Arabic Discussion Forum with a Special Interest in Travel and Immigration

مودة · 22nd April 2011, 08:52 PM

دعوه لموضوعي

كل عيد ربيع وإنتم طيبين.. طبعا مع قرب شم النسيم وأعياد الربيع بنجدد عادتنا الفرعونية كل سنة مع أكل الرنجة والفسيخ والبيض الملون.. النهاردة هيكون مميز جدا بأكلاته الربيعية المملحة، ووصفاته الجديدة المتنوعة، تابعونا هتلاقوا وصفات مميزة وجديدة..

رنجة بالمسطردة
المقادير:

4 رنجات

بصلة

1/ 4 كوب خل

1/ 4 كوب ميه

ملح وفلفل أسود

2 ملعقة مسطردة

فلفل ملون مفروم صغير

1/ 2 حزمة شبت مفرومة

الطريقة:
1- أول حاجة هتنقعي الرنجة في ميه مغلية لمدة 2 : 3 دقائق علشان تنزل الميكروبات.

2- نظّفي الرنجة وانزعي منها السلسلة والجلد والرأس والذيل، واقسميها نصفين.

3- قطّعي البصل حلقات رفيعة ورصّيها فوق الرنجة.

4- اخلطي الخل والميه والفلفل الملوّن المفروم والشبت المفروم والفلفل الأسود والمسطرده واطبخيهم على النار لمدة 6 : 8 دقائق.

5- سيبي الخليط ده يبرد وصبّيه على الرنجة وغطّيها وحطيها في الثلاجة مدة كافية علشان الرنجة تتشرّب الصوص، وبالهنا والشفا.

*******************

عند التقديم صبّي الكريمة على شرائح الرنجة وزينيها بالبقدونس

رنجة بالكريمة
المقادير:

4 رنجات
2 بصل
ليمونة
1/ 2 كوب زيت
كوب كريمة طهي
ملعقة صغيرة سكر
3/ 4 كوب عصير ليمون

الطريقة:
1- انقعي الرنجة في ميه مغلية لمدة 2 : 3 دقائق، وبعدين نظّفيها واخليها.

2- اقسمي الرنجة نصفين وحطّيهم في قالب عميق، وحطّي بينهم شرائح رفيعة من البصل وشرائح الليمون.

3- اخلطي عصير 3 ليمونات مع السكر والزيت وصبّيهم على الرنجة.

4- غطّي الرنجة وحطّيها في الثلاجة لمدة نصف يوم أو يوم كامل.

5- طلّعيها من الثلاجة وصفّيها من السائل، وبعدين خدي 4 ملاعق كبيرة من السائل ده واخلطيه مع الكريمة.

6- عند التقديم صبّي الكريمة على شرائح الرنجة وزينيها بالبقدونس.. وبالهنا والشفا.

*******************

رصّي الرنجة وحلقات البصل والجزر في قالب وصبّي عليهم الخليط

رنجة بالخل والسكر
المقادير:

4 رنجات
كوب خل
كوب سكر
2 ثمرة جزر
بصلة صغيرة
1 و 1/ 2 كوب ميه
فلفل أسود وأبيض
2 ملعقة صغيرة مسطردة

الطريقة:
1- انقعي الرنجة في ميه مغلية لمدة 2 : 3 دقائق، وممكن تنقعيها في لبن علشان تتخلصي من الملح الزيادة.

2- نضّفيها واخليها بس سيبي الجلد فيها وقطّعيها لشرائح رفيعة.

3- اخلطي الميه والسكر والخل والمسطردة والفلفل، وحطّيه على النار لحد ما يغلي، وبعدين ارفعيه وسيبيه يبرد.

4- رصّي الرنجة وحلقات البصل والجزر في قالب وصبّي عليهم الخليط، بحيث إنه يغطي الرنجة كلها.

5- سيبي الرنجة في الثلاجة مدة كافية لحد ما تتشرّب من الخليط كويس، وقدّميها.. بالهنا والشفا.

*******************

اخلطي مكونات الصوص كويس وصبّيه على السلطة

سلطة الرنجة
المقادير:

2 ثمرة جزر
2 ثمرة بنجر
خيار مخلل
فلفل أبيض
حبة بصل صغيرة
رنجة متوسطة مخلية
2 ثمرة بطاطس متوسطة

لعمل الصوص:

كوب كريمة أو زبادي
ملعقة عصير ليمون
2 ملعقة عصير بنجر
سكر
ملح

الطريقة:
1- اسلقي البطاطس والجزر في حلة، واسلقي البنجر في حلة تانية.

2- قشّريهم وقطّعيهم مكعبات أو أي شكل تحبيه، ومعاهم البصل والخيار المخلل والرنجة واخلطيهم مع بعض.

3- اخلطي مكونات الصوص كويس وصبّيها على السلطة، وحطّي عليها مكعبات البنجر قبل التقديم على طول.. وبالهنا والشفا.

*******************

عند التقديم حطى عليه زيت واعصري عليه ليمون وقدّمي معاه عيش محمص

معجون الرنجة
المقادير:

كيلو رنجة
1/ 2 كوب طحينة
3 ثمرات طماطم
2 فلفل حامي
كمون وشطة
عصير ليمون
بصلة صغيرة
زيت وخل

الطريقة:
1- اسلقي الرنجة في ميه مغلية لمدة 2 : 3 دقيقة علشان تقتلي الميكروبات والبكتيريا.

2- نضّفيها وانزعي منها الشوك والجلد واخليها تماما وقطّعيها قطع صغيرة.

3- قطّعي عليها البصل والطماطم والفلفل وحطّي معاهم الطحينة والخل والكمون والشطة واضربيهم في الخلاط.

4- هيطلع معاكِ معجون رنجة وعند التقديم حطي عليه زيت وعصير ليمون، وقدّمي معاه عيش محمص.. وبالهنا والشفا.

ملحوظة:
ممكن تحطّي معاها البطارخ، وممكن تعملي البطارخ بالطريقة دي لوحدها من غير رنجة.

*******************

عند التقديم حطّي له خلطة من الملح والكمون والشطة والليمون

بعد ما خلصنا وصفات الرنجة، هنعرف مع بعض إزاي نحضّر الترمس وحمص الشام..

الترمس
1- كل اللي عليكِ إنك تشتري الترمس من عند أي عطار، بس خلّي بالك، لأن فيه نوعين من الترمس؛ نوع بلدى ونوع مستورد، والطريقة واحدة في الاتنين بس بتفرق في المدة اللي هيحتاج إنه يتنقع فيها، لأن البلدي بياخد وقت أطول.

2- هتجيبي الترمس وتغسليه كويس وبعد كده حطّيه في ميه واغليه.

3- ارفعيه من على النار وسيبيه في الحلة وهو متغطي لمدة ساعة، وبعدين صفّي الميه واشطفيه وحطي له ميه جديدة.

4- سيبيه في الميه لمدة من 2 : 6 أيام حسب نوع الترمس، وطبعا كل يوم تشطفيه وتغيّري الميه.

5- لما تحسّي إنه استوى حطّي شوية ملح في الميه وسيبيه 4 أو 5 ساعات، علشان الترمس يتملّح كويس.

6- عند التقديم حطّي له خلطة من الملح والكمون والشطة والليمون.. وبالهنا والشفا.

*******************

عند التقديم حطّي عليه عصير ليمون

حمص الشام
المقادير:

1/ 2 كيلو حمص
كمون وملح وشطة
5 ثمرات طماطم مبشورة
3 فصوص ثوم مفرومين
بصلة صغيرة
ليمون

الطريقة:
1- اغسلي الحمص كويس وانقعيه في الميه لمدة من 8 : 10 ساعات علشان يبقى أسهل في التسوية.

2- اغلي ميه وحطّي فيها الحمص ومعاها الثوم المفروم والطماطم المبشورة والبصل المبشور.

3- سيبيه على نار هادية لمدة نصف ساعة، ولما تحسّي إنه دخل في السوا، حطّي عليه ملح وكمون وشطة، وعند التقديم حطّي عليه عصير ليمون.. وبالهنا والشفا.

نتمنى لكم جميعا يوم سعيد،،،

D@rk_Kn!ght · 22nd April 2011, 09:08 PM

أوبا

هو ده الكلام

بموت فى الرنجة

تسلم الايادى يا فندم

اهم حاجة من غير ضرب

مودة · 22nd April 2011, 09:10 PM

دعوه لموضوعي

مدونة مودتي بلا حدود

اقتباس

المشاركة الأصلية كتبت بواسطة D@rk_Kn!ght


	أوبا هو ده الكلام بموت فى الرنجة تسلم الايادى يا فندم اهم حاجة من غير ضرب

من غير ضرب

استنى طيب اراجع الكلام

بالهنا والشفا وكل سنة وانتم طيبين

مــــلامــــح · 22nd April 2011, 09:14 PM

دعوه لموضوعي

رســـوماتى

مكنتش ناويه آكل رنجه يا موده بس دلوقتى بفكر أجرب طريقه من دول

مودة · 22nd April 2011, 09:16 PM

دعوه لموضوعي

مدونة مودتي بلا حدود

اقتباس

المشاركة الأصلية كتبت بواسطة مــــلامــــح


	مكنتش ناويه آكل رنجه يا موده بس دلوقتى بفكر أجرب طريقه من دول

ملامح

ياخبر الا الرنجة

انا مستنية الموسم بصبور الفرغ

بالهنا والشفا مقدما ياقمر

Rapt · 23rd April 2011, 02:15 PM

وصفات مميزة وجديدة ..... هوة مااعرفش مين اخترع الرنجة بس اختراع لازم الشخص يجربة ..... اختراع ابن لازينة ميرسى على التوبيك

Dr-Alrefa3y · 23rd April 2011, 02:31 PM

انا كنت معتقد ان اكل الرنجة والسمك المملح دى عادة مصرية صرف

اتارى الموضوع كبير
هنا فى كندا المحلات اليومين دول مقتظه بالرنجة على جميع الاشكال وجميع انواع السمك المملح

الظريف انهم عاملين الرنجه جاهزة باكثر من طريقة وفيه متنظفه ومتقطعة وفيه السمكة كاملة
اما السمك المملح فاكثر من عشرة انواع وكل نوع مختلف عن الاخر فى درجة الملح ونوع السمكة

only you · 23rd April 2011, 02:36 PM

تسلم الايادى يا مودتى تحفه بجد بس كدا الدايت هيبوظ

O.S.A.M.A · 23rd April 2011, 03:08 PM

ممكن بس يا جماعة أسأل سؤال رخم شوية ؟ .. لأ ممكن شويتين

أيه موضوع الرنجة اللى بتتسلق دى ؟؟؟

أنا على أيامى كنت عارف انها بتتشوى وبس

only you · 23rd April 2011, 03:12 PM

دا عشان الملح والزيت الزياده اللى فى الرنجه خفيف خفيف للناس اللى عندها مشاكل فى الضغط او الكلوسترول

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
حزن و فرح	أدب وشعر وقراءات متنوعة	مودة	10	2671	25th September 2013 06:23 AM
على شاطئ البحر && بعدستي	عدسة المطاريد	مودة	28	4769	14th September 2013 01:54 AM
أيمم بلا وجهي	أدب وشعر وقراءات متنوعة	دكتور مهندس جمال الشربيني	9	1860	10th September 2013 12:20 PM
من أكون ...........؟	أدب وشعر وقراءات متنوعة	مودة	10	3497	22nd August 2013 12:06 PM
دعوة للتفاؤل .....تجميع لمقالات د. أحمد عمارة	توعية جماهيرية	دكتور مهندس جمال الشربيني	14	23252	22nd August 2013 08:03 AM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ملف وصفات خروف العيد عيدكم مبارك	سهى يافا	شؤون المطبخ	18	4th November 2011 10:40 PM
وصفات لعدة مشروبات تساعد على اذابة الدهون	سهى يافا	شؤون المطبخ	14	16th October 2011 08:21 AM
عايز وصفات الكابتشينو و اللاتيه وكل المشروبات	KANE	شؤون المطبخ	68	31st March 2010 06:12 AM
وصفات خرافية لعيالنا المفترية	haya	شؤون المطبخ	114	22nd March 2010 07:34 AM
مطلوب وصفات بلدى لنزلات البرد	حشيش	إستشارات صيدلانية ودوائية	23	22nd February 2010 01:06 PM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

شؤون المطبخ

وصفات مميزة لتقديم الرنجة في شم النسيم