هاملتون لأول مرة

[Clinical chemist]

الصحف المصرية والعربية

السلام عليكم ورحمة الله وبركاتة
أحييكم من هاملتون - أونتاريو اختيارى للأستقرار بكندا وهقول بعدين ليه هاميلتون بالتفصيل
وعموما انا باكتب الموضوع ده أولا كألتزام أدبى بذكر تجربتى يمكن تفيد اللى بيفكروا فى الهجرة زى ما أنا استفدت من مشاركات وتجارب الآخرين فى هذا المنتدى وبخاصة أنا لاحظت عدم وجود أى تجارب سابقة لأحد بهاملتون بأستثناء بعض الأخوة السعوديين فى منتديات أخرى.
ثانيا أنا هاعتبر أنى بكتب مذكراتى فممكن الكلام يفتح شويتين بس أعتقد أن التفاصيل ممكن تفيد البعض.

 

[Clinical chemist]

أنا عايز أبدء من أول مشوار الهجرة والأسباب وحابب أعرفكم بنفسى وأسرتى الأول

د.محمد محمود أستاذ مساعد الكيمياء الحيوية الاكلينيكية
متزوج وعندى 3 أولاد

البداية كانت فى مصر
الحياة معقولة وأن كانت على القد والوضع الوظيفى معقول ولكن ممل وفرص الترقية ضعيفة وبطيئة والمستقبل مش واضح.

أنا عايز أقول أنى قبل الالتحاق بالكادر الاكاديمى كنت - ومازلت - استشارى للتحاليل الطبية وعندى معمل تحاليل طبية لكن المشكلة كانت فى المنافسة الرهيبة مع شركات المعامل اللى غطت تماما على المعامل الفردية وبالتالى الشغل اصبح ضعيف وممل ولا يبشر بمستقبل جيد.

حاولت فى كل الاتجاهات وبخاصة الكادر الاكاديمى ولكن بدون جدوى
قدمت فى كل حته فى مصر والخليج حتى كنت على استعداد للعمل فى أى مستوصف فى السعودية - وهم كتييييييييييييييير - من كتر الزهق بس كنت بتراجع فى الآخر لأنى مش بحب البهدلة وقلة القيمة.

والدنيا ضاقت بشكل فظيع وركبنى الهم من كتر التفكير والحقيقة المشكلة مكانتش مادية بالدرجة الأولى وانما المشكلة كانت انى استقر فى كرير احبه ويرضى طموحى وبالطبع مستقبل أولادى كان شاغل تفكير وعايز أضمنلهم ظروف تعليمية ومعيشية جيدة.

بعد محاولات عديدة مريرة للبحث داخليا وعربيا بدءت أتجه غربيا لأول مرة
وبدءت بأنجلترا لأن كان لى صديق هناك بيحضر الدكتوراة فى الهندسة وقلت أسأله أذا كان ممكن الاقى فرص أكاديمية أو عملية هناك والكلام جاب بعضه حوالين المستقبل والعيشة والأولاد والتعليم ......وهب....قالى طب ليه متفكرش فى كندا ؟

وبدء المشوار

 

 

[Rapt]

مبروك يا دكتور .. جاري عمل زرار واضافة التوبيك الجميل .. لكتالوج كندا خالص تحياتي

 

 

[Clinical chemist]

الصراحة عمرى مافكرت فى اتجاه الغرب وفكرة الهجرة بالذات كانت فكرة غريبة ومرتبطة فى ذهنى بالغربة والقطيعة والخوف على الأهل وبخاصة والدى ووالدتى كبار السن ربنا يديهم الصحة.

لكن اللى حصل الحقيقة غريب

بعد ما خلصت كلامى مع صديقى بانجلترا تنحت شوية وبعدين دخلت فى حوار مع زوجتى

أنا بسخرية : تصورى بيقولى فكر فى الهجرة لكندا؟
هى : وماله فكرة برضة
أنا : أزاى يعنى دى هجرة يعنى نسيب كل حاجة واهلنا ونروح للمجهول
هى: ما احنا جربنا كل حاجة خلينا نجرب السكة دى يمكن فيها الخير
أنا : مش عارف والله عموما استخير الله وربنا ييسر اللى فيه الخير.

وأستخرت الله فى الليلة دى وانا واخد الموضوع باستخفاف ومش مقرر حاجة
لكن الحقيقة أنى شوفت رؤيا مطمئنة وصحيت تانى يوم والموضوع مالى دماغى
ولقيتنى بأتصل بالمركز البريطانى وبحجز ميعاد الأيلتس كده خبط لزق

مش عارف ليه من اللحظة دى وانا حاسس - وحتى الآن - أنى مدفوع دفع فى اتجاه الهجرة
وهب........ربنا كرمنى ونجحت فى الايلتس من أول مرة ......وكنت موضب ملف الهجرة بمساعدة الزملاء الكرام بالمطاريد .....ولا محامى ولا بتاع ( بالمناسبة أحدهم كان بيستعبط وعايز 25 الف جنيه عشان يعملى الملف ويتابع اجراءات الهجرة).......وهب بعت الملف لكندا فى نفس يوم نتيجة الايلتس.....بدءتم تنهجوا معاى
كل ده خلص فى حوالى شهر من بداية تفكيرى فى الهجرة.

10 أيام تقريبا ولقيتهم ساحبين الفلوس من الفيزا......يا ما أنت كريم يارب
وفرحت قوى أن الموضوع ماشى بالسرعة دى واستبشرت خير

وفجأة........أفتكرت حاجة بسيطة خااااااااااااااااااااااااااااااااالص

هو أنت لما تجيلك الفيزا للهجرة ........هتجيب منين فلوس رحلة اللاندنج والاقامة شهر على الأقل فى كندا للعائلة

هاااااااااااااااااااااااااااار أسود.......أيه اللى أنا عملته ده

 

 

[Clinical chemist]

صحيح أنا دخلى كان معقول لكن كمان أنا كنت صرفت جزء كبير من مدخراتى البسيطة على اجراءات الهجرة والباقى بالعافية يكفى مصاريف الميديكال والفيز والتذاكر واحتمال مصاريف الاقامة شهر بكندا .....بس ده يبقى معناه أننا نرجع لمصر شحاتين ونعيش بقى على زكريات اللاندينج

قلت لنفسى ليه كده.....ورطت نفسك فى سكة مش مدروسة كويس وضيعت فلوسك على الفاضى وانت لا عندك مدخرات كتيرة ولا شغال فى الخليج.....حد يعمل كده......أعمل أيه بس يا ربى أنا أستخرتك قبل مادخل السكة دى .....أجيب فلوس منين أكمل المشوار ده......لو بس كنت أشتغلت سنه ولا أتنين بالخليج مش كانت الأمور تبقى اسهل.

تصدقوا

شهر بالظبط

وألاقى جامعة سعودية بتتصل بى للعمل كأستاذ مساعد ......لا وأيه....مستعجلين

مع أنى كنت مقدم لهم طلب من فترة كبيرة.....أيه اللى فكرهم بى

ساعتها بدءت أتأكد أن ربنا عايزنى أكمل مشوار الهجرة وبيحلهالى.

 

 

[Clinical chemist]

الله يبارك فيك يا Rapt
شكرا لاهتمامك

 

 

[Clinical chemist]

المهم

خدت بعضى وعلى السعودية عدل

وهناك بقى لقيت معاملة حلوة ومرتب جميل والجامعة كانت فى الدمام ودى مدينة جميلة ومتفتحة

وبدءت اعيد تفكيرى......طب ما حلو كده احنا هننهب بلا هجرة بلا بتاع

يادوب شهر من وصولى السعودية وألاقى ايميل ال PER جايلى

هنا بقى دماغى دخلت الخلاط وحد شغله ودماغى جواه

وبدء الصراع وبدءت اقارن بين السعودية وكندا

السعودية:ايجابيات: فلوس - عيشة كريمة لى وللأولاد - الكادر الأكاديمى اللى كان نفسى فيه
سلبيات: تعليم سىء للأولاد (90% من المدارس هناك سيئة )
الفلوس اللى هعملها مسيرها تخلص ومهما قعدنا فى السعودية عمرنا ماهنبقى سعوديين
وهتفضل المعاملة معاملة الأجير ليس الا.
يبقى السعودية فلوس وبسسسسسسسسسسسسسس

كندا: 3 أو 4 سنين ونبقى مواطنين - تعليم مميز للأولاد (كندا رقم 2 فى التعليم بعد فنلندا) - هنعامل كمواطنين من اول دخولنا كندا - بيئة جيدة للعيشة والاستقرار - ويمكن ربنا يكرمنى بعمل قريب من مجالى.

المهم استخرت الله لأنى كنت محتار جدا ......وقلت خلاص......لما تيجى الفيزا نبقى نطلع زى بقية الناس نعمل لاندينج وبعدين نرجع السعودية 3 سنين نعمل مدخرات كويسة نعتمد عليها فى الاستقرار فى كندا.

وكان ده قرارى وقتها

 

 

[Clinical chemist]

أتأخر على الميديكال لحد مازهقت ورجعت تانى أقول لنفس خلاص مش مهم ......حتى لو ملفى اترفض دلوقت مش مشكلة اهو البديل موجود ولما أزهق من الخليج أبقى أقدم تانى.

أنا ذكرت التفاصيل السابقة عشان ابين بس أنى الأمور كانت ماشية بتوجيه بحت من الله مش بأرادتى أو أختيارى
والصراحة ده اللى مطمنى

المهم

6 أشهر ولقيتهم مرقينى لرئيس قسم

قلت لا بقى .....ده كده يبقى افترى وبطر.....بارك الله فيما رزق وكده رضا وألغى بقى ياعم موضوع الهجرة ده

بس اللى حصل بعد كده ينفع يبقى فيلم أكشن وهأحكيه عشان الأخوة اللى بيشتغلوا فى الخليج يستفيدوا منه

 

 

[Dr-Alrefa3y]

حمدا لله على السلامة يادكتور ,,,
متابعين باهتمام ياجميل,,,

 

 

[مسلمة معاصرة]

سرد جميل للأحداث فعلا واجمل ما فية هو التوكل على الله فى كل شى
ربنا يوفقك يا دكتور ومستنيين التفاصييل