ازاى نملى ابليكاشنز فيدرال 2014

[abo_hammad]

الصحف المصرية والعربية

الحمد لله و الصلاة و السلام على رسول الله -صل الله عليه و سلم- و اشهد ان لا اله الا الله و ان محمدا عبده و رسوله.

إخوانى و اخواتى المطاريد الكرام, احنا هناقش هنا ازاى نملى الابليكاشنز او الفورمز للهجرة كندا فيدرال 2014 و هنبدأ بالـ GENERIC
الفورم ده متقسم لـ SECTIONS و كل SECTION له اسم و عدد معين من الاسئلة فانا هبدأ بذكر اسم الـ SECTION و بعد كده رقم السؤال و نقول بسم الله:

APPLICATION DETAILS

1- هنختار ECONOMIC
2- SKILLED WORKER
3- عدد افراد الاسرة كاملة( اب و ام و ابناء)
4- هتختار مكتب الفيزا اللى يدرس ملفك و كلنا تقريبا بنختار مكتب CAIRO
5- ده سؤال من 3 اقسام
A) لغة المراسلات يا انجليزي يا فرنساوى و طبعا كلنا هنختار فرنساوى
انا بهزر, هنختار طبعا ENGLISH

B) لو هيبقى فيه انترفيو هتختار اللغة اللى انت عايز يبقى اللقاء بيها , و انا بفضل اننا كلنا نختار ENGLISH عشان ندى للضابط الانطباع بان اللغة سهل اننا نتعامل بيها.

C) طبعا لو هتحتاج مترجم هتكتب YES بس بناءا على اللى انا قلته يبقى هنختار NO

6- و السؤال ده قسمين
A) هتختار المقاطعة اللى انت ناوى تنزل عليها.
B) هتختار المدينة اللى انت ناوى تنزل فيها فى المقاطعة اللى انت اخترتها.
و ده مش الزامى انك تلتزم بيه,يعنى من حقك بعد كده تنزل مقاطعة غير اللى انت اخترتها, يعنى هو مجرد سؤال روتيتي.

و أول ما تعمل كده هتلاقى السؤال رقم قفل لوحده لانه عن كيبيك.

PERSONAL DETAILS

و ده للمقدم الرئيسي

1- و ده هتلاقيه مربعين الاول لاسم العائلة, اللى هو اخر اسم فى اسمك و المربع التانى هيبقى لاسمك كله الا الاسم الاخير اللى هو اسم العائلة.

2- ده سؤال عن اذا كنت استخدمت اى اسماء تانية قبل الاسم اللى انت كتبته, لو لا يبقى هنختار مربع NO و لو اه يبقى هنختار مربع YES و نكتب الاسم اللى استخدمناه قبل كده .

3- ده للى كان مقدم و اخد رقم ملف و معاه رقم الـ UCI , لو اول مرة نقدم يبقى هنسيبه فاضى و فاضى يعنى فاضى و مش هنكتب NONE او N/A لو كنا قدمنا قبل كده يبقى نكتب اليونيك نامبر بتاعنا.

4- النوع( ذكر او انثى) .

5- الطول .

6- لون العين.

7- تاريخ ميلادك

8- مدينة و بلد المولد.

9- الجنسية , لو معاك جنسية واحدة يبقى هتكتبها فى اول مربع ولو معاك اتنين يبقى هتكتب التانية فى المربع التانى.

10- بيانات بلد الاقامة, يعنى لو انت مصري يبقى هتختار مصر و الـ STATUS هتبقى CITIZEN و هتلاقى اللى بعد كده قفل لوحده, انما لو انت مصرى و مقيم بالخارج يبقى هتختار البلد اللى انت فيها و فى الـ STATUS هتلاقى عدة اختيارات كلمة WORKER و دى غالبا بتبقى للعاملين فى الخليج و بعد كده بتكتب التواريخ.

رقم 11 هيقفل لوحده.

12- السؤال ده عن اى بلد انت كنت مقيم فيه قبل بلد الاقامة الحالى و يكون غير بلدك الام و يبقى فى اخر 5 سنين , يعنى لو انت مصرى و سافرت من 9 سنين مثلا للكويت و فضلت فيها 3 سنين و بعد كده سافرت قطر و فضلت فيها و بتقدم منها, يبقى هتكتب فى السؤال ده الكويت و بعد كده التوترايخ,انما لو مفيش حاجة زى كده يبقى هنختار مربع NO .

13- الحالة الاجتماعية لو سينجل هتلاقى المربعات اللى بعد كده قفلت لوحدها ,انما لو متزوج يبقى هتكتب تاريخ الزواج و هو التاريخ المكتوب فى قسيمة الزواج فى الجزء B و بعد كده اسم الزوجة فى الجزء C.

14- لو كنت متزوج قبل كده و انفصلت او حصل حالة وفاة لا قدر الله هتعلم YES و تكتب التفاصيل للزوجة السابقة و ايه كانت طبيعة العلاقة ما بينكم و اللى هى طبعا MARRIED وبعد كده التواريخ.
بعد كده هنتكلم عن سيكشن CONTACT INFORMATION.

 

[M,Nagib]

تسجيل متابعه يا ريس

 

 

[Mr_masry]

ماشاءالله على مجهود حضرتك .. ربنا يباركلك ويجعله في ميزان حسناتك ..

في إنتظار باقي ال Applications كلها بداية من ال Check list معلش بقى إحنا طماعين ..

 

 

[thelord]

تسلم ابو حماد،، وانا كمان بسجل متابعه

 

 

[M,Nagib]

بس السوال هنا يا ابو حمد بقى الفورمه دى هتملا بخط اليد ولا عن طريق الكمبيوتر

 

 

[abo_hammad]

احنا ان شاء الله هنتكلم عن كل الفورمز و كلها بتتملى بالكمبيوتر مش بخط اليد.

 

 

[liketlove]

جزاك الله عنا خير الجزاء

 

 

[abo_hammad]

نكمل فورم ال GENERIC و كنا وصلنا للسيكشن ده
CONTACT INFORMATION

1- السؤال ده متقسم ل 9 مربعات و هو سؤال عن عنوان المراسلات اللى ممكن يبقى غير عنوان اقامتك و مفيش اى مشكلة,الاول لرقم صندوق البريد, و هو عبارة عن صندوق بريد خاص بيك بتشتريه من هيئة البريد و التعاقد بيبقى لمدة سنة و بيبقى بحوالى 60 جنية او صندوق بريد شركتك لو انت عايز تكتب عنوان شكرتك عشان تستلم عليه البريد بتاعك,بس طالما انك كتبت الايمال بتاعك يبقى كل المراسلات هتم عليه.
بعد كده رقم الشقة و المربع الثالث لرقم الشارع و الرابع لاسم الشارع و الخامس لاسم المدينة و السادس للدولة و لما هتختار مصر هتلاقى مربع الـ PROVINCE قفل لوحده و بعد كده الرقم البريدي للمنطقة و بعد كده الحى.

اللى انا عايز اقوله فى السؤال ده ان مش لازم نملى كل المربعات ,مثلا المربع بتاع رقم الشارع انا سيبته فاضى لان مفيش رقم للشارع و هكذا.

2- والسؤال ده عن عنوان اقامتك ,لو مش نفس عنوان المراسلة يبقى هنعلم على مربع NO و نكتب عنوان اقامتنا ,انما لو نفس عنوان اقامتنا يبقى هنعلم YES و الخانات هتقفل لوحدها.

3- التليفون بتاعك, و هنعلم على OTHER لاننا كلنا خارج كندا و هنكتب الكود و بعد كده رقم التليفون.

4- رقم تليفون اضافى لو حبيت و لو مفيش يبقى هنسيبه فاضى.

5- لو فيه فاكس يبقى نكتبه و لو مفيش نسيبه فاضى.

6- الايمال بتاعنا, و ده اللى هيبقى عليه كل مراسلات ضابط الهجرة معاك, عشان كده انا بفضل انى اعمل ايمال خاص بيه لوحده, لو الايمال الرئيسي بتاعك عليه ضغط.

و بكده يبقى وصلنا لسيكشن PASSPORT

1- بيسألك هل عندك جواز سفر صالح للاستخدام, طبعا كلنا لازم يبقة عندنا جوازات صالحة فهنعلم على مربع YES .

2- هنكتب رقم الجواز .

3- بلد الجواز.

4- تاريخ الاصدار.

5- تاريخ الانتهاء.

بعد كده سيكشن NATIONAL IDENTITY DOCUMENT

1- سؤال عن اذا كنت تمتلك بطاقة شخصية صالحة, هنعلم علىمربع YES .

2- رقم البطاقة.

3- بلد البطاقة.

4- تاريخ الاصدار.

5- تاريخ الانتهاء.

و بعد كده سيكشن EDUCATION/OCCUPATION DETAIL

1- اعلى مستوى تعليمي وصلت له, و تقدر تختار من الملابع نفسه.

2- عدد سنين الدراسة, من اول ابتدائى الى اخر سنة انت درستها و متعدش سنوات الرسوب, يعن لو كنت سقطت سنة يبقى متعدهاش من سنوات الدراسة.

3- وظيفتك الحالية.

4- الوظيفة اللى انت ناوى تشتغلها.

سيكشن LANGUAGE DETAIL

1- اللغة الام و هتختار من المربع نفسه.

2- لو مش اللغة الانجليزية هى اللغة الام, اى لغة بستخدمها اكثر و بتختار ما بين الانجليزي او الفرنساوى, وكلنا هنختار طبعا الانجليزي.

3- باى لغة تستطيع التواصل.

سيكشن DEPENDANTS و ده لكل افراد الاسرة الاخرين و هتبدأ بالمدام و اللى مش متزوج يبقى هيسيبه فاضى و مش هيكتب اى حاجة فيه و ينفع نضيف لحد 5 اشخاص و اللى افراد اسرته اكتر يبقى هيحتاج يملى ابليكاشن اسمه ADDITIONAL DEPENDANT.

هيبدأ بسيكشن PERSONAL INFORMATION

نفس اسئلة المقدم الرئيسي بس فيه اختلافات انا هقول عليها و هذكر السيكشن و رقم السؤال.
سيكشن PERSONAL DETAILS
سؤال رقم 10- العلاقة بالمقدم الرئيسي و هنختار طبعا SPOUSE .

11- هل هتصاحب المقدم الرئيسي لكندا هنعلم على مربع YES و لو NO يبقى هتكتب السبب لعد الاصطحاب لكندا, و السؤال رقم 12 هيقفل لوحده.

السؤال رقم 16- لما نختار الحالة متزوج او متزوجة( حسب المقدم الرئيسي مين) يبقى هنكتب بعد كده بيانات المقدم الرئيسي كزوج او زوجة , يعنى , لو المقدم الرئيسي هو الزوج يبقى هنكتب فى السؤال رقم 16 جزء C بيانات الزوج اللى هو المقدم الرئيسي.

سيكشن EDUCATION/OCCUPATION DETAIL

سؤال رقم 3 و 4 - لو الزوجة ربة منزل يبقى هنكتب المربعين دول N/A و لو بتعمل يبقى نكتب الوظيفة الحالية و الوظيفة اللى ناوية تشتغلها .
كده نبقى خلصنا , بس اللى عنده اولاد يبقى هيضغط على ADD DEPENDANT و لما تضغط عليه هتلاقى الابليكاشن زود لك جزء تانى زى الجزء بتاع الزوجة .

و نفس الاسئلة الا الاتى:

السؤال رقم 10 و هو لما بتختار العلاقة بالمقدم الرئيسي CHILD هتلاقى السؤال رقم 12 مفتوح و اللى هو DEPENDANT TYPE و ده هتختار فيه TYPE A DEPENDANT

و رقم 16- هنختار SINGLE

و فى التعليم هنختار NONE و عدد سنين التعليم هنكتب 0 و لو الاولاد كبار و بيدرسول فى الابتدائى مثلا يبقى هنختار SECONDARY OR LESS و نكتب عدد سنين دراستهم.

و فى بيانات اللغة هنختار ARABIC, EGYPT حتى لو زى مريم بنتى اللى عندها سنة و نص و بتتكلم هيروغليفي حاليا .

بعد ما نخلص ملى الابليكاشن لازم ندوس على المربع الازرق المكتوب فيه VALIDATE و لو فيه اى حاجة غلط هتلاقى المربعات الغلط اتعلمت بالاحمر, انما لو ملينا الخانات صح يبقى هنلاقى ظهر لنا الباركود بتاعنا و كمان هنلاقى فى اول الابليكاشن جنب السؤال رقم 2 اللى بنختار فيه SKILLED WORKER مربع على اليمين صغير بتاع الـ VALIDATE و اتكتب فيه YES .

و بعد الباركود هنلاقى اقرار منك بالسماح للـ CIC باستخدام بياناتك , هتعلم على المربع YES .

و كمان هنترخ الابليكاشن بتاريخ يوم الارسال.

و بكده يبقى الابليكاشن جاهز و نطبعه بالباركود و ندبس الابليكاشن كاملا مع بعضه و بعد كده هنرجع تانى للاقرار اللى بعد الباركود و هنكتب اسمنا بخط اليد,انا فارك انى كتبت اسمى ثلاثى بس الثالث كان اسم العائلة, يعن اسمى و اسم الاب و اسم العائلة.

و هنمضى طبعا فى المربع اللى فوقه كلمة SIGNATURE OF APPLICANT

و دمتم.

و بكده نبقى خلصنا ابليكاشن الـ GENERIC و اللى عنده سؤال انا مستنى قبل ما ادخل على الابليكاشن اللى بعد كده

 

 

[abo_hammad]

اقتباس المشاركة الأصلية كتبت بواسطة abo_hammad 12- السؤال ده عن اى بلد انت كنت مقيم فيه قبل بلد الاقامة الحالى و يكون غير بلدك الام و يبقى فى اخر 10 سنين , يعنى لو انت مصرى و سافرت من 9 سنين مثلا للكويت و فضلت فيها 3 سنين و بعد كده سافرت قطر و فضلت فيها و بتقدم منها, يبقى هتكتب فى السؤال ده الكويت و بعد كده التوترايخ,انما لو مفيش حاجة زى كده يبقى هنختار مربع NO .

انا كنت كتبت الكلام ده فى اول مشاركة فى الموضوع و انا بعتذر عن الخطأ الموجود فيها و اللى هو(10 سنين) و الصح هو اخر 5 سنين.

 

 

[canada wait me]

اقتباس المشاركة الأصلية كتبت بواسطة abo_hammad انا كنت كتبت الكلام ده فى اول مشاركة فى الموضوع و انا بعتذر عن الخطأ الموجود فيها و اللى هو(10 سنين) و الصح هو اخر 5 سنين.

الاخ ابو حماد
خالص التحية على مجهودك
تم تعديل الخطأ بالنص الاصلي
تحياتي