاجة.. الناس اللي قدمت معايا وبعدي فلوسها اتسحبت وبعتولها.. المهم عرفت ان المعاملة اترفضت (بتاعة سحب الفلوس من الكارت) وبالتالي الملف اترفض.. السبب؟ السبب ان البنك حاطط ليميت للسحب اليومي والمبلغ اللي كان مفروض يتسحب كان أكتر من الليميت وصديقي صاحب الكارت مايعرفش القصة دي .. ده غير انهم لما المعاملة اترفضت مابلغوناش رغم ان صديقي كان بيأكد لي انهم كانوا بيتصلوا بيه لو حصل حاجة زي كده بس للأسف الواضح ان كل حاجة في البلد بتتدهور مع العلم ان محاولة سحب الفلوس اتكررت 3 مرات ومع العلم ان البنك ده بنك أجنبي شهير جدا وسمعته كويسة.. المهم كان الكلام ده قبل نهاية السنة (2015) بأيام وده كان معاد بداية العمل بالنظام الجديد.. الاكسبريس انتري..
قلت قدر الله وماشاء فعل أنا هاقدم في النظام الجديد وربنا يسهل.. أنا أصلا كنت فاتح موضوع عن الاكسبريس انتري من أكتوبر 2014 وكنت مذاكره كويسعشان كده ماكانش غريب اني أفتح الأكونت في الساعات الأولى من فتح النظام الجديد .. وقد كان فتحت الأكونت ودخلت الPool بس كنت حاسس ان سكوري ضعيف (ساعتها كان أقل من 320 وماكانش لسه فيه سحوبات اتعملت فمش عارف أنا كده كويس ولا لأ).. المهم عدت الأيلتس تاني.. وتالت بعدها بكام شهر.. حسنت درجاتي شوية بس للأسف ما وصلتش للمستوى اللي كنت عاوز أوصل له CLB9 .. كان عندي دبلومة درسات عليا ما كنتش عامل لها تقييم وقدمت من غيرها في الفيدرال القديم عشان ما كانتش هتفرق معايا فقمت باعت مقيمها.. وقيمت شهادات زوجتي.. غير انها بدأت تاخد كورس أيلتس هي كمان وتستعد للامتحان .. سكورنا بعد كل ده وصل 377 وفي عيد ميلادي في ابريل نزل 5 نقاط بقى 372 .. سحوبات الاكسبريس انتري تتوالى وتتوالى معها الصدمات.. الاسكور لسه بعيييييد جدا.. مافيش قدامي غير اني أعيد الأيلتس (لخامس مرة) والمدام تدخل الأيلتس .. كان ممكن نوصل ل 430 أو أكتر شوية.. كنا هنبقى لسه مستنيين لحد دلوقتي .. أو الحل التاني في الwild cards.. ترشيح مقاطعة أو عرض عمل.. عرض العمل سكة تقريبا شبه مستحيلة يبقى الحل الوحيد هو ترشيح المقاطعة..
نرجع لورا تاني وتحديدا لبداية السنة (2015).. في الوقت اللي كنت عرفت ان ملفي راجع وباستعد للتقديم في الاكسبريس.. في الوقت ده شفت موضوع على
المطاريد بيتكلم عن نوفاسكوشا بدون عقد عمل.. برنامج هجرة جديد مربوط بالاكسبريس انتري.. دخلت على الموقع .. شفت الشروط.. نفس الشروط بتاعة الفيدرال اللي انا كنت مستوفيها.. تمام.. لستة الوظايف: وظيفتي مطلوبة.. قشطة.. المصاريف:مفيش.. زي الفل.. حتى المستندات كانوا طالبين صور بس مش أصول (كان ساعتها الملف بتاع الفيدرال اللي فيه كل الأصول لسه مارجعش بس كنت محتفظ بنسخة كاملة منه) جمعت الأوراق تاني ومليت الفورم بتاعتهم (كانت أبليكيشن رخمة 25 صفحة قعدت فيها كذا يوم متواصلين عشان أملاها وكانت سبب في اني كنت متردد أبعت) وقمت باعت الملف.. ملفي وصل 19 يناير.. ما كنتش معول كتير على البرنامج ده خاصة ان العدد الإجمالي لي صغير جدا (تقريبا 350 واحد).. كنت متصور انه هيتملي في 3 أيام زي بعض البرامج التانية.. وكان عندي أمل ساعتها في الاكسبريس انتري اني هتاخد من أول سحبة بقى
ومش هابقى متقيد بمقاطعة وبتاع.. ما كنتش مهتم أوي وأنا باملا الفورم وباجهز الملف وكنت هاطنشه أصلا بس قلت يا واد مش هتخسر حاجة.. المهم سبحان الله الملف ده كان هو السبب والسكة اللي بسببها اتجدد الأمل في الهجرة.. في شهر أبريل بعتولي ما يسمى AOR يعني افادة بأنهم استلموا الملف وابتدوا يدرسوه.. وطلبوا شوية حاجات بعتهالهم في خلال أيام.. في نهاية يونيه بعتولي الnomination على الايميل وعلى السيستم .. بمجرد قبولها على السيستم اترفع سكوري بمقدار 600 نقطة.. وبالتالي في السحب التالي في 10 يوليو جاتلي Invitation to Apply .. طبعا قدمت وبدأت استكمل المستندات وأرفعها على السيستم لحد ما قدمت الأبليكيشن في أواخر يوليو
في نفس الوقت ده وتحديدا في أغسطس جالي ما يسمى Intention to refuse أو ما يطلق عليه هنا في المنتدى طلب الأبديت من
كيبيك.. برضه اترددت ابعت لهم ولا أطنشهم.. بس قررت أبعت لهم خاصة ان ملف الاكسبريس انتري لسه ما وصلش لنهايته وممكن يطلع لي فيه أي خازوق كالعادة استنيت لحد آخر وقت وبعت الأوراق المطلوبة (كانوا عاوزين دوابات خبرة جديدة ووورق تأمينات جديد) ووصلت قبل نهاية المهلة بأيام .. بتوع مكتب المحامي كوهين قالولي ان ورق التأمينات مش زي ما هم طالبين وممكن يرفضوا الملف بسبب كده.. قلت خلاص بقى زي ما تيجي تيجي
من يوليو لحد ديسمبر فضلت عايش في قلق لاحسن يحصل أي مشكلة في الملف وفضلت متابع الأبليكيشن على السيستم يوم بيوم.. طلبوا أكتر من أبديت كنت باعمل الأبديت المطلوب في ظرف يوم أو يومين وأرجع استني ان الحالة تتغير.. الحالة فضلت معلقة فترة طويييلة جدا على مرحلة الBackground Check اللي هي مرحلة مراجعة المستندات المقدمة قبل اتخاذ القرار.. لحد ما في يوم سعيد في بداية ديسمبر 2015 جالي إيميل طلب الباسبورات.. وبعدها بحوالي أسبوعين كان معايا الباسبورات وفيها الفيزا
مش عاوز أقول لكو خلال الفترة دي كلها اللي تعدت التلات سنين مريت بأوقات توتر وترقب وانتظار وقلق أد إيه.... ومش عاوز أقول لكم برضه تعبت أد إيه سواء في مذاكرة لغات وتجهيز أوراق وخلافه.. ومش عاوز أقول لكو صرفت فلوس أد إيه بعضها للأسف راح ع الفاضي.. بس اللي أقدر أقوله الحمد لله على كل شئ وقدر الله وما شاء فعل.. ما حدش بيتعلم ببلاش وما حدش عارف الخير فين ولا هييجي امتى ولا من أنهي سكة..
تكملة القصة بقى إني بعد ما وصلت ل
كندا بشهر تقريبا وتحديدا في مارس 2016 قررت أبعت لمحامي الهجرة أطلب منه انه يسحب ملف
كيبيك بما إني خلاص في
كندا تجنبا لأي مشاكل.. بعد أيام رد عليا بأن إدارة الهجرة ال
كيبيكية وافقت على ملفى وتم إصدار الCSQ لي ولأسرتي بدون انترفيو (بعد حوالي سنتين و10 شهور من استلام الملف) يعني من حقي الاقامة في
كيبيك والتمتع بكل المزايا اللي بتديها للمهاجرين
النهارده وأنا بافتكر الأيام دي باقول يااااااه يا عبد الصمد .. كانت رحلة طويلة وشاقة بس الحمد لله تستاهل.. انا مش باحكي القصة دي على سبيل التفاخر ولكن على سبيل التحفيز وعلى فكرة فيه ناس عافرت وتعبت أكتر مني 100 مرة. فالخلاصة: إذا أردت شيئا بقوة فاعمل واجتهد وحتما ستصل إلى هدفك في يوم من الأيام طبعا بعد إرادة الله وتوفيقه
انتهت حلقة النهارده وان شاء الله هاحاول امشي بمعدل مشاركة واحدة يوميا (يا رب أقدر أواصل على كده) واحتمال في يوم ياخدني الحماس واكتب مشاركتين تلاتة.. في الحلقة الجاية هاتكلم عن الأسباب اللي خلتني أفكر في الهجرة وأمشي في السكة
