لاندنج جديد لانج جدا !

[bongeorge]

الصحف المصرية والعربية

كنت حابب أشارك معاكم التجربة اللاندنجية من مصر الى أونتاريو

أولا" أنا باشكر ربنا على كل شىء و انه عرفنى على ناس محترمة و حلوة جدا" كتير هنا و أخص بالذكر د حسام يوسف اللى ساعدنى من أول خطوة و مازن أطرش و مدام جيسيكا و د قناوى و نصار لينك

انا قدمت كيبيك 2 2009
الفايل نمبر 3 2009
الانترفيو دمشق 12 2009
تاريخ التقديم فيد 12 2009 ( ماتضيعش وقت بعد ال CSQ علشان هى مش ناقصة تضييع وقت)
الميديكال 10 2010
الفيزا 10 2010
تاريخ اللاندنج 7 2011

أنا تقريبا أخدت 9 أشهر بعد الفيزا علشان اللى حصل من أول أحداث كنيسة القديسين مرورا" بالثورة الميمونة و اللجان الشعبية و كان لازم أطمن على أهلى الاول قبل مافكر فى السفر و الحمد لله كل شىء بقى تمام فى مصر دلوقتى !

أشتريت لاب توب قبل ما اسافرو اشتريت موبايل E72

نصيحتى ليكوا ماتشتريش اى موبايل غالى من مصر انت تقريبا بتاخده هنا ببلاش مع الشركة اللى انت بتشترك معاها مثلا" مع شركة فودو فى موبايل Samsung galaxy ثمنه هنا 650 دولار لو هاتشتريه لوحده ... لكن لو هتاخد خط ( و ده أكيد هايحصل ) يبقى ب 125 دولار بس

أرجوكم ماحدش يشترى موبايل جامد من مصر ( ألا لو هو اريدى عندك هاته و أعمله Unlock ب 25 دولار تقريبا") بس هايحد كتير من أختيار العروض لان معظم الشركات هنا مش متوافقة مع ال GSM- UTMS اللى فى الموبايلات المصرية لكن بيستخدموا نظم مختلفة
أنا طبعا" لسة ما اشتريتش الخط و لا اى حاجة و تايه فى اختيار اى شركة أفضل و اى نظام أفضل ..... الأنظمة هنا كتير جدا: من 15-20-25-30-45 دولار تقريبا فى الشهر
---------------------------------------------------------------------------------

المهم .... نبتدى بموضوع حجز تذكرة الطيارة .... انا أخترت ال KLM و كانت غالية جدا ب 7300 جنيه رايح جاى لانى اتأخرت فى الحجز لشهر 6
يا ريت الناس تحجز بدرى و مفيش داعى رايح جاى لو مش عارف انت جاى امتى ....بس انا حجزت رايح جاى و خلاص لأن كان الرايح بس بنفس سعر الرايح جاى فقولت هى هى ( أستخسار يعنى !)
دايما أعملوا تشيك على الwww.thomas*****gypt.com وبعدين شوف أرخص سعر على انهو خطوط طيران..... ألقط الاسم ..... Alitalia مثلا ... أطلع على ال www.alitalia.com شوف العروض هناك ممكن تطلع أرخص من شركة السياحة بكتير أو زيها ....دور كتير بس
أنا كنت ممكن أسافر على ال Alitalia و يوم سبت كمان ( علشان الناس تبقى فى أجازة فى كندا و تستناك ) و رايح بس ب 3700 جنيه مصرى فقط
تلف الايام و اتزنق فى الوقت و احجز متأخر علشان ظروف البلد و الشغل و أحجز ب 7300
(نفس الارقام بس متلخبطة ! هاجة أجيبة خالص )
أنا كتبت كتير فى موضوع حجز الطيران ده و قولت نبعد عن ال BA BMI و نبعد عن Austrian airlines و Lufthanza علشان بيسمحوا شنطة واحد بس 23 كجم لكل فرد و هاند باج
ال KLM و Alitalia و الاتحاد و Airfrance , Delta سماح شنطتين 23 كجم لكل فرد و هاند باج برضه 12 كجم تاخدها معاك الطيارة

بالمناسبة أنا كنت وازن الشنطتين فى البيت و 23 كجم الا 3 جم !
من 23.5 الى 32 كجم هاتدفع 100 دولار زيادة ...خد بالك 600 لحلوح !!
و قوم أيه أروح أوزن الشنط فى المطار بتاعنا الشنطة تدى واحدة 18 و التانية 16

- خد معاك قرايبك فى المطار و حط بزيادة و جهز شنطة فاضية علشان لو فى وزن زيادة ياخدوه معاهم و اوزن قبل ماتدخل على وزن الشنط
يوم السفر و الوداع يا ريت تروح بدرى و لو انت مش من القاهرة ...يبقى لازم تبيت عند حد من قرايبك فى القاهرة و خصوصا الحالة الأمنية و الهرجلة و السبهللة اللى فى مصر دلوقتى .... ممكن الطرق تتقفل .... ممكن أئتلاف البادنجان مايعجبهمش البابا غنوج يروحوا يعتصموا فى صلاح سالم مثلا او الطريق اللى انت جاى منه و يتقفل و ماتعرفش تروح طيارتك ( حصلت فعلا")

- ماحدش ينسى تصريح السفر بتاع الجيش (ظابط 15 يوم و عسكرى 30 يوم )

- الهولندية من مصر الى أمستردام مش بطالة ..لكن فترة الترانزيت الكبيرة هاتدمرك و خصوصا لو معاك أسرة مش سينجل زى حالاتى ..... طبعا الانتظار الكبير ده معناه أكل و شرب و فلوس

المهم أول ماوصلت مطار شخيبول ( أمستردام) دورت على Arrival sign و أمشى مع الناس و خليك لذيذ
طبعا" ظابط الججوازات هناك قاللى انت عايز تطلع برة المطار ليه؟ قولتله مش عايز خبيبى .... قاللى يبقى تقعد قولتله طيب .... أروح فين بقى ؟ قاللى أطلع فندق فى الدور التانى ( المطار كله محندق و دورين بس و بالتالى مش عاتتعب فى التيرمينالز ...زى شار دى جول مثلا )
الفندق أسمه Yotel Hotel
good evening mam >>>>i would like to have a room here >>>>
its 78 Euros
do u accept dollars ?
nop
only credit card or euros

روحت طالع على الا Exchange office لقيته قفل الساعة خامسة و انا جيت الساعة سبعة.... باعتبار انى رايح أشترى كنتاكى مثلا" بيقفل بدرى و خلاص
يبقى مفيش غير waiting hall فى الدور التانى برضه كراسى فوتيه مريحة .... تليفزيون 120 بوصة .... يبقى ناقص بيبسى

أتعرفت على كام واحد هولندى على مصرى و ضيعت الوقت و نمت 3 ساعات تقريبا و راسى بتلف و عينى بترف

يا ريت لو انتظار طويل و خلاص اتزنقت فى الهولندية ( هى مش وحشة ) و معاك أسرة يبقى لازم تحجز الفندق ده من مصر (من جوة ال KLM اللى فى ميدان طلعت حرب أو شركة السياحة اللى بتحجز معاها )


فاصل و نواصل .....

 

[bongeorge]

الملخص
1- ماتشتريش موبايلات من مصر
2- أحجز الطيران بدرى جدا" و أبعد عن الشتاء القاتل
3- أحجز الوجبة و الكرسى من النت و ريح دماغك و أعمل برضه Check in من النت
4-لا تنسى تصريح السفر بتاع الجيش ( مهم جدا" )
5- خد معاك هدوم بزيادة و حط اللى مش مهم على الوش و نزله قبل الوزن ( ده لو محتاج هدوك كتير جدا" زيى )
5- أشترى 2 شطافة الواحدة ب 15 ج فى مصر و حرف T توصيلة
6- ماتنساش ال ترانسفورمر ( أنا نسيته )
7- الشواحن و أكسسوار اللاب حطه فى شنطة اللاب
8- أشترى يورو من مصر و شوية فكة لو نازل ترانزيت فى اى مطار أوروبى

لو فى أى حد عنده أى سؤال عن الطيارة يا ريت يقوللى أحسن تعبت من الكتابة !

 

 

[bongeorge]

لو فى حد فى ماركهام أونتاريو يا ريت يقوللى :)
- أحسن بنك أشترك فيه
- أحسن خط موبايل

 

 

[bongeorge]

برجاء أطالة مدة التعديل من 15 دقيقة لوقت اطول ... كان فى حاجات كتير عايو أعدلها و بعد م اعدت اعدل نص ساعة قاللى معلش ... وقتك خلص ! هى دى مصر !

 

 

[السيد ميدو]

تسجيل حضور
معاك فى المغاره
بس انت ماقلتش انت حجزت لمونتريال ولا لمكان تانى
وايه الترانسوفورم ده

 

 

[bongeorge]

اقتباس المشاركة الأصلية كتبت بواسطة السيد ميدو تسجيل حضور معاك فى المغاره بس انت ماقلتش انت حجزت لمونتريال ولا لمكان تانى وايه الترانسوفورم ده

أونتاريو لأنى سينجل و مش هاستفيد أى حاجة من كيبيك بتاعت المساعدات المالية للأطفال (child tax benefit ) و جوها سىء و الشغل قليل و الفرنساوى بكرهه

لكن بالنسبة للمتزوجون الموضوع مختلف لأن الحياة هاتبقى أرخص

تورونتو جميلة جدا" .... البلد أكثر من رائعة .... كندا تستاهل بجد

 

 

[السيد ميدو]

انا بعمل لاندنج حاليا بمونتريال==لكن ايه هو الترانسفورمر ده
بالنسبه للبنك احنا عملنا اشتراك فى hsbc لانه مشهور ومعروف بمصر وبيقبل التعاملات من البنك الاهلى المصرى

 

 

[shawi]

اكتب اللي انت عاوزه على الوورد
ولما تخلص وتفكر وتشرب الشاي
مخخ الكلام وبعدين انسخه في الصفحه هنا كوبي بيست
وكل سنه وانت طيب ومش حتتزنق في الوقت
حمدالله عالسلامه
انا ركبت الهولنديه
وبصراحه مش بطاله
ترانزيت امستردام احسن من مايروح الحجز عليك في زحمة الموسم وتلاقي نفسك متأخر أكثر
ترانزيت لندن مش بطال وبالذات لما يكون من نفس التيرمنال

فيه شيئ فاتك تقوله

محدش يحمل معاه سوائل اكثر من 100 ملي ليتر
يعني كولونيا 130 بيرموها ( اللي بيحب الشبراويشي 555) ميجبش قزازه كبيره

الادويه المتكرره المستدامه..دايما جيب معاك الوصفه الطبيه علشان الدكتور هنا يقدر يصرفلك زيها والا...........

اذا اشتريت حاجه من السوق الحره خليهم يحطوها في الكيس البلاستيك ويقفلوه هما مش تقفله بالدبابيس والا لصق خارجي
انا شفت ست كبيره من لبنان بتشتغل في الامم المتحده مستشاره وفي لندن معاها 3 قزايز كواونيا وفي علبها الاصليه واقل من 100 مللي
قام قالها ممنوع حلفت له بكل الايمانات انا خدتها من الست كده والشنطه عليها شعار السوق الحره ودي شارياها هدايا والكيس مغلق
قال لها حل واحد نفتح العلب ونفحصها تحت الجهاز بره كراتينها ( اقصد العلبه بتاعة كل واحد)
قالت له ازاي وتبقى هديه ازاي بعد كده!
قالها ماليش دعوه.............هوه ده الحل!!
قامت استسلمت بعد الطابور وراها ما وصل من الهرم لمصر الجديده
ودخلها الاشعه وطلعها وقال اتفضلي بالسلامه
طبعا بقت زي كانها شاريه برفانات ريفيربش............حتى الريفيربش في الاليكترونيات بتبقى متغلفه زي الجديده بالظبط

 

 

[حسام]

حبيب قلبي جورج باشا العنتبلي
حمدالله ع السلامة
وموفق ان شاء الله فى اختياراتك خارج كيبيك
تسجيل متابعة يا عمنا فى اللندنج اللانج

 

 

[salamatarek]

حمد لله على السلامة يا بونجورج
بقالنا كتييييييييييير ما شفناش زملاء بيعملوا لاندنج, منه لله اللى كان السبب

ربنا يوفقك ويكرمك ان شاء الله
مع تحياتى