تحياتي من مسيساجا

[somayasaleh]

الصحف المصرية والعربية

مساء الخير عليكم جميعا

اعتقد فيه ناس كتير يعرفوني من هنا ومن هناك.... واللي مش عارف نقوله

انا مهندسة طبية.....زوجة طبيب والهجرة باسم الزوج

عندي ولدين وبنوتة.......الكبير في نهائي هندسة

البنوتة في اولي طب اسنان...الصغير في هاي سكول في مدرسة كندية في مصر جريد 10

المعلومات السابقة كان لابد منها....حتي تكون مرجع لاي اسرة في نفس وضعنا تقريبا....يعني الاولاد جامعة وهاي سكول

علشان اللي عنده اي سؤآل بالنسبة للكليات والتقديم وكده....ربنا يسهل وممكن افيده حسب حالاتي اولادي

نبدأ بسم الله.......

قدمنا علي الهجرة في ابريل 2008......الابديت في ديسمبر 2009....المديكال يونيو 2009......الفيزا في اكتوبر 2009......الاندنج في 12 فبراير 2010

طبعا ناس كتير ح تقول ليه اخترنا الشتاء ومش الصيف....طبعا للاسف ماكنش ينفع لان الاولاد ح يكونوا في في امتحانات اخر السنة ....ومش ح اقدر بعد كده علشان الفيزا تخلص في شهر يونيو 2010

اختيار مسيساجا جاء لاكتر من سبب
1- اخويا هناك وعنده بيت ....
2- لنا اقارب كتير ومعارف في مسيساجا
3- البلد هادئة جدا وعائلية جدا جدا....غير تورونتو خالص
4- احنا قررنا الاستقرار فيها باذن الله تعالي...فكان لازم ان الواحد يستكشف البلد اللي ناوي يكمل فيها ان شاء الله

ده بعض الاسباب اللي خلتنا ننزل علي مسيساجا

اولا .....الحجز للسفر

الموضوع ده احنا قتلناه بحث انا وزوجي علي النت....حتي توصلنا للاتي

اكسبيديا ....ارخص من شركات كتير.....ويليها توماس كوك

احنا بعد ما اخترنا موعد السفر......ودخلنا علي اكسبديا وتوماس كوك ....وجدنا ان توماس ارخص....لذلك تم الحجز علي توماس كوك....من علي النت....واخدنا الرفرنس نمبر وذهبنا للشركة فرع المهندسينودفعنا هناك

الطيران كالاتي......

القاهرة......فرانكفورت...علي لوفهانزا

فرانكفورت.....مطار بيرسون.....علي اير كندا

والرجوع كالاتي......

مطار بيرسون....زيوريخ...علي اير كندا

زيوريخ...القاهرة....علي مصر للطيران

التذكرة الواحدة كانت سعرها 4800 بالضرايب وكل حاجة

احنا كنا حاجزين اسبوعين فقط علشان نخلص الاوراق ونرجع الاولاد يكملوا الدراسة ونرجع نستقر علي اخر الصيف القادم......لكن.....قدر الله وما شاء فعل........

ظهرت عندنا مشكلة الصور الخاصة بالبي ار......احنا كنا متاكدين انها مش نافعة......وحاولنا نعمل زي اخونا زناتي ماقال لنا....بس فشلت المحاولة....ولذلك كان لازم نأجل الحجز كمان ثلاثة اسابيع حتي نضمن اننا ناخد الكروت قبل ما نمشي....وربنا يستر....دعواتكم.....

طبعا في حالة تغير الحجز بندفع 100 يورو علي كل تذكرة......

علشان كده بقول لكل اللي جاي يعمل اللاندنج وراجع تاني يتاكد من الصور اولا......ثانيا....يتاكد من موعد السفر والرجوع

الكلام السابق لا يسري علي الناس اللي جاية ون واي ومش راجعة تاني غير اجازات

في المطار بيأخدوا الاوراق الخاصة بالاندنج ويتركوا لك ورقة مكربنة كده......الورقة ده تحافظوا عليها زي عينيكوا ليه؟؟؟؟

1= ده اول اثبات بيطلبوه في اي مصلحة حكومية اول ما تعملوا اللاندنج

2= الورقة ده مطلوبة لما تيجوا تاخدوا الجنسية والبسبور الكندي

3= الورقة ده تعتبر اثبات شخصية وفيها رقم خاص بكل واحد بيطلبوا الرقم ده لو اتصلت بيهم في اي جهة حكومية تسال عن اي حاجة...لازم تقولهم الرقم ده وطبعا شوية بيانات اخري علشان يتاكدوا من شخصيتك

قبل ما نخلص موضوع البي ار ده........لو انت لسه ما قدمتش....تاكد من مواصفات الصور كويس قوي
1- الوجه في السنتر وابعاد معينة مكتوبة في سيت الهجرة
2- مفيش اي ابتسامة
3- مفيش اي رتوش.....يعني المصور ما يعملش اي حاجة في الصور بالفوتوشوب
4- طبعا ملونة

لو الفاس وقعت في الراس وبعت الصور وهي مش في المواصفات الصحيحة....تعمل الاتي

تتصور صح تاني زي ما قلنا فوق
تاخد الصور معاك....في المطار وهم بيعملوا الاوراق تسالهم...الصور مقبولة ولا لا....وتوريهم الصور الجديدة اللي المفروض انها اظبط....وتطلب منهم انهم يغيروها...لو مشي الحال ...خير وبركة ...لو ما مشيش....ندخل علي البلان الرابع....بتاع اخونا زناتي

تروح شارع سنت كلير....بنك نوفا سكوتشيا تحت منه مصور اسمه جو ديسكونت....توريه الصور هو ح يقولك اللي تنفع واللي ما تنفعش ح يصورك

تاخد الصور وتطلع علي 55 شارع سنت كلير ....وتطلب منهم انهم يغيروا لك الصور....لو مشيت .....يبقي خير وبركة....لو ما مشيتش.....يبقي البلان الاخير

انك تقعد حاطط ايدك عل قلبك الخمس اسابيع وتدعي ان الكروت توصل....بس قبل كده في الاسبوع الرابع كلمهم في سي اي سي واسالهم الكروت ما وصلتش ليه؟

لو فيه مشكلة في الصور ...ح يقولوا لك.....لو ما فيش يبقي تستني لحد ما تاخد الكروت بنفسك وترجع ترتب حالك قبل الاستقرار النهائي

كفاية كده النهاردة.......نكمل بعدين باقي الاوراق والحياة في مسيساجا

ربنا يوفق الجميع

 

[سيف الدولة]

مشكورة استاذة سمية على مجهودك ...طيب مثلا لو احنه شاكين بموضوع الصور ..نعمل ايه عشان نحتاط للموضوع ده قبل السفر .يعني نتصور مرة تانية ونأكد على ملاحظاتك وملاحظات المعلم زناتي ..وناخدهم معانا استحياطا ولا ايه النظام ..ده نمرة واحد ونمرة اتنين ..ماشاء الله ولادك شباب ..ممكن تحكيلنا عن انطباعاتهم ..نشاطاتهم ..رأيهم بموضوع الهجرة ..قبل السفر وبعدو ..إذا مكانش فيها غلبة ..

 

 

[Ahmed Osman]

م. سميه
دمتم بخير ...... تسجيل متابعة

تحياتي

 

 

[le quebecois]

الف مليون مبروك علي موضوع حضرتك وملايين مبروك علي سلامة الوصول وعمل الاندنج ويارب البي ار وكل شيء يبقي تمام وان شاء الله رحلة موفقة وان شاء الله في رحلة الإستقرار اللي جايةتكونوا أفضل نموذج للأسرة المصرية في كندا

تسجيل متابعة من
المحاوراتي القديم
والمطاريدي الجديد
لو كيبكواه
عبدالحليم

 

 

[العندليب]

بشكر حضرتك جدا على الموضوع دة وخصوصا انى لو ربنا وفقنى فى الهجرة وسافرت كندا هستقر فى مسيساجا
ياريت تشرحيلنا كل حاجة هناك

 

 

[somayasaleh]

استاذ مازن....شكرا لذوق حضرتك....زي ما قلت سابقا.....ممكن تتصور تاني وتتاكد من الصور وتاخدها معاك....وفي المطار تحاول تعطيهم لهم....ده بالنسبة للفدرالي....بصراحة ما اعرفش كيبك زينا ولا لا

استاذ احمد....متابعة حضرتك تشرفني


استاذ عبد الحليم...منور والله...وربنا يكرمك ويبارك لك علي الكلام الجميل ده


العندليب.....شكرا لحضرتك...واتمني انك تستفيد من المعلومات اللي ح اكتبها ان شاء الله


نكمل بقي الموضوع.............

بعد البي ار اللي في المطار...تان حاجة مهمة تعملوها هي السن كارد.....ده بالنسبة للفدرالي

وده سهل جدا....في كل بلدة في اونتارو...فيه مكتب كندا سيرفس...احنا طبعا رحنا بتاع مسيساجا

الجو العام مريح ...لازم كل افراد الاسرة يروحوا....الاول تقف في طابور....الموظفة تسالك علي اللي عايز تعمله وتديك رقم

تنتظر لحد ما الرقم يظهر علي الشبابيك وبعدين فرد فرد يدخل علي الشباك....لازم البسبور ورقة اللاندنج تكون معاك
تعطيك رقم السن وباس ورد لكل فرد من العائلة.....وكرت السن نفسه يوصل بعد اسبوع بالظبط في البريد....العنوان اللي بتعطيه لهم ده مهم....يعني لازم قبل السفر تكونوا عارفين عنوان بريد
لانه بيطلبوه في كل حاجة حكومية


تالت حاجة......فتح حساب في البنك.....في طبعا بنوك كتير...وده حاجة شخصية...وانواع حسابات كتير...يعني باختصار ده حاجة شخصية...كل واحد واحتياجه...وطبعا المهم انك تعمل فيزا كارد.....بس علشان مفيش اي ضمان بيفتح حساب توفير ويضع فيه مبلغ الفيزا...مثلا احنا فتحنا بالف ومتين دولار...علشان الحد الائتماني يبقي الف دولار.....وزي الناس الافاضل ما قالوا قبل كده...اهم حاجة انك تستعمل الفيزا وتسدد اول باول علشان ده بداية تاريخك الائتماني في البلد

كروت الايه تي ام تاخدها وانت واقف.... كروت الفيزا بعد اسبوع في البريد


رابع حاجة مهمة.....رخصة السواقة

اللي بيسوق من زمان ...يطلع شهادة بينات من المرور التابع له في مصر...الشهادة ده بتقول انت بقالك كام سنه بتسوق.......لا تترجمها في مصر....مش ح يعترفوا بالترجمة......الترجمة لازم تكون من اماكن هم ح يقولوا لكم عليها في مركز المرور هناك

ترجمة الرخصة المصري=30 دولار
ترجمة شهادة خبرة السواقة=30 دولار

تروحوا بيهم المرور...كالعادة شباك فيه موظفين الاستقبال....يسألوا انت عايز ايه....ويعطوا لكم رقم....تنتظر حتي يظهر الرقم علي الشبابيك.....تروح للشباك....يكشفوا نظر عليك وانت واقف...وتتصور وانت واقف ...وياخدوا العنوان اللي ح تتبعت عليه الرخصة...وبعدين تدخل تمتحن النظري....فيه كتاب اخونا زناتي نزله وسيت جميل جدا برضه موجود في التوبك بتاعه
لو اتمرنتوا عليهم كويس ح تعدوا سهل جدا....

الرخصة بتكلف 125 دولار....وده اسمها الجي 1
بس انا دفعت 85 دولار فقط علشان عندي شهادة الخبرة المترجمة

كمان انا بالشهادة ده ممكن امتحن علي طول الجي.....بدل الجي 2
خلوا بالكم...المرور هنا رائع جدا جدا ومنظم جدا جدا.....بس فيه حاجات صعبة احنا مش متعودين عليه....مثلا هنا في مسيساجا مفيش حاجة اسمها يو ترن خالص مالص.....يعني لو عايز تلف وترجع في نفي الشارع ده حاجة تانيه خالص

كمان الدخول شمال هنا ....غريب جدا جدا...بتدخل والاشارة خضراء امامك وتستني في نص الشارع لحد ما تلاقي فرصة او تصفر تدخل بسرعة

الموضوع ده كان عامل لنا شوية لخبطة اول ما وصلنا ...بس الحمد لله اخويا كان معنا في اول اسبوع وعودنا علي السواقة في كندا

بس بصراحة......اكتر حاجة حلوة هنا متعة السواقة في الشوارع...وانت متاكد ان مفيش حد ح يكسر عليك او تبقي خايف علي الهاي واي من الشاحنات،،،،،بصراحة حاجة تفرح

احنا اول اسبوع اجرنا فان...علشان اخويا كان معانا وكمان علشان يعلمنا عليها

الايجار 50 دولار في اليوم... ولو اي حد تاني ح يسوق بيكتبوا اسمه ويدفع 10 دولار

بمعني اخويا هو اللي كان ماجر باسمه اول اسبوع...ووضع اسم زوجي معاه بعشرة دولار في اليوم علشان يقدر يسوق هو كمان

لما اخويا سافر بالسلامة...احنا رجعنا الفان...واجرنا تويوتا كرولا لذيذة قوي باسم زوجي...30 دولار في اليوم...وانا 10 دولار لو ح اسوق

كده يبقي اغلب المصالح الحكومية خلصت ....فاضل حاجتين بس.....الهيلث كارد...وده لسه ما عملنهاش....وحاجة اسمها اعانة للاطفال...كل طفل اقل من 18 سنه بيعطوه اعانة 300 دولار في الشهر

في المطار بيدوك الورق بتاع الهيلث...وبيسالوا الاولاد عندهم كام سنة ويعطوا علي اساس السن زي ما قلنا

بس برضه احنا لسه ما قدمناش علي التشيلد بنفيت ده

ده شوية معلومات علي السريع كده...وقبل ما انسي...لازم يبقي معاكم في المطار دولارات كندي علشان العربية اللي ح تطلعوا عليها الشنط

كمان نسيت اقول ....كل فرد له شنطتين الواحدة 23 كيلو...وكمان شنطة هاند باج وطبعا الاب توب

الشنط بتسلمها في مطار القاهرة....وتستلمها في مطاربيرسون ومفيش اي شنطة بتتفتح

كمان قبل ما انسي في المطار بياخدوا منكم لستة بالاشياء اللي ح تشحنوها بعدين.....اكتبوا كل حاجة......حتي البراويز والتحف والهدايا....لان الحاجات ده غالية جدا هنا

وللسيدات اقول لهم حاجات المطبخ اكتبوها كلها ...حتي لو مش ح تحضروها بعدين

اكتبوا السجاجيد.....اكتبوا المفارش...اكتبوا الكمفورتر....كل كل كل حاجة اكتبوها....مش لازم تجبوها....بس اكتبوها....الدهب كمان ...صوروه....واكتبوا القيمة التقريبية للحاجات ده

سلام مؤقت ولنا عودة بالتفصيل للحياة في مسيساجا

وربنا يوفق الجميع

 

 

[اسكندرانية كنداوية]

باشمهندسة سمية منورة المنتدى و مبروك على التوبيك وشكرا جزيلا على المعلومات القيمة فى إنتظار باقى التفاصيل و خصوصا إنطباعاتكم عن الهاى سكول ونظام الجامعات ويارب يطمنكوا و تستلموا البى أر قريبا إن شاء الله

 

 

[اسكندرانية كنداوية]

باشمهندسة سمية منورة المنتدى و مبروك على التوبيك وشكرا جزيلا على المعلومات القيمة فى إنتظار باقى التفاصيل و خصوصا إنطباعاتكم عن الهاى سكول ونظام الجامعات ويارب يطمنكوا و تستلموا البى أر قريبا إن شاء الله

 

 

[نهر النيل]

يا هلا ياهلا يا هلا

الحبايب متجمعين ومنورين

ربنا يجمعنا على خير يارب

الف مبروك على التوبك الجديد الراااائع دكتورة سميه

ربنا يطمنا عليك انت وعائلتك الكريمة دوما

بس انت عارفة احلى وارقى شئ في الناس الجميلة اللي عمالة تجمع في بعضها دي ايه

انكم مصرين على تقديم المعلومة والمساعدة للاخرين

مافي حد فيكم فكر بطريقة سلبية (مع ان من حقكم)وقال انا مالي ايه اللي هيخليني اتحمل معامله سيئة

انا مش مستفيد حاجة واللي عايز يعرف شئ يتعب هو ويبحث عنه

والله انكم بتخجلونا برقي تفكيركم وقلوبكم العامرة بالإخلاص والعطاء
انت وباقي الاخوة ومش هذكر اسماء لان كلامي ده يطبق على الجميع

جزاكم الله الف خير

 

 

[الأهلاوي الأصيل]

باشمهندسة سمية...نورتي المنتدي ونورتي كندا كلها انتي وكل الأسرة الكريمة