تحياتي من مسيساجا

[shawi]

اقتباس المشاركة الأصلية كتبت بواسطة رانيا يا جماعة الخير السلام عليكم انا رانيا طبيبة بشرية بقالي هنا في ميسسيساجا يومين بس نفسي اعرف هل في اماكن هنا في ميسسيساجا او جروبات تجمع للمصرين او العرب لاني ما اعرفش حد خالص و صاحب زوجي الوحيد للاسف مشغول جدا مش عارفين نقابله فهل في اماكن اقدر اسال فيها على حاجات كتير لاننا تايهين خالص .... ربنا يسهل للجميع ان شاء الله

حمدالله عالسلامه يا دكتوره
صاحب زوجك فعلا معذور
الشغل بياخد الناس وبيبقى السبت والاحد هما الافراج
الابواب اللي في المنتدى فيها تفاصيل كثيره وفيه ناس افاضل بيعرضوا مساعدتهم لوجه الله
احنا في مانيتوبا اعذريني
----
تاكس على سيرفس كندا ومعاكم الباسبور وورق اللاندنج وحتعملوا السن نمبر ومن هناك على المكان اللي تعملوا فيه بطاقة الصحه اعتقد بيسموها الاوهيب في اونتاريو
لكن لازم يكون معاكم عنوان علشان البطاقه تتبعت عليه
السن نمبر بتاخدوا الرقم على ورقه لكن البطاقه البلاستيك بتتبعت عالعنوان خلا اسبوعين
فيه ناس في المنتدى بتعرف سماسره علشان البيوت
فيه ناس بتعرف وكتبوا عن الاكل الحلال والمطاعم والفسح
تحياتي

 

[رانيا]

اقتباس المشاركة الأصلية كتبت بواسطة oshalla الموضوع فعلا جميل يا بشمهندسه بس عايزه اسال كام سؤال 1 ليه لازم نكتب فى المطار قائمه بكل ما عندنا من متعلقات ممكن تتشحن لاحقا وليه نصور الدهب ونقيمه 2_لازم الدهب يبقى مرفق معاه فواتيره 3_ هو فعلا شحن متعلقات لينا الى كندا يعتبر ماديا اوفر من اعاده شرائها من كندا وياريت لو فى معلومات عن الشحن 2- لازم فواتير الجهب او الاجهزه

بعد اذن المهندسة ارد عليك لاني لسه واصلة .... نصيحة صور الدهب لاني مصورتوش اول مرة جيت فيها و كسلت الظابطة مرضيتش و قالتلي لازم تصوريه و اديتنا 10 ايام نصوره و رجعنا المطار ودناه دا كان من سنتين في اللاندنج. يعني حسب الظابط يطلبوا او لا....اما الفواتير مش بيسال عليها خالص بس مش عارفة هنا لازم تبقى معاك ساعة البيع او لا.....
لا طبعا الشحن غالي و الاجهزة لازم تتاكد انها بتشتغل على كهربا 110 لان السشوار بتاعي مرضيش يشتغل هنا و كل اجهزة مصر و الخليج نفس الشئ (220)

هما طلبوا نكتب الرقم المسلسل بتاع الاب توب فقط لا غير
اكتب كل حاجة عندك حتى المفارش علشان لو فكرت تيجيبها معاك في مرة تانية

بالنسبة للشحن لو في شنطة زياده مثلا خدها معاك و ادفع في المطار من مصر الشنطة الزياده 200 دولار و كده احسن ما تبعت مع شركة و بعدين تضطر تروح تجيبها و تدفع تاني...
و ربنا يسهل البلد هنا فيها كل حاجة بس للاسف عاوزة فلوس فوفر الفلوس هتحتاجها هنا

ربنا يسهلكو و احنا كمان و كل الناس يا رب

 

 

[اسكندرانية كنداوية]

باشمهندسة سمية منورة المنتدى و مبروك على التوبيك وشكرا جزيلا على المعلومات القيمة فى إنتظار باقى التفاصيل و خصوصا إنطباعاتكم عن الهاى سكول ونظام الجامعات ويارب يطمنكوا و تستلموا البى أر قريبا إن شاء الله

 

 

[اسكندرانية كنداوية]

باشمهندسة سمية منورة المنتدى و مبروك على التوبيك وشكرا جزيلا على المعلومات القيمة فى إنتظار باقى التفاصيل و خصوصا إنطباعاتكم عن الهاى سكول ونظام الجامعات ويارب يطمنكوا و تستلموا البى أر قريبا إن شاء الله

 

 

[نهر النيل]

يا هلا ياهلا يا هلا

الحبايب متجمعين ومنورين

ربنا يجمعنا على خير يارب

الف مبروك على التوبك الجديد الراااائع دكتورة سميه

ربنا يطمنا عليك انت وعائلتك الكريمة دوما

بس انت عارفة احلى وارقى شئ في الناس الجميلة اللي عمالة تجمع في بعضها دي ايه

انكم مصرين على تقديم المعلومة والمساعدة للاخرين

مافي حد فيكم فكر بطريقة سلبية (مع ان من حقكم)وقال انا مالي ايه اللي هيخليني اتحمل معامله سيئة

انا مش مستفيد حاجة واللي عايز يعرف شئ يتعب هو ويبحث عنه

والله انكم بتخجلونا برقي تفكيركم وقلوبكم العامرة بالإخلاص والعطاء
انت وباقي الاخوة ومش هذكر اسماء لان كلامي ده يطبق على الجميع

جزاكم الله الف خير

 

 

[الأهلاوي الأصيل]

باشمهندسة سمية...نورتي المنتدي ونورتي كندا كلها انتي وكل الأسرة الكريمة

 

 

[وسيمو]

السلام عليكم ورحمة الله وبركاته
شكرا على التفاصيل وتسجيل متابعة

 

 

[somayasaleh]

مساء الخير عليكم....نجاوب علي الاعضاء الافاضل

مدام ناوية...كلام اخونا زناتي صح مية في المية....لو معاكي شهادة الخبرة ده من المرور...تدخلي علي طول علي الجي....بس نصيحة لازم تاخدي كام حصة مع حد بروفيشنال قبل الامتحان العملي علشان تعدي من اول مرة ان شاء االله

اخونا العزيز زناتي...ربنا يبارك في حضرتك...وقت فراغ بقي نعمل ايه في البلد الفاضية هنا..

الاخت العزيزة ام يمني ...بالنسبة لموضوع الصور .....لو حضرتك تتبعتي الخطوات اللي انا واخونا زناتي قلنا عليها...ان شاء الله مش ح يطلع فيها اي مشاكل

استاذ مونتريال اليكس...الرخصة المصرية لازم يكون عدي عليها سنة علشان يسمحوا بامتحان السواقة العملي....الجي 2.... ولو كانت ما عداش عليها سنة....لازم ينتظر سنة بعد امتحان النظري...الجي 1 علشان يدخل امتحان الجي 2

الموقع ده رائع ...ياريت تقرأوه...فيه كل حاجة عن الرخص والسواقة
والكتاب...اللي بيتباع ب 16 دولار هنا ببلاش
https://www.mto.gov.on.ca/english/dan...ion1.0.0.shtml

 

 

[somayasaleh]

استاذي واستاذنا كلنا باشمهندس ياسر

ربنا يبارك لحضرتك ويجعل كل ما تقوم به من خير في ميزان حسناتك

احنا اتعلمنا من حضرتك العطاء المجاني للناس .....فقط ابتغاء لوجه الله تعالي

وانا سعيدة جدا جدا جدا بتشريف حضرتك للموضع ده...

 

 

[somayasaleh]

مدام اسكندرانية....معلش ما شفتش مداخلة حضرتك....العتب علي النظر يا فندم

التشيلد بنفت بتاخدي حضرتك النماذج من المطار يوم اللاندنج.....وده تاريخ استحقاقك للفلوس...حتي لو ما قدمتيش عليها غير بعد شهور.....الكلام ده من ناس هنا عملوا كده

وطبعا موضوع التقديم ده يتوقف علي كل حالة.....ممكن اول ما تعملوا اللاندنج....وممكن بعد ما تستقروا....وممكن بعد سنة ...كل واحد وظروفه الخاصة