Arabic Discussion Forum with a Special Interest in Travel and Immigration

dr_mohamedimam · 14th December 2010, 02:21 PM

التكرااااااااااار

OmarDent · 14th December 2010, 10:50 PM

أنا دخلت علي المواقع الخاصة بقصة المعادلة و واضح ان في تعديلات جديدة هيبدأ تنفيذها في 2011 ان شاء الله
و ملخصها ان المعادلة ممكن تتم بطريق تاني غير انك تقدم علي برنامج المعادلة و لو قبلت تدرس اخر سنتين في الكلية
الطريق التاني هو سلسلة من الامتحانات نظري و عملي و فترة اختبار في حدود 3 أشهر و لو نجحت تقدم علي امتحان البورد و تاخد ال License و لو فترة الاختبار اللي هي 3 شهور أظهرت انك غير مؤهل ودة أكيد اللي هيحصل مع الكل مفروض تاخد فترة تدريب لمدة 9 شهور و بعدها تمتحن البورد
نرجع لنفس المشكلة لما تحتاج التدريب لأنه هيكون موجود في 8 جامعات تقريبا و طبعا العدد محدود
و بالتالي ممكن يكون الموضوع أسرع شوية بس تظل مشكلة القبول في الجامعات هي العقبة خصوصا في وجود منافسة شديدة جدا من الأطباء الأسيويين

dr_mohamedimam · 15th December 2010, 05:12 AM

اللي فهمته انه قدامك حل من اتنين ..
1 - تقدم في برنامج جامعي اسمه (IDAPP ) =
International Dentist Advanced Placement Program for Foreign-Trained Dentists

اللي هم احنا ... تمام ده بعد ماتخلصه (مش عارف مدة التدريب قد ايه) بتدخل على سنة تالتة و رابعة في الكلية ... و بتتخرج بدرجة DDS=doctor of dental surgery و البرنامج ده بيأهلك انك تدخل امتحان البورد الكندي اللي حسب ما فهمت (كلهم بيدخلوه حتى الكنديين )عشان يتم اعتماد شهادتك و تترخص...و الامتحان ده نظري و عملي طبعا..

و من شروط انك تدخل برنامج ال IDAPP انك تكن معاك الايلتس و تكون ناجح في امتحان تقييم اللي هو EE=eligibility exam (و ده لسة مش قادر اعرفه ... هو يفرق ايه عن كل الامتحانات اللي حندخلها دي؟؟)
ده طريق..
الطريق التاني :
تدخل في سلسلة امتحانات ... و تدريبات و تقييمات ... و بعد ما تعديها تمتحن ال NDBE و بيبقى امتحانين written & OSCE
اللي هو حتمشي في الخطوات بالضبط اللي في الصفحة دي https://www.ndeb.ca/en/non_accredited...graduates.html
.....................
فأنا شايف ان المشكلة انك تنجح في امتحانات اللي عاملنها للقبول أو تمشي في السكة التانية اللي هي سلسلة التقييمات دي و لو دست على كل خطوة حتلاقي شرحها و تكلفتها و هي عبارة عن ايه ...
يعني الموضوع متعلق بالمذاكرة الكويسة و النجاح في الامتحانات دي...

اللي عايز أتأكد منه.. هل سهل بالنسبالنا نتقبل في شغل مساعد أسنان هناك وللا دي كمان محتاجة ترخيص ؟؟!!!!!!!
أنا حاسس ان الموضوع صعب و مكعبل ... بس خطوة خطوة نمشيها .. المهم في الاخر اننا نتخرج بشهادة معتمدة و تعليم سليم..
طيب انت ناوي على ايه لما تنزل هناك بما انك قدمت ورقك خلاص يبقى خططت حتعمل ايه ان شاءالله...

dr_mohamedimam · 15th December 2010, 05:18 AM

اللي كمان عايز أتأكد منه.. هل تقديرنا و درجاتنا في البكالوريوس عندنا حتفرق في القبول؟؟؟ و بالنسبالي انا عملت دبلومة سنة بعد التخرج في جراحة الفم ..فحياخدوا بمجموعي و تقديري في البكاوريوس وللا اللي في الدبلوما؟؟؟ وللا أصلا ملهومش دعوة بتقديراتك...لان اللي فهمته انك لو حتقدم على برنامج الجامعة حيبقوا عايزين مجموعك .. لكن لو سكة المعادلة الطويلة اعتقد ملهومش دعوة بالمجموع..

dr_mohamedimam · 15th December 2010, 05:38 AM

أول مرة أشوف الموضوع ده .. وواضح انه أسنان في كندا محدش جربها خالص :)

dr_mohamedimam · 15th December 2010, 05:40 AM

طيب أنا كنت عامل موضوع تاني عن طب الأسنان في كندا و مع اني بحثت كتير في كل المواضيع القديمة حتى في المنتدى بس ما شفتش الموضوع ده قبل ما أعمل بتاعي.. فرجاء من المشرفين يضموا الموضوعين على بعض... و مازلنا في انتظار طبيب أسنان جرب معادلة شهادته و الشغل في كندا..

OmarDent · 15th December 2010, 06:16 AM

مممم بص يا سيدي موضوع القبول دة طبعا مرتبط تقريبا بكل حاجة في ملفك
لو انت راجل جايب في البكالريوس 90% و جايب تويفل عالي و في امتحان ال Eligbility جايب سكور عالي أكيد هتكون فرصك أعلي كتير من واحد جايب تقدير نص نص و هكذا
المشكلة ان جامعة من جامعات أونتاريو ( هما جامعتين بس في أونتاريو اللي موجود بيهم البرنامج دة ) مش فاكر أي واحدة فيهم كانت بتاخد 25 واحد في السنة و عندك الهنود صواريخ مذاكرة و بيجيبوا سكورات عالية جدا و عادة هما و الاسيويين اللي بياخدوا الأماكن دي

المهم كلامك متطابق مع اللي أنا قلته من ناحية سكك المعادلة ... و طبعا موضوع ان 300 بس اللي مقدمين فانتا عندك الاف هناك مستنيين الفرصة :( و متنساش ان كيبيك عمالة تجيب ناس و بأعداد كبيرة غير اللي انتا شايفه في الفيدرال
العمل كمساعد طبيب أسنان بيتطلب ترخيص و دة مش بتاخده الا لما تاخد كورس

مش فاكر كان 6 شهور أو سنة و تكلفته كانت معقولة تقريبا 5000 دولار بس الاقبال عليه عالي و كانوا كاتبين جنبه Competitive لكن أكيد لما دكتور أسنان يقدم حتي لو مش معادل هيكون ليه أولوية ( و الله أعلم )
نرجع تاني للمعادلة .. أنا شايف ان التدريب التأهيلي دة هيتطلب من كله و بالتالي هتكون المشكلة انك تتقبل في جامعة بتقدم البرنامج دة
لكن نرجع نقول انظام الجديد دة برضو فيه ميزة ... علي الأقل انه هيستوعب عدد كويس من الناس الفطاحل بتوع اسيا و يزود عدد الفرص المتاحة في برامج المعادلة (النظام القديم ) للي مش هيفلح في انه يلتحق ببرنامج التدريب المطلوب للمعادلة ( النظام الجديد )
بالنسبة لي أنا مستني ان ملفي يتقبل الأول ( ربنا يسهل ان شاء الله ) و بعد كدة ابدأ أتحرك و أقدم
لكن أنا شخصيا بفكر اني أقدم علي دراسة تانية غير الأسنان بحيث انها تزود فرصي في العمل الي أن يشاء الله ان موضوع المعادلة دة يمشي
أنا أصلا كنت بفكر اني أدرس حاجة في مجال ادارة الأعمال و أنا هنا في مصر و قبل ما أفكر في موضوع كندا و كنت مقدم علي MBA في الجامعة الأمريكية و أخدت ال GMAT Test و جبت فيه سكور كويس الحمد لله و قبلت في الجامعة الأمريكية .. لكن تراجعت لبعض الأسباب منها ان التعليم في مصر استثمار مش امن و عائده صعب جدا التكهن بيه و ال MBA دي كنت هصرف عليها حوالي 150-200 ألف جنيه

فبصراحة أنا بدأت افكر تاني اني أقدم علي Full Time MBA في كندا و و دي ممكن تستغرق حوالي سنة
لكن حتي الان لسة مسألتش حد من الأخوة اللي موجودين في كندا عن جدوي الدراسة دي و فرص انها توفرلي عمل مناسب .. و وجود GMAT معايا هيسهل اني أقدم للجامعات يعني هقدم و مش هخسر كتير ان شاء الله و لو قبلت هتكون فرصة كويسة لو مفيش أي فرص أحسن ... انما لو لسة هجهز نفسي عشان GMAT و TOEFL أكيد كنت هفكر قبل ما أضيع كل الوقت دة في حاجة ممكن مستخدمهاش
ياااااه أنا اتكلمت كتير أوي

و علي فكرة يا دكتور محمد أنا بعتلك علي الخاص ردا علي كلامك من يومين لكن انت مرديتش

dr_mohamedimam · 15th December 2010, 06:45 AM

ليه بس يا دكتور عمر.. أنا بعتلك على الماسنجر نفس اليوم ... :) و بنفس اسمي هنا ...
كل ما بسمع حد من الأسنان ناوي يغير الكرير.. بكتئب... :(
ربنا يصلح الحال يا رب و يوجهنا للخير...

OmarDent · 15th December 2010, 07:03 AM

ههههه لا مفيش اكتئاب و لا حاجة ان شاء الله
طيب انت رأيك ايه في وضع أطباء الأسنان في مصر ؟؟ أهو دة اللي يجيب اكتئاب صح
أنا في الشوية اللي اشتغلتهم في الصحة كانت الممرضة اللي معايا في عيادة الأسنان بتاخد حوافز أكتر مني ... هاه ايه رأيك ؟؟ عشان كدة خدت أجازة بدون مرتب من الحكومة
و علي فكر موصلنيش حاجة منك خالص ... دي مش أول مرة تحصل معايا .. عموما ابعتلي ايميلك

dr_mohamedimam · 18th December 2010, 06:54 AM

اقتباس

المشاركة الأصلية كتبت بواسطة OmarDent


	ههههه لا مفيش اكتئاب و لا حاجة ان شاء الله طيب انت رأيك ايه في وضع أطباء الأسنان في مصر ؟؟ أهو دة اللي يجيب اكتئاب صح أنا في الشوية اللي اشتغلتهم في الصحة كانت الممرضة اللي معايا في عيادة الأسنان بتاخد حوافز أكتر مني ... هاه ايه رأيك ؟؟ عشان كدة خدت أجازة بدون مرتب من الحكومة و علي فكر موصلنيش حاجة منك خالص ... دي مش أول مرة تحصل معايا .. عموما ابعتلي ايميلك

الوضع مش محتاج نتكلم عليه ماهو واضح زي الشمس و اديك قلت الممرضة بتاخد حوافز أكتر.. أنا سبت مصر كلها و رحت اشتغلت في السعودية اساسا.. هنا يمكن ماديات أحسن بس مستوى الشغل ضعيف خالص بالنسبة لل GP
عشان كدا عايز أدرس في اي حتى تانية .. ربنا يعين..
هو صحيح مفيش ولا طبيب أسنان شفته معدي من هنا... !!!!! هم ما بيهاجروش وللا ايه؟؟؟

انت موجود عندي في الماسنجر خلاص...

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الخليج vs كندا .. لماذا يترك الكثيرون العمل بالخليج و يغامرون بالهجرة الى كندا	هشام المصرى	الهجرة إلى كندا	187	9th December 2022 06:10 AM
الإسلام فى كندا	ehabtaher	شؤون إسلامية	352	20th February 2021 10:26 AM
عرب كندا....عن حياة العرب فى كندا.!!	Badroora	الهجرة إلى كندا	62	26th June 2015 06:47 AM
كندا وحشه خالص ☻☻☻ دعوه لعرض سلبيات كندا	nassarlink	الهجرة إلى كندا	355	26th August 2014 08:55 PM
حملة شعبية في كندا للمطالبة بتوقيف بوش في جرائم حرب ... عمار يا كندا ...	MFaisal	شؤون عربية ودولية	0	6th October 2009 06:35 PM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

الدراسة فى كندا واستراليا واوروبا

طب الاسنان في كندا