المشوار الى امريكا

[hanydlt]

دعوه لموضوعي

المشوار الى امريكا

السلام عليكم ورحمة الله وبركاته
لاحظت ان مع كبر حجم دوله زى امريكا ووجود مصريين وعرب كتير جدا هناك الا انه مع الاسف مافيش توبيكات خاصه بطرق السفر الى هناك ولا اخبار عن السفاره فى مصر والمقابلات بها ولا انواع المعيشه هناك ولا معلومات عن الولايات ولا خبرات من اعضاء المنتدى المقيمين بها .
فحبيت زى ما استفدت كتير من المنتدى يكون ليا اسهام بسيط بتجربتى الامريكيه والتى مازالت فى مرحلة المهد
وابداها معكم من مرحلة المقابله بالسفاره

 

[hanydlt]

دعوه لموضوعي

المشوار الى امريكا

تجربتى فى المقابله ( للهجره العشوائيه )
هاحاول اشرح كل حاجه علشان اى حد يحب يعرف التفاصيل لعلها تفيده
اولا انا كنت حاسب عدد الناس اللى هاتروح فى نفس اليوم بتاعى من سايت السفاره وكنت عارف ان عددنا هايكون 12 ( دا لو الكل راح ) فمحبتش اروح قبل 7 ونص علشان معايا اطفال ومانقفش فى الشارع والبرد وفعلا كان احسن لان ماوقفناش كتير وقبل الدخول طلبوا كل واحد يمسك الجواب بتاع ميعاد المقابله فى ايده ويبص فيه ويتاكد من عدد المطلوبين للمقابله قبل مانعدى من الباب الخارجى وسالونا اى حد معاه حاجه الكترونيه او ولاعه يسيبها بره ماعدا الموبايل قالوا للناس تقفله وانا عن نفسى كنت سايبه فى البيت اصلا علشان ماكنتش عايز اى حاجه تلخمنى وكان اللبس عادى انا والاولاد والزوجه مجرد حرصت ان كل واحد يلبس الهدوم اللى بيكون مرتاح فيها بغض النظر عن كاجوال او كلاسيك كنت انا اخر واحد فى الصف وكان فيه كذا اسره وكان طابور السياحه اضعاف اضعاف الهجره (حوالى 200 شخص )وعلشان كدا كانوا محددين لهم كذا ميعاد بس برضه كانوا كتييير جدا المهم كنت عامل حسابى انى مايكونش معايا انا وشنطة مراتى اى حاجه معدن علشان مايزهقوناش واحنا داخلين يعنى مثلا كنت متعمد اكون لابس بنطلون ما احتاجش البس حزام له ( لان ناس هناك كان لازم تفك الحزام مادام الجهاز بيدى تحذير ) والشنطه الحريمى مافيهاش غير اكل للاولاد وازازة ميه ومناديل فقط فماكانش معايا اى معدن غير ميدالية المفاتيح المهم بصوا فى الشنطه بعد مامرروها من الجهاز وسابوهالنا عادى وانا تركت المفاتيح وعديت لقيت الجهاز بيدى اشاره انذار فاكتشفت ان الفلوس الفضه معايا هى اللى عملت كدا المهم عدينا بسلام ودخلت يمين بعد البوابه الالكترونيه لقينا زى كاونتر بتوريله الجواب التانى ويديلك ورقتين فيهم رقمك فى الدور بالنسبه للهجره كانوا بادئين ب 600 فما فوق وانا كنت اخر واحد وكان رقمى 610 ففهمت ان فيه واحد ماوصلش ( كنت حابب اركز فى كل حاجه علشان اقدر افيد باى معلومه)



المهم قعدنا بعد ما اخدت الرقم وورقه مكتوبه بترتيب الورق وكنت مرتبه انا مسبقا زى ماكان مكتوب على سايت النت وطلع هو فعلا نفس الترتيب وانتظرنا دورنا لحد ماوصلوا لرقمى قمت لوحدى بدون الاولاد وروحت على الشباك اغلب اللى فى الشبابيك سيدات متقدمات نوعا ما فى السن بس كان واضح انها مصريه ( شبابيك الهجره ارقامها 12 و13 اما شبابيك السياحه فارقامها من 1 الى 11 ماعدا رقم 4 فدا الكاشير وشباك القنصل اخر شباك رقمه 15)اخدت نسخه من رقم دورى وسابت لى النسخه التانيه كنت فاكر هاتاخد الورق كله مره واحده انما كانت بتطلب شهاده ورا التانيه اول حاجه طلبت الجواب التانى وطلعت الدوسيه بتاعى من عندها كان فيه كل حاجه فاتت من اول ورق كنت كتبته على النت علشان ادخل فى القرعه وطابعينه بالصوره بتاعتى ابيض واسود ولغاية الورق اللى كنت باعته لكنتاكى وطلبت بعد الجواب المؤهل وصورته وترجمته بعد ماسالتنى انا حاصل على ايه ( من الاسئله الهامه عندهم ) ورديت عليها بعدها طلبت شهادة الميلاد اصل وصوره وترجمه انا عن نفسى كنت مصور الترجمه كمان قالت لى انا مش عايزه غير صوره واحده بتاعة الاصل وماكانتش بتاخد صوره الترجمه والحاجه التانيه كنت فاكر انها هاتاخد كل شهادات الميلاد لينا كلنا مره واحده طلع انها بتاخد بالعكس يعنى كل الشهادات الخاصه بالشخص وبعد كدا ترجع تعيد الكره تانى للشخص المرافق له
طلبت بعد شهادة الميلاد شهادة الجيش وبعدها الفيش وصورته (بالرغم من انهم بيحتفظوا بالاصل )وبعد كدا طلبت شهادات الزوجه بدءا بشهادة الميلاد والفيش بصورهم طبعا وبعدها شهادات ميلاد الاولاد بصورهم وبعد كدا الصور الشخصيه للكل واحده لكل شخص واخر حاجه الباسبور (مع انه اول حاجه مكتوبه فى الورق ) ومن غير صوره له وكل دا دبسته مع كمان رقمى فى الدور فى الفايل وسالتنى على المدام والاولاد قلت لها معايا فى الاستراحه فسكتت واديتنى ورقه قالت لى دى هاتدفع بيها فى شباك رقم 4 رسوم الفيزا والورقه دى فيها جدول به رسوم فيزا لكل حاله وعلامه امام مبلغ 440 دولار ( المبلغ دا يضرب فى عدد الافراد )اللى تناسب حالتنا كهجره عشوائيه وورقه تانيه قالت لى دى للدى اتش ال عند الكونتر الرخام جنب الباب وقالت لى احتفظ بالنسخه التانيه من رقم دورى واستريح لحد مايجى الرقم تانى وتقابل القنصل عند كدا حسيت ان كل حاجه ماشيه طبيعى وان ربنا مسهل الامور

 

 

[hanydlt]

دعوه لموضوعي

المشوار الى امريكا

جات بعد شوية مقابله القنصل كانت سيده لطيفه والعربى عندها ممكن يتفهم انا اديتها نسخه من نسختين الدى اتش ال لانه قالى واحده ليا والتانيه للقنصل ورسوم الفيزا ادانى برضه 2 ريسيت فتحتهم اتاكد من المبلغ هو اللى انا دفعته بحكم انى محاسب فلقيت مكتوب على واحده نسخه للعميل قلت اشوف النسخه التانيه لقيت مكتوب عليها ادارة الهجره بالسفاره ففهمت ان القنصل هاتاخدها برضه وكان الشخص اللى بياخد الرسوم هو الوحيد اللى ما لفتش نظرى للورقتين اللى اخدتهم منه دا غير انه ماكانش موجود فى مكانه فترات كتير يعنى من الاخر هو الوحيد جوه المكان دا اللى تحس منه انه موجود بمصر المهم القنصل طلبت منى النسخه بتاعتى بتاعة الرسوم مع نسختها فاستغربت واما اديتهالها قامت ماضيه عليها ورجعتها لى ماكانش فيه اسئله غير تقسم ان البيانات صحيحه وكررت نفس السؤالين اللى سالتهم الموظفه الاولى واتضح لى ان هم دول السؤالين المهمين بالنسبه لهم ( مع التاكد من المؤهل )وهو سافرت بره مصر قبل كدا ( ردى كان بالنفى فماعرفش لو اه كان ايه اللى هايطلبوه ) وهل انا او مراتى سبق لنا الجواز قبل كدا فكان ايجابة السؤالين دول هم اللى كانوا ممكن يعطلوا الموضوع واى حاجه تانيه لاء قامت قالت لى البصمات كنت اخدت بالى ان فيه جهاز سكانر صغير اضع عليه صوابعى جنب الشبك فاخدت بصماتى على الكمبيوتر قدامها وبعد كدا الزوجه لان فى مرة القنصل اما جه دورى قمت واخدت معايا الاولاد والزوجه قلت دى اخر حاجه واكيد هاتطلبهم المهم بعد بصمات الزوجه قالت لى مبروك فقعدت اركز فى المده اللى هاتقولها علشان استلام الباسبور قالت لى اجراءات اداريه لمدة اسبوعين شكرتها ومشينا على طول
اتمنى اطالتى فى الشرح ماتكونش زهقتكم بس انا من النوع اللى احب اعرف كل التفاصيل مهما كانت صغيره واستفدت كتير من الاعضاء الكرام هنا فحبيت لو حد عايز يعرف التفاصيل كلها يلاقيها وابقى ساهمت بحاجه بسيطه وربنا يوفق الجميع ان شاء الله

 

 

[Mafia]

السلام عليكم ورحمة الله وبركاته
استاذ هاني هو انت من الفائزين في امريكا وحصلت على التاشيرة هل وصلت امريكا
والي اي ولاية او اين تنوي ان تقيم وشكرا

 

 

[hanydlt]

دعوه لموضوعي

المشوار الى امريكا

الحمدلله حصلت على التاشيره وحاليا فى ميتشجن

 

 

[Mafia]

اقتباس المشاركة الأصلية كتبت بواسطة hanydlt الحمدلله حصلت على التاشيره وحاليا فى ميتشجن

ممكن تقول لنا ليه اختارت ميتشجن
وياريت نشوف منك موضوع عمار يا امريكا زي بتاع كندا عشان اليوميات والحياة هناك

 

 

[hanydlt]

دعوه لموضوعي

المشوار الى امريكا

اقتباس المشاركة الأصلية كتبت بواسطة Mafia ممكن تقول لنا ليه اختارت ميتشجن وياريت نشوف منك موضوع عمار يا امريكا زي بتاع كندا عشان اليوميات والحياة هناك

والله هو الكل اجمع ان اللى يروح امريكا لاول مره يفضل انه ينزل على حد يعرفه وانا للاسف ماكنتش اعرف حد فكانت ميتشجن من الولايات المتوسطه السعر وجوها الصيفى كويس جدا وفيها كبرى الجاليات العربيه والاسلاميه فى امريكا وبها كبرى شركات صناعه السيارات زى فورد وجنرال موتورز وانا كنت شغال فى مصر فى شركة سيارات فكانت مجرد فال حسن مش اكتر
وان شاء الله هاعمل توبيك لليوميات هنا وايه اجراءات استخراج الاوراق وكيفيه البحث عن عمل فى اقرب فرصه باذن الله

 

 

[نانا محمد]

السلام عليكم ورحمه الله وبركاته
لو سمحت عاوزة اسال علي التقديم للهجرة الامريكيه بالقرعة
انا متزوجه و حامل ومعنديش اطفال تاني فلو سمحت عندي كذا سؤال:
1- ايه هوه وقت التقديم ل lottery 2016 هل ليه ميعاد بيفتح فيه وبيقفل ؟ ولا بيفتح من دلوقتي؟
2- لو التقديم مفتوح دلوقتي. هل ينفع اقدم دلوقتي ولا انتظر للولاده( الولاده قريبا ان شاء الله) عشان اضيف المولود؟
3- احنا مصريين بس هل فيه مشكله لو طفلي اتولد في السعوديه ان شاء الله؟
4- هل ينفع اعمل ابليكشن بأسمي وابليكشن اخري باسم زوجي ولا ده غلط يعني كل واحد فينا يقدم طلب؟
5- بيطلبوا في الابليكشن mailing address ف ده اللي حضرتك قولت عليه بيكون في امريكا ولا ده بتاع مصر العادي؟
شكرا علي الرد

 

 

[hanydlt]

دعوه لموضوعي

المشوار الى امريكا

اقتباس المشاركة الأصلية كتبت بواسطة نانا محمد السلام عليكم ورحمه الله وبركاته لو سمحت عاوزة اسال علي التقديم للهجرة الامريكيه بالقرعة انا متزوجه و حامل ومعنديش اطفال تاني فلو سمحت عندي كذا سؤال: 1- ايه هوه وقت التقديم ل lottery 2016 هل ليه ميعاد بيفتح فيه وبيقفل ؟ ولا بيفتح من دلوقتي؟ 2- لو التقديم مفتوح دلوقتي. هل ينفع اقدم دلوقتي ولا انتظر للولاده( الولاده قريبا ان شاء الله) عشان اضيف المولود؟ 3- احنا مصريين بس هل فيه مشكله لو طفلي اتولد في السعوديه ان شاء الله؟ 4- هل ينفع اعمل ابليكشن بأسمي وابليكشن اخري باسم زوجي ولا ده غلط يعني كل واحد فينا يقدم طلب؟ 5- بيطلبوا في الابليكشن mailing address ف ده اللي حضرتك قولت عليه بيكون في امريكا ولا ده بتاع مصر العادي؟ شكرا علي الرد

وعليكم السلام ورحمة الله وبركاته
1-وقت التقديم بيكون شهر اكتوبر من كل عام اللينك دا https://www.dvlottery.state.gov/ بيكون متاح وقتها للتسجيل والاوقات اللى بخلاف كدا بيكون اللينك متاح للكشف عن نتائج السنه السابقه
2-التقديم فى اكتوبر 2015 هايكون ان شاء الله ل lottery 2017 لان النتيجه بتكون فى مايو 2016 وبدايه المقابلات للمقبولين فى اكتوبر 2016 وبتستمر حتى سبتمبر 2017 (لوترى 2016 فاتت خلاص)
3-مافيش مشكله فى حاله الولاده خارج مصر اهم حاجه لو حصل نصيب وتم القبول يتم طلب بان تكون المقابله فى السفاره الامريكيه فى مصر(تفاديا لطلب ضامن)
4-ال mailing address دا اميل عادى غير اللى كنت اتكلمت عنه (التانى عنوان حقيقى فى امريكا بيتطلب لو حصل نصيب وتم القبول ان شاء الله)
بالتوفيق ليكوا وللجميع باذن الله

 

 

[hanydlt]

دعوه لموضوعي

المشوار الى امريكا

اقتباس المشاركة الأصلية كتبت بواسطة Mafia السلام عليكم ورحمة الله وبركاته استاذ هاني هو انت من الفائزين في امريكا وحصلت على التاشيرة هل وصلت امريكا والي اي ولاية او اين تنوي ان تقيم وشكرا

وعليكم السلام ورحمة الله وبركاته
ايوه انا الحمد لله من الفائزين ووصلت من حوالى 10 ايام