الخليج vs كندا .. لماذا يترك الكثيرون العمل بالخليج و يغامرون بالهجرة الى كندا

[هشام المصرى]

الصحف المصرية والعربية

السلام عليكم

اريد ان اسئل و استفيد من أرائكم فى التالى فقد تولد عندى فكرة ان الخليج يوجد به فرص عمل افضل للمصريين بدون معادلات ولا وجع قلب

وفى نفس الووقت التحويش فيه افضل من كندا

الجو فيه و ان كان حار فانه ليس فى سوء شتاء كندا

البلاد عربية مسلمة شرقية و ذلك ففيه حفاظ للهوية و الدين

العنصرية قليلة مقارنة بالغرب عموما

فلماذا اذن يتجه الكثيرون لكندا رغم انها مغامرة كبيرة جدا خاصة للمتزوجين؟؟

 

[Dr.Samo]

بإختصار من يتوجة لكندا يبحث عن الحرية
عن مستقبل افضل للابناء بإذن الله
الحياة ليست مالا فقط .....ولكنها تشكيلة متكاملة
(رعاية صحية متكاملة - تعليم على مستوى عالى للأبناء - .......وغيره الكثير )
طبعا هناك الكثير لا يقتنعون بهذه المبررات والأختلاف لا يفسد للود قضية
ولكن من هم هنا يؤمنون بهذا المنطق
اهم مافيها أن تعيش بحرية وبكرامة ......
ان لا تحمل هم غدر من أحد (كفيل - حكومة - نتيجة لأى موقف )
أن تحيا وانت تتنتشق هواءا نظيفا خاليا

 

 

[mohamed rabee]

الى بيهاجر ميعرفش ان الخليج افضل..ماديا

 

 

[anwar-m]

انا لم اعيش في الخليج
ولكن اغلب زملائي في الجامعه اتولدوا وعاشوا هناك
وفي كلمه قالها لي احد زملائي قبل حوالي عشر سنين وعمري ما حنساها
قال "" لو عشت في الخليج حتي 40 سنه وافنيت عمرك هناك , ممكن في يوم وليله تنطرد وتتلغي اقامتك زيك زي اي واحد دخل الخليج من يومين

اذا ما نبحث عنه هو
1- الاحترام
2- الكرامه
3- ان نعامل بما نستحق , او اقلها نعامل بادميه
4- تعيش في بلد مستقر , وتكون زيك زي اي مواطن او مقيم اخر

وشكرا

 

 

[ياسر جعفر]

خد بالك للطبيعة الساحرة فى كندا عشاق كُثـُر

 

 

[Ehab Salem]

اقتباس المشاركة الأصلية كتبت بواسطة هشام المصرى الخليج يوجد به فرص عمل افضل للمصريين بدون معادلات ولا وجع قلب

بدون معادلات ووجع قلب .. نعم
لكن مش أفضل من الناحيه المهنيه ..
من ناحيه ال Technicality.. ال Professionality ...
الخبره المكتسبه في كندا أثقل و أقيم
إلا إذا كنت هتشتغل في شركه عالميه في الخليج

اقتباس وفى نفس الووقت التحويش فيه افضل من كندا

بصفه عامه صح .... بس طبعا خلي بالك إنت في الخليج قدرتك محدوده على رفع راتبك بصوره دوريه مع تقدم العمر
في ظل نظام الكفاله معندكش حاجه تناور بيها غير التهديد برجوع بلدك أو الإنتقال لبلد خليجي أخر وناس كتير مبتقدرش تهدد بكده مخافة الإستجابه لهم في ظل الإقبال الكبير على العمل في الخليج بأجور صغيره
أنا شفت ناس في قطر شغالين بنفس الراتب لسنين طويله و بح صوتهم بالمطالبه بالزياده نظرا لزيادة أعبائهم و كل اللي سمعوه "يصير خير "

على الجانب الأخر ... في كندا .. إنت حر ... من حقك تسيب جهة عملك و تروح مكان تاني براتب أكثر في أي وقت بعد إخطارهم قبل المده المحدده في العقد و اللي هيا تتراوح من شهر لشهرين
وده اللي بيخلي الشركات بتحاول إستبقاء الموظفين بتطبيق retention policy جيده ... زيادات رواتب دوريه مجزيه (حسب إجتهاد كل موظف) ... أنشطه إجتماعيه .... benefits أخرى غير الراتب .. وهكذا

وبعدين إنت بتقارن حاجتين مختلفتين
إنت في الخليج ... ضيف ... تعمل مقابل أجر ...
في كندا إنت مواطن ... صاحب البيت .. زيك زي كل الناس لك كل الحقوق

اقتباس الجو فيه و ان كان حار فانه ليس فى سوء شتاء كندا

أنا جربت الإتنين ... صدقني شتا كندا أهون بكتيييير من حر الخليج
هنعتبر الإتنين متساويين في الأماكن المغلقه .. فرضا (برضه كندا أحسن في دي) .... هنا تدفئه ... هناك تكييف و الناس عايشين
بس في الأماكن المفتوحه .... البرد له حل .... الحر و الرطوبه ملهمش

اقتباس البلاد عربية مسلمة شرقية و ذلك ففيه حفاظ للهوية و الدين

صحيح ... بس الموضوع في إيدك إنت برضه
و الإنترنت و الفضائيات قللت من المشكله دي كتير
إحنا عايشين في المنطقه العربيه فعليا ... من ناحية الميديا

اقتباس العنصرية قليلة مقارنة بالغرب عموما

معندكش حق في دي خالص
عنصرية الخليج ملهاش مثيل ... عنصريه بالقانون .. عنصريه تشمها في الهوا
ماليش دعوه بالغرب ... يعني فرنسا ... هولندا ... و النماذج دي
أنا عايش في كندا بقالي 3 سنين و مشفتش عنصريه
لا ظاهره و لا خفيه و لا بفيونكه حتى

 

 

[VERDI]

بحثا عن الأخلاق

 

 

[اسكندرية تانى]

اخى الكريم

طبعا كندا تكسب رغم صعوبة الدخول فى السيستم الكندى بالذات لو انت regualted job
بس بشاعة الاحساس انك مواطن ....اسف... وافد من الدرجة العاشرة اسوأ من اى احساس اخر!

مرارة الاحساس بانك لا تستطيع الاعتراض على مالا يعجبك لا تعوضها كنوز الدنياّّّ

الحقيقة يعنى.... كندا البيت بيتك

تحياتى

 

 

[Dr. masryia]

سؤال حلو ومهم أوى أستاذ هشام
احد الاصدقاء حكت لى ان فى احدى دول الخليج لا ينفذ القانون الا على الوافدين وانه اذا اشتكيت على احد ابناء البلد لا تستطيع انك تأخذ حقك وعلى العكس اذا اشتكاك احد المواطنين وان لم يكن له حق فيحكم عليك
نادرا ماتجد رب عمل ينفذ قانون العمل ويعطيك حقوقك ونظرة الازدراء الشديد جدا للعمالة الاسيوية الذين يقومو باعمال النظافة وما الى ذلك ولا يقدر ويحترم عمله كما يحدث فى كندا
اما رأئى الشخصى فكندا تعنى الحرية والنظام والقانون الذى يطبق على الجميع والاهم هو تقديم مستوى متقدم وعالى فى التعليم وده السبب الاول اللى خللانا نفكر فى الهجرة ....الاولاد ثم الاولاد

خالص تحياتى

 

 

[Om nour]

أختي الفاضلة Dr Masriya و الأخ الفاضل Ehab Salem ردودكم بصراحة المختصر المفيد و وجعت قلبي خاصة و انا لسة سايبة الخليج من شهرين و استقريت في أخر يوليو هنا في مونتريال اللي تفضلتوا و اوجزتوه هو بالضبط اللي بيحصل في الخليج فلوس كتير أوي و مستوى معيشة عالي يجب ان تجاريه من حيث السكن و المدارس الانترناشيونال و الشغالة و عربيتين في البيت و اشتراك في نادي ولبس ماركات و مكياجات و برفانات من اشهر البيوت و عروض كل يوم و التاني و سفر للدول المجاورة في الويك اند و لكن مافيش تقدم مهني تقريباً معدوم يعني بنتحول لmoney makers و بنحس اننا صدينا على الصعيد المهني و بنعامل كمواطنين درجة تاسعة مش تانية حتى ، و الحر و الرطوبة حدث و لا حرج لكن في الاخر بيكون في مكسب مادي عالي ماقدرش انكر (أمابنعمة ربك فحدث) لكن الحالة النفسية بتكون دايماً مضطربة . ربنا يكرم الجميع سواء في كندا أو في الخليج