تحياتى من لندن اونتاريو

[ايناس احمد]

الصحف المصرية والعربية

بسم الله الرحمن الرحيم

تحياتى لكم جميعا من لندن جميله الجميلات
الحمدلله النهارده كملنا شهر فى كندا بس انقطاعى عنكم كان بسبب النت
اولا وقبل كل شىء اتوجه بالشكر لكل اعضاء المنتدى الكرام
كل كلمه اتكتبت هنا فى المنتدى كان ليها اثر كبير وربنا يجازيهم جميعا كل خيرويجعله فى ميزان حسناتهم
حتى لو معلومه بسيطه صدقونى ياجماعه بتنفع والله
طبعا فيه ناس كتير ليها افضال علينا مش حوافيهم حقهم بالكتابه بس ربنا يجعل اللى عملوه معانا فى ميزان حسناتهم
احب اخص بالشكر المهندس يوسف الماضى بصراحه الباشمهندس مسبناش خالص من قبل مانسافر من القاهره وهو على اتصال بينا وبيتابع اخبارنا ويمدنا بالنصائح اللى كانت مصابيح لينا فى رحلتنا والحمدلله بمجرد وصولنا كندا كان بيطمن علينا يوميا ويساعدنا ودا اللى بيهون الغربه الايام الاولى
طبعا احنا كنا على اتفاق مع الباشمهندس قبل سفرنا اننا ننزل على شقتهم لانهم كانوا مسافريين فى نفس الوقت اللى احنا حنوصل فيه لكندا وفعلا اقمنا فى اسكاربرو عشره ايام
قبل ذهابنا الى مدينه لندن
ربنا يجازيه خير ويبارك له فى زوجته واولاده

 

[الأهلاوي الأصيل]

حمد لله على السلامة يا مدام إيناس...كندا نورت
شكل كل الناس الكويسة بتتجمع في لندن أونتاريو...استنوني سنتين وأحصلكوا إن شاء الله

 

 

[ايناس احمد]

كما اتوجه بالشكر للدكتور محمد (ميو) حقيقى الدكتور انسان رائع وفاضل وماشاء الله عليه عنده كم هائل من المعلومات ربنا يبارك له ويكمل مشواره على خير امدنا بالكثير من النصائح والمعلومات ربنا يجعلها فى ميزان حسناته وكان لينا شرف اللقاء بيه على السريع


حقيقى الناس هنا كلها ماشاء الله اكتر من الاخوات ومش عايزه انسى حد
الدكتور الشامى ربنا يبارك له فى اولاده ويجازيه خير كان على اتصال بينا وعلطول
واخدنا رايه فى الاستقرار فى لندن طبعا هو عمده المدينه وكان لازم ناخد موافقته قبل ما نيجى هنا والحمدلله كان اختيار موفق بامر الله

طبعا هنا فى لندن قابلنا الاستاذ حاتم (الحواستراليا)
بصراحه جمايله كتير علينا ومتـأخرشى عننا بمجرد ماعرف اننا جايين على لندن واستقبل زوجى فى لندن وساعدنا فى البحث عن سكن هو حقيقى انسان خدوم جدا ربنا يجازيه خير وكان لينا شرف اللقاء باسرته والتعرف عليهم يوم العيد وربنا يبارك له فى زوجته واولاده ويجازيه خير
طبعا كان لازم ابدا بالمقدمه دى علشان ارد جزء بسيط من جمايل الناس علينا


طبعا الباشمهندسه سميه اختى الكبيره ونواره المنتدى كله كل كلمه كتبتها هنا فى المنتدى ربنا يجعلها فى ميزان حسناتها ويبارك لها فى اولادها يارب الحمدلله
كان لى شرف الحديث معاها قبل مانسافر وبعد ماجينا هنا ربنا يجازيها خير الجزاء

 

 

[ايناس احمد]

اقتباس المشاركة الأصلية كتبت بواسطة الأهلاوي الأصيل حمد لله على السلامة يا مدام إيناس...كندا نورت شكل كل الناس الكويسة بتتجمع في لندن أونتاريو...استنوني سنتين وأحصلكوا إن شاء الله

الله ينور عليك ياباشمهندس كندا منوره بيكم انتوا وان شاء الله نبارك لك قريب على الدكتوراه
ولندن تنور بحضرتك والاموره جنه ومامتها

 

 

[ايناس احمد]

اولا احب افكركم اننا كنا مقدمين كيبك وتقريبا اول ناس من اللى نعرفهم تغامر وننزل على اونتاريو علطول ومنروحشى كيبيك ودى كانت نقطه قلق لينا قبل السفر بس الحمدلله عدت على خير
ثانيا الحجز كان على الخطوط التركيه بتاريخ 25/10 ارخص تذاكر فى الوقت دا خمس تذاكر زوج وزوجه وطفلين وطفل رضيع كلفوا حوالى 14750جنيه طبعا ذهاب فقط
ترانزيت فى تركيا حوالى ست ساعات عدوا على خير الحمدلله الجوازات ثم ذهبنا الى المسجد لصلاه الفجر وارتحنا فى المسجد ساعتين ثم توجهنا لصاله الانتظار لطياره تورونتو
طبعا الرحله التانيه من تركيا الى القاهره كانت طويله جدا حوالى 11ساعه و45دقيقه الحمد لله ربنا هدى الاولاد وبقوا يناموا شويه ويصحوا شويه والخطوط التركيه بصراحه خدمتهم ممتازه مش سيئه
كان لينا كل فرد قطعتين كل قطعه 23كيلو وقطعه 23كيلو للطفل الرضيع بالاضافه لكل واحد مننا هاندباج وكنا طبعا حاجزين المقاعد مع الحجز قبل السفر بحوالى شهر وشويه
وفعلا لقينا المقاعد ذى ماحجزناها وكنا طالبين وجبات حلال بس طلع كل الاكل على التركيه حلال ودا كان شىء كويس
الحمدلله وصلنا مطار تورونتو الساعه 4 ونصف عصرا بتوقيت كندا بعد مالرحله استغرقت حوالى 24ساعه من ساعه ماخرجنا من شقتنا فى مصر

 

 

[الحو استراليا]

اقتباس المشاركة الأصلية كتبت بواسطة ايناس احمد طبعا هنا فى لندن قابلنا الاستاذ حاتم (الحواستراليا) بصراحه جمايله كتير علينا ومتـأخرشى عننا بمجرد ماعرف اننا جايين على لندن واستقبل زوجى فى لندن وساعدنا فى البحث عن سكن هو حقيقى انسان خدوم جدا ربنا يجازيه خير وكان لينا شرف اللقاء باسرته والتعرف عليهم يوم العيد وربنا يبارك له فى زوجته واولاده ويجازيه خير طبعا كان لازم ابدا بالمقدمه دى علشان ارد جزء بسيط من جمايل الناس

حمد للة على السلامة انا معملتش غير الواجب تسجيل متابعة يا فندم

 

 

[ايناس احمد]

طبعا اول ماوصلنا مطاركندا حمدنا ربنا اننا وصلنا بالسلامه بعد الرحله الشاقه لينا وللاولاد
ذهبنا للجوازات ماخدناش تقريبا دقيقتين وويلكم تو كندا
لحد هنا الحمدلله الامور ماشيه تمام مفيش مشاكل
توجهنا بعد ذلك لظابط الهجره ومن هنا بدأ تعب الاعصاب لان ظابط الهجره عمل معانا موقف سخيف جدا تعب اعصابنا فى اول لحظات لينا فى كندا
احكى لكم المشكله بالتفصيل
طبعا ذى ماقلت لكم فى الاول اننا كنا من الاساس مقدمين كيبك وكنا متخوفين من اننا نغامر وننزل اونتاريو من غير مانعمل لاندنج فى كيبيك بس توكلنا على الله وقلنا احنا معانا فيزا فيدرالى لدخول كندا كلها مش بلد بعينها بس كنا قلقانين من المبلغ المالى اللى ناخده معانا احنا كنا ماضيين مع كيبك اننا ندخل ب 5000دولار كندى وكان المبلغ الكاش اللى معانا اكتر من كدا فلما سأل زوجى عن المبلغ اللى معاه قاله 7000دولارامريكى وهو سمع الكلمه دى من هنا واتجنن اذاى جاى كندا بأولادك وممعاكشى غير سبع الاف انت المفروض انك داخل اونتاريوامش كيبيك والمفروض يكون معاك 23000كاش

طبعا انا كنت فاهمه من المنتدى هنا اننا مينفعشى نشيل اكتر من10000كاش ودا اللى خلانا نقول كدا قلنا بلاش نقول عشره علشان الورقه اللى ماضينها مع كيبك فقلنا نقول سبعه
ويحاول زوجى يقنعه اننا معانا فيزا لبنك فى مصر وفيها حسلب لينا ودا ابدا اثبت لى
يديله كشف حسلب كنا عاملينه من البنك فى مصر قبل سفرنا ودا ابدا مش راضى يقتنع
يقوله انا لى اموال فى السعوديه وحتتحول لى بعد فتره يقوله اثبت لى
طبعا بدات اعصابنا تتعب ومش عارفين نرضى سعادته اذاى
ويزيد فيه ويقول انت معاك اطفال حتصرف عليهم منين احنا حكومتنا مبتديش اعانات
قلناله احنا مش جايين هنا علشان اعاناتكم احنا هنا لان حكومتكم اختارتنا ووافقت علينا للهجره ليها
ودا برضه مفيش فايده يقول انا المفروض دلوقتى ارجعكم مصر تانى وبكل قله ذوق بس انتو حاطينى فى موقف محرج لان الفلوس اللى معاكم متكملشى تمن التذاكر
المهم طولت عليكم انتهى الموضوع بانه مضانا اننا داخلين ب 15000دولار ودا مكانشى حقيقى
طبعا احنا عارفين انه مش من حقه يعمل معانا كدا بس الموقف والله ياجماعه كان صعب علينا بعد رحله سفر طويله ومتعبه وكنا مش ناقصيين مشاكل من اول لحظه لينا فى كندا

ودا كان اول انطباع لينا فى كندا بس للاسف كان سىء جدا وتعبنا وتعب اعصابنا وخلانا نسينا فرحه وصولنا لكندا

معلشى انا اسفه انى اكتب لكم اول انطباع لى فى كندا ويكون سىء بس لازم اكون صريحه معاكم
للحديث بقيه ان شاء الله

 

 

[mezo]

الف حمد الله على السلامة يا مدام ايناس واخيرا التوبيك بتاع حضرتك نور المنتدى ومنتظرين التفاصيل وواضح انها مفيدة جدا للى ناوى يغير من كيبك لاى مقاطعة تانية

 

 

[kaza]

تسجيل متابعة و حمدالله على السلامة و الف مبروك :)

بس في حاجة انا مش فاهمها ! ازاي قانونيين وازاي خلاكوا تمضوا على ورقة ب 15000 وليه 15000 بما انه كدب في كدب مش 23000 المبلغ المطلوب ؟؟
وماااااااااااااااااااااااااال اهله :)

 

 

[Dr.Samo]

حمد الله على السلامة مدام ايناس
تسجيل متابعة .....ربنا يجعل ايامكوا خير وبركة بإذن الله
موقف غريب فعلا ومتناقض مع كل مواقف أصدقاءنا السابقين
وبصراحة عايزين حد من فطاحل المطاريد يقولنا الكلام دا صح ولا غلط
وازاى يمضيكوا على حاجة محصلتش ؟؟؟؟؟
على العموم خير إن شاء الله .....ربنا يكمل ليكوا الأيام بالخير
وفداكوا وفدا الأولاد