عائدون...25 يناير .....2012

[dr-amira]

خرجت جموع الشعب المصري فى كل ميادين مصر فى ثورة 25 يناير رافعين شعار التغيير والمناداة بـــــ "عيش .. حرية .. عدالة اجتماعية"

سالت الدماء الطاهرة من اجل ذلك فما كان الا أن تخلى رأس النظام مع إستمرار جسده ليديروا كل مجريات الامور فى مصر!

زدادت الامور سوء فى كل نواحى الحياة .. وكممت أفواه الثوار وحبسوا وقتلوا وانتهكت أعراض الفتيات على مرأى ومسمع من الجميع .................!

لابد ان تحقق كل اهداف ثورة 25 يناير 2011 ونحن على خطى النصر سائرون

25/1/2012 لإسقاط حكم العسكر
كفانا ذل-كفانا سكوت-كفانا ظلم
هنكمل ثورتنا السلميه
ومطالبنا زى ماهيه
"عيش -حريه-عدالة اجتماعية"

من أجل الوطن موعدنا يوم 25 يناير 2012 لتسليم السلطة من المجلس العسكري لمجلس الشعب

المجد للشهداء ومصابى الثورة فأنتم فقط العظماء .

 

[Eng Hesham]

وتبتدى تانى الحكايه

وبعد موضوع بايو باشا

يظهر موضوع الدكتوره اميره للنور

ويارب تكون ثوره احسن من اللى فاتت

 

 

[dr-amira]

تحذير هـــآآآم لكل شخص سينزل الميدان يوم 25-1-2012
احنا مش نازلين نحتفل .. لأن ثورتنا لم تنجح حتى الان
ولن نرقص يوما علي جثث الشهداء ،،

1- خليك فاكر ان ثورتنا سلمية لأبعد حد عشان الادب هو اللى بناخد بيه حقنا
2- اياك حد يستفزك من الشرطة او الجيش وتظهر بصورة سيئة امام الاعلام
3- هناك منشورات توزع تفيد بحمل السلاح يوم 25 يناير القادم من شخصيات مجهولة لتشويه الثوار ... اعلم انها فتنة ولا تحمل اى اسلحة معك
4- قم بالتظاهر سلمياً حتى نستطع ان نأخد حقوقنا
5- لا تجعل فرق بين مسلم ومسيحي او حزب وحزب اخر...فكلنا نريد اسقاط حكم العسكر
6- لا تأخذ اطفال معك دون سن 12 تجنباً لأى شيء قد يحدث وحرصاً على سلامتهم
7- ضع نصب عينيك دم الشهداء دائماً
8- لا تقم بالادلاء بأى كلمة امام كاميرات الفضائيات تجنباً لأى خطأ غير مقصود منك وبالتالي يؤثر بالسلب على تفكير المشاهدين .. الا اذا كنت متمكن من أدوات الحوار
9- لا تترك الميدان لأى سبب من الاسباب
10- اذا حدث اى نوع من انواع العنف ضدنا من فضلك اجلس صامتا بالميدان وانتظر الدعم ونتمنى ان تظل سلمية للنهاية

الله .. الوطن .. الثورة

 

 

[Ahmed Kotb]

أما نشوف إيه اللي هيحصل
المهم إني هخلص إمتحانات قبل الثورة الكلاكيت تاني مرة
ياخوفي بس من مواطنينا الشرفاء

 

 

[دموع الورد]

تصدقوا أيام الثورة دى على قد ماكانت أيام كلها شد أعصاب وتوتر وقلق بس والله كانت أجمل وأحلى أيام وذكرياتها كلها رائعة بما فيها الطريف والمؤلم لاتنسى بجد وبشتاقلها أووووووى

حتى هنا فى المنتدى فى موضوع بايوباشا ومشاركات الاعضاء ولمتنا كلنا أيام ماكنا متجمعين على هدف واحد والروح كانت واحدة مش زى دلوقتى للأسف

ياترى الروح دى ممكن ترجع تانى ؟!

 

 

[بنت شعنونة]

ايه توقعاتكم صحيح؟؟
انا شايفة انه مش هايحصل اي حاجا!!
بالكتير شوية فلول وشوية بلطيجة وشوية ثوار وحرب شوارع وينفض المولد

انتوا شافين ايه؟؟

 

 

[O.S.A.M.A]

موضوعك ده فى وقته يا أميرة

لأن أنا واحد من الناس لسه مش مقتنع أن كان فيه ثورة وأن المفروض كان ليها أهداف اللى هيا ما حصلتش

المفروض يوم 25 هو يوم ثورة مش يوم إحتفال بثورة
لازم إحتفالاتنا تتأجل لغاية أما المواطن البسيط يحس أن حاله أتصلح وأن البلد أتغيرت وأن الثورة آتت أُكلها

الثورة لازالت قائمة

 

 

[Sonesta]

دعوه لموضوعي

ليالى المطاريد.,,,هل تعلم

اقتباس المشاركة الأصلية كتبت بواسطة O.S.A.M.A موضوعك ده فى وقته يا أميرة لأن أنا واحد من الناس لسه مش مقتنع أن كان فيه ثورة وأن المفروض كان ليها أهداف اللى هيا ما حصلتش المفروض يوم 25 هو يوم ثورة مش يوم إحتفال بثورة لازم إحتفالاتنا تتأجل لغاية أما المواطن البسيط يحس أن حاله أتصلح وأن البلد أتغيرت وأن الثورة آتت أُكلها الثورة لازالت قائمة

فعلالالالالالالا أسامة

اللى قولته إحنا نازلين على أساسه

ثورة مش إحتفال

 

 

[O.S.A.M.A]

اقتباس المشاركة الأصلية كتبت بواسطة بنت شعنونة ايه توقعاتكم صحيح؟؟ انا شايفة انه مش هايحصل اي حاجا!! بالكتير شوية فلول وشوية بلطيجة وشوية ثوار وحرب شوارع وينفض المولد انتوا شافين ايه؟؟

مش عارف انا سمعت الكلام ده فين قبل كده ؟
فين يا واد سمسم ؟ فين يا واد يا سمسم ؟ .. أه أفتكرت

انتى مش قولتى الكلام ده من سنة يا شانا ؟ وقولتى ان مافيش حاجة هاتحصل وحصلت ثورة "أو حاجة شبه كده "

إتفائلي يا شانا وخليكى واثقة أن الشعب ده هايعمل حاجة بإذن الله

 

 

[only you]

14 يوما فقط.. ويعود الثوار للميدان.. 14 يوما فقط.. ويعود هتاف: الشعب يريد إسقاط النظام، 14 يوما فقط، لتعود سماء مصر تتلألا بأرواح الشهداء..
25 يناير اقترب..
الثورة مستمرة...