بيتزا مارجريتا فورية....افتكاسة

[toota]

الصحف المصرية والعربية

معرفش ايه الي جه على بالي....قلت اكل مناقيش على الصبح...صاحبتي بتكلمني وقالتلي حنزل اشتري مناقيش ع الصبح وانا قلت ابدا....لازم اعمل مناقيش.....



المهم قمت عجنت عجينه غريبه....مكوناتها بالبركة

دقيق اقل من كيلو بس انا بالبركه بحط.....معلقتين زبادي...نص كوب لبن حليب...بيضة....نص كوب ميه

ورشة ملح وسكر... قعدت اعجن فيها وكل ما تنشف ازودها لبن او زيت...وكل ما تطرا ازودها دقيق....وسبتها تخمر في فرن ساخن عشر دقايق

مديتها على الصينيه ...وكنت ضاربه طماطمتين طازه ف الخلاط وعليهم صلصه وفصين توم مدشوشين وشويه فلفل وزيت.....

حطيت الخليط على العجينه ورشيت عليها خليط من شيدر مع ر ومي وحطيت التوب جبنه موزاريلا....وحطيتها ف الفرن عشرين دقيقه....

ولما خرجتها رشيت عليها زعتر .....( منا نفسي كانت بالاساس اكل مناقيش مش بيتزا)


المهم اني معنديش ولا خميرة فوريه ولا اي حاجه تخمر العجينه....بس طلعت تحفه هشة وطرية ...وفي اقل من ساعه كانت جاهزه وطعمها ايطالي من بلدهم

دوقوا وقولولي

 

[بندق]

يبدو طعمها حلو بس كانت ناقصة ورقتين ريحان من البلكونة أو بلكونة الجيران أو من جنب دكة البواب

عشان تبقى مرجريتا بجد لأنه المرجريتا هى أى بيترا فيها أخضر وأحمر

هذا الرأى على مسئولية جيادا دى لورينتى


طيب ليه مش تعملى لنا أكلات لبنانية من المطبخ اللبنانى الغنى جدا ؟؟

 

 

[Badroora]

تسلم ايديك يا توتا بس انت حرقاها من تحت ولا ايه ؟
ينفع ابقي احط عليها زيتون مقطع وشرائح فلفل اخضر وماشروم ولا ما يصير ؟
وسؤال كمان الصلصة اللى ضربتيها فى الخلاط وحطتيها ع العجينة ثبتت مكانها يعنى مدلدقتش من الجوانب ولا عملتى العجينة غويطة عشان تستوعب المكونات
بس نجربها عشان خاطر عيونك وعيون الجبنة اللى فيها

 

 

[أحمد باشــا]

اقتباس قعدت اعجن فيها وكل ما تنشف ازودها لبن او زيت...وكل ما تطرا ازودها دقيق

 

 

[toota]

اقتباس المشاركة الأصلية كتبت بواسطة بندق يبدو طعمها حلو بس كانت ناقصة ورقتين ريحان من البلكونة أو بلكونة الجيران أو من جنب دكة البواب عشان تبقى مرجريتا بجد لأنه المرجريتا هى أى بيترا فيها أخضر وأحمر هذا الرأى على مسئولية جيادا دى لورينتى طيب ليه مش تعملى لنا أكلات لبنانية من المطبخ اللبنانى الغنى جدا ؟؟

بقولك هي طلعت في دماغي الساعه ستة الفجر وعلى قد لحافك مد رجليك...وعلى فكره نسيت اقول اني حطيت ريحان ناشف وزعتر ناشف من بتوع كارفور ابوظبي كنت جبتهم معايا من اخر مره


اما الاكل اللبناني...فأنا مبقتش اعمل منه الا شويه حاجاات بس....طعمه هنا مش زي هناك

 

 

[toota]

اقتباس المشاركة الأصلية كتبت بواسطة Badroora تسلم ايديك يا توتا بس انت حرقاها من تحت ولا ايه ؟ ينفع ابقي احط عليها زيتون مقطع وشرائح فلفل اخضر وماشروم ولا ما يصير ؟ وسؤال كمان الصلصة اللى ضربتيها فى الخلاط وحطتيها ع العجينة ثبتت مكانها يعنى مدلدقتش من الجوانب ولا عملتى العجينة غويطة عشان تستوعب المكونات بس نجربها عشان خاطر عيونك وعيون الجبنة اللى فيها

هي متحرقتش...دي الصلصه المتحمره..... الطماطم لما بتتضرب ف الخلاط بتبقى غليظه....ومش بتتدلدق من الجوانب.....

جربيها بجد سهله ولذيذه وسريعه....الجود من الموجود

 

 

[toota]

وكملت نص العجينه الي فضلت بزعتر وزيت من الي قلبي بيحبهم....وقاعده بمزمز فيها لوقتي حالا

 

 

[تقى]

تسلم ايديك ياتوتا سهله قوي وشكلها لذيذ هاجربها

 

 

[toota]

اقتباس المشاركة الأصلية كتبت بواسطة تقى تسلم ايديك ياتوتا سهله قوي وشكلها لذيذ هاجربها

عينيكي الي حلوة يا تقى.......ميرسي


الا صحيح بتختفي فين كل شويه كدة؟

 

 

[تقى]

اقتباس المشاركة الأصلية كتبت بواسطة toota عينيكي الي حلوة يا تقى.......ميرسي الا صحيح بتختفي فين كل شويه كدة؟

العفو ياقمر بجد والله وحشتيني
بختفي فين ما انتي عارفه العيال والانسه تقى دخلت المدرسه
يادوب على مانخلص يكون كبس عليا النوم

• والنت كان خربان وغيرنا الدي سي ال طلع منيل وبيفصل كل شويه بس غيرناه وكل يوم جيالك بس ياريت انتي ما تزهقيش تقبلي تحياتي
• ولكي مني باقة ورد لعيونك ياقمر