أستودعكم الله ...سعدت بالوجود بينكم

[af27_3]

الصحف المصرية والعربية

أخوانى وأخواتى أعضاء منتدى المطاريد ....
بدون مقدمات ولا رغى كتير .... بقولكم ... إلى القاء ...
خلاص ميعاد ترحيلى للجيش قرب جدا ... والحمد لله على كل قضاءه خيره وشره ..... أتمنى منكم الدعاء لىّ ولكل من هو على شاكلتى .... ممن سيقضون فترة عقوبتهم فى الجيش .... وأنا ومع حزنى الشديد على العمر ألى ضاع وألى هيضيع لسه فى الجيش .... بس أنا متأكد أن كل تجربة قاسية ليها أكيد منافع وليها جانبها المضىء زى ماليها جانبها المظلم ....
أحب أشكركم وأبدى سعادتى على الوقت ألى قضيته ما بين ناس زيكم أقل ما يقال عنهم أنهم ناس بيحبوا بلدهم ومهمومبن بهمومها رغم الغربة ... وناس أتعلمت منهم كتير ... وموضوعاتهم وأرائهم هى بمثابة جواهر فى بحر المنتديات والأنترنت .... لن أخص بالذكر أحد .. حتى لا أنسى منهم أحد ... واحب أشكركم على العالم الأفتراضى الجميل ده ألى هو المطاريد ... ألى كان أول منتدى أشارك فيه بإنتظام . شكرا أستاذ حشيش صاحب الفكره..
أدعولى وما تنسونيش .... وأفتكرونى بالخير ... ده لو حبيتوا تفتكرونى .... زى ما أنا لو باقى من العمر شىء ههفتكركم بكل خير بأذن الله .... ولنا لقاء بإذن الله ... أول ما أخد إفراج وأنزل فى أول زيارة ...
لكل ألى هيقرى الموضوع د بطلب منه يدعيلى بالخير ... أن ربنا يصبرنى .... وبشكره ..
شكرا لك يا غير مسجل.... شكرا ليكوا كلكم .... شكرا لكل الى كلف نفسه عناء قرأة الموضوع ....
وأحب أستأذن الأستاذ حشيش بانى أنزل رابط لقصة المنتوف فى محاورات المصريين لقرأتها .... حتى يتذكرنى الجميع ويتذكروا كل من يؤدى شرف الخدمة العسكرية المقدس ..... ولنا الله .... وليس أحدا غيره ..رابط قصة المنتوف لحشيش فى محاورات المصريين ..
https://www.egyptiantalks.org/invb/?showtopic=4453
.... وشكرا للجميع ...( ملحوظة لو ظهر أسم العضوية بتاعتك ما تقلقش ... أنا عامل أدراج أتوماتيكى لأسم العضو ألى هيقرى الموضوع )

اقتباس وأعتذر مقدما لأى حد هيرد على الموضوع ولم يجد رد منى عليه .... لأن الوقت لن يسعفنى للرد ...

 

[اليس في بلاد العجائب]

نستودعك الله الذي لا تضيع دوائعه
و مستنينك لما ترجع ان شاء الله و تحكيلنا حاجات كتير
خلي بالك من نفسك

 

 

[dr-amira]

فيه ايه يابنى قطعت قلبى ...زى ما تكون رايح المقصلة مش الجيش ....شد حيلك واعمل هدف انك تحفظ القرأن فى الفترة ديه وان شاء الله ترجع بالسلامة.... وكفاية زمان مامتك جالها اكتئاب من اللى انت عاملة ده

 

 

[العندليب]

انشاء الله ترجع لنا بالسلامة

 

 

[nash]

يا أحمد الجيش للجدعان وكفايه فكرة أنك بتدافع عن أخوانك في المطاريد...

صدقني فترة وتعدي وهاترجع تفتكرها وتحكيها كنوادر وأيام جميله ... والله كل اللي دخلوا الجيش كانوا بيحكوا حكايات تضحك ليها من القلب ...وتحس أن اللي بيحكي فخور بالفترة دي من حياته ...

وبعدين دي أول خطوة في عالم الجد وبعدها تنطلق في الحياة بتوفيق من رب العالمين ودعاء الوالدين...

فيه مثل عندنا وأنا مؤمنه بيه جدا ... كبرها بتكبر .. صغرها بتصغر ...

وبعدين فينك عن المقوله ( أنا عند ظن عبدي بي ) ؟ يعني إحسن الظن بالله وهاتلاقي كل أمورك بحول الله وقوته متيسرة وبلاش التشاؤم الكبير ده .. علشان الأيام تعدي بسرعه ..

ماقولتش دخلت أنهي قسم؟؟ أياكش سلاح المشاة ... انا سمعت أنه غتت أوي

علي فكرة والله العظيم كنت في بالي النهارده ودعيتلك ربنا ييسر لك الأمور كلها وإن شاء الله خير ...

بقولك هو أنتوا معندكوش نت في الجيش؟

 

 

[مصرية]

تروح وترجع بالسلامة يا أحمد ... إنت مش رايح المعتقل متقلقش إن شاء الله حترجع مبسوط ومش حيحصل حاجة تضايقك وبعدين جايز تعرف هو الجيش بتاعنا راح فين علشان مش لاقيينه في البلد بقاله فترة

ترجع بالسلامة إن شاء الله وتحكيلنا على يومياتك هناك ... ومشكووووور على قصة المنتوف اللي مكنتش عارفة أقراها فين

 

 

[شرقاوي]

ربنا يطلعك منه على خير
وان شاء الله ترجع احسن ما رحت
وما تتشائمش كله خير باذن الله وفكر على انها تجربة مختلفة مش تتوقع السوء من الاول

 

 

[أحمد باشــا]

خلاص نويت عالجهادية يا باشمهندس

ايه يا عم الفيلم الهندي اللي انت عامله ده

دي دعاية سيئة عن الجيش للأجيال القادمة

و متقلقش قوي هم اول 45 يوم لو كنت هتبقى ظابط احتياط

و بعد كده هتلاقي مبيت يومي و اجازات و آخر نعنشة

لعلمك الجيش مدرسة كبيرة جدا للإنسان بيخرج بعدها عنده خبرات لا تقدر بمال

يعني على الأقل هتعرف قيمة اهلك و صحابك و تحترم اي أكل في بيتكم

و كمان لو انت موقعتش على اي اوراق في التجنيد ممكن تلاقي نفسك عسكور مقطقط

منتظرينك قريبا يا صديق ... و لو رحت فايد أو بني يوسف ألسلام أمانة

 

 

[مدى]

سيادة الباشا أحمد..
هنفتقدك أووي والله..
انت من الشخصيات اللي الواحد يفخر بتواجده معاهم في نفس المكان..
زي ما كلهم قالوا لك اتفائل..واقبل ع الجيش بنية خدمة بلدك وطاعة لله (واعدوا لهم مااستطعتم من قوة ومن رباط الخيل) وربنا هيراضيك وهتكون من احلى فترات حياتك..بإذن الله..


أحمد..
أحفظ الله يحفظك ..احفظ الله تجده تجاهك ..
إذا سألت فسأل الله..وإذا استعنت فاستعن بالله..
واعلم ان الأمة لو اجتمعت على ان ينفعوك بشيء ..لن ينفعوك الا بشيء قد كتبه الله لك..
ولو اجتمعت على ان يضروك بشيء ..لن يضروك الا بشيء قد كتبه الله عليك..

واعلم ان النصر مع الصبر وان مع العسر يسر..


نستودع الله دينك وأمانتك وخواتيم اعمالك..ونشوف وشك بخير ياارب..
مش هننساك من دعواتنا ..
وانت كمان افتكرنا..




بالله عليك ابقى طمنا عليك لما تنزل اجازات..


في أمان الله ..

 

 

[sincere]

ربنا معاك يا بني

و يكون جيش لطيف ظريف خفيف