مقارنة نتائج تقييم بكالوريوس من اكاديمية خاصة لكندا و استراليا

[ماتريكس دوت نت]

السلام عليكم

حبيت أشارك تجربتي في تقييم البكالوريوس الخاص بي من جهتين دوليتين في كندا و استراليا لعلها تفيد حد
وللعلم انا حاصل على بكالوريوس نظم المعلومات الادارية اربع سنين من اكاديمية خاصة ولكن معتمدة من المجلس الأعلى للجامعات ۔۔۔۔۔ نتدخل بقى في التفاصيل
أولا: الجهات المعنية بالتقييم
بالنسبة لكندا في جهات كتير ولكن اشهرها واسرعها هي WES ودي اللي انا قيمت عندها
بالنسبة لأستراليا كل مجال ليه المكان الخاص بيه وفي حالتي هتكون ACS
اللي هي Australian Computer Society
ثانيا: الأوراق المطلوبة للتقييم
بالنسبة لكندا : اصل بيان الدرجات يتحط في ظرف الكلية او ظرف ابيض ويتختم على القفلة بتاعته + صورة شهادة البكالوريوس ويتحط الاتنين دول في ظرف تاني ويتكيب عليه الريفرنس نمبر بتاعك + عنوان الويس
* بتاخد الريفرنس نمبر بعد عملية التسجيل والدفع على موقع ويس
* بالنسبة لخريجي التعليم الخاص (جامعة - اكاديمية - معهد) مش محتاج ورق المعادلة او أي أوراق زيادة عن المطلوب فوق
بالنسبة لأستراليا: كل المطلوب منك صور طبق الأصل للاتي:
صورة بيان الدرجات
صورة البكالوريوس
صور أي شهادات دولية زي شهادات مايكروسوفت او سيسكو ۔۔۔ الخ
صورة جواز السفر او صورة شهادة الميلاد
صور جميع شهادات الخبرة الوظيفية وطبعا شهادة الخبرة ليها مواصفات معينة على الموقع الخاص بالتقييم
في هنا نقطتين مهمين اللي هما
ازاي نعمل صورة طبق الأصل للورق وليه شهادات الخبرة مطلوبة في التقييم ؟
بالنسبة للصور طبق الأصل المفروض انك بتصور كل الورق المطلوب وتروح السفارة الاسترالية تعملوا ودا مكلف شوية او انك تروح لحد ليه ترخيص مزاولة مهنة زي الأطباء او المحامين وتخليه يمضي على الصور كلها ويكتب عليه
certified true copy
ويكتب التاريخ ويوقع او لوعنده ختم للموضوع دا يختم ويكتب التاريخ ويوقع ودا لكل الورق المطلوب
اما موضوع ليه شهادات الخبرة فدا علشان تقييم كندا بيقيم المؤهل بس انما استراليا بتقييم المؤهل والخبرة الوظيفية مع بعض ومن نفس جهة التقييم علشان كدا لو ناوي تهاجر استراليا اعمل حسابك ان جهة التقييم هتقيم المؤهل والخبرة مع بعض
ثالثا: طريقة التقديم
كندا: بتعمل اكاونت الأول على موقع الويس وبعد ما تاخد الريفرنس نمبر بتكتبه على الظرف اللي فيه الورق اللي قولنا عليه فوق وبعد ما تبعت الظرف عن طريق شركة الشحن بتتابع على الموقع بتاع الويس لحد ما نتيجة التقييم تطلع
استراليا: الموضوع كله اونلاين عن طريق الموقع بتاعهم لحد ما يبعولك نتيجة التقييم على الايميل
رابعا: مدة معالجة الطلب
كندا WES : شهر بالظبط او اقل بشوية من وقت وصول الورق للويس
استراليا: على ما أتذكر من أسبوعين لتلاتة
خامسا: التكلفة
كندا WES : دولار كندي $322.05 بمصاريف شحن نتيجة التقييم الورقية عن طريق شركات الشحن الدولية
استراليا :دولار استرالي 500
سادسا: نتيجة التقييم وهي دي اللي على أساسها كتبت الموضوع دا لانه فعلا التقييم مختلف كليا وهو كالتالي:
كندا: Bachelor's degree (four years)Major: Management Information Systems
استراليا: Associate Degree with a major in computing
والفرق كبير بين الاتنين كندا قيمت المؤهل انه بكالوريوس اربع سنين انما استراليا قيمته على انه مش بكالوريوس ولا دبلومه بس حاجة تالته كدا زي مؤهل مساعد ودا بيبقى مدته من سنتين لتلاته
طبعا بخلاف الكلام اللي فوق دا كله الكلام دا بيفرق في عدد النقط اللي هتاخدها وانت بتحسب نقاطك للهجرة بمعنى انك في كندا هتاخد نقاط البكالوريوس عادي انما في استراليا البكالوريوس عليه 15 نقطة وطبعا بعد التقييم دا مش هتاخدهم بس معرفش اذا واخد شهادات دولية من مايكروسوفت هتفرق في التقييم ولا لا