Arabic Discussion Forum with a Special Interest in Travel and Immigration

abysaleh · 10th November 2010, 03:58 PM

كل واحد فينا عايز يهاجر بيكون ف الأول ملخبط ومش عارف يعمل ايه ويبدأ ازاي
والمعلومات اللي بتجيله بتلخبطه زيادة وبيكون مش فاهم

عايز تهاجر

عايزة تهاجري

انتم جيتوا المكان الصحيح

هنا(المطاريد) ان شاء الله نساعدكو على بدء مشوار الهجرة وأي سؤال باذن الله ح نلاقي الكثير من الأعضاء الأفاضل يردو عليه

المهم قبل اي سؤال ارجوكم تقروا التوبيك دا الأول وبعدين لو لسة فيه استفسار تقدرو تحطوه في التوبيك الخاص به علشان تلاقو اللي يقدر يساعدكم بسهوله

باسم الله نبدأ
.
.
.

abysaleh · 10th November 2010, 04:18 PM

قبل ما نبدأ عايزة اقول حاجة

أهم حاجة ف الهجرة تكون عارف كويس أوي

انت عايز تهاجر ليه ؟؟؟؟

لو عايز تعمل قرشين الهجرة مش طريقك

لو عايز حياة آدمية
تعليم افضل لابناءك
الحصول على شهادات معترف بها عالميا
حياة بدون عنصرية ظاهرة وصريحة
حقوق تعليمية وصحية لك ولافراد اسرتك

يبقا انت اخترت صح

احسبها صح تعيشها صح

مش حاقول عيوب ولا مميزات بس لازم كل واحد يكون متأكد من موضوع الهجرة علشان ما يرجعش يندم

طيب احنا هنا ح نساعدك اكيد
بس مش ح نعمل لك كل حاجة
يعني ايه؟؟؟؟

يعني اللي عايز حاجة لازم يتعب فيها ويدور ويترجم ويبدأ ولما يجي عند نقطة مش واضحة بالنسبة له ح يلاقي اللي يوضحهاله باذن الله

ومع ذلك برضه احنا معاك خطوة خطوة

الهجرة انواع كثيرة....اهم نوع(وماتدورش كتير وتتعب نفسك) اللي بنقدم عليه كلنا هو هجرة العمالة الماهرة (سكيلد ووركر)

أهم حاجة دلوقتي انك تعرف هل انت مؤهل للهجرة واللا لأ؟

يعني هل وظيفتك مطلوبة في قائمة الوظائف المطلوبة للهجرة او لأ

موجودة....خير وبركة

طب لو مش موجودة؟؟؟

ما تزعلش
لسه فيه فرصة في كيبيك
بس لازم يكون عندك استعداد تدرس فرنساوي كويس
وما تخافش الموضوع سهل

فيه زملاء لنا هنا حولو من هجرة الفيدرال( القسم الانجليزي) الى هجرة كيبيك (القسم الفرنسي)
وبيقولو انه اسهل

حاجيب لكو دلوقتي الرابط بتاع الوظايف
انتظرونا

alex love · 10th November 2010, 04:19 PM

موضوع مهم جداً جداً
الواحد تعب من البحث والتدوير والساعات قدام الكومبيوتر
متابعين وباذن الله يبقى لينا مشاركات تفيد الناس
وربنا يكتبلنا كلنا الخير

abysaleh · 10th November 2010, 04:40 PM

دا رابط الموقع الرسمي للهجرة ومافيش غيره

واي موقع تاني غالبا بيكون نصب او محامين هجرة وبرضه بيبقى مكتوب فوق cic
فخلو بالكو

https://www.cic.gc.ca/english/index.asp

طبعا قوانين الهجرة بتتغير كل شوية والوظايف برضه فيه اللي بيتشال واللي بيتحط غيره

دي ليستة الوظايف المطلوبة السنة دي من بعد 26 يوليو بالنسبة للقسم الانجليزي (الفيدرال)

https://www.cic.gc.ca/english/immigra...structions.asp

الوظايف في كندا مترقمة كل وظيفة لها رقم بيسموه نوك NOC

كل وظيفة لها مهام وظيفية محددة على اساسها بتقدم ع الوظيفة

يعني ايه الكلام دا؟؟؟؟

يعني ممكن أوي يكون مسمى وظيفتك مش موجود لكن حضرتك بتقوم بمهام وظيفية من وظيفة في الليستة لكن اسم الوظيفة عندهم مختلف

طيب نعرف ازاي باه الموضوع دا؟؟؟

دا موقع النوك فيه كل الوظايف والمهام الوظيفية لكل واحدة على حدة مرتبة ومصنفة

https://www5.hrsdc.gc.ca/NOC/English/...tionIndex.aspx

https://www5.hrsdc.gc.ca/NOC/English/NOC/2006/Concordance.aspx

طيب برضه ماتوفقتش انك تلاقي وظيفتك ولا المهام الوظيفية بتاعتك؟؟؟؟

يبقى مافيش ادامك غيركيبيك وتوكل على الله

https://www.cic.gc.ca/english/immigrate/quebec/index.asp

https://www.immigration-quebec.gouv.qc.ca/en/index.html

للأسف انا ماعنديش معلومات كتير بالنسبة لهجرة كيبيك لكن المعلومة الأكيدة عندي ان كل الوظايف ممكن تروح كيبيك ووظائف معينة فقط بتاخد درجات زيادة

وعلى حسب درجاتك يتحدد اذا ينفع تهاجر او لا

لمتابعة الموضوع بصورة أشمل ولتجد من يجيب عليك باستفاضة ان شاء الله ممكن تدخلو المغارة دي

https://www.almatareed.org/vb/showthread.php?t=7633
ودي
https://www.almatareed.org/vb/showthread.php?t=1274

وكمان لقيت لكم مغارة حلوة أوي فيها طريقة ملء لأبليكيشن كيبيك بالصور
https://www.almatareed.org/vb/showthread.php?t=34075

abysaleh · 10th November 2010, 04:49 PM

طيب لقيت وظيفتك والحمد لله في قائمة الوظائف وعندك خبرة في وظيفة منهم سنة واحدة على الأقل
ايه الخطوة اللي بعد كدا؟؟؟

انك تحسب درجاتك

ادخل هنا وجاوب بمنتهى الصراحة علشان اي غلط ممكن يطلع درجاتك اكتر وساعة التقديم تلاقي الورق بيرجعلك علشان درجاتك قليلة

https://www.cic.gc.ca/english/immigra...sess/index.asp

طيب الدرجات دي بتتحسب على اي اساس؟؟؟

عوامل متعددة منها:

مستوى اللغة: لازم اثبات ليها بامتحان الايلتس
العمر
الوظيفة
خبرة العمل
التعليم
تعليم الزوجة
اقارب في كندا
فرصة عمل في كندا

كل بند من دول له درجات وعلشان تكون مقبول للهجرة لازم تجيب 67 درجة

بس اعمل حسابك وانت بتجاوب على تحديد مستوى اللغة انك تحط اقل من مستواك أو تعمل حسابك انك تقوي مستواك ف اللغة بقدر الدرجات اللي ناقصاك
وما تحطش في اللغة الفرنسي الا لو كنت متأكد انك ح تقدر تدخل امتحان التيف وتجيب فيه درجات البيسك على الأقل

ونصيحة انك تعمل التقييم مرة على انك المقدم ومرة على ان زوجتك المقدم الرئيس(لو كانت وظيفتها موجودة طبعا) وتشوف مين اللي يجيب درجات اكبر هو اللي تقدموا الطلب باسمه ان شاء الله

abysaleh · 10th November 2010, 05:03 PM

لقيت الوظيفة في الليستة والحمد لله
ودرجاتك 67 او اكتر ماشاء الله
يبقى الخطوة الجاية ايه؟؟؟؟؟

المفروض ملأ الابليكيشن وتحضير الأوراق

بس قبل الخطوة دي انا باقول احجز اختبار الأيلتس وابدأ ذاكر واستعد للامتحان

على اد ما اللغة سهلة لكن اختبار الايلتس ليس اختبار لغة ولكنه اختبار مهارة التعامل مع اللغة والسرعة

احجز اكتر من ميعاد يكون بينهم اكتر من 13 يوم(الوقت المطلوب حتى ظهور نتيجة الايلتس)
وما تخافش لو جبت السكور المطلوب من اول مرة ممكن تسحب فلوسك

واحنا هنا برضه ان شاء الله ح نساعدك على اجتياز مرحلة الايلتس بنجاح

من خلال المغارة دي اللي فيها خلاصة مواقع تحميل كتب واختبارات الايلتس واللغة عموما

https://www.almatareed.org/vb/showthread.php?t=30896

ودي فيها متابعة الممتحنين الايلتسيين ونصائح عديدة ممن اجتازو الاختبار بنجاح بحمد الله

https://www.almatareed.org/vb/showthread.php?t=2162

طبعا مش ح توقف حياتك لحد ماتخلص الايلتس

كلا البتة

ح نبدأ نملا الابليكيشن ونحضر الاوراق

وما أدراك ما الاوراق ....آه

مشاوير وترجمة وبهدلة (علشان انت اكيد في مصر)

بس لجل الورد ..... ينسقي العليق

!! Lidooooo !! · 10th November 2010, 06:43 PM

الى المفضلة فوراااااااا

الله ينور يا عبير هانم

abysaleh · 10th November 2010, 07:22 PM

قبل ملأ االأبليكيشن وتحضير الأوراق

عايزين نراجع ع السريع

-لازم يكون معاك نتيجة اختبار الايلتس
-لازم يكون معاك شهادة خبرة معتمدة من مكان عملك بوظيفة من اللي في الليستة

الخبرة على الأقل عام

ملحوظة: مش لازم تكون الوظيفة اللي فيها خبرة مطابقة لشهادة التخرج

ممكن تكون متخرج من كلية في تخصص ما ولكن بتشتغل في مكان بتخصص مختلف

المهم: انك تقدر تجيب شهادة من مكان عملك بالمهام الوظيفية (وتحاول تخليها قريبة من اللي موجودة ف النوك) وبيزنس كارد لرئيسك أو صاحب العمل نفسه

وخللي بالك.... بيتصلو ويسألو

يعني تزوير مافيش
همبكة ممنوع
اعملها كدا وتعدي

بعدين تعمل اختبار الدرجات اللي قلنا عليه

https://www.cic.gc.ca/english/immigrate/skilled/assess/Education.asp

طبعا مش ح تعطل نفسك لغاية ما تمتحن ايلتس وتطلع النتيجة علشان كدا ح نبدا
بسم الله الرحمن الرحيم

ونملا الابليكيشن

من هنا
https://www.cic.gc.ca/english/information/applications/skilled.asp

اللينك دا ف الأول مهم جداااااااا بتاع الجايد....

https://www.cic.gc.ca/english/pdf/kits/guides/EG7.pdf

نصيحة: اقراه كويس جدا واحدة واحدة وعلى مهلك خااالص ح يساعدك في ملأ الابليكيشن كلها

وبعدين ح تلاقي تحته الابليكيشن لو كنت متزوج ح تعمل نسختين من Schedule 1ومن Additional Family Information

واحدة ليك وواحدة لزوجتك

اللينكات أهي:

Application for Permanent Residence in Canada
[IMM 0008]

Background/Declaration
[IMM 0008 SCHEDULE 1]

Schedule 3: Economic Classes
[IMM 0008 SCHEDULE 3]

Additional Family Information
[IMM 5406]

Fee Payment Form – Application for Permanent Residence – Federal Skilled Worker
[IMM 5620]

Document Checklist
[IMM 5612]

ملحوظة هامة:

برجاء مراجعة الموقع الأصلي حيث انه يحدث تغيير وتطوير كل فترة في الابليكيشن وشروط الهجرة

m.sherif · 10th November 2010, 07:40 PM

بجد موضوع اكتر من ممتاز

بس ياريت يجماعة محدش يرد شكر الا بعد انتهاء الموضوع

abysaleh · 10th November 2010, 07:54 PM

أهم حاجة وانت بتملا الأبليكيشن انك... تتأنى
بالراااااحة خااالص ... ما تستعجلش
لسة عندك نتيجة ايلتس ما طلعتش....مستعجل على ايه بأه

علشان ماتنساش خانات فاضية>>>>بيرجعو عليها الورق

أو بيانات متضاربة >>>>برضه الورق ممكن يرجع

-معلومات يثبت عدم صحتها فيما بعد >>>

طيب يبقا أهم حاجة تعملها انكك توحد بياناتك وخصوصا الاسم بالانجليش يكون مطابق للموجود في الباسبور تماما
ودا ينطبق كمان على جميع الأوراق المترجمة

دكتور قناوي كان عامل موضوع ممتاز عن كيفية ملأ الأبليكيشن بالصور

التغييرات اللي حصلت في الأبليكيشن مش كبيرة حادور عليها واجيبهالكم ان شاء الله بحيث تاخدو فكرة عن طريقة ملأ الأبليكيشن

فورمز الابليكيشن كلها بي دي اف ... يعني لازم يكون عندك أدوبي ريدر او اي بي دي اف ريدر علشان تقدر تفتح الملفات

الملفات ممكن تملاها ع الكمبيوتر لكن للأسف لا يمكن حفظها

فيه حلين:
-تملا الابليكيشن وتطبعها فور ملأها
-تطبع الأبليكيشن وتملاها بعدين بقلم أسود

نيجي بأه للورق
وماااا أدراك ما الورق واستخراجه و.....

المداخلة الي جاية ان شاء الله

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
التحليل النفسي لمرشحي الرئاسة (هام جدا)	توعية جماهيرية	AlexG	1	1732	10th April 2012 05:47 AM
انت مش لوحدك :) مع د منال عمر	توعية جماهيرية	abysaleh	3	2057	13th March 2012 07:58 PM
الطب النفسي وصناعة مستقبل الوطن	الأسرة والطفل	حسام	14	2287	5th January 2012 09:11 AM
مهم جدا...إحمي نفسك من الكرب العظيم	توعية جماهيرية	Farida	13	2743	3rd January 2012 10:50 AM
اقتراحاتكم يا كيبيكواه :)	الهجرة إلى كندا	star of montreal	28	4274	6th December 2011 08:52 PM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
أهاجر ولا لا ؟!!!	bazzoka	الهجرة إلى كندا	33	26th February 2018 10:18 AM
هموم مهاجر	عبدوس الوزير	مناقشات وحوارات جادة	37	19th August 2014 08:26 AM
عايز بانجو عايز حشيش قرب قرب ؟؟؟؟؟؟؟	kokomen	مناقشات وحوارات جادة	6	6th April 2012 07:53 AM
عايز الثوره تنجح ولكن مش عايز مظاهرات؟	Agaza	ثورة مصر ... 25 يناير 2011	0	25th February 2011 02:23 PM
أهاجر وأسيبك لمين ..!	نانا	موسيقى وأغانى	6	25th December 2010 02:20 PM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

دليلك إلى الهجرة لكندا

عايز/ة أهاجر......أبدأ منين؟؟؟؟؟