أنا وأنتم ....وتورونتو

[Dr. Ahmad]

الصحف المصرية والعربية

اقتباس المشاركة الأصلية كتبت بواسطة Rock دكتور احمد...مستر اماد....تحياتي لكما (زي الصاحبان في الشعر الجاهلي ) ممكن بعد اذنك (( لو مفهاش رخامة يعني)) ,تجيب الكاميرا اللي هي اكيد سودة برضه و تحط كام صورة من حياتك اليومية ,عشان يبقي الموضوع صوت و صورة. ربنا معاك و يوفقك و يسمعنا عنك كل خير و طيب.

مافيش رخامة ولا حاجة يا دكتره ...وانا فعلا جبت الكاميرا السوداء ...اللي مش عارف مين اللي قال لحضرتك انها سودا ...وصورتلك السنجاب الاسود ...اللي بيوزعوه هنا هدية لكل مواطن ...


يا رب ما اكونش حارم حضرتك من حاجة يا رب

 

 

[Dr. Ahmad]

اقتباس المشاركة الأصلية كتبت بواسطة kaza كفرد من افراد المطارييييد أطالب بتثبيت هذا الموضوووووووووووووووووووووووووووع لانه ماينفعش غير انه يكون في الصفحة الاولى من باب الهجرة الى كندا

يا نهار .. تثبيت مرة واحدة .. ربنا يخليك يا ريس ..بس احنا مش قد الكلام ده

 

 

[Dr. Ahmad]

اقتباس المشاركة الأصلية كتبت بواسطة ضبش الراجل اتحسد يا جدعان من ساعة ما دخلنا كلنا نشكر فيه ماظهرش ولا مرة

لا والله يا ضبش .. انا بس اليومين اللي فاتوا دول كنت تقريبا طول اليوم في الشارع ... بودع الصيف .. هبقى احكي ان شاء الله اليومين دول ان شاء الله ..

 

 

[Dr. Ahmad]

اقتباس المشاركة الأصلية كتبت بواسطة Moe طب اسمعني يا جميل مع اني عارف في مرحلة( الواو ) والفسح دي بيكون مستر( اماد )بتاع كل واحد مسيطر عليه ومش حيسمع اي كلمه ..بس اخاف اتشغل وأنا أكون عارف حاجة ممكن تفيدك و مااقولهاش وانت ناوي تستقر مش لاندينج القصه بتفرق..أسمع مني ونفض للكلام ده لحد ما تكون حاسس أنك محتاجة أرجع اقراه. 1- للfuture reference only شارع Galloway لوحدك تسكنه ماشي و مؤقتا بس مع عيله ولا لفتره كبيره ماينفعش ابدا ابدا..بـ 600 دولار دول وأقل ميه متين ممكن تجيب Bachelor لوحدك ..ممكن تسكن في بيت زي دهshared في قلب المدينه ..أنت في اطراف سكاربرو و اطراف تورونتو كلها بعيد عن كل الدنيا ..مكان مايتسكنش لو حتستقر. 2-لو عايز محل أكل حلال..لحوم وفراخ و كده .. اتمشي في لورانس لحد Kingston…بالظبط من عندك 3 دقائق مشي فيه ماكدونالدز وفيه بنك BMO ..لازق في البنك ده محلات حتلاقي كل حاجة فيها حلال .. لو اتخنقت وعايز تشم هوا و تغير جو …اطلع للورانس..أركب 54A..مش ناحية المول الي انت رحتله بس الناحية وانت جاي منه.للبيت.وخليك فيه ..10 دقائق أو اقل حتسمع Port Union ..أنزل خد يمينك للاخر حتلاقي شاطئ كبير جدا وجميل جدا ..التمشيه هناك حتغيرلك جو أكيد .. الجو ساقع..أركب نفس الباص ناحية المول و الداون تاون المره دي ..وما تنزلش ..بعد مايطلع من محطة لورانس خليك مركز حتلاقي يفط عربيه كتير جدا ..محلات عربيه كتير جدا ..قهاوي ام كلثوم وقهوة اسكندريه..حتغيرلك جو القعده..الاماكن زي ال CN tower والحاجات دي معروفه ..المهم أعمل اي حاجة ماتخليش اي stress ولا قلق يتملكك . لما توصل عن البحث للشغل وكده ياريت تشاركنا انت عملت ايه وقدمت فين والردود الي جاتلك ايه ..انت بتعرف تنقل مشاعرك كويس بالكتابة..متابعين يا باشا صحيح انت بعيد عن المطار حولي 20 دقيقه بس بالهاي واي..عشان كده لما تكون في المطار تاني وعايز تاكسي قوله أنا عايز flat rate ..يعني حيقولك انت حتتكلف كده وخلاص ..من غير عدد ..لأن لو انت كنت في ساعة rush hour والناس خارجة من اشغالها بيتك حيتخرب ..بال فلات رت مش حيكون أكتر من 65 دولار وأقل ساعات ..

انت يا دكتور محمد .. يا أما مكشوف عن حضرتك الحجاب يا اما مكشوف الحجاب عن حضرتك .. انا كل لما افكر في حاجه او اعملها .. الاقي حضرتك كاتبهالي ... ربنا ما يحرمنا من نصايحك يا غالي ... انا فعلا النهاردة بالصدفة اكتشفت المكان اللي حضرتك بتقول عليه ... مكان جميل فعلا .. واخدت له كام صورة كده ع السريع ... هبقى احطهم هنا ان شاء الله ... بالنسبة للتاكسي من المطار .. ان شاء الله يا رب ما يكونش في مرة تانية .. يارب .. بس هو اعتقد انه حسبها لي بالطريقة اللي حضرتك قلت عليها .. قبل ما نتحرك من المطار كان قايل لي على السعر ... والسكن اللي انا فيه حاليا .. هو فعلا زيادة 100 او 50 دولار عن باقي الحاجات اللي انا كنت شوفتها على النت من مصر .. بس كان كل الناس اللي بتبعتلي عروض على النت كانو بنات في العشرينات .. وحسيت اني مراتي ممكن يجيلها سكتة قلبية لا قدر الله .. فما كانش قدامي غير العرض ده .. وربنا يكرم ان شاء الله لما ييجوا هنا .. انا عن نفسي اتمنى ان اسكن في بيت لوحدي في north york مثلا ... بس على رأي المثل .. " منين يا عسل " .. المنطقة اللي انا فيها حاليا .. انا شايف ان عيبها في العيال الافارقة اللي مسقطين بنطالوناتهم .. في مصر كانوا بيسقطوا البنطلون 2 سم او حاجة كده .. هنا نازل لغاية الركبة ...وليهم مشية كارتونية ظريفه كده .. زي ما يكون فيه زمبلك راكب في ركبهم .. بس مضحكين برضه ..
بالنسبة لموضوع الشغل .. انا مازلت في مرحلة ال online application عشان ابقى عملت اللي عليا لغاية ما يجيلي ال sin card ان شاء الله .. في job fair كنت شوفت له اعلان وانا رايح الداون تاون .. هاروحه ان شاء الله .. وربنا يكرم ..

جزاك الله كل خير يا دكتور ..

 

 

[ياسر جعفر]

دكتور أحمد باشا
ما فيهاش حاجه لو دورت على شغل فى محلات الأكل زى تيم هورتونز
لا هو عيب و لا هو حرام و أهى تجربه و لو ما عجبتكش قولوهم أدونى حسابى و سلامو عليكو
الرزق يحب الخفيه
و الشاطره تغزل برجل حمار
يعنى خلى العجله تدور يا معلم

 

 

[Dr. Ahmad]

اقتباس المشاركة الأصلية كتبت بواسطة ياسر جعفر دكتور أحمد باشا ما فيهاش حاجه لو دورت على شغل فى محلات الأكل زى تيم هورتونز لا هو عيب و لا هو حرام و أهى تجربه و لو ما عجبتكش قولوهم أدونى حسابى و سلامو عليكو الرزق يحب الخفيه و الشاطره تغزل برجل حمار يعنى خلى العجله تدور يا معلم

تيم هورتونز !!!... لو عندك وظيفة هناك الحقني بيها اعمل معروف ... هو حد طايل ... ده كده ابقى ضمنت القهوة والمكسرات

 

 

[Dr. Ahmad]

توجهت في صباح احد الايام..الى الداون تاون .. وكان مقصدي هو الوصول لجامعة Ryerson ..وفي الطريق الى الداون تاون .. في ال subway كانت الناس اكثر اشراقا وسعادة .. الغالبية يرتدون الملابس الرسمية .. بدأت البرفانات والبدل والكرافتات تظهر كده والحياة بقت more wow ... معظم الناس غالبا .. ما بيضيعوش وقت في ال subway اللي بيقرأ الجرنان .. واللي بيكتب على الموبايل .. واللي نايم ..واللي بيشرب قهوة ... واللي بيقضي وقت ظريف مع الجيرل فريند بتاعته ..حاجة تجيب الشلل كده ... وعندما وصل المترو الى yong station ... بدأ معظم الركاب ينزلوا ... وانا برده بتفرج عليهم ... مهو انا اصلي كنت عايز انزل Bloor station .. وبعد نصف ساعة من مغادرة المترو محطة yong ... اخيرا اقتنعت اني لازم اطلع الخريطة من الشنطة واشوف انا لسه ادامي وقت أد ايه ... واكتشفت ساعتها ... ان Yong station هي نفسها Bloor station ... رحت نازل وواخد المترو من الاتجاه الاخر ...ووصلت متأخر حوالي ساعة ...اخدت مترو أخر من Bloor الى Dandas عشان كانت هي اقرب محطة ل Ryerson ...عشان أخرج من المحطة ..كان لابد اعدي على Eaton Center ... وده بصراحة عايز له كتاب لوحده .. المهم لفيت فيه على السريع ..وخرجت بسرعة عشان الحق اروح الجامعة بسرعة ... خصوصا اني كنت متأكد اني هتوه .. هي عادتي يعني ولا هاشتريها .... خرجت الى الشارع مسرعا ... لأجد الداون تاون ..عبارة عن شيئا أشبه بالمولد ...زحمة جدا ...ناس رايحة وناس جاية ... والشوارع ضيقة ... والعمارات كبيرة ...والسواقة هناك ..تقريبا شبه مستحيلة .. في اختراع هناك كده اسمه Street car عامل رعب في المنطقة ..كل شوية يقف ...ويثبت وراه العربيات على بعد مترين تلاتة كده ...عديت الشارع .. بس مش من المكان بتاع المشاة ... وكمان اكتشفت بعد ما عديت ان الاشارة بتاعة المشاة ما كانتش خضرا ... هنقول ايه ... فضيحة طبعا ...
كان هناك شخص ما .. عامل صداع وقلق في المكان ..ما اعرفش هو مين لغاية دلوقتي .. بس صورته برضه ...


وكان مجمع حواليه حوالي مليون واحد ... بيحتفلوا بال Freedom day



بعدما نظرت في الخريطة التي كنت رسمتها لنفسي .. توجهت الى جامعة Ryerson ..والمفاجأة هي اني وصلت من أول مرة من غير ما أتوه .. غريبة جدا ... اول مرة اعملها .. دخلت المبنى ...ثم اكتشفت انه مش مبنى جامعة Ryerson ... يا فرحة ماتمت ... الجامعة لم يكن لها سور يحيطها ... فقط مجموعة مباني جنب بعضها كلها عليها اسم الجامعة ... كل مبنى يعتبر كلية ... وكلهم مفتوحين على الشارع ... وعندما وصلت هناك ... " ايه كمية العيال دي .. هو انا هقعد مع العيال دي ...وانا اللي فاكر نفسي لسه صغير "
للأسف معرفتش اوصل لأي معلومات هناك .. قالوا لي لازم تفوت علينا بكره يا سيدي .. طبعا بكره ده هيكون ان شاء الله في اكتوبر .. مع بداية قبول الطلبات بتاعة السنة الجديدة

 

 

[Dr. Ahmad]

في اليوم التالي .. كان فقط للاسترخاء ... لم اكن افكر في أي شيئ ... توجهت لاستكشاف المنطقة التي اسكن بها ...كانت قطرات المطر...او بمعنى ادق شلالات المطر ..تنهال من السماء ... لتغسل اوراق اشجار مدينة تورونتو... كانت تلك هي المرة الاولى ..التي اتمكن فيها من المشي تحت الأمطار ..دون ان أمارس رياضة التزحلق على الطين ... تلك الرياضة التي طالما مارستها رغما عني .. وجدت مكانا مخصصا للمشاة بين الاشجار... فقط للمشاة ....شيئ جميل ان يكون الانسان ...ذلك المخلوق الذي كرمه الله .. مكرما في ارض الله ...


والطيور .. الظاهر برضه كانت عاملة دماغ في المطر ...

 

 

[Insider]

موضوع جميل وطريقتك فى الكتابة دمها خفيف جداً على العموم مبروك وبالتوفيق إن شاء الله

 

 

[Lee Lee]

دكتور / احمد

اسلوبك شيق ودمك خفيف وحوارك ممتع

حمدالله على السلامة يا فندم

متابعة مع حضرتك

وحاجزة اول صف