أنا وأنتم ....وتورونتو

[Dr. Ahmad]

الصحف المصرية والعربية

فرانكفورت كانت بصراحة برد جدا ...جيبت البلوفر من الهاند باج ولبسته....وتوجهت الى الاوتوبيس اللي وصلنا لبيت جحا الشهير بمطار فرانكفورت الدولي....وكان قدامي ساعة واحدة بالظبط على ميعاد اقلاع طيارة اير كندا....حجرة المدخنين في مطار فرانكفورت تحسهم عاملينها عشان يهزءوا المدخنيين ...عبارة عن غرفة من الزجاج على الاربع اتجاهات ..مساحتها اصغر من مساحة علبة السردين ...وفيها حوالي 100 واحد ومكتوب عليها “Camel smoke zone” واللي رايح واللي جاي يبص على اللي جوه ويضحك...
وصلت عند بوابة الطيارة ...حطيت الهاند باج على السير ...واللاب توب لازم يخرج من شنطته ...والساعة والمفاتيح والكوينز والحزام وكل حاجة لازم تتحط على السير ...وبعد ما قلعت كل حاجة معدن ...برضه الجهاز بيصفر ...ظابطة بوليس جاتلي بالجهاز اليدوي وكل شوية الجهاز يصفر في منطقة معينة ....لأ بقه انت لازم راجل يشوفك ...جالي واحد قاللي ماتقلقش ...بس اقلع ...لسه باقلع الجزمة....قاللي استنى....وراح واخدها كاشف عليها ولقاها كلها معدن....ادهالي وقاللي مع الف سلامة من غير ما يكمل تفتيش والحمد لله.

 

 

[Dr. Ahmad]

اقتباس المشاركة الأصلية كتبت بواسطة Sweet Heart حمدالله على السلامة د/ أحمد، بالتوفيق إن شاء الله.

الله يسلمك يا فندم ..وشكرا لحضرتك

 

 

[Dr. Ahmad]

فوجئت ان تقريبا المانيا كلها كانت مسافرة كندا....طابور الجوازات كان زحمة جدا....والطيارة كانت زحمة جدا ...ومافيش فيها خرم ابرة فاضي الواحد ينام فيه....بصراحة 8 ساعات مالهمش طعم ولا لون ولا ريحة ...ما اعرفش عدوا ازاي ...بس الحقيقة طقم المضيفين كانوا ناس ذوق ذوق الصراحة ... حاجة غريبة بس افتكرتها...هي الوجبة ...انا طبعا كنت حاجز وجبة اسلامية ... الطيارة طلعت من هنا وجابولي الوجبة بتاعتي ..انا فقط لوحدي ...وكانت عبارة عن شوربة عدس وأرز وقطعة من اللحم ...لما الوجبة بتاعة باقي الركاب نزلت ..لاقيتها لازانيا مع سي فوود ..نفسي اعرف فيها ايه لو كانوا جابولي منها ...والوجبة التانية ...كانت عبارة عن ساندوتش خس مع طماطم بالنسبة لي ...وللباقيين كانت راب جبنة بالصوص ...وعلى فكرة بقى انا بلطجت عليهم وأخدت منهم عافية كده ....الرحلة مكنش فيها حاجة مميزة ...كل اللي فاكره ان كان فيه راجل هندي من السيخ كل خمس دقايق يروح عند المضيفة في مكان تجهيز الطعام ...ويقوم راجع بكوباية عصير برتقال ...وكان جنبي راجل الماني ووراه مراته ولا الجيرل فريند بتاعته ...كل لما يزهقوا تقوم جايه قاعدة على رجله ولا كأني موجود ...

 

 

[Dr. Ahmad]

وصلت الطيارة مطار بيرسون في تورونتو الساعة 12:30 بعد الظهر ...طابور الجوازات كان طويييييييل ...دخلت على ست عجوز حيزبون ...قالتلي روح املا الفورم يا حبيبي كويس وبعدين تعالى ...قولتلها ماهو مليان صح ...قالت لي انا قلت لك مش مليان ...قلتلها لأ مليان يا حاجة ...قامت مكشرة ومعلمالي على اللي مش مليان ولاقيت فعلا الاستمارة نصها كان فاضي ...يادي الكسوف ...بعد كده شاورولي على مكتب الهجرة ...لاقيت ظابط هناك من اصل افريقي ...غاية في الأدب والاحترام ...شاف الفيزا والباسبور والبرووف اوف لاندنج ...وسألني عن مراتي وولادي ...قلت له هيحصلوني ...سألني عن الفلوس قلت له اوريهالك قال لي لأ انا بس عايزك تمضي انها معاك ..قلتله حاضر يا معلمي ...واديت له العنوان ...وده كنت شفته من هنا في مصر في موقع easy roommate ..غرفة في تاون هاوس مع 3 اشخاص تانيين : شانتال ...وين...ريكاردو...شاملة الاكل واللاندري وكل حاجة ب 600 في الشهر ... وبعدين رحت على مكتب تاني للهجرة ...قابلت موظفة من اصل يوناني ..قعدت تتكلم معايا وفي دقيقتين عرفت عني كل حاجة وبلا بلا بلا ... ثم... ويلكوم تو كندا....وراحت مدياني شنطة مليانة ورق وكتب واسطوانات ...ما اعرفش فيهم ايه لغاية دلوقتي ...وبعدين موظف تاني من اصل اسيوي محترم جدا ...فهمني اعمل ايه بالظبط وقاللي اقدم على ال SIN وال OHIP وقال لي ا ن ال OHIP هيجيني بعد 3 اشهر من تاريخ اللاندنج وليس تاريخ التقديم ... وال PR هيجي بعد شهرين ...ثم توجهت لمكان استلام الحقائب ...ولاقيت الشنط متبهدلة ...وللاسف نسيت اخد معاي 3 دولار كندي كوينز عشان اجيب عربية للشنط ...في شركة هناك في ثواني خدت مني الشنط ..لاقيتهم ناس من اثيوبيا على ناس من لبنان كده وخدوا عشرة دولار في الموضوع ده ... وكمان كانوا عايزين بقشيش ...واخدت منهم ريسيت ... ظابط الجمارك كان شاب لطيف ...أخد مني ورقة things to follow اللي انا كنت كاتبها في فورم B4A وخلاني اجمع قيمة الحاجات اللي انا كاتبها فيها ...دخل ختمها جوه وفرغها في فورمة تانية اسمها B4 ودي لو حد عايز يخلص علطول يملاها قبل ما يجي وبعد ما ختمها اداهالي وقالي مش عايز حاجة من الحاجات اللي انت جايبها معاك ولا اعايز اعرفها خالص ..ومالمسش الشنط خالص ...وبعدين خرجت من المطار ...ولا كأني دخلت جوه تلاجة ..رحت داخل تاني بسرعة ....قعدت الف حوالين نفسي شوية ...جبت كارت من المطار وكلمت اهلي في مصر وكلمت شانتال في مكتبها قلتلها اني وصلت ...قالت لي حمدا لله على السلامة يا برنس الليالي.... خد تاكسي وتعالى ...قلتلها تاكسي ولا ليموزين ...قالت لي ما فيش فرق ..الاتنين هيكونوا بحوالي 75 دولار من المطار الى سكاربورو ...والمهم ان تقريبا السيخ مسيطرين على سوق الليموزين...رحت مع واحد منهم ب 77 دولار ...وطبعا طول ما انا كنت في السكة وانا عمال استغرب على لون السما مع لون الشجر ...زي ما اكون في فيلم كارتون... السماء في مصر لونها ماطلعش ازرق بعد 31 سنة يا جدعان ...
وبدأت الرحلة الكندية .....

 

 

[Dr. Ahmad]

وصلت البيت تقريبا الساعة 3:30 العصر .. كان تاون هاوس ..عبارة عن بيت في مجموعة بيوت كلها نفس الشكل ..وعاملين زي اتحاد ملاك ..ليهم الباركينج بتاعهم فقط ...لاقيت الحاج وين قاعد مستنيني وقاللي :
- ويلكم اماد
- شكرا يا وايني
- انا اسمي وين مش وايني
- وانا اسمي احمد مش اماد
- ما انا عارف ،... اماد مش اماد
- ماشي
المهم .. البيت كان عبارة عن 3 ادوار في بعض : الدور الاول فيه الباركينج وغرفة اللوندري ومخزن ...الدور التاني مطبخ وسفرة وليفينج ...والدور التالت عبارة عن 3 غرف نوم وحمامين ...والغريب ان تقريبا كل شبر في البيت فيه يا اما تليفزيون يا اما شاشة بلازما ...وكل غرفة فيها DVD PLAYER فهمت منهم بعد كده ان التلفيزيون والافلام مهمة جدا مع وجود الثلج والعواصف... قعدت اتكلم انا و"وين" شوية وقعد يحكيلي قصة حياته وازاي اتجوز شانتال ...وانا اصلا مصدع ومش طايق نفسي ودماغي هتفرقع ... شوية وشانتال رجعت من الشغل ...وقعدت تقوللي قواعد البيت ...كل واحد ليه مواعيد في استخدام اللوندري وكل واحد ليه جدول ينظف فيه... والخ الخ الخ....كل اللي طلبته مني اني اروح بكره اجيب ال SIN عشان تكتبه في العقد اللي هتعمله لي ...قلتلها طيب اجيب لك الفلوس دلوقتي ...قالت لي لأ طبعا بعدين ...استريح الاول ...ونزل هدومك من الشنط ...ونام و خلص مشاويرك ....وبكره تبقى تدفع لو حبيت ...طيب هتاخدي شهرين والتأمين ...قالت لي لأ شهر واحد والتأمين ...ناس ذوق الصراحة ...وما طلبتش ضامن ولاحساب في البنك ولا أي حاجة ...وموضوع الضامن ده انا كنت خايف منه جدا الصراحة ...ولكن بفضل الله كل حاجة عدت زي السكينة في الحلاوة ...

 

 

[السيد ميدو]

حمدالله على السلامة د/ أحمد

 

 

[Moe]

حمد لله علي السلامة د احمد انت فين في سكاربورو??ربنا يكرمك
اصحي الصبح ان شاء الله يوم الاتنين ..ادخل اي convenience store او سوبر ماركت لو فيه واحد قريب منك واشتري 5 tokens ارخص ..لو ما فيش يبقي اشتري من اي subway مكان ما بتحط التذاكر..لو فيه تيم هورتينز قريب منك ادخل اشتري double double coffee يعني 2 سكر و اتنين كريم او triple triple علي حسب ما تحب مع Candian Maple عشان تكون بقيت كندي رسمي ..عشان اليوم الطويل.

2-روح علي اقرب محطة مترو subway و خد خط ال East To Kennedy Station ..اسئل where is the RT..حتتطلع السلم المتحرك حتاخد قطر صغير خاص بسكاربور بنفس التذكره لحد Scarborough Town Center..هو حيتكلم لما توصل المحطه دي.

3-اطلع بره علي شمالك المول Scarborough Town center mall ..خد يمينك لحد.
.200Town Center Crt اول عماره و اكبرهم .
9734400(416) ..اسئل السكيورتي تحت where is service Canada??ادخل اعمل ال SIN No..هل ال OHIP هناك اسئل ال agent انت مش عارف صراحه بس انا اعرف واحد في
2063Lawrence Avenue east..بيروحله باص No 54
من محطة Lawerance Ave East..حتسمعها و انت راكب ال RT

. لما تخلص ادخل المول و اتغدي و خد معاك اكل البيت لحد ما تعرف محلات الاكل فين..اول ما تدخل في ال Food Court في محل عربي اسمه المدينه..اول واحد ..اكله حلال..شاورمته مش قد كده..الشيش طاووق محترم ..في وش البوابات حتلاقي ال Information Desk ..اسئلهم فين Wal-mart and Dollarama .. جيب الي محتاجه زي المكوة و ال Towels,personal use stuff, Bath Soap ..معالق و اطباق و الي تحتاجه ..اكتب الي انت محتاجه و جيبه لان
trust me you don't want share their stuff even if it is there like
.. dishes and stuff

اسئلهم فين Wind Mobile and Chater..شارتر حتلاقيها فوق ..Wind حتلاقيها عند MacDonalds تحت.. .
both have Unlimited cool plans..لو مش عايز تشتري تلفون شوف Charters ..واعمل لك رقم تلفون .. if you have craving for technology see Virgin Mobile and rogers will give you I phone or black berry with contracts
بس مالهاش لازمة تخنق نفسك بعقد و انت جديد]

3-بنك TD زي الفل و البلد مليانه لكن RBC بيديك VISA CARD بدون Credit History افضل لك..TD موجود في المول تحت..RBC اسئل عليه اي حد .. في فرع جنب المول لزق بس بره .
Royal Bank – Progress & Grangeway Branch
111 Grangeway Avenue, Scarborough, ON M1H 3E9
P: 416-289-5600
Transit #: 5752

كده تكون خلصت من اهم يوم ..لو محتارفي حاجه ولو بسيطه اسئل و ربنا يكرمك..
وما اعرفش لو عندك خطط تانيه like renting car بس الكلام general بس ارجوا ان التفاصيل الدقيقه برخامه تفيدك..ساعات التفاصيل البسيطه دي بتفرق جدا ..لو انت already عملت الحاجات يبقي ان شاء الله تفيد حد غيرك و تقصر عليه هم اول ايام
موفق

 

 

[shawi]

أهلا وسهلا في الديار الكنديه

نعم السيخ مسيطرين على موضوع التاكسي تعرف ليه
لأنه شركتين على الاقل منهم أصاحبها سيخ من البنجاب وكل شركه تقريبا بتدير 300 تاكسي
وبيجيب الجماعه ولاد البلد دكاتره ومهندسين وصيادله الخ وعلى ما يعادلوا شهاداتهم بيشغلهم سواقين تاكس
كثير منهم بيبقوا في بيوتهم بيجيلوه الندا فيه زبون في العنوان الفلاني بيقوم رايحله
يعني فيه ناس منهم بيشتغلوا من بيوتهم مش عالخط وبتبقى السياره الفان عليها شعار شركة التاكس بتاعته
وشفت منهم ماعليهاش حاجه كانها سياره ملاكي بس فيها جهاز النداء بتاع الشركه

ازيدك من الشعر بيت
انا قضيت اسبوع اول ماجيت البلد كل يوم تاكسين صبح وبعد الضهر لما اتعرفت عليهم كلهم وسالتهم
لقيت دكتور منهم قالي احسن من المعادله ياراجل
بيطلع 3000 دولار صافي من التاكس
اشترى بيت المورجيج بتاعه الف
وبيصرف هو الف
وبيحوش الف
ده على كلامه وقام جاب ابوه وامه سبونسر شب
وكل سنه وانتم طيبين وعقبال ما تيجب عيلتك ان شاء الله

===========
انتبه ان اليوم الأحد
وإن البنوك ما بتشتغلش يوم الأحد ولا المصالح الحكوميه
وفي محلات ما بتفتحش الا بع الساعه 12 الظهر في هذا اليوم

 

 

[Dr-Alrefa3y]

حمدلله على السلامة يادكتور

نورت تورونو

 

 

[rania]

الحمد لله على السلامة يا د\احمد
د\ Moe انا كنت بعتت لحضرتك على الخاص لكن للاسف حضرتك مش بتستقبل رسائل واميل حضرتك الي كنت كاتبه مش لاقياه