ناعومى كامبل عروس الصعيد !!

[فــيــروز]

الصحف المصرية والعربية

نعومى كامبل عروس الأقصر

-

نعومي كامبل مع الملياردير الروسي دورونين

قررت عارضة الأزياء البريطانية السمراء نعومى كامبل، الاحتفال بزفافها على الملياردير الروسى فلاديسلاف دورونين بمعبدالأقصر، فى السابع من شهر ديسمبر المقبل.

ومن المتوقع أن يحضر حفل زفاف كامبل، البالغة من العمر 40 عاما، ودورونين «47 عاما»، لفيف من نجوم هوليود وعدد من الشخصيات المرموقة والمشاهير. وسيقيم العروسان فى فندق «ونتر بالاس»، وهو نفس الفندق الذى أقام به الرئيس الفرنسى نيكولا ساركوزى وعارضة الأزياء الإيطالية السابقة كارلا برونى، أواخر 2007، قبل أن يقترنا العام التالى.

ويعود تاريخ إنشاء فندق «ونتر بالاس» إلى عام 1886، حيث أقيم على الطراز الفيكتورى، ويضم سبعة أجنحة سكنية فاخرة تطل على نهر النيل مباشرة، وتتراوح فيه الأسعار بين 850 يورو «للجناح الرئاسى»، و1250 يورو «للجناح الملكى».

حققت نعومى كامبل نجاحا غير مسبوق كعارضة أزياء سمراء، بمساندة صديقها وراعيها مصمم الأزياء الفرنسى إيف سان لوران‏،‏ والذى أصر على ظهورها على غلاف مجلة الموضة «فوج»، كأول فتاة غلاف سمراء عام ‏1988. وظلت نعومى العارضة السوبر طوال عقد التسعينيات،‏ إلى جانب أبرز العارضات مثل كلوديا شيفر،‏ وسيندى كروفورد،‏ وكيث موس‏.‏

وتشارك كامبل منذ عام 1997 فى رعاية الأعمال الخيرية جنوبى الصحراء الأفريقية،‏ وتتعاون فى هذا الصدد مع الزعيم الجنوب أفريقى نيلسون مانديلا‏، الذى وصفت معرفتها به بأنها من أعظم الأشياء التى مرت بها فى حياتها‏.

 

[فــيــروز]

هو أى حد "يقرّر" يعمل فرحه فى معبد مصرى يروح يعمله كده من غير ولا إحِم ولا دستور !! لأ و بيقول لك "عروس الأقصر" و فرحانين أوى و كأن المعبد كان مستنّى "ناعومى" تتهبّب فيه !! طيب و فين الباشمهندس "زاهر حوّاس" يكلّمنا عن نَفَس المعازيم و الضجيج و الإضاءه و تأثيرها السلبى على الآثار !! أنا حتى الآن لا أفهم لماذا لم يعلّق أى مسئول ع الخبر العجيب ده !!

 

 

[Prof]

اقتباس المشاركة الأصلية كتبت بواسطة فــيــروز هو أى حد "يقرّر" يعمل فرحه فى معبد مصرى يروح يعمله كده من غير ولا إحِم ولا دستور !! لأ و بيقول لك "عروس الأقصر" و فرحانين أوى و كأن المعبد كان مستنّى "ناعومى" تتهبّب فيه !! طيب و فين الباشمهندس "زاهر حوّاس" يكلّمنا عن نَفَس المعازيم و الضجيج و الإضاءه و تأثيرها السلبى على الآثار !! أنا حتى الآن لا أفهم لماذا لم يعلّق أى مسئول ع الخبر العجيب ده !!

أكاد أجزم ان الباشمهندس زاهي حواس وجدها فرصة أكثر من ممتازة من أجل مزيد من التصاوير والظهور على شاشات التلفزة.
وربما يكون هناك ظرف في الدرج والله أعلم (قصد اتهام أو قصد الإساءة).

 

 

[حازم حسن]

وزعلانة ليه بس يا فيروز انا شايف انها دعاية ممتازة للأقصر وللسياحة في مصر

 

 

[Dr.Samo]

يوم العيد رحت أفرج المدام على مسجد السلطان حسن .....أحد التحف المعمارية
ولأن مراتى مش بتحب الأثار .....قعدت اقنعها ان عمنا أوباما جاى من اخر بلاد المسلمين يشوفه
المهم رحنا لاقينا واحد قريب زاهر حواس بيكتب كتابة
وممنوع دخول المسجد
العسكرى بتاع الحراسة قالى لو حضرتك قريب العريس أو العروسة أدخلك
طبعا شكلى قدام مراتى كان وحش .....وعملت نفسى ببص فى حتة تانية
جنب منه مسجد الرفاعى (أحد التحف المعمارية ) واللى مدفون فيه شاه إيران
الفيران والقطط بيعلبوا صلح على الشاهد بتاعه
والجامع مرتع لأى حد ......الكارثة إن فيه غرفة فى مدخل المسجد مكتوب عليها بالبنط العريض
الحزب الوطنى الديمقراطى - الدائرة الفرعية
طبعا قلت لمراتى .....يالا بينا نمشى
أنا غلطان

 

 

[حازم حسن]

اقتباس المشاركة الأصلية كتبت بواسطة Dr.Samo يوم العيد رحت أفرج المدام على مسجد السلطان حسن .....أحد التحف المعمارية ولأن مراتى مش بتحب الأثار .....قعدت اقنعها ان عمنا أوباما جاى من اخر بلاد المسلمين يشوفه المهم رحنا لاقينا واحد قريب زاهر حواس بيكتب كتابة وممنوع دخول المسجد العسكرى بتاع الحراسة قالى لو حضرتك قريب العريس أو العروسة أدخلك طبعا شكلى قدام مراتى كان وحش .....وعملت نفسى ببص فى حتة تانية جنب منه مسجد الرفاعى (أحد التحف المعمارية ) واللى مدفون فيه شاه إيران الفيران والقطط بيعلبوا صلح على الشاهد بتاعه والجامع مرتع لأى حد ......الكارثة إن فيه غرفة فى مدخل المسجد مكتوب عليها بالبنط العريض الحزب الوطنى الديمقراطى - الدائرة الفرعية طبعا قلت لمراتى .....يالا بينا نمشى أنا غلطان

تستاهل عشان تسمع كلام المدام بعد كده

 

 

[حسام]

طول عمرى مش برتاح للراجل ده
مرة لما كنت بعمل موقع عن اسوان
زرت متحف ما مش هقدر اقول اسمه عشان الراجل مديره ما يتئذيش
طلبت منه معلومات
وهعمل موقع فيه كلمات ووصف عن اثار مصرية
غلطتش انا؟
قاللى بص يابني
شكلك نيتك طيبة
وهتدوينا فى داهية
اى حد في متاحف مصر هيتكلم مع حد من زواره
زاهي هيشيله على طول
قلت جايز الراجل بيقول كدة عشان يكبر دماغه
جبتله واحد معرفة وواسطة مهمة
برضة الرد كان هو هو
طبعا عشان الطاووس يفضل بيتكلم لوحده فى القنوات التمانية المحلية والنايل تي في وكل قنوات الدش

 

 

[فــيــروز]

طبعا لازم أعترض ع الموضوع !!

لأنّه لا يصح أن تُعامَل آثارنا و تاريخنا كقاعة أفراح !! و يبدو أن المسئولين من بعد ما ابتدعوا فكرة إقامة أفراح أنجالهم فى القصور التاريخيه لم يعودوا يجدوا أى غضاضه فى فعل المثل مع الآثار و الحِجّه الجاهزه : الدعايه و البروباجندا !!

معبد "الأقصر" لا يحتاج دعاية "ناعومى" أو غيرها بالعكس هى التى تحتاجه لإقامة حفل غير عادى يلفت إليها الأنظار و كان يفترض بمن صدّعونا بضرورة الحفاظ على الآثار فنقلوا تمثال "رمسيس" من مكانه القديم لمكان مهجور للحفاظ عليه و منعوا المصريين من دخول الهرم بردو للحفاظ عليه أن يكون لهم نفس الموقف ولا تتغيّر مبادئهم الأستكيه لمجرّد أن الطلب هذه المره من عارضة أزياء أجنبيه !! بجد موقف شديد السُخف ..

 

 

[brain]

ناعومي كامبل تزور البر الغربي

وسط أجواء حضارة‏7‏ ألاف عام فاجأت عارضة الأزياء البريطانية ناعومي كامبل أمس الأول زوار مقبرة الملك توت عنخ أمون بالبر الغربي بوجودها وسطهم للاستمتاع بزيارة مقابر وادي الملوك.


‏ وسجلت كامبل عارضة الأزياء السمراء البشرة والأشهر في العالم إعجابها وانبهارها بمقبرة الفرعون الذهبي توت عنخ أمون وكانت زيارتها قد تمت في سرية تامة وسط حراسها الشخصيين الذين كونوا حلقة من حولها‏.‏
https://www.ahram.org.eg/344/2010/11/08/16/47436.aspx

مش عارف بجد بيضحكوا على مين
اذا كان العالم كله عارف من حوالي اسبوع ان سيادتها جايه تحتفل بجوازها في الاقصر

 

 

[dr-amira]

تصورى يا فيروز بنتى كانت فى رحلة مع المدرسة للاهرام و كان نفسهم يدخلوا الهرم ....قالوا لهم ممنوع للمصريين ...و سمحوا للسياح قدامهم بالدخول ...حد يفهمنى ايه المنطق المقلوب ده و مين اللى طلع قرار زى ده ....و احنا بقى ازاى ساكتين على كده ؟؟؟؟؟؟؟؟