Arabic Discussion Forum with a Special Interest in Travel and Immigration

elmadysm · 12th July 2010, 03:03 AM

دعوه لموضوعي

من الرحلات المهمة التى قراتها و اريد ان ادونها هنا فى المنتدى رحلة مدام دعاء
(تحياتى من كيبك سيتى)
الرحله مثلها مثل رحلات الافاضل السابقين فيها كثير من الخبرات و مفيدة جدا لان فيها تفاصيل كثيرة والتى ركزت فيها على النقل من المصدر مع بعض التعديل البسيط

نبدا الرحلة

اخوانى واخواتى اعضاء المنتدى الكرام
بجد وحشتونى جدا جدا جدا
دعاء تحدثكم الان من مدينة كيبيك سيتى عاصمة مقاطعة كيبيك فى كندا
احب ان تعذرونى على التقطع فى الكتابة ولكن نحن الى الان ما زلنا فى حالة انعدام وزن وفى مرحلة التظبيط والتاقلم ويادوب لسة النت واصل البيت من يومين
لكن بجد مش ناسياكم وماقدرش انساكم ابدا وهاحاول اروى لكم بعض تفاصيل الرحلة الى كندا
بس اطمنوا الى الان انطباعاتنا ايجابية عن البلد من خلال مشاهداتنا فى الفترة القصيرة الماضية فنحن لم نكمل بعد الاسبوعين لكن لسة مش قادرين ناخد راحتنا علشان الاولاد سنهم صغير والتحرك بيهم صعب من غير عربية ولسة ماتوفقناش فى عربية مناسبة بالاضافة ان الجو لسة برد ومازال التلج مغطى الارصفة
على العموم ده كان تنويه بسيط منى باقولكم انا هنا وان شاء الله نتقابل قريبا

elmadysm · 12th July 2010, 03:10 AM

دعوه لموضوعي

CharlesSwide

احنا لحد قبل مانسافر باسبوعين بس ماكناش عارفين نستقر على المدينة اللى هاننزل عليها تصدق ؟؟؟!!!
وكنا انا وجوزى بنقعد على النت لحد الصبح مايطلع علينا كل يوم علشان نقدر نلاقى مكان لكن استبعدنا الفندق لان ميزانيته هاتكون كبيرة جدا ومش هاينفعنا طبعا غرفة واحدة ولا اننا ننفصل فى غرفتين لان العيال طول الوقت انا عيزة بابا لا انا عايزة ماما وكده مش هانخلص
فوصلنا لحل اخيرا اننا ناجر شقة مفروشة لمدة شهر واثناء الشهر ده ممكن نخلص اوراقنا ونلاقى مكان للاستقرار الدائم براحتنا فواجهنا مشكلة تانية اننا مانعرفش ايه المكان اللى ممكن يكون كويس والمنطقة المناسبة وكمان ماعرفناش نحجز من على النت وفيه ناس كتير ياجروا كلمناهم فيه اللى كان مابيردش خالص وفيه اللى يقول لا علشان عدد الافراد كبير
ايه يا جماعة ؟ مش كندا بلد الاطفال برضه ؟ ليه كل ما حد يسمع 4 اطفال يتخض ويقول ماينفعش
ماكانش ينفع غير انه يكون فيه حد هناك يقدر ياجر لنا شقة ونبعث له الفلوس وكان فيه كام واحد فى مونتريال معارف واحد صاحب جوزى لكن للاسف كله تملص مننا لان عددنا كبير
وطبعا وصلنا لدرجة من الاكتئاب كبيرة جدا
لحد ما فى اخ فاضل فى كيبيك سيتى كان بيعزل من شقته وقالنا انه ممكن يسيبها لنا بس نحاول نيجى بدرى وبعد ماكنا حجزنا 2 ابريل غيرنا الحجز ل14 مارس فى سرعة فائقة
لان طبعا ماصدقنا ان اخيرا هانلاقى مكان بدل مانخرج من المطار ونتبهدل مع العيال فى بلد غريبه وكمان كان معانا كم شنط رهيب

وعلى الرغم انى ماكنتش مبسوطة لانى كنت بفضل مونتريال لاتساع مجالات كتير فيها الا ان جوزى رحب بالفكرة وقالى احسن بداية لينا تكون فى مدينة هادية وتكاليف معيشتها ارخص قليلا افضل فى الاول وبعد كده يبقى ربنا يسهل اذا حبينا تغيير المسار بس نكون اخدنا على نظام البلد وفهمنا الدنيا حوالينا
وعلشان كده توكلنا على الله وجينا على كيبيك سيتى
وفعلا لاقينا ان فرصتنا لدراسة اللغة الفرنسية هاتكون اسرع من مونتريال لان طابور الانتظار فيها طويل
وقولنا دلوقتى نركز على الدراسة واذا مالاقيناش فرص عمل ممكن ننتقل الى مدينة اخرى
معلش طولت عليك لكن باختصار جينا كيبيك سيتى لتوفر مكان سكن لم يتوفر فى مونتريال بعد محاولات جهيدة
وشكرا لمرورك الكريم
بس مين اللى هاجم على اللاب توب ده ؟؟ ولا هو الشغل واخد حقه تمام معاه ؟

elmadysm · 12th July 2010, 03:15 AM

دعوه لموضوعي

CharlesSwide

اخوانى واخواتى الكرام اعضاء المنتدى
بجد اسرتمونى بذوقكم ومشاعركم الطيبة وباشكركم من كل قلبى على كل شخص دخل موضوعى وكتب فيه حرف او حتى دخل وقرا فقط وان شاء الله لكم اكثر مما اعطيتمونى خير وثواب باذن الله

اعتقد ان فى ردى على المهندس ايهاب رويت تفاصيل ايجاد سكن مناسب قبل السفر اما الان فساخبركم على تفاصيل رحلة الطيران وطبعا اعذرونى لان ملكات الكتابة عندى مش جيدة بما يكفى وممكن تكون المعلومات غير منظمة شويةبس هاحاول على قد ما اقدر

فى البداية دورنا على النت على كل عروض شركات الطيران واستخدمنا كذا موقع وكان اهمهم ( اكسبيديا ) ولكن نظرا لعدم وجود امكانية استخدام الكريديت كارد معانا فاحنا كنا بناخد فكرة فقط
وبعد كدا بدا زوجى فى رحلة اللف على معظم مكاتب السياحة للبحث عن عروض جيدة من حيث جودة شركة الطيران وطبعا رخص الاسعار
وكان فيه عرض ممتاز من شركة اير كندا بالتضامن مع كل من ( مصر للطيران - لوفتهانزا ) وسعر خيالى وهو تقريبا ( 820 دولار للفرد ) - بصراحة مش متذكرة قوى الرقم بس هو فى التمنميات-
بس للاسف العرض دة كان على بعض الكراسى فى الطيارة فقط ولم يكن العدد كافى لنا
وبالتالى انتقلنا بعد كده على الشركة الاوليمبية وزى ما ذكرت قبل كده حجزنا لينا كلنا فى حدود ( 3600 جنيه مصرى للفرد ) وتوكلنا على الله
وكان اختيارنا ليها بصراحة بسبب السعر لانها كانت ارخص شركة
وخط سير الرحلة من القاهرة الى اثينا ( ساعتين ) ترانزيت فى مطار اثينا ( 3 ساعات ) من اثينا الى مونتريال ( 10 ساعات )
قعدت يا افاضل اظبط وزن الشنط اسبوع وفتحتهم وفضيت منهم حاجات 3 مرات علشان الوزن يتظبط ومافيش فايدة واخر 3 ايام قبل السفر ماكنتش بنام لحد الحمد لله وصلتهم للوزن المطلوب وهو 23 كيلو لكل شنطة ( 10 شنط ) وشنطة 10 كيلو ( لياسين )
وده والله مش عشان انا عايزة اخد حاجات كتير ابدا بس احنا غصب عننا حاجاتنا كتير علشان عددنا واعتقد ان كل ما سن الاطفال كان صغير بيكونوا حاجاتهم اكتر مننا

المهم انا كنت متاكدة من الوزن علشان جيبت ميزان مخصوص للشنط وكنت باوزن كل شنطة اكتر من مرة لحد ما ضهرى وضهر جوزى اتقطم ولما اتوزنت الشنط فى المطار كانت كل شنطة معدية 25 كيلوا ازاى ماعرفش ( علشان تاخدوا بالكم من النقطة دى ميزان المطار مختلف )
بس الحمد لله مادفعناش وزن زيادة ودى كانت ميزة الشركة الوليمبية انها مش بتدقق على الوزن قوى طالما فى حدود ( العشرينات )

وركبنا الطيارة فى ميعادها والحمد لله
وهذه قصة اخرى سوف احكيها لكم لاحقا باذن الله واشكركم على حسن الاستماع

elmadysm · 12th July 2010, 03:16 AM

دعوه لموضوعي

CharlesSwide

اعذرونى اخوتى الكرام لقطع سير الاحداث وذلك لتقديم حلقة خاصة عن الشنط ( وآآآآه من الشنط ) بناء على رغبة الاخت الفاضلة ايناس احمد
سوف اسرد المحتويات فى نقاط محددة كالاتى :

- ملابس صيفية وشتوية ( للخروج والبيت ) لكل فرد ويفضل ماتشتريش من مصر الا اذا كانت الفترة اللى جايين فيها ( صيف او شتاء ) مافيش ما يناسب لها خالص من اللى عندكم ( وهذا ما لا اعتقده طبعا )
- الاحذية ( اختيار فقط الاجود والاحدث من الموجود عندكم ) لكل فرد
- مفارش للسراير وفوط واكياس المخدات المستطيلة العريضة فقط اما المخدات الطويلة اللى بطول السرير دى مش موجودة هنا
- بعض الالعاب الخاصة بكل طفل والتى يفضلها بشدة ( وياريت مش كتير علشان هنا الالعاب تبهر الكبير قبل الصغير ) اما الاسعار فهناك تفاوت كبير بين الرخيص جدا الى المتوسط الى الغالى وكله موجود
- بعض الكتب الخاصة الهامة لينا والمصاحف وجبت كتب للغة العربية والدين علشان البنات وكمان قصص باللغة العربية ليهم
- سجاجيد صلاة وسبح
- للسيدات المحجبات ( اسدال للصلاه فى البيت واسدال للخروج ) ايشاربات ودبابيس للحجاب وشرابات محجبات
- بعض ادوات المطبخ والتى ستستعمل للفترة الاولى ( انا جبت عدد طبق لكل فرد من كل نوع - غويط - مسلطح ) - المعالق وادوات السفرة على قد كل فرد 3 حلل مثلا - كبايات - مجات ( كله على القد جدا فترة اسبوعين لشهر لحد ما تقدروا تنزلوا وتشتروا )
- مجموعة كبيرة من الادوية العامة وخاصة المناسبة للطوارئ للاطفال من ( خافض حرارة - مضاد حيوى - مراهم - قطرة للعين - ادوية للمعدة - للصداع - مسكنات للالم ........ )
- ادوات للخياطة - شامبو - معجون اسنان وفرش وتوك للشعر

ده اللى انا فاكراه دلوقتى واذا افتكرت حاجة تانية هابقى اقولها بعدين
المهم ماتجيبوش اى شئ يعمل بالكهرباء خالص لن يصلح هنا لاختلاف الفولت عن مصر

وشكرا على حسن الاستماع

elmadysm · 12th July 2010, 03:16 AM

دعوه لموضوعي

CharlesSwide

اخوتى الافاضل نرجع لسياق الاحداث ونحكى عن رحلة الطيران
وصلنا البوابة اللى هاندخل منها على اول طيارة وانتظرنا شوية كان لسة فاضل حوالى ساعة الا ربع على ميعاد الاقلاع وده لاننا وصلنا المطار بدرى شوية علشان كان حجز الكراسى فى الطائرة الاولى يجب ان يتم من المطار اما الطائرة الثانية فتم حجز الكراسى مسبقا ( قبل يوم السفر )
وقبل الميعاد بحوالى من تلت الى نصف ساعة بدانا نقف طوابير لدخول الطائرة وتفتيش الهاندباجات وكان مع كل بنت من بناتى زجاجة مياه صغيرة فى الشنطة بتاعتها رموهم كلهم ودخلت الشنط فى الجهاز الخاص بالتفتيش وبعد كده دخلنا الطائرة فى سلام

الطائرة كانت صغيرة وضيقة ( ايرباص ) 3 كراسى على اليمين و3 على الشمال وممر ضيق فى المنتصف
وتقريبا المسافرين كلهم كانهم جروب سياحى كبار السن واحنا الوحيدين اسرة ومعاها اطفال وحسيت ان الكل بيبصلى باستغراب واول ما وصلنا الكراسى ياسين بدا فى سيمفونية الصراخ ومش عايز يسكت عملت كل المحاولات اللى اقدر عليها ومافيش فايدة ومالاقيتش غير انى اديله دواء مسكن للالم علشان يهدى شوية وتم الاقلاع فى سلام وطاقم المضيفات كانوا لطاف جدا وذوق جدا وفرحانين قوى بالعيال وكانت تجربة مثيرة للبنات ( ربط الاحزمة والاقلاع )
وخلال ساعة ونصف ياسين عامل قلق فى الطيارة لدرجة انى ماقدرتش اكل وجبتى وسيبتها لكن الحمد لله نام اخر نص ساعة وبدانا ربط الاحزمة من جديد علشان الهبوط وهنا اعترضت ( مى ) جدا جدا ( 3 سنوات ) علشان مش عايزة تتقيد فى الكرسى وبدات السينفونية بتاعتها لحد ما لمسنا الارض وانا طبعا وشى فى الارض من الناس اللى حوالينا
وبعد مانزلنا ( نزلنا من الطائرة على اتوبيس لحد باب المطار ) ودخلنا المطار فضلت اعتذر عن الازعاج لكل جروب الاقيه من المسافرين معانا وبصراحة كانوا ذوق وكله قال مافيش مشكلة وبقوا يقولوا لجوزى ( nice family ) ( واكيد كان قصدهم ايه الجيش ده كله صدعتونا حرام عليكو )
وبعد كده دخلنا على قاعة الانتظار للطائرة التانية وطبعا البنات كلهم ناموا وفضل ياسين من ايدى لايد باباه وقولنا معلش ممكن ننام فى الطيارة التانية ( 10 ساعات )

ملخص :
الطائرة الاولى كانت متواضعة فى الشكل لكن طاقم الضيافة كان متعاون جدا وودود جدا والخدمة جيدة

قريبا :
تفاصيل رحلة الطائرة الثانية الى مطار مونتريال

اشكركم على حسن المتابعة والاستماع

elmadysm · 12th July 2010, 03:17 AM

دعوه لموضوعي

CharlesSwide

انا وزوجى تعليمنا كان عربى واللغة الاولى بالنسبة لنا كانت الانجليزية واحنا فعلا فيها افضل بس قبل ما نقدم على الهجرة خالص عملت امتحان ال IELTS فى الاول ولكن للاسف مكانش عندى غير 4 اسابيع فقط للمذاكرة مع وجود طفلتين صغيرين معايا مع صعوبة هذا الامتحان مؤخرا وفعلا كانت نقطى كالتالى :
6.5 - 6.5 - 5.5 - 5 وبالتالى لم استطع التقديم فيدرال لانهم كانوا طالبين 4 سبعات
وبما ان حلم الهجرة كان متاصلا فى داخلنا قررنا تغيير المسار والمحاولة مرة اخرى لتحقيق الحلم مع العلم انى لم ادرس الفرنسية غير ال3 سنين فى ثانوى ومع ذلك بدات الدراسة وثابرت واستمريت ووجدت نفسى احب هذه اللغة وارتقى فيها جيدا
وقولنا لنفسنا ليه لأ ؟ مانكمل فى الفرنساوى ونعيش بالفرنساوى يمكن هو ده نصيبنا وان شاء الله يكون خير
وعليها الحمد لله كملنا المشوار لحد ما وصلنا الى كيبيك سيتى
اما موضوع العنصرية فانت بنفسك قولت ان العنصرية فى كل مكان وتكاد تكون فى بلادنا العريية بنسبة اكبر من البلاد الغربية
وعلى العموم احنا دلوقتى فى بداية المشوار وهانستفيد من الدراسة وهدوء الحياه ورخص الاسعار بالاضافة الى المنحة المالية المقدمة للاطفال هنا ونجرب وبعد كده نقدر نقرر هانعمل ايه لما يبتدى البحث الجاد عن العمل
اما عن عنصرية الكيبيكيين بالتحديد فطبعا مش هاقدر دلوقتى اقول اى راى بخصوص الموضوع ده لان اكيد هايكون راى غير موضوعى لاننا يادوب فى البلد من 12 يوم فقط وده غير كافى اطلاقا على اصدار حكم سواء بالسلب او الايجاب
لكن انا يعتبر تعاملت معاهم فى حوالى 4 او خمس مواقف خلال انهاء الاوراق الرسمية والتقديم لبنتى فى المدرسة وبصراحة فى كل المرات دى الناس كانوا ذوق جدا ومتعاونين ومتفهمين عدم اتقانى للغة بشكل كامل - ( بل حصل موقف فى مدرسة بنتى ان المدرسة قالت لى : " انت برافو عليكى انك بتتكلمى انجليزى وفرنساوى كويس بالاضافة الى لغتك الام وهى العربية فى حين انى لا اتحدث الا الفرنسية فقط " )
وطبعا عارفة اينشتاين ربنا معاه ويوفقه ان شاء الله بس بصراحة هو single واعتقد ان المتزوج ومعه اطفال ممكن يكون حاله افضل من العازب فى مقاطعة كيبيك بالتحديد
وبالعكس يا باشمهندس انت ماضيقتنيش ولا حاجة خالص ده انت بتفتح باب جيد جدا للنقاش ممكن يساعد اى حد فى اتخاذ قرارات مهمة فى حياته وطبعا ممكن يساعدنى انا شخصيا لوضع جميع الاحتمالات لمستقبلنا فى كندا عموما
وزى ما قولت فى الاول احنا مانزال فى طور التجربة وان شاء الله مش هايكون وقت ضائع لانه سوف يستثمر فى الدراسة واكيد الشهادة الكندية هايكون ليها اهمية زى الخبرة الكندية بالظبط مش كده ولا ايه ؟

مع جزيل الشكر

elmadysm · 12th July 2010, 03:19 AM

دعوه لموضوعي

CharlesSwide

اخوانى واخواتى الافاضل وحشتونى جدا جدا
وانا اسفة على التاخير بس انتم عارفين ان الويك اند هنا السبت والاحد والعيال ما صدقوا احتلوا الكمبيوتر ومش عارفة اجى ناحيته منهم
احب فى الاول اشكر كل اللى دخل موضوعى واضاف اليه مشاركة وكمان عايزة ااكد انى ان شاء الله مش هانسى اى سؤال بس ارجوكم رجاء خاص ان تدعونى اكمل سياق الاحداث علشان ماتلخبطش وانسى حاجة مهمة كنت عايزة اقولها وصدقونى مقدرة كويس جدا كل سؤال وقد ايه بتكون اللهفة فى انتظار الاجابة لانى كنت فى نفس الوضع ده من فترة قصيرة جدا وكنت بتمنى حرف مش كلمة بس تفيد فى موضوعنا
فان شاء الله اكمل حسب ترتيب الاحداث وبعد كده اجاوب على كل سؤال على حسب خبرتى الخاصة لانى مش هاقدر افتى فى حاجة انا مش عارفاها خلاص اتفقنا ؟
هانكمل النهاردة رحلة الطيران التانية من اثينا الى مطار مونتريال
كان ميعاد الطائرة الساعة تسعة الا خمسة وبداوا المسافرين يعملوا طابور من الساعة 8 واستغربت ليه بدرى كده ؟؟!!
المهم وقفنا فى الطابور وبعد كده عرفت ليه واقفين بدرى بل اكتشفت ان الطابور بدا من سبعة وتلت كمان اتاريهم عمالين يفتشوا فى الناس تفتيش غريب جدا!!!!!
احنا كل واحد مننا انا وجوزى والبنتين الكبار كان معانا هاندباج طبعا الشنط دخلت جهاز التفتيش وكمان طلبوا نقلع الجواكت بتاعتنا كلنا وتدخل هى كمان الجهاز وبعد ماعدينا احنا كمان من بوابة التفتيش طلبوا من جوزى انه يقلع حزام البنطلون ويفضى جيوبه كلها !!! وبعد ده كله مسكوا شنطة شنطة ( الهاندباجات طبعا ) وفلوها مش فتشوها بس وطلعوا من شنطتى انبوبة معجون اسنان مستعملة لزوم الصبح فى المطار استخدمتها انا والبنات ورماها وقالى ممنوع وكمان كريم للشعر وزجاجة كلونيا فيها نصها كل ده رماه وقالى ممنوع يطلع على الطيارة ( بصراحة كان التفتيش مستفز جدا ) واخيرا ادونا حاجتنا وقعدنا نقفل الشنط والبس العيال تانى وكل واحد يشيل حاجته لما خلاص لحقنا الطيارة بالعافية كنا عمالين نجرى ونجر العيال معانا وهما بيستعجلونا
واخيرا ركبنا الطيارة
كانت على عكس الطيارة الاولى تماما كبيرة جدا ( نظام كرسيين جنب الشباك و4 كراسى فى النص ) وكمان كانت مجهزة بشاشة فى ضهر كل كرسى ولما كل واحد قعد فى كرسيه بداوا المضيفين ( 2 رجالة - 2 بنات ) يوزعوا على كل واحد مخدة وبطانية وسماعة هيدفون
وبدا مسلسل الحرك والفرك والعياط والزهق من العيال فمافيش داعى اطول فى الموضوع ده
كان فيه وجبتين ومع كل وجبة مشروب ساخن ومشروب بارد
المضيفين كانوا مش لطاف بالمرة ولا متعاونين على عكس الطيارة الاولى برضه وكانوا مكشرين دايما على عكس المعتاد
فى النصف التانى من الرحلة ( يعنى بعد مرور حوالى 4 او 5 ساعات ) وزعوا علينا ورقة زى البروشور كده والمفروض نكتب فيها اسماء المسافرين من العائلة وتواريخ ميلادهم وكمان معاك ايه داخل بيه كندا من محتويات الشنط
كانت الورقة دى مكتوبة بالانجليزى والفرنساوى
ومكانش فيها مكان غير لاربع اشخاص بس فكتبت فيها على قد الامكنة المتاحة وماكتبتش ( مى ولا ياسين ) ولما حاولت اسال المضيف قالى ماعرفش زى اى سؤال سالته قبل كده ( الاجابة النموذجية ماعرفش )
اما فى خانة المنقولات اللى معانا فكتبت فيها ملابس فقط لانى ماكنتش عارفة اكتب ايه تانى ( حلل واطباق يعنى !!؟؟ )
المهم
انتهت الرحلة ووصلنا الحمد لله مطار مونتريال فى سلام وبعد ماكنت انا وجوزى كمان انتهينا
وبعد مادخلنا المطار ( المرة دى من الطائرة الى المطار من خلال تيوب ) بعض المضيفين واقفين يشاوروا على المكان اللى المفروض نروحه وكان فى كذا مكتب زجاج زى بتوع البنك كده روحنا لمكتب فاضى فيهم الموظفة شافت الباسبورات والورقة اللى وزعوها علينا فى الطيارة ودخلت بيانات على الكمبيوتر وبعد كده قالت لنا ندخل على مكتب الهجرة
دخلنا المكتب وقابلنا موظف من اصول شرق اسيوية وشاف الباسبورات والورقة وفجاة اتنفض وكشر وقعد يتكلم بنرفزة ازاى انتو 6 اشخاص وكاتبين 4 بس وازاى الموظفة الاولانية ماخدتش بالها من الموضوع ده وراح قايم منطور وراح لها وقالى تعالى معايا وقعد يزعق لها وبعدين كملت البيانات منى ورجعنا مكتبه تانى
طلب الباسبورات وقعد يسالنى انتى بتشتغلى ايه ؟ وجوزك بيشتغل ايه ؟ وبيتاكد من تواريخ ميلاد الاولاد واسماؤهم وبعدين طلب العنوان اللى هانستقر فيه وقال لنا استريحوا ربع ساعة وبعدين اناديلكم
وبعد كده ادالنا اوراق اللاندينج وقالنا ان الاوراق دى مهمة جدا وهاتستخدموها فى استخراج اوراقكم الرسمية بعد كده وكمان ادالنا ظرفين للمنحة الحكومية للاطفال ( المفروض ظرف خاص بكيبيك وظرف خاص بالفيدرال ) وبعد ما روحنا وفتحناهم بعدين لاقيناهم الاتنين للفيدرال بس ( ودى اخرة النرفزة بتخلى الواحد يتلخبط ويغلط )
المهم قالنا روحوا على مكتب الهجرة الخاص بكيبيك ولما دخلنا المكتب قابلتنا سيدة كبيرة فى السن بس سكرة والله
كانت بتتكلم بالراحة وبهدوء شديد ورحبت بينا جامد وكانت سعيدة باللاطفال واديتنا الكتيبات اللى فيها معلومات عن كل حاجة فى كيبيك واكدت علينا تانى فى المحافظة على اوراق اللاندينج وقالت ان الوراق دى هاتطلب مننا لما الاولاد يدخلوا الجامعة فى كندا واديتنا عنوان لمكتب الهجرة القريب مننا فى كيبيك سيتى علشان نروح لهم يطلعولنا الكروت المهمة ( التامين الاجتماعى والتامين الصحى )

وبعد ماخلصنا معاها روحنا علشان نستلم الشنط من على السير وفعلا استلمناها وروحنا بعد كده على اخر خطوة وهى اللى كان بيسال عليها الاستاذ ibra
مكاتب مفتوحة زى الكاونتر كده وقابلنا شاب وشاب الباسبورات واوراق اللاندينج وسالنا
هوا : معاكوا ايه
احنا : معانا ملابس
هو : تقريبا بكام دولار ؟
احنا : حوالى كذا
هوا : معاكم اى شئ ثمين او اجهزة ثمينة او اى شئ ذا قيمة عالية ؟
احنا : انا معايا جزء من ذهبى
هو : مستعمل ولا جديد ؟
احنا : مستعمل
هو : معاكوا موبيلات ؟
احنا : ايوة
هو : مستعملة ولا جديدة ؟
احنا : مستعملة
هو : فى حاجة فى بلدكم عايزين تجيبوها كندا بعد كده ( عفش او اجهزة او اى شئ ) ؟
احنا : لأ مافيش
هو : شكرا وراح مدينا ورقة بكدة
وبس خلاص وقالنا اتفضلوا
ودى كانت اخر خطوة فى المطار وطلعنا بعد كده علشان نحجز تذاكر الاتوبيس من مطار مونتريال وحتى كيبيك سيتى ودى رحلة تانية اخدت لها حوالى 4 ساعات
خط سير الاتوبيس ( مطار مونتريال - المحطة الرئيسية فى مونتريال نفسها - وهناك قعد نص ساعة يحمل - اتحرك الساعة 6 من مونتريال - ووصل كيبيك سيتى حوالى 9 الا ربع )

ارجوا ان اكون عوضتكم عن الويك ان اللى فات
وشكرا على حسن استماعكم

elmadysm · 12th July 2010, 03:20 AM

دعوه لموضوعي

CharlesSwide

اخوانى واخواتى الكرام
يبدو ان كلمات الشكر والعرفان لم تعد تكفى امام هذا الوابل من الكلمات الرقيقة المفعمة بالتشجيع والاحترام لشخصى الضعيف من قبلكم ولكنى للاسف لا اجد غيرها للتعبير عن امتنانى لكل من يدخل موضوعى ويضيف مداخلة تشجيع او سلام او حتى استفسار او حتى متابعة بدون تعليق
فشكرا جزيلا لكم وبارك الله فيكم جميعا ويارب اكون فعلا عند حسن ظنكم بى
الحقيقة الحلقة اللى فاتت سقطت منى بعض المعلومات البسيطة وهى كالتالى :
كان من المقرر ان تصل الطائرة مطار مونتريال الساعة واحدة وربع ظهرا لكن فى الحقيقة نزلت ( زى ماذكرت الشاشة على الطائرة ) الساعة 12 ونص ظهرا
وطبعا فرحنا جدا علشان قولنا هانلحق اتوبيس الساعة 2 الظهر اللى هايوصلنا لكيبيك سيتى
ولكن بعد ما نزلنا المطار اكتشفنا ان الساعة فى مونتريال زادت ساعة ( التوقيت الصيفى فى كندا ) وده طبعا غير الخطط خالص
فاذا قولنا ان احنا فعلا هبطنا بالطائرة الساعة واحدة ونص فاحنا خلصنا اجراءاتنا على الساعة 4 عصرا
وبكده ركنا اتوبيس الساعة 5 ووصلنا كيبيك سيتى حوالى الساعة 9 الا ربع مساءا
والاتوبيسات بتاعة كيبيك سيتى مواعيدها كالتالى ( 2 - 5 - 8 ونص مساءا ) ( حوالى 64 دولار الفرد ) والرحلة من مطار مونتريال الى كيبيك سيتى حوالى 4 ساعات
مش عارفة اذا كانت معلومات مهمة ولا ايه بس قولت اضيفها للمعرفة العامة

بالنسبة للجواكت اذا كونتى هاتيجى فى وقت شتاء فهاتى اتقل حاجة عندك للولاد لزوم السفر والوصول ( وطبعا تتقلى فى الهدوم تحت الجواكت وماتنسيش الآيس كابات والجوانتيات ) اما اذا كنتى هاتيجى فى الصيف فافضل انك تجيبى من هنا علشان بتبقى فيه عروض حلوة واسعارها معقولة ومش هاتبقى مضطرة تجيبى من مصر لانه مش بجودة اللى هنا من ناحية الملائمة للجو طبعا
ام بالنسبة للبطاطين انا جيبت معايا عدد 2 كوفرتة وعدد 2 بطانية خفيفة وطبعا ده علشان الوزن
لكن لما جيت هنا ماحتجتش زيادة علشان التدفئة جو ة البيت بتكون كويسة جدا وممكن الكبار مايحتاجوش غير غطا خفيف جدا
لكن الحقيقة لسة ماعرفش نظام الاغطية هنا ايه واسعارها كام علشان زى ماقولت لك ماحتجتش زيادة عن اللى جيبته معايا من مصر

بالتوفيق
شكرا جزيلا على حسن الاستماع

elmadysm · 12th July 2010, 03:23 AM

دعوه لموضوعي

CharlesSwide

اخوانى واخواتى الكرام
وصلنا كيبيك سيتى الساعة تسعة الا ربع مساءا كما ذكرت سابقا
محطة ( saint foy ) وهى المحطة قبل الاخيرة لان المحطة الاخيرة هى كيبيك القديمة
نزلنا من الاتوبيس وحسينا ان الجو بارد بس دخلنا على طول المحطة من جوة ( قد ايه التدفئة الداخلية هنا حلوة جدا كانك منعزل تماما عن الجو الخارجى ) وانتظرنا وبعد لحظات وصل اخونا فى الله ورفيق اخر وحملوا مع جوزى الهم ما يتلم اللى على الرصيف ( قصدى الشنط طبعا ) وبعد كدة ركبنا العربيات ووصلنا البيت
وطبعا هذا الاخ الفاضل كان سايب لنا بعض من العفش وطبعا كان اهمها فى وضعنا ساعتها هو السراير ( صحيح من غير مخدات ولا فرش ) بس مش مهم وكان الواحد مشتاق انه يفرد جسمه وينام بعد هذه الرحلة الطويلة

** ملاحظات عامة على الشقق فى كيبيك سيتى ( وطبعا بتكلم من خلال شقتى )
- الاراضى والحيطان خشب ( علشان كده حاسة ان اقل صوت بيسمع كانه اضعاف الصوت اللى طلع اصلا )
- الشبابيك محكمة الغلق جدا ومافيش منفذ للهواء ( واكيد ده علشان نظام التدفئة فى الشتاء )
- الدواليب كلها فى الحيطة ( كل غرفة فيها باب تانى لما يتفتح تلاقى ارفف ومكان تعليق الملابس )
- البوتوجاز كهربا مش غاز
- مافيش مناشر طبعا لنشر الغسيل ( بنشترى مناشر داخلية )
- المراتب سفنج مش قطن

طبعا نمنا نوم عميق وكان تانى يوم معركة مع الشنط لاستخراج ما فيها ورص كل حاجة فى المكان المخصص وعلى الرغم اننا قعدنا اليوم كله فى الموضوع ده الا ان المهمة ماخلصتش ولكن بعد كده خلصت بالتدريج على مدى ايام تالية

شكرا على حسن الاستماع

elmadysm · 12th July 2010, 03:25 AM

دعوه لموضوعي

CharlesSwide

اخوانى واخواتى الافاضل
تاخيرى مش بايدى والله احنا لسة فى حالة انعدام وزن وبنحاول نظبط الشقة اللى احنا ساكنين فيها وحاجات تانية لزوم الحياة اليومية
الحلقات اللى جاية هاتكون بخصوص استخراج الاوراق الرسمية بس الاول هابتدى بمدرسة بنتى علشان دى فعلا اول حاجة عملناها

انا بنتى الكبيرة ماشية فى 8 سنين وكانت فى تانية ابتدائى فى مصر
وطبعا ماكملتش التيرم التانى فى المدرسة نظرا لظروف سفرنا وقولنا مش مهم حتى لو عادت تانية ابتدائى تانى السنة الجاية فى كندا خليها تتعلم صح احسن
بس من خلال محادثتنا مع اخونا الفاضل اللى استقبلنا هنا فى كيبيك قال لنا انها ممكن تدخل المدرسة ال3 شهور اللى فاضلين واذا كان مستواها بيتقدم يبقى ممكن تدخل سنة تالتة ابتدائى على طول السنة الجاية ويبقى نفدت بتانية ابتدائى واتعلمت شوية اللغة من خلال احتكاكها بزملائها فى المدرسة ( مع العلم بعدم وجود امتحانات فى مرحلة التعليم الابتدائى )
فكنا جايبين شهادة سنة اولى ابتدائى وشهادة التيرم الاول من مدرستها فى مصر وترجمناهم ولما جينا هنا باباها راح المدرسة الاقرب للبيت وقدم لها مع وجود شهادة ميلادها مترجمة وتم عمل ملف ليها فى المدرسة
بس المديرة قالت له انها ماعندهاش مكان للبنت السنة دى فهادور لها على مكان فى مدرسة تانية علشان البنت ماتضيعش عليها السنة
وفعلا بعد كام يوم المدرسة بعتت لنا جواب على عنوان البيت وقالت لنا انها لاقت مكان للبنت فى مدرسة كذا وقالت لنا روحوا المدرسة دى علشان تتعرفوا عليها والبنت تدخل المدرسة على طول بعد كده
وده اللى حصل
روحنا المدرسة التانية وكان عندهم كل الاوراق من خلال اتصالهم بالمدرسة الاولى ( على اساس ان بنتى كانها منتدبة بس عندهم علشان تكمل السنة دى )
وروحنا بالبنت زيارة للمدرسة التانية وعرفوها فصلها وكان مرحب بيها جدا وقالوا لنا انها هاتبتدى من اول الاسبوع الانتظام فى الحضور
المدرسة التانية اديتنى ظرف فيه جدول بالايام اللى فيها اجازات - وورقة بالمصاريف السنوية ( 120 دولار ) نظير الكتب والكراسات اللى بيدوها للاولاد ( احنا دفعنا 40 دولار بس علشان جزء من السنة )
وورقة تانية بالطلبات اللى المفروض نجيبها للبنت من ادوات مكتبية
وده كل اللى حصل معانا بخصوص الموضوع ده
معلومات عامة عن المدارس ( فى حدود معرفتى الضئيلة جدا الى الان ) :
- المدرسة الابتدائى بتاخد الاطفال حسب السن ( ابتداء من 5 سنين سنة حضانة او kg وابتداء من 6 سنين اولى ابتدائى ) وبيتحسب السن من بداية شهر سبتمبر من كل عام ولن يقبلوا حتى لو يوم اقل من السن المقرر
- الاولاد فى الغالب بيروحوا المدرسة الاقرب لمكان السكن وكل الناس هنا ملتزمة بده لان المدارس متشابهة وزى بعض
- طبعا ماعرفش اذا كانت المصاريف دى فى كل المدارس ولا ايه لانى كنت عرفت من المنتدى قبل كده ان فى ناس لم يدفعوا اى مصاريف لاولادهم عند دخول المدارس ( حتى 120 دولار فى السنة اعتقد انه مش مبلغ كبير قوى )
- بيهتموا هنا فى المدارس بالانشطة جدا ( لازم كل يوم يكون فيه رياضة وموسيقى واعمال فنية ورسم )
- كلامى كله عن المدارس الحكومية ولا اعلم نظام المدارس الخاصة او الاسلامية هنا
- فى فترة فى منتصف اليوم ( فترة الغدا او الراحة ) بتكون مابين الساعة 12 الى واحدة الظهر ودى فترة مقدسة جدا هنا حتى فى الاعمال الحكومية - فى المدارس الاطفال الباص بيروحهم البيت يتغدوا ويرجع يجيبهم المدرسة تانى الا الاطفال اللى اولياء امورهم فى العمل وبيكونوا مش فى البيت بيطلبوا الفترة دى حضانة لاولادهم انهم يقعدوا فى المدرسة ويكونوا واخدين غداهم معاهم او المدرسة تقدم لهم الغدا نظير مبلغ من المال
بالنسبة لى انا بدى لبنتى الغدا بتاعها كل يوم ( لازم الغدا يوميا يحتوى على بروتين - رز او مكرونة - خضار - فاكهة )
والمدرسة فضلت ان البنت تفضل فى المدرسة الفترة دى وماتروحش علشان تختلط افضل بزملائها وتتعلم اللغة افضل

بجد دى كل معلوماتى لحد دلوقتى وتحت امر اى حد فى استفسار
شكرا على حسن الاستماع

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
إبدأ مشروع كبير برآس مال صغير فى كندا	الهجرة إلى كندا	bassamfox	16	7665	20th November 2017 06:33 AM
مطلوب مساعدة من طبيب باطنه فى الرياض	ترحيبات ... مناسبات ... علاقات عامة	مصري سكندري	13	4242	25th July 2013 01:31 AM
خبر سار :جيسون كينى يترك وزارة الهجرة	الهجرة إلى كندا	mohdsayed	10	3600	19th July 2013 03:59 PM
شيكابالا فى الاهلى 3 سنوات ب 20 مليون جنيه	موضوعات عامة ... موضوعات خفيفة ... منوعات	elmadysm	2	1818	23rd June 2013 07:54 AM
رأى الدكتور يوسف القرضاوى فى شراء بيوت السكنى في...	الهجرة إلى كندا	mohamed naguib	23	29464	5th June 2013 05:53 PM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تحياتي من مسيساجا	somayasaleh	مقاطعات كندا	2208	30th November 2020 10:41 AM
تحياتى من لندن اونتاريو	ايناس احمد	الهجرة إلى كندا	470	5th June 2013 07:14 AM
مع تحياتي.. والد بنت شعنونة..!!!	بنت شعنونة	مواضيع شخصية	17	23rd May 2010 12:56 PM
الي جميع من مروا بحياتي	التونسيه	ترحيبات ... مناسبات ... علاقات عامة	2	21st April 2010 07:10 AM
تحياتي للجميع	حسام	ترحيبات ... مناسبات ... علاقات عامة	13	16th March 2010 05:26 AM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

الهجرة إلى كندا

تحياتى من كيبك سيتى