افتكاسات في الصميم.. لتلوين بيض شم النسيم

[مودة]

الصحف المصرية والعربية

دعوه لموضوعي

مدونة مودتي بلا حدود

افتكاسات في الصميم.. لتلوين بيض شم النسيم



تلوين البيض من الحاجات اللي بتميّز يوم شم النسيم جدا، وكلنا كبار وصغيرين بنستمتع وإحنا بنلوّن البيض، وبنعمل منه أشكال مختلفة وفيها إبداع، وخصوصا الناس اللي بيكون عندها ميول فنية، وكتير مننا بيسترجع ذكريات طفولته، وهو بيلوّن البيض مع أولاده أو إخواته الصغيرين..

النهارده هنعمل مع بعض أشكال وتصميمات مختلفة ومميزة من البيض، بس قبل ما نبدأ، تعالوا نعرف إزاي نلوّن البيض براحتنا، ونستخدم كل الألوان اللي إحنا عايزينها من غير ما نخاف إنه يبقى غير صالح للأكل..

والطريقة بسيطة أوي
- كل اللي هنحتاجه إننا نجيب بيض بالعدد اللي عايزين نلوّنه، ونفرّغه من الصفار والبياض بإننا نعمل فتحة صغيرة جدا في البيضة باستخدام مسمار صغير، وننزل كل اللي في البيضة من صفار وبياض، وممكن نستخدمهم بعد كده في إننا نعمل تورتة أو كيكة.

- بعد كده نعجن شوية جبس أبيض بميه؛ بحيث إن سُمكه يبقى خفيف، ونبدأ ندخّل الجبس في البيضة، لغاية ما نملأها كلها من جوه.

- ونسيب البيض لمدة يوم كامل أو لغاية ما نتأكّد إن الجبس نشف تماما من جوه، وبعد كده ممكن نقشّر القشرة الخارجية، أو نخّليها ونلوّن عليها، وبكده هيتبقى لنا بيضة من الجبس نقدر نلوّنها بالطريقة اللي نحبها.

ودلوقتي بقى تعالوا هنعمل إيه في بيض شم النسيم؟!!

ممكن نعمل نفس الشكل بألوان ورسومات مختلفة ونعمل بها سرب كامل من الطيور




بيضة العصفور الأزرق
التصميم اللي هنعمله دلوقتي، هو تصميم لعصفور أزرق، وممكن نعمل نفس الشكل بألوان ورسومات مختلفة، ونعمل بها سرب كامل من الطيور...

الخامات اللي هنحتاجها:

• بيض
• قلم ألوان أزرق
• قلم ألوان أسود
• ألوان خشب
• مقص
• صمغ
• ورق مقوّى أبيض وأصفر

الطريقة:
1- أوّل حاجة هنعملها إننا نلوّن البيضة باللون الأزرق.

2- قصّي قطعة من الورق المقوّى على شكل جناح، وممكن نلوّنه بالأشكال والألوان اللي نحبها، وبعد كده نلصق الجناح على جانب البيضة.

3- قصّي قطعة من الورق المقوّى الأصفر على شكل مثلث صغير علشان نعمل بها منقار، وبعد كده نثني قاعدة المثلث علشان نعمل بها سطح مستوي، نقدر نلصقه على مقدمة البيضة.

4- نسيب الصمغ ينشف، وبعد كده نرسم بالقلم الأسود مكان العينين.

ملحوظة:

• ممكن نستخدم أي غلاف لمذكرة أو كارت تهنئة قديم عندنا، ومش لازم نشتري ورق مقوّى مخصوص.

• كمان الناس اللي بتحب إنها تلون البيض المسلوق علشان تاكله ملوّن، ممكن إنها تعمل الطريقة دي لأننا ممكن مانستخدمش فيها أي خامات صناعية، وبالنسبة للون الأزرق فممكن نحصل عليه بإننا نسلق البيض مع أوراق الكرنب الأحمر، وبعد ما البيض يتسلق نعمل باقي الخطوات.

*******************

ممكن نعمل نفس الفكرة بتصميمات مختلفة




حروف اسمك على البيضة
الطريقة دي بتدّي خصوصية، يعني كل واحد ممكن يكتب اسمه، وممكن نكتب اسم أي حد عليها ونهاديه بها..

الخامات اللي هنحتاجها:

• بيض
• ألوان
• مانيكير أو ألوان ميه
• فرشة صغيرة ورفيعة
• استيكرز على شكل حروف

الطريقة:
1- في البداية هنرسم بقلم رصاص شكل بيضاوي على أحد أسطح البيضة، وبعد كده نلوّن باقي البيضة بأي لون نختاره؛ بحيث إننا نسيب الشكل البيضاوي اللي رسمناه لونه أبيض زي ما هو.

2- باستخدام المانيكير باللون اللي نختاره أو بألوان الميه، هنبدأ نرسم بالفرشة الصغيرة اللي عندنا، نقط صغيرة على إطار الشكل البيضاوي اللي موجود على البيضة.

3- بعد كده هنبدأ نلصق الاستيكرز سواء أول حرف من الاسم، أو نكتب الاسم كامل بالحروف دي، بالطريقة دي كل واحد هيقدر يعمل بيضة خاصة به، وممكن نعمل نفس الفكرة بتصميمات مختلفة، ونتسابق ونشوف مين هيعمل أفضل شكل باسمه.

*******************

الجزر والأرانب من أكتر الحاجات اللي مرتبطة بشم النسيم




3- جزرة وأرنب
الجزر والأرانب من أكتر الحاجات اللي مرتبطة بشم النسيم، ودلوقتي هنعمل تصميم لجزرة وأرنب..

اللي هنحتاج له:

• بيض
• قلم ألوان باللون البرتقالي
• ورق مقوّى باللون الأبيض
• قلم أسود بسن رفيع
• 5 شرائط خضراء (اللي بتستخدم في لف الهدايا)
• زرار لونه بمبى
• دباسة
• مقص
• صمغ

الطريقة:
1- علشان نعمل شكل الأرنب، هنجيب بيضة، ونلصق في نصفها الزرار البمبي، باستخدام الصمغ.

2- نجيب الورق المقوّى الأبيض، ونرسم عليه شكل لأذنين الأرنب، وبعد كده نقصّهم، ونثنيهم من تحت علشان نعمل قاعدة نقدر نثبتها بالصمغ على البيضة من فوق زي ما هو واضح في الصورة.

3- لما الصمغ ينشف، نبدأ نرسم العينين والشنب بتوع الأرنب باستخدام القلم الأسود.

4- علشان نعمل شكل الأرنب، نلون البيضة باللون البرتقالي.

5- بعد كده نجيب 5 شرائط طول كل واحد 25 سم، ونثنيهم من المنتصف، وباستخدام المقص نبدأ نجعّد الشرائط دي، علشان يبقى شكلها مموج، ونلصقهم على البيضة من فوق باستخدام الصمغ، وممكن نثبّت الشرائط باستخدام شريط لاصق شفاف، علشان يثبّت الشرائط لغاية ما الصمغ ينشف.

ملحوظة:
الناس اللي بتحب إنها تلون البيض المسلوق علشان تاكله ملون، ممكن إنها تعمل الطريقة دي؛ لأننا ممكن مانستخدمش فيها أي خامات صناعية، وبالنسبة للون البرتقالي فممكن نحصل عليه بإننا نسلق البيض مع ورق البصل الناشف أو مع الفلفل الأحمر المطحون، وبعد ما البيض يتسلق نعمل باقي الخطوات.

*******************

التصميم ده طريقته سهلة جدا لكن شكله النهائي بيكون جميل ومميز ومبهج




4- بيض بزهور الربيع
التصميم ده طريقته سهلة جدا، ومش هنستخدم فيه خامات كتيرة أوي، لكن شكله النهائي بيكون جميل ومميز ومبهج جدا..

اللي هنحتاج له:

• بيض
• أقلام ألوان
• استيكرز على شكل ورود

الطريقة:
1- نلوّن البيضة باللون اللي إحنا عايزينه، وبعد كده نلصق الاستيكرز زي ما هو باين في الصورة.. وبس كده.

*******************

يعني ممكن نخلّي الوش يقول إننا مبسوطين جدا أو مندهشين أو في مود عادي




5- عبّر عن مودك.. ببيضة من تصميمك
الطريقة دي بجد ممتعة جدا، وكمان فيها إبداع؛ لأننا بنخلّي البيضة تعبّر عن المود اللي إحنا فيه وإحنا بنعملها، برسومات بسيطة وخطوات قليلة.

اللي هنحتاج له:

• بيض
• قلم ألوان أصفر
• قلم ألوان أسود بسن رفيع

الطريقة:
كل اللي علينا نعمله، هو إننا نلوّن البيض باللون الأصفر، وبعد كده نرسم ملامح الوش بالشكل اللي إحنا عايزينه، يعني ممكن نخلّي الوش يقول إننا مبسوطين جدا، أو مندهشين، أو في مُود عادي.

وبجد هتبقى حاجة لطيفة جدا لو عملنا تصميمات مختلفة، وبعد كده نعمل مسابقة علشان نخلّي كل واحد يخمن الوش ده بيعبر عن إيه؟!!

وبكده نكون عملنا بعض الأفكار والتصميمات المختلفة بالبيض..
ويا ريت لو حد عنده أفكار تانية يبعت يقول لنا عليها..
وما تنسوش تحكوا لنا هتقضّوا اليوم ده إزاي؟!

 

[ana_3enady]

دعوه لموضوعي

RobertInole

احنا يعني هانقشر البيض علشان ناكله ولا هانقعد نلونه .. حاجة غريبة

 

 

[مودة]

دعوه لموضوعي

مدونة مودتي بلا حدود

اقتباس المشاركة الأصلية كتبت بواسطة ana_3enady احنا يعني هانقشر البيض علشان ناكله ولا هانقعد نلونه .. حاجة غريبة

ماهو بعد مايتلون
قشر ياخويا وكل وقولنا طعم الجبس ايه

 

 

[bond]

فكره جميله بتاعة تفريغ البيضه وبدل ماناكولها مسلوقه ناكولها مقليه
ايه الجمال ده ياموده
فكرتينى بالصعيدى بتاع زمان اللى قرر يشتغل فى البحث العلمى
اشترى باللطو ابيض واخد نص الزريبه عملها معمل ابحاث وجاب اجنده وقلم ومشرط وشريحة زجاج وبدا فى اول تجربة
جاب ضفدعه وحطها على الزجاج وقطع رجلها ثم وضعها على الترابيزه وقالها
فوطى =اى نطى-
وبدا يسجل ملاحظاته العلميه
عند قطع الرجل الاولى فطت الضفدعة
ثم قطع التانية وقال لها فوطى
ثم سجل عند قطع الرجل الثالثه فطت الضفدعة
ثم قطع الرابعه وقال لها فوطى فلم تتحرك
فكرر الامر فوطى فلم تتحرك
فقام بتسجيل الملحوظه الاخيرة
عند قطع الرجل الرابعه انطرشت الضفدعه

 

 

[مودة]

دعوه لموضوعي

مدونة مودتي بلا حدود

اقتباس المشاركة الأصلية كتبت بواسطة bond فكره جميله بتاعة تفريغ البيضه وبدل ماناكولها مسلوقه ناكولها مقليه ايه الجمال ده ياموده فكرتينى بالصعيدى بتاع زمان اللى قرر يشتغل فى البحث العلمى اشترى باللطو ابيض واخد نص الزريبه عملها معمل ابحاتوجاب اجنده وقلم ومشرط وشريحة زجاج وبدا فى اول تجربة جاب ضفدعه وحطها على الزجاج وقطع رجلها ثم وضعها على الترابيزه وقالها فوطى =اى نطى- وبدا يسجل ملاحظاته العلميه عند قطع الرجل الاولى فطت الضفدعة ثم قطع التانية وقال لها فوطى ثم سجل عند قطع الرجل الثالثه فطت الضفدعة ثم قطع الرابعه وقال لها فوطى فلم تتحرك فكرر الامر فوطى فلم تتحرك فقام بتسجيل الملحوظه الاخيرة عند قطع الرجل الرابعه انطرشت الضفدعه

الرجالة في المعمل بتقطع الضفدعة وتاكلها
هنا في المطبخ الستات قبل ماتقطع البصلة بتزوقها وتحطلها فيونكة
والبيض بنلونه ونحطله دنتيل وتول كمان
بندلع الاكل مالكم ومالنا
روحوا المعمل بتاعكم وشرحوا الجثث بايد واليد التانية فيها السندويتش

اقولكم











بره المطبخ بليز

 

 

[bond]

 

 

[مودة]

دعوه لموضوعي

مدونة مودتي بلا حدود

اقتباس المشاركة الأصلية كتبت بواسطة bond

مفيش صورة
مفيش صورة

 

 

[ana_3enady]

دعوه لموضوعي

RobertInole

لأ فيه

 

 

[مودة]

دعوه لموضوعي

مدونة مودتي بلا حدود

اقتباس المشاركة الأصلية كتبت بواسطة ana_3enady لأ فيه

طب غششني فيها ايه
دايما بوند بيخبي الصور بتاعته بيخاف اغش منه

 

 

[D@rk_Kn!ght]

افكار ابداعية يا مودة بصراحة

انا من انصار ان الاكل لازم يبقى منظره جميل لان ده بيساعد على فتح الشهية

وفيها ايه لما ناكل الحاجة وهى شكلها جميل مش عارف

ولا لازم تبقى عك

استمرى