أنا وأنتم ....وتورونتو

[Dr. Ahmad]

الصحف المصرية والعربية

مقدمة:
بعد الوصول الى كندا .. والانتهاء من إجراءات اللاندينج
والاستقرار في تورونتو إحدي مقاطعات كندا
تورنتو (بالإنجليزية: Toronto) وهي أكبر مدن كندا، وهي عاصمة مقاطعة أونتاريو

بسم الله الرحمن الرحيم ... أعزائي المطاريد .. اتوجه بالشكر بعد الله تعالى لكل من ساهم ولو بكلمة في بداية مشوار الهجرة ..شكر خاص للدكتور qenawy ...الرجل اللي بسببه عرفت أقدم ازاي ..واشكر الدكتور Robin hood والدكتور الشامي والدكتور التهامي والمهندس ايهاب سالم والمهندس يوسف الماضي والمهندس زناتي والدكتور الرفاعي والمهندسة سمية صالح والاستاذ مازن الاطرش والمهندس ياسر والدكتور MOE ويارب ما اكونش نسيت حد ...ربنا يجعل كل ما كتبوه أو فعلوه في ميزان حسناتهم ...وقبل كل شيئ ...الشكر والحمد لله وحده ... فلولا دعاء الله وتوفيقه ما كان لشيئ ان يكون...
تم بحمد الله الوصول الى ارض توروننتوم سالما غانما ..

 

[Engineer]

حمد الله على السلامة و عقبال كل المنتظرين

 

 

[حسام]

بجد؟
مش حضرتك بلدياتي دكتور
Dr.A?
والله ماكنتش واخد بالي انك م المهاجرين
ألف مبروووووووووووووك
وبالتوفيق فى حياتك الجديدة
وربنا يكتبلك فى كل خطوة سلامة

 

 

[Eng Hesham]

الف الف الف مبروك وحمد لله على السلامه

بالتوفيق فى الاراضى الكنديه ان شاء الله

تقبل خالص تحياتى

 

 

[astrophy]

حمدلله على السلامه ربنا يوفقك

 

 

[Dr. Ahmad]

شكرا هشام .. حسام .. و Engineer ربنا يوفق الجميع لما يحبه ويرضاه .
ايوه يا دكتور حسام .. انا ليا الشرف اني بلدياتك ..

 

 

[Dr. Ahmad]

اقتباس المشاركة الأصلية كتبت بواسطة astrophy حمدلله على السلامه ربنا يوفقك

الله يسلمك وشكرا يا Astrophy

 

 

[Dr. Ahmad]

في مطار القاهرة كنت حاسس احساس غريب..... مش عارف اذا كنت فرحان ولا زعلان.... ما اتذكره هو اني كان صعبان عليا كل فرد في عائلتي .... عارف انهم كلهم هيوحشوني ..... وجاءت لحظة السلام الكئيب اللي عمري ما حبيته في حياتي لما بكون مسافر او أي واحد بحبه مسافر .... لكن هنعمل ايه .... هيا الدنيا كده .... دخلت على البورد بتاعة لوفتهانزا....الراجل خد مني الشنط وحطهم على الميزان....ولقيت الوزن زيادة 3 كيلو.....يانهار مش باين له لون ....من اولها كده .... ده الكيلو الواحد الزيادة في لوفتهانزا بالشيئ الفلاني .... امال انا بقالي اسبوع عمال اوزن ايه .... وكل لما عدي جنب الشنطة اروح جايب الميزان ووازنها ..... الظاهر اني كنت باشتغل نفسي بالميزان بتاعي ده .... هتعمل ايه يا احمد هتعمل ايه يا احمد .... وفجأة لقيت الراجل اللي بيحط الشنطة قاللي احنا هنعديهالك المرة دي .... و.... كل سنة وانت طيب .... افتكرت برنامج كنت شوفته في رمضان بتاع عمرو قطامش كانت الحلقة بعنوان " كل سنة وانت طيب " ... واهو 20 جنيه احسن برده من 100 دولار ... البنت اللي قاعدة بقى لازم تتسلى عليا ... قالتلي :" انت عارف ان لوفتهانزا بقت شنطة واحدة ... وانت معاك شنطتين ؟" كنت عايز انادي على الراجل اللي خبط العشرين جنيه وقالوا خلاص ..انا مش مسافر.... بطلت ... انا لسه سائل في شركة السياحة اللي حجزت عندها وقالولي شنطتين ... بس الحمد لله لاقيت البنت كتبت حاجة على الكمبيوتر وقالت لي : "غريبة انت مكتوب قدامي على الشاشة ان لك شنطتين !!!... بعد كده ابقى اعمل حسابك انها شنطة واحدة " ...اصل الكحكة في ايد اليتيم عجبة ... ياستي انجزي بقى الله يخليكي ...المهم .. عدت الحمد لله ...الضابط بتاع الجوازات كان عمال يتاوب وأول لما لمح فيزا الهجرة ,,,ماكدبش خبر ...وراح كاسر ورايا قلة ...ما وقفتش قدامه اكتر من عشرين ثانية....الحمد لله....كان باقي على الطيارة حوالي ساعة ونص ...جبت كوباية كابتشينو مالهاش أي طعم من المطار...بس كانت رخيصة....ب 36 جنيه بس....غرفة المدخنين في المطار مكان يكرهك في عيشتك بصراحة....ربنا يتوب عليا منها بقى وخلاص ...

 

 

[Dr. Ahmad]

الطيارة كانت جميلة والحمد لله ...طقم المضيفين كانوا الاغلبية فيهم فوق التسعين سنة....ماعدا بنت عسولة كده عندها حوالي 50 سنة ...طبعا ما فيش دعاء السفر ..لازم انت اللي تقوله مع نفسك ...وفيها شاشة في كل كرسي ...تختار منها اغاني او اخبار او كارتون ...او افلام او مسلسل...انا شوفت فيلم واحد بتاع "ميل جيبسون" كان اسمه "The Beaver " وطبعا كل شوية حاجة تشربها وجابولي الوجبة بتاعتي (بيض اومليت) و عشان كده ما عدتش هطلب “Muslim meal” تاني.....!!!
الرحلة كانت 4 ساعات تقريبا وكانت عامة جميلة وما حسيتش بيها بصراحة ...مكانش معكنن عليا بصراحة غير ريحة الشراب بتاعة الراجل اللي كان جنبي ...وماكنتش عارف اقول له ايه.... كنت مفكره الماني لانه حاطط تاتو على ايده...وبعدين في نهاية الرحلة اكتشفت انه مصري من الباسبور بتاعه....
والطيارة بتنزل .... فرانكفورت كانت باينة جميلة جدا ...غابات خضراء....والشوارع مرسومة رسم ..والعربيات والقطر الوانهم فاقعة كده ...وتحس ان ما فيش تراب في أي حته فيها....وهبطت الطائرة....والطيار كان فنان بصراحة...وبهذه المناسبة ..احب اشكر طيارين شركة نادي مصر للطيران ...اللي لحظة هبوط الطائرة كنت دايما بحس ان الطيارة دخلت في جبل... نادوا في الميكروفون ان كل واحد لازم يخلي باله من لغاليغه ويبرز الباسبور بتاعه عشان حضرة الظابط هيشوف الباسبورتات على باب الطيارة ...وبعد ما الطيارة وقفت ...بدأت الركاب تعدي واحد ورا التاني والظابط يشوف الباسبور بتاعهم...لحد ما جه الدور عليا ...لاقيت كده واحد طول بعرض ولابس لبس الصاعقة ...ومسك الباسبور بتاعي من الشمال لليمين ...وقعد يقلب يجي 5 صفح ما لاقاش حاجة ...راح ماسكه بالعرض وقعد يقلب برده مالقاش حاجة ...راح قايل لي : ويلكم.... لسه هيقعد يوجع دماغه ...

 

 

[Sweet Heart]

حمدالله على السلامة د/ أحمد، بالتوفيق إن شاء الله.