مدارس جدة العالمية

[فالحة هانم]

لو حد يعرف اسماء مدارس انترناشيونال في جدة مع شوية معلومات عنها ... ياريت يكتبها هنا

وبقدر الإمكان تكون معلومات عن مكان المدرسة ، في انهي حي ، ومستواها التعليمي هل كويس ولا لآ ، جنسيات المدرسين ؟؟؟..

وقيمة المصاريف والباصات .. لأن دي برضة حيكون عليها عامل كبير في تحديد المدرسة

ويوضح مثلا هل فيها Pre – KG ، وهل بياخدوا في ال KG قرآن واحاديث.. ولا مفيش

بأسمع ان فيه مدارس ممتازة ومدارس نص نص ومدارس ميفضلش الإلتحاق بها .. وكل ده بيعتمد على خبرات الناس مع المدارس

لأن الواحد مش بيكتفي بالإعلانات اللي بتعملها المدارس ..لكن يحاول يعرف ايه الأفضل من جميع النواحي..

وإن شاء الله المداخلات تفيد الأعضاء والزوار كمان ...

وشكرا لتعاونكم مقدماً

 

[diab]

مودست ... كلم

 

 

[فالحة هانم]

يااااه هي الحكاية صعبة كده



طيب إن امكن اسهلها شوية




سمعت ان فيه مدرسة اسمها مدرسة دار جنى العالمية في حي الروضة .. بيقولوا مدرسينها لبنانيات او سوريات مش فاكرة

بس غالية الـ pre-KG تقريبا بـ 13000 ريال ده غير مصاريف الباص

بس هل هي مدرسة ممتازة ولا بس كويسة ولا ايه نظامها


وسمعت عن مدرسة اسمها مدرسة الهداية العالمية بيقولوا هي قريبة من القنصلية المصرية في جدة بس معرفش مستواها إيه ومسمعتش عنها حاجة ولا عن مصاريفها

وفيه مدرسة شفت الباص بتاعها في النواحي عندينا اسمها مدرسة الرواد العالمية في حي الأندلس شارع إبراهيم الجفالي

حد يعرف يدينا معلومات عن دول طيب !!!!

او غيرهم .. وشكرا

 

 

[فالحة هانم]

اقتباس المشاركة الأصلية كتبت بواسطة diab مودست ... كلم

شكل الخط مشغول يا diab

 

 

[Modest]

اقتباس المشاركة الأصلية كتبت بواسطة فالحة هانم شكل الخط مشغول يا diab

ياااااادي الكسوف .. يااااادي الكسوف
إطلع منها يا دياب يا فاعل خير انت .. فالحة هانم طيبة و هاتسامحني على التأخير

بصي يا ستي
خبرتي مع المدارس الإنترناشيونال نتحصر في مدرستين .. ثامر و جلوبال.
في الأول الاولاد كانوا في ثامر لقربها من البيت و لأنها كانت الأشهر أيامها و كانت هايلة في مرحلة الكي جي .. كانوا بيعتمدوا على إن المدرسات أمريكان كعامل جذب (نصب يعني) لكن بصراحة كانت نشاطات المدرسة متعددة و كنت ملاحظ تطوّر في طريقة تفكيرهم و استيعابهم عن ابناء بعض أصدقائنا في مدارس أخرى... الآن اعتقد أن مدرسات هذه المرحلة أصبحن معظمهن لبنانيات في ثامر و غيرها من المدارس التي تكون إدارتها لبنانية.
و لما إبني الكبير بدأ يدخل في مرحلة الأي جي سمعنا إن جلوبال مكسرة الدنيا و رحنا شوفنا النتائج و انبهرنا فعلاً بها و كانت النتيجة التحويل إلى جلوبال.
بعدها عرفنا إنها كانت مقلب زي كل المدارس هنا و إن نتيجة الأي جي الرائعة دي معتمدة على الدروس الخصوصية من مدرسين من خارج المدرسة.
في أي مدرسة من دول سواء ثامر أو جلوبال أو أي مدرسة أخرى لابد من بذل جهد في البيت .. المدارس كأي شيء هنا تعتمد على الربحية في الاساس و تأتي العملية التعليمية ثانياً.
بالنسبة لدار جنى باسمع عنها كل خير خصوصاً في المرحلة الثانوية و بافكر أنقل إليها لكن هاتأكد الأول علشان ماشربش مقلب زي اللي شربته لما نقلتهم من ثامر لجلوبال.
صدعتك يا فالحة هانم .. زمانك بتقولي أنا جاية اسأل على الـ Pre-KG و البنوتة تلعب و تتبسط يقوم الجدع ده مدخلني في IG و دروس خصوصية و مشاكل و انا مش ناقصة

لو عايزة رأيي بقى بالنسبة للـ Pre-KG .. كل الإنترناشيونال يتساوى و الأفضل إن البنوتة تكون في مدرسة جنب البيت.. اكتشفت إن المدارس دي فعلاً بتهتم بهذه المرحلة كنوع من إبهار الأباء علشان يجرّوا رجليهم للمدرسة و بعدين يبقوا يبهدلوهم على راحتهم في المراحل التالية مادام خلاص سجلوا في المدرسة و صعب نوعاً ما و وجع دماغ النقل بين مدرسة و أخرى.

بالنسبة للمصاريف هاسأل لحضرتك عن الـ Pre-KG و إن كنت متأكد إنها في جلوبال أرخص من دار جنى و لكنها لن تقل بأي حال عن 9 آلاف إن لم تكن قد زادت

لو بنوتك الجميلة راحت جلوبال هاخلي كريم ابني يذاكر لها .. الولد في Grade 2 دلوقتي يعني ينفع يدرّس KG

 

 

[بندق]

فيه الوادى دى ممتازة بس تقيلة أوى فى التعليم ..

التكلفة بين 6 الى 15 الف فى السنة حسب المرحلة التعليمية .. الباص مش عارف كم ..

دى قريبة من عزيز مول فى حى الصفا ولا اسمه ايه الحى مش فاكر ..

البواب صاحبى لو عاوزة اخدمة منه ما عنديش مشكلة

صحيح لو تلميذين اخوان/أخوات فى المدرسة بيعطو خصم 15%

لو جتلك فرصة تشتغلى فى المدرسة (وده ممكن) هتاخدى 50% خصم على كل حاجة

 

 

[فالحة هانم]

لا يا عم موديست مفيش تأخير ولا حاجة ... ده انت كتر خيرك انك رديت بالتفاصيل الجامدة دي

اقتباس زمانك بتقولي أنا جاية اسأل على الـ Pre-KG و البنوتة تلعب و تتبسط يقوم الجدع ده مدخلني في IG و دروس خصوصية و مشاكل و انا مش ناقصة اكتشفت إن المدارس دي فعلاً بتهتم بهذه المرحلة كنوع من إبهار الأباء علشان يجرّوا رجليهم للمدرسة و بعدين يبقوا يبهدلوهم على راحتهم في المراحل التالية مادام خلاص سجلوا في المدرسة و صعب نوعاً ما و وجع دماغ النقل بين مدرسة و أخرى.

شكلي حأعلم البنت لغاية مرحلة الـ Pre-KG بس مفيش اكتر من كده ... علشان تكون اتعلمت في المراحل اللي بيهتموا بيها بس

اقتباس بالنسبة للمصاريف هاسأل لحضرتك عن الـ Pre-KG و إن كنت متأكد إنها في جلوبال أرخص من دار جنى و لكنها لن تقل بأي حال عن 9 آلاف إن لم تكن قد زادت

شكرا والله كتر خيرك ... وابقى جيب معاهم السعر من الآخـــر ... ..وقولهم مش عايزين كتر مناهدة .. فالحة لسة جديدة في جدة

اقتباس لو بنوتك الجميلة راحت جلوبال هاخلي كريم ابني يذاكر لها .. الولد في Grade 2 دلوقتي يعني ينفع يدرّس KG

ما شاء الله ربنا يبارك لك فيه .. خلاص ضمنا كده الدروس الخصوصية اللي ببلاش وتطلع سمسمة من الاوائل إن شاء الله

اقتباس الأفضل إن البنوتة تكون في مدرسة جنب البيت.

بيقولوا ثامر اتنقلت لشارع قريش السنة دي .. بس لسة معرفتش مصاريفها .. ربنا يسهل


وشكرا لمراسل مدارس الانترناشيونال والانترباناسونيك والانترسوني


.

 

 

[فالحة هانم]

اقتباس المشاركة الأصلية كتبت بواسطة بندق فيه الوادى دى ممتازة بس تقيلة أوى فى التعليم .. التكلفة بين 6 الى 15 الف فى السنة حسب المرحلة التعليمية .. الباص مش عارف كم .. دى قريبة من عزيز مول فى حى الصفا ولا اسمه ايه الحى مش فاكر .. البواب صاحبى لو عاوزة اخدمة منه ما عنديش مشكلة صحيح لو تلميذين اخوان/أخوات فى المدرسة بيعطو خصم 15%

عم بندق

انا سمعت بالفعل عن اسم المدرسة دي والمنهج بتاعها بريطاني ... بس لقيتها في حي الصفا يعني بعيييدة عن البيت

اقتباس لو جتلك فرصة تشتغلى فى المدرسة (وده ممكن) هتاخدى 50% خصم على كل حاجة

بجـد ... لو اشتغلت هناك يكون فيه خصم 50% على المصاريف وعلى كل حاجة


طب إذا كان كده بأة يا عم بندق خلي سعادة الأستاذ البواب يتوسط لي هناك ويشغلوني عندهم وساعتها مش حتكون بعيدة ولا حاجة

ولو الكلام ده ينطبق على كل المدارس العالمية .. يبقى همتكوا معانا يا مطاريد في ايجاد شغل للمطرودة زميلتكم في أي مدرسة انترناشيونال ..

وانا حأشوفكو بشوية حلاوة المولد

وشكرا لمداخلتك الكريمة

.

 

 

[بندق]

اقتباس المشاركة الأصلية كتبت بواسطة فالحة هانم عم بندق انا سمعت بالفعل عن اسم المدرسة دي والمنهج بتاعها بريطاني ... بس لقيتها في حي الصفا يعني بعيييدة عن البيت بجـد ... لو اشتغلت هناك يكون فيه خصم 50% على المصاريف وعلى كل حاجة طب إذا كان كده بأة يا عم بندق خلي سعادة الأستاذ البواب يتوسط لي هناك ويشغلوني عندهم وساعتها مش حتكون بعيدة ولا حاجة ولو الكلام ده ينطبق على كل المدارس العالمية .. يبقى همتكوا معانا يا مطاريد في ايجاد شغل للمطرودة زميلتكم في أي مدرسة انترناشيونال .. وانا حأشوفكو بشوية حلاوة المولد وشكرا لمداخلتك الكريمة .

بسيطة خالص انتى بس جهزى سى فى نزحلقها للبواب يعمل عليكى ريكومنديشن) وتتحطى فى المستهدفين للعام القادم .. طبعا هو أى حد شغال فيها بيبلط مش مفيش بقى الا هترجع شغلها فى مصر ولا لبنان ولا أى حتة قوم ايه المكان يفضى .. طبعا لو مهنتك التدريس هيكون كويس .. هى أصحابها مصريين على فكرة .. بنت عدلى لملوم باشا ..

 

 

[فالحة هانم]

اقتباس المشاركة الأصلية كتبت بواسطة بندق بسيطة خالص انتى بس جهزى سى فى نزحلقها للبواب يعمل عليكى ريكومنديشن) وتتحطى فى المستهدفين للعام القادم .. طبعا هو أى حد شغال فيها بيبلط مش مفيش بقى الا هترجع شغلها فى مصر ولا لبنان ولا أى حتة قوم ايه المكان يفضى .. طبعا لو مهنتك التدريس هيكون كويس .. هى أصحابها مصريين على فكرة .. بنت عدلى لملوم باشا ..

شكرا لمساعدتك اخي الكريم / بندق

خلاص أشوف الموضوع ده .. بس اخلص اللي ورايا اليومين دول ... وإن شاء الله يكون فيه نصيب فيها

.

والله اول مرة اعرف ان اصحابها مصريين ... برافو عليهم والله ...

وربنا يبارك لنا في سعادة الخديوي البواب باشا ..