تحياتي من مسيساجا

[somayasaleh]

مساء الخير عليكم جميعا

اعتقد فيه ناس كتير يعرفوني من هنا ومن هناك.... واللي مش عارف نقوله

انا مهندسة طبية.....زوجة طبيب والهجرة باسم الزوج

عندي ولدين وبنوتة.......الكبير في نهائي هندسة

البنوتة في اولي طب اسنان...الصغير في هاي سكول في مدرسة كندية في مصر جريد 10

المعلومات السابقة كان لابد منها....حتي تكون مرجع لاي اسرة في نفس وضعنا تقريبا....يعني الاولاد جامعة وهاي سكول

علشان اللي عنده اي سؤآل بالنسبة للكليات والتقديم وكده....ربنا يسهل وممكن افيده حسب حالاتي اولادي

نبدأ بسم الله.......

قدمنا علي الهجرة في ابريل 2008......الابديت في ديسمبر 2009....المديكال يونيو 2009......الفيزا في اكتوبر 2009......الاندنج في 12 فبراير 2010

طبعا ناس كتير ح تقول ليه اخترنا الشتاء ومش الصيف....طبعا للاسف ماكنش ينفع لان الاولاد ح يكونوا في في امتحانات اخر السنة ....ومش ح اقدر بعد كده علشان الفيزا تخلص في شهر يونيو 2010

اختيار مسيساجا جاء لاكتر من سبب
1- اخويا هناك وعنده بيت ....
2- لنا اقارب كتير ومعارف في مسيساجا
3- البلد هادئة جدا وعائلية جدا جدا....غير تورونتو خالص
4- احنا قررنا الاستقرار فيها باذن الله تعالي...فكان لازم ان الواحد يستكشف البلد اللي ناوي يكمل فيها ان شاء الله

ده بعض الاسباب اللي خلتنا ننزل علي مسيساجا

اولا .....الحجز للسفر

الموضوع ده احنا قتلناه بحث انا وزوجي علي النت....حتي توصلنا للاتي

اكسبيديا ....ارخص من شركات كتير.....ويليها توماس كوك

احنا بعد ما اخترنا موعد السفر......ودخلنا علي اكسبديا وتوماس كوك ....وجدنا ان توماس ارخص....لذلك تم الحجز علي توماس كوك....من علي النت....واخدنا الرفرنس نمبر وذهبنا للشركة فرع المهندسينودفعنا هناك

الطيران كالاتي......

القاهرة......فرانكفورت...علي لوفهانزا

فرانكفورت.....مطار بيرسون.....علي اير كندا

والرجوع كالاتي......

مطار بيرسون....زيوريخ...علي اير كندا

زيوريخ...القاهرة....علي مصر للطيران

التذكرة الواحدة كانت سعرها 4800 بالضرايب وكل حاجة

احنا كنا حاجزين اسبوعين فقط علشان نخلص الاوراق ونرجع الاولاد يكملوا الدراسة ونرجع نستقر علي اخر الصيف القادم......لكن.....قدر الله وما شاء فعل........

ظهرت عندنا مشكلة الصور الخاصة بالبي ار......احنا كنا متاكدين انها مش نافعة......وحاولنا نعمل زي اخونا زناتي ماقال لنا....بس فشلت المحاولة....ولذلك كان لازم نأجل الحجز كمان ثلاثة اسابيع حتي نضمن اننا ناخد الكروت قبل ما نمشي....وربنا يستر....دعواتكم.....

طبعا في حالة تغير الحجز بندفع 100 يورو علي كل تذكرة......

علشان كده بقول لكل اللي جاي يعمل اللاندنج وراجع تاني يتاكد من الصور اولا......ثانيا....يتاكد من موعد السفر والرجوع

الكلام السابق لا يسري علي الناس اللي جاية ون واي ومش راجعة تاني غير اجازات

في المطار بيأخدوا الاوراق الخاصة بالاندنج ويتركوا لك ورقة مكربنة كده......الورقة ده تحافظوا عليها زي عينيكوا ليه؟؟؟؟

1= ده اول اثبات بيطلبوه في اي مصلحة حكومية اول ما تعملوا اللاندنج

2= الورقة ده مطلوبة لما تيجوا تاخدوا الجنسية والبسبور الكندي

3= الورقة ده تعتبر اثبات شخصية وفيها رقم خاص بكل واحد بيطلبوا الرقم ده لو اتصلت بيهم في اي جهة حكومية تسال عن اي حاجة...لازم تقولهم الرقم ده وطبعا شوية بيانات اخري علشان يتاكدوا من شخصيتك

قبل ما نخلص موضوع البي ار ده........لو انت لسه ما قدمتش....تاكد من مواصفات الصور كويس قوي
1- الوجه في السنتر وابعاد معينة مكتوبة في سيت الهجرة
2- مفيش اي ابتسامة
3- مفيش اي رتوش.....يعني المصور ما يعملش اي حاجة في الصور بالفوتوشوب
4- طبعا ملونة

لو الفاس وقعت في الراس وبعت الصور وهي مش في المواصفات الصحيحة....تعمل الاتي

تتصور صح تاني زي ما قلنا فوق
تاخد الصور معاك....في المطار وهم بيعملوا الاوراق تسالهم...الصور مقبولة ولا لا....وتوريهم الصور الجديدة اللي المفروض انها اظبط....وتطلب منهم انهم يغيروها...لو مشي الحال ...خير وبركة ...لو ما مشيش....ندخل علي البلان الرابع....بتاع اخونا زناتي

تروح شارع سنت كلير....بنك نوفا سكوتشيا تحت منه مصور اسمه جو ديسكونت....توريه الصور هو ح يقولك اللي تنفع واللي ما تنفعش ح يصورك

تاخد الصور وتطلع علي 55 شارع سنت كلير ....وتطلب منهم انهم يغيروا لك الصور....لو مشيت .....يبقي خير وبركة....لو ما مشيتش.....يبقي البلان الاخير

انك تقعد حاطط ايدك عل قلبك الخمس اسابيع وتدعي ان الكروت توصل....بس قبل كده في الاسبوع الرابع كلمهم في سي اي سي واسالهم الكروت ما وصلتش ليه؟

لو فيه مشكلة في الصور ...ح يقولوا لك.....لو ما فيش يبقي تستني لحد ما تاخد الكروت بنفسك وترجع ترتب حالك قبل الاستقرار النهائي

كفاية كده النهاردة.......نكمل بعدين باقي الاوراق والحياة في مسيساجا

ربنا يوفق الجميع

 

[سيف الدولة]

مشكورة استاذة سمية على مجهودك ...طيب مثلا لو احنه شاكين بموضوع الصور ..نعمل ايه عشان نحتاط للموضوع ده قبل السفر .يعني نتصور مرة تانية ونأكد على ملاحظاتك وملاحظات المعلم زناتي ..وناخدهم معانا استحياطا ولا ايه النظام ..ده نمرة واحد ونمرة اتنين ..ماشاء الله ولادك شباب ..ممكن تحكيلنا عن انطباعاتهم ..نشاطاتهم ..رأيهم بموضوع الهجرة ..قبل السفر وبعدو ..إذا مكانش فيها غلبة ..

 

 

[ehabtaher]

اقتباس المشاركة الأصلية كتبت بواسطة مازن أطرش مشكورة استاذة سمية على مجهودك ...طيب مثلا لو احنه شاكين بموضوع الصور ..نعمل ايه عشان نحتاط للموضوع ده قبل السفر .يعني نتصور مرة تانية ونأكد على ملاحظاتك وملاحظات المعلم زناتي ..وناخدهم معانا استحياطا ولا ايه النظام ..ده نمرة واحد ونمرة اتنين ..ماشاء الله ولادك شباب ..ممكن تحكيلنا عن انطباعاتهم ..نشاطاتهم ..رأيهم بموضوع الهجرة ..قبل السفر وبعدو ..إذا مكانش فيها غلبة ..

انا شايف ان الواحد يتصور عند 3 او اربع مصوراتيه محترمين
كل واحد نعطيه المواصفات المكتوبه بالضبط فى الموقع

ونقيس المقاسات بعد ما ناخد الصور واللى مش مظبوطه نقوله يصورها تانى على حسابه

وبعدين لما نروح ان شاء الله فى المطار نطلع لهم ورق الكوتشينه ده ونقولهم اختارو اللى انتم شايفينها صح

 

 

[أكسيلانس]

السلام عليكم ورحمة الله وبركاته

حمدلله علي السلامه يا بشمهندسه

أرجوا أن تكوني كونتي ما يكفينا من ألانطباعات أيجابيه و سلبيه ,, أحنا كنا في أنتظار حضرتك و الدكتوره صفاء بفارغ الصبر ,,
و الحمد لله أننا تجمعنا هنا مره تانيه و ربنا ما يفرقنا أبدا -- كان فيه خبر الدكتوره سوسراني كتبته أن حضرتكم و الدكتوره صفاء هتشتركوا في موضوع الانطباعات - يا تري حد أرسل دعوه للدكتوره صفاء للمشاركه . و يا ريت كمان المناضله سوسراني حد يطمنا عليها

أنا جالس في الصف الاول - و محوش الاسئله لاخر الدرس

خالص تحياتي

 

 

[znaty]

العزيزة الغالية م سمية ...هو دة المكسب الحقيقي لمنتدي المطاريد

منورة يا دكتورة وترجعي بالف سلامة انت والاسرة الكريمة والبي ار ان شاء الله

علشان ماكتبش بس مداخلات كتيرة ..عايز ارحب adamdec واكسيلانس وكل رفقاء الطريق

ونفسي كان ريمون هنا ..علشان ماكانش هايعديلك ( استحياطا ) دي يا مازن

متابعين يا باشمهندسة

 

 

[om saif]

حمد الله على السلامه اولا

ثانيا بالنسبه للصور نصيحتى للجميع ان الصور اللى بعتوها لكندا مع الابلكيشن يكون عندهم فائض منها يقدموه للبي ار ساعه اللاندنج
بكده مفيش اى مشكله بامر الله

اقتباس المشاركة الأصلية كتبت بواسطة mazen atrash مشكورة استاذة سمية على مجهودك ...طيب مثلا لو احنه شاكين بموضوع الصور ..نعمل ايه عشان نحتاط للموضوع ده قبل السفر .يعني نتصور مرة تانية ونأكد على ملاحظاتك وملاحظات المعلم زناتي ..وناخدهم معانا استحياطا ولا ايه النظام ..ده نمرة واحد ونمرة اتنين ..ماشاء الله ولادك شباب ..ممكن تحكيلنا عن انطباعاتهم ..نشاطاتهم ..رأيهم بموضوع الهجرة ..قبل السفر وبعدو ..إذا مكانش فيها غلبة ..

 

 

[arora]

كل سنة وانتى طيبة باشمهندسة سمية
اول عيد فى كندا
ان شاء الله عيد سعيد عليكم جميعا
كل سنة وانتم طيبين

 

 

[somayasaleh]

اقتباس المشاركة الأصلية كتبت بواسطة سهام السلام عليكم ورحمة الله وبركاته مدام سمية صباح الخير او مساء الخير حضرتك متعرفنيش بس انا اصبحت اعرفك كويس فقد قرات التوبيك بتاع حضرتك ووصلت لصفحة 109 ولسه بكمل واحب ان احييك على المجهود الرائع واحب احيى كل الاخوة الافاضل على مداخلاتهم القيمة وانا لسة جديدة على المنتدى وبصراحة وجدت ناس فى غاية الاحترام والرقى واستفدت من مداخلاتهم كثير فلكى ولهم منى الف شكر وجزاكم الله كل خير مدام سمية انا طبيبة اطفال اعمل فى جدة وزوجى مدير مالى فى احدى الشركات الكندية ومقر عمله فى القاهرة عملنا لاندينج فى 24 يونيو 2010 فى ترونتو جلسنا اسبوعين ورجعنا لمقر عملنا ماهى اقصى مدة ممكن قضاءها خارج كندا قبل الرجوع والاستقرار هل هى 6 اشهر او اكثر والف شكر يافندم

اهلا بك يا سهام.....

شوفي هو المفروض ...او اللي قالوه لنا لما عملنا اللاندنج.....ان المدة ستة شهور....احنا عملنا كده....بس ناس تانية قعدوا بره بعد اللاندنج سنة او اكتر....علي حسب ظروفهم

As the first of Canada's new Permanent Resident cards hit their expiry date, immigrants who haven't spent the required length of time in Canada – 730 days out of five years – face losing their landed status in the next few months.

اقتباس المشاركة الأصلية كتبت بواسطة Ahmed Osman يا باشمهندسه .... تحياتي ندعو الله أن ييسر لكم الحال نحن في إنتظار المشاركة الإسبوعيه عيد سعيد عليكم إن شاء الله لا تنسونا

شكرا لك يا استاذ احمد....اول ما يكون عندي معلومات مهمة....علي طول ح تلاقيها هنا ان شاء الله

اقتباس المشاركة الأصلية كتبت بواسطة arora كل سنة وانتى طيبة باشمهندسة سمية اول عيد فى كندا ان شاء الله عيد سعيد عليكم جميعا كل سنة وانتم طيبين

كلك ذوق يا دكتورة

اخبار الفيزا ايه.....طمنيني

 

 

[Ahmed Osman]

م. سميه
دمتم بخير ...... تسجيل متابعة

تحياتي

 

 

[le quebecois]

الف مليون مبروك علي موضوع حضرتك وملايين مبروك علي سلامة الوصول وعمل الاندنج ويارب البي ار وكل شيء يبقي تمام وان شاء الله رحلة موفقة وان شاء الله في رحلة الإستقرار اللي جايةتكونوا أفضل نموذج للأسرة المصرية في كندا

تسجيل متابعة من
المحاوراتي القديم
والمطاريدي الجديد
لو كيبكواه
عبدالحليم