وده تجربةاخونا دكتور سيرجن وولادة الصغيرة لمار في كندا
===============================
السلام عليكم ورحمة الله من بلاد الفرنجة
احنا وصلنا يوم الاربعاء الماضى الى مونتريال( ليه مونتريال؟ ) دى قصة طويلة حاقولها بعدين.
اول يومين( عملنا الاوراق بتاعت SIN والتأمين الصحى) و بصراحة عملناهم بسهولة ويسر ولله الحمد. احنا سكنا فى Downtown مونتريال, فى Clarion suites .هو عبارة عن اجنحة فندقية , كويس قوى ,بس هو غالى شويتين....
اهم حاجة بصراحة انهم فى التأمين الصحى اعطوا للمدام علشان هى حامل(confirmation of inssurance letter ) تستطيع به الولادة قبل الحصول على الكروت الصحية
الجو هنا ثلجججججج ,ويقولوا ده لسة الشتاء ما جاش؟؟؟!!!!1
الحمد لله نصف الرحلة تم بعون الله واحنا فى انتظار ولادة البيبى على خير.
نسألكم الدعاء بالتيسير
الفندق فى الشهر حوالى 2300 دولار شامل كل حاجة(ما عدا الاكل) جاهز من كل حاجة , وده بعد الخصم علشان الفترة كبيرة(الخصم حوالى40 %)
احنا سمينا البنوتة "لمار" واسألوا زناتى ايه المعنى لو مش عارفين
الحمد لله استلمنا النهاردة الSIN لينا كلنا(حتى الولاد الصغيرين اتعمل ليهم), جم فى حوالى 9 ايام. احنا فى انتظار ال PR علشان نقدر نسافر واحنا مطمنين.
الجو يا جماعة مش ثلج, مش لاقى وصف... وطلع الموضوع يا زناتى يا خويا انه فى جواكت للبرد تتحمل درجات الحرارة تحت الصفر Thermal ) - 40 -50)
اللى عاش فى الخليج مش حيحصل له انبهار شديد هنا, لما سألت الناس قالوا ان مونتريال وكيبك مختلفين عن باقى المقاطعات الاخرى زى اونتاريو او فانكوفر.
ومع كدة الناس غاية فى الاحترام والالتزام, البلد لها طابع اوروبى جميل, ده طبعا غير الوجوه البشوشة اللى موجودة فى كل مكان.
بعض الانطباعات الاولية:
==============
1- انت صادق فى كل كلامك من غير ما يطلبوا اثبات لكلامك... من المطار(مكتب الهجرة) الى اى مكتب حكومى اخر.
2- الحياة غالية لو الواحد قعد يحسبها بالريال او الجنيه, اول كام يوم ما كنتش عارف اجيب ايه من كتر الحسابات الغريبة... بعد كده الواحد اخد على القيمة المالية الدولارية اللى هى زى الريال مثلا فى السعودية تزيد فى حاجات وتقل عنها فى حاجات ثانية.
3- الواحد على قد ما يقدر يعمل اللاندنج فى مكان يعرف فيه حد.. صدقونى بتفرق كثيررررررررر.
4-لازم الواحد ما يستعجلش فى عمل اللاندنج , لازم دراسة كويسة قوى ,بحث فى الانترنت, سؤال اصحاب عايشين فى نفس المكان... كل ده انا افتقدته مع انه الحمدلله الواحد ربنا سهلها له.
5-تجربة الولادة حاحكى عنها بعدين ,,لانى باكتب عربى ببطىء.
افتكرونا فى دعائكم.
بعد وصولنا ب4 ايام, الساعة 3 فجر يوم الاثنين الماضى لقيت زوجتى بتصحينى(كنت نايم من الساعة 12 ) وهى عندها الم ولادة....
صحينا الولاد بسرعة ,لبسنا الولاد بسرعة اكثر,نزلنا اللوبى بتاع الفندق الساعة 3:30 ,كان الريسبشانست موجودوالدنيا فى منتهى الهدوء, والمدام كانت غير عوايدها متماسكة ماشاء الله,طلبت منه يتصل ب911 علشان عندى emergency case , اتصل من غير تردد وبدأ بالكلام انه عنده حالة طارئة بحاجة الى عربية اسعاف وكانت ال911 operator واحدة ست , طلبت بيانات الفندق ثم أعطانى الجدع سماعة التليفون وبدأ حوار مدته حوالى دقيقة... حلو كدة.
what is your name sir , what is the case sir, how old is she, is the water out sir, does she has any medical problem, is this the first baby sir,
Ok sir the ambulance is on the way.
رجعت لزوجتى بعد المكالمة وهى كانت جالسة بالولاد سامعة الحوار وبدأت اهديها, لقيت ابنى الصغير بيقول لى بابا البوليس جيه( عربية الاسعاف جت بعد حوالى دقيقتين من المكالمة), ماكنتش مصدق اللى بيحصل خصوصا ان انا دكتور وشايف قبل كدة تجارب كثير فى مصر والخليج.
جيه لنا 2 مسعفين , بدأ الكلام واحد منهم :
every how much the contractions mam, is the water out, do you have any medical problem, which hospital do you follow up mam,
عرفته ان احنا نيو كمرز , وعايزين نروح royal victoria hospital , انا كنت قبل يوم روحت المستشفى استكشف المكان وبعده عن الفندق وسألت عن اجراءت الadmission .
اخونا المسعف الثانى لقيته بيقول : kids are not allowed in sir . بيقصد عربية الاسعاف
قلتله بمنتهى الادب Listen i have no one to keep them with now and i can not leave my wife in this condition.
رد المسعف الاول it is ok sir, mam you could go to the ambulance or you need stretcher
ركبنا كلنا الاسعاف , قعدونا انا والولاد كل واحد على كرسى وربطلنا الاحزمة والولاد فى منتهى السعادة فاكرين ان احنا بنتفسح .....والمدام ريحت على السرير وبدا الالم يزيد كل 2-3 دقايق.
أنطلقت عربية الاسعاف فى هدوء , الشوارع كانت شبه فاضية وصلنا المستشفى بعد حوالى 5 دقايق, كنا فى طوارىء ROYAL VICTORIA HOSPITAL
الحمد لله اليوم استلمت شهادة ميلاد البنت, وبرضة عرفت ان البى أر بيأخد 61 يوم علشان يجى وده عمل لى ربكة فى حساباتى
المهم نكمل حكاية الولادة.....
وصلنا THE ROYAL VICTORIA HOSPITAL حوالى الساعة 3:30 صباحا , الاسعاف وقف فى الطوارىء , ونزلونا هيلا بيلا على الدور السابع اللى فيه قسم الولادة , سألت المسعف مش لازم اعمل اجراءت التنويم(الحجز) فى الاول !! رد باستغراب : الاول نطمن على الام والبيبى ونحطحهم فى المكان بتاعهم وبعدين تروح تعمل الadmission .
طلعنا الدور السابع ,قسم الولادة دخلوا زوجتى الى حجرة كشف, عملوا استدعاء لنايبة علشان تشوف الحالة, فى ثوانى كان فى بنت زى القمر واقفى بتكشف على المدام وعملت لها سونار وتخطيط للبيبى وبعد كدة طلبت انهم يكملوا اجراءات الحجز علشان الحالة فعلا ولادة ولازم تتحجز.
كان اول حاجة قالوها ان الاطفال ممنوع وجودهم علشان الH1N1 , وده كان صدمة جامدة لى, المهم اخدت العيال ونزلنا عملنا اجراءات الحجز , ما اخدتش وقت, طلعنا تانى للدور لقيناهم دخلوا المدام حجرة لو حدها فيها متابعة للبيبى مستمرة, فيها يا زناتى ياخويا كاسيت علشان تهدى نفسيتها!! ولو عايزة تليفزيون يجيبوا بس كله بحسابه.
طلبوا ان الولاد يدخلوا يقولوا GOODBYE MAMY وقال ايه يروحوا؟؟!!!!!!
طبعا دخلوا قالوا جود باى مامى واللى نام جنبها على السرير واللى قعدت تلعب فى الكاسيت وانا استكشفت الحجرة والحمام......
مافيش 10 دقايق ودخلت الممرضةبكل ذوق طلبت منا الانصررررراااااااففففففف. اخوكم وقف وشرح ان احنا نيوكمرز والولاد مافيش حد ياخد باله منهم والوقت متأخر , فأنظروا ماذا انتم فاعلون؟؟؟؟؟
قالت IT IS OK , I WILL OPEN THE CHILDREN PLAY ROOM FOR THEM BUT YOU HAVE TO STAY WITH THEM, OK
طبعا وافقت وكنت طاير من الفرحة, وروحنا الحجرة اللى كان فيها لعب اطفال كتير وكومبيوتر والاطفال اتبسطوا فيها جدا وكانت ديه الحجرة بتاعتنا طول فترة وجودنا فى المستشفى, وكنت باسيبهم كل شوية وادخل اطل على امهم.
الولادة ماشاء الله اخدت وقت حوالى 15 ساعة مع انها الولادة التالتة, فى الفترة ديه ادولها ابرة الابيديورال علشان الالم و احنا استكشفنا المستشفى بالطول والعرض, بصراحة مستشفى كبيرة وحلوة الواحد يتمنى يشتغل فيها.....
كل شوية ممرضة تدخل تكشف تشوف احنا فين بالظبط , لما المسألة وصلت للأخر لقيتهم جهزوا نفس الحجرة علشان تبقى هى نفسها حجرة الولادة!!!!
الحمد لله ان فى نفس الوقت ده فى واحدة ممرضة صعبت عليها, قالتلى ادخل لمراتك وانا حاجلس مع الاطفال. وحضرت الولادة كلها ولقيت دكتورة كبيرة فى السن
عرفتنى بنفسها وهى اللى ولدت البيبى وخلتنى اقص الحبل السرى(يا جماعة الناس دى عندها احساس ومشاعر تجاه الاخرين غير عادية) علشان تبقى ذكرة كويسة. البيبى حطوه فى حضن امه على طول.جابوا ليه لبس وحفاضات والذى منه...
طلبوا ان الولاد يدخلوا يشوفوا امهم علشان يواسوها شوية بعد الولادة. انصرفت انا والولاد بعد الولادة وكانت الساعة 8 مساء.
على ميعاد تانى يوم علشان ناخد البيبى ومامته نروحهم.....
كانت تجربة لذيذة وممتعة ومتعبة لينا كلنا , بس كلنا كنا الحمد لله مبسوطين بيها
اسألكم الدعاء لانى شكلى حاسافر بدرى بعد ما عرفت موضوع لبى أر ده!!!
الحمد لله احنا رجعنا اول امس الى السعودية بعد رحلة اللاندنج السريعة( 3 اسابيع)
اولا : موضوع ال61 يوم عرفته من مكتب الهجرة , أتصلت عليهم علشان اعرف باقى قد ايه ويبعتوا الكروت, فعرفت ان فى سيستم جديد وكروت جديدة , لما قلت للاستاذ الكندى(الاوفيسر) انهم فى المطار قالوا حياخد 4 اسابيع , رد انهم فى المطار ما يعرفوش التعديلات الجديدة, قلتله ششششكككككرررررررراااااااا بالفرنساوى(merci ).
وكان ده سبب عودتنا بسرعة , غير كده احنا كنا عايزين ناخد الكروت ونرجع.
ثانيا: مافيش فرق انك تعمل لاندنج فى مونتريال او اونتاريو او اى مكان فى كندا لو انتى فيدرال, كل الحكاية انك لو نزلت فى كيبك(مونتريال) لازم تديهم عنوان خارج كيبك, غير كده المعاملة واحدة ولو حبيت تعيش فى مونتريال سهل , حتقدم على السى اس كيو وحيفرحوا بيك جدا وحيدوك فلوس علشان تتعلم الفرنساوى.
فى مكتب الهجرة بتاع مطار مونتريال, ظابط الهجرة طلب منى عنوان علشان يبعتوا عليه البى أر ,اديته عنوان فى مونتريال رفض!!! وقال ما ينفعش علشان انت فيدرال ,ما اتكلمتش معه كثير اديته عنوان فى اونتاريو (كنت محضره تحسبا لحاجة زى ديه).
الموضوع فيه شوية خطورة ومجازفة انك تمشى من غير ما تاخد الكروت , بس لازم تحدد الاولويات قبل ما تقرر تعمل اللاندنج
الرحلة ده كانت نوفمبر 2009