هذا التوبيك محاولة بسيطة لرد الجميل لهذا المنتدي الرائع ومحاولة ربما تفيد القادمين الجدد
وفي البداية ..... اشكر الله الذي اعاننا علي اتمام مشوار الهجرة علي خير وبداية مشوار اخر جديد جوه كندا ولا انسي ان اشكر كل اعضاء المنتدي الاعزاء وعلي رأسهم د/ قناوي واستاذ اكسيلانس والمهندس زناتي
وكل من تفضل وساعدنا ولو بمعلومة صغيرة في هذا المشوار
الرب قادر ان يعوضكم تعب محبتكم ويكلل خطواتكم بالنجاح
قدمنا الملف 5/5/2010 ووصلت الفيزا بحمدالله 18/5/2012
اي بعد سنتين واسبوعين وتم عمل اللاندنج يوم 28/7/2012 في مسيساجا
واحب احكي لكم بالتفصيل علشان انا عارفة ان كتير بنبقي عايزين نعرف التفاصيل الصغيرة بس يا رب ماتزهقوش
نبتدي الحكاية .... حجزنا طيران علي توماس كوك رحلة اير كندا علي مصر للطيران وترانزيت في لندن لمدة 4 ساعات ونصف ثم اكملنا اير كندا حتي مطار بيرسون بتورنتو في 8 ساعات وبالمناسبة مش محتاجين فيزا للندن ولا حاجة
كل واحد فينا انا وزوجي وابنتي كان ليه شنطة واحدة 23 كيلووشنطة واحدة هاندباج 7 كيلو وكنا واخدين معانا شنطة زيادة قلنا ندفع عليها 60 دولار اول ما دخلنا مطار القاهرة فوجئنا بمشكلة صغيرة لكن لم تخطر علي بالنا وهي ان حجم شنطتين من الهاند باج اكبر من الحجم المسموح بالهاند باج اي اصبحوا يعتبروا شنطتين زيادة بالاضافة للشنطة الزيادة اللي كنا واخدنها معانا اي اصبح معنا 3 شنط زيادة فطبعا علي الريق رحنا دافعين 1770 جنيه علي الشنط الزيادة وعلشان كده
ملحوظة هامة : وانتم بتشتروا الهاندباج تشتروا مقاس رقم واحد مش مقاس رقم اتنين
بعد كده عدينا ودخلنا الطيارة وهي طيارة حلوة والخدمة فيها كويسة اخدنا 5 ساعات من القاهرة حتي لندن من 9.30 الصبح وحتي 2.30 ظهرا وقدموا لنا وجبة واحدة الساعة 12.30 ظهرا
في مطار هيثرو بلندن زي ما قلنا مش محتاجين فيزا ولما عدينا طلبوا مننا كل السوائل اللي في شنطة اليد والهاند باج فكان معانا عصاير وميه وهي بتظهر علي الجهاز فاخدوها وقالولنا لو حبيتوا تشربوها هنا قدامنا بس احنا سيبناها
قعدنا بعد كده ترانزيت 4 ساعات ونصف ويا ريت تكونوا واخدين معاكم سندوتشات او كيك اوشيكولاته او بسكويت
لغيت ما ظهر رقم الجيت علي الشاشة قبل ميعاد الطيارة بساعة فرحنا ودخلنا الطيارة لمدة 8 ساعات
الخدمة حلوة وقدموا لنا وجبة بعد الاقلاع بساعة ثم سناكس قبل ما ننزل بساعة وطبعا في مشروبات علي الطيارة للي يحب وكمان في افلام عربي واجنبي وكرتون علشان ما تحسوش بالوقت
وزعوا علينا ورقة تملاها وتسلمها في المطار لما تنزل انا صورتها بس معرفتش انزلها مكتوب فيها بياناتكم والجنسية وعنوانكم في مصر او المكان اللي جايين منه مش المكان اللي انتم رايحين فيه
بعد كده في حوالي 6 اسئلة تجاوب عليهم نعم او لا الاسئلة دي بقي هي
هل معاكم 10.000 دولار او اكتر
هل معاكم اي منتجات البان او لحوم
هل زرتم مزرعة قبل كده وناوييين تزوروا مزارع في كندا هل معاكم اي نوع من البضائع
احنا جاوبنا كله لأ ما عدا سؤال الفلوس قلنا نعم
احنا كان معانا حوالي 14 الف دولار بس لما سألونا في المطار قلنا 10 بس
المهم نزلنا مطار بيرسون بتورنتو وكانت 9 مساءا بتوقيتهم لكن كانت الدنيا نهار فاستغربنا جدا لكن اكتشفنا ان الليل هنا من 9.20 او 9.30 م
اجراءات اللاندنج لم تأخذ سوي 10 دقائق مفيش ولا شنطة اتفتحت
قلنا لهم احنا فيزا هجرة فوصفوا لنا الباب المخصص علشان ماتقفوش في صف غلط الناس هنا كلها لطيفة ومهذبة وبشوشة شاوروا لنا علي مكتب دخلنا فيه والضابط طلب منا ورق اللاندنج واتاكدنا منه ان الصور سليمة ختمه لنا واخد الورقة اللي فيها الصورة واعطانا الورقة اللي مفيهاش صورة وطبعا تبقوا حافظين العنوان اللي انتم نازلين عليه علشان هيبعتوا عليه البي ار وقالنا هتستلموا بعد حوالي شهر ونصف ولما سالناه علي ليسته العفش قالنا بعد ما تنزلوا من السلالم وتستلموا الشنط تسلموا ورقة العفش علشان تتختم
وانا كنت عارفة من المنتدي ان في شنطة اوراق تخص النيوكمرز سالناه عليها فقالنا ان المسئول مشي فقام بنفسه واعطانا ورق وكتيبات هامة للمهاجرين الجدد
بعد كده نزلنا علشان ناخد شنطنا ويا ريت يكون معاكم دولارات فكة لان عربية نقل الشنط ب 2 دولار واحنا احتجنا شنطتين ب 4 دولار وماكانش معانا فكة ففكينا من هناك رغم اني كنت قريت المعلومة دي علي المنتدي بس لم اهتم لاني لم اكن اعرف ان زوجي مش معاه دولارات فكة علشان كده احب اقولكم محدش يستهين باي معلومة حتي لو بدت صغيرة لانها قد تفيد احد
اخدنا الشنط ورحنا للمسئول علي ليسته العفش واحنا كان معانا ليسته تحفة بعتها لينا اقارب لنا في كندا فيها كل مايخطر علي بالكم حاولت انزلها بس مش عارفة هي 3 ورقات وبتنزل ورقة ورقة حاولت اضغطها بس قاللي خطأ في التحميل بس انا هحاول مرة تانية
فبعد ما شافها الضابط قالنا ليه مش كاتبين الرقم الاجمالي لازم تكتبوه قعد زوجي يحسب علي الموبايل 3 صفحات
وهو بيحسب الضابط اخد ورقة منهم وبص علي الاسعار وسمعته بيكلم واحدة زميلته عراقية
قالها هي الاسعار دي طبيعية قالت له علي حسب هل معاهم قلوس يقدروا يشتروه او لأ
البنت سألتنا بالعربي انتم رحتم اي مكان تاني غير مصر قلنا لها لأ قالت لنا يبقي انتم اكيد اغنياء علشان يكون عندكم كل الحاجات دي فقلنا لها لأ الحاجات دي في مصر غالية ضحكوا وقالولنا يبقوا انتم كده ممكن تبقوا هنا مليونيرات رغم انها كانت عاملة اجمالي 22 الف دولار وطبعا نصها حاجات مش عندنا بس كتبناها زي ما هي المهم طلب منا نروح نختمها
وولكم تو كندا ........وخرجنا من المطار وعدت علي خير الحمدلله ......هي ليسته ممكن يكون مبالغ فيها لكن هحاول احطها وكل واحد يغير فيها زي ما هو عايز وللحديث بقية