♥♥♥♥ عمار يا كندا ♥♥♥♥

[Ehab Salem]

الصحف المصرية والعربية

أعزائي المطاريد

على بركة الله نعلن إفتتاح مغارة عمار يا كندا

لو حكينا يا حبيبي نبتدي منين الحكايه

حقيقي مش عارف أبتدي منين
هو أنا إمتى أصلا جتني فكرة الهجره لكندا ? ....
الموضوع حصل أثناء دراستي في السنه الأخيره في كلية الهندسه
في تلك السنه تعرفت بالصدفه على زميل لي له 2 من أعمامه مهاجرين و مستقرين في كندا منذ السبعينيات و بدأ في سرد الحكايات عن كندا و عن حياة أعمامه و أولادهم هناك و يفرجني على صور و خلافه و قال لي أنه ينوي الهجره لهناك هو و أخوه الأكبر و الذي تخرج من نفس كليتنا منذ سنتين و لم أكن أعرفه و قتها بل تعرفت عليه بعد ذلك
أنا أصلا كانت مسيطره علي فكرة الهجره من مصر بعد التخرج ... كان عندي إحساس متزايد بأن مش هي دي العيشه اللي عايز أعيشها طول عمري و عندما أقول العيشه فأنا لا أقصد الماديات أبدا
فأنا لو ملياردير برضه مكنتش هأحب العيشه في مصر
أنا أقصد السيستم .. الثقافه السائده .. تصرفات الناس في مختلف جوانب الحياه ... المرور ... النظام ... النظافه ... الحريه ... حقوق الإنسان الخ

مش عايز حد يمصمص شفايفه و يقول يعني إنت أحسن من الملايين اللي عايشين في مصر ... لأ هما أحسن مني ستين مره ... عشان قادرين يعيشوا هناك
أنا مشكلتي إني بالتعبير المصري مش مدردح .. أو بتعبير والدي .. إنت إبن مدارس ... ياما سمعت من والدي الجمله دي ... (يا أبني خليك ملحلح شويه و مشي أمورك .. كده أنت مش هتعرف تعيش في البلد دي )
الحقيقه هو كان عنده حق ... أنا من أول ما غادرت مرحلة الطفوله و بدأت أعي الحياه و أفهم و أقرأ و أشاهد و أقارن و أنا أصبح عندي إحساس متزايد إني مش هأقدر أكمل حياتي في مصر لأني ببساطه أفتقد لكثير من المهارات اللازمه للنجاح فيها

إتظلمت كتير و إتاخد حقي بسبب إني مش بأعرف أمشي أموري و كتير كنت هأتبهدل لولا تدخل والدي بواسطه أو برشوه أو بكليهما
مواقف سلبيه كتير

أنا كل اللي كنت عايزه نظام واضح يمشي على الكل ... نظام يضمن لي إني أخد حقي بدون واسطه أو رشوه أو محايله
أنا فاكر و أنا في أخر سنه في الكليه طقت في دماغي أطلع بطاقه إنتخابيه روحت القسم قالولي روح و تعال في شهر 12 رجعت في شهر 12 و لما قلت لهم أنا جاي أطلع بطاقه إنتخابيه قالولي إحنا مش فاضيين النهارده عندنا تشريفه تعال بكره روحت بكره فضلوا لاطعيني ساعتين عشان أزهق و أمشي و بعدين طلعلي واحد صول قالي أروح و أجي بعدين وطبعا مطلعتهاش
ما زلت فاكر قريبنا اللي دفع 100 ألف جنيه سنه 94 عشان يدخل إبنه كلية الشرطه و صاحبي التاني اللي دخلها بواسطه لأن جده عبد الأحد جمال الدين و عشان كده إبن قريبنا لما إتخرج إشتغل في الأمن المركزي لكن صاحبي إشتغل في شرطة المطار
وده طبعا لأن مفعول ال 100 ألف جنيه الرشوه إنتهى عند مرحلة دخول كلية الشرطه لكن عبد الأحد جمال الدين ما زال موجود لذلك فمفعوله إستمر لمرحلة توزيع الضباط بعد التخرج
ما زلت أتذكر أول يوم ليا في مركز التدريب في الجيش و بعضهم يأخذ مخلته و يستقل السياره ليقضي الجيش في بيتهم بينما إنطحنت أنا 7 أيام حتى أخرجني والدي بواسطه لأقضي باقي شهر التدريب في بيتنا بينما يتمرمط الباقون ممن ليس لديهم واسطه

نلقاكم بعد الفاصل

 

[Ehab Salem]

ما زلت أتذكر إنه برضه بالواسطه إتوزعت على إدارة التأمين و المعاشات للقوات المسلحه على بعد دقائق من بيتنا بينما كان بعض زملائي يسفون التراب في الصحراء
ما زلت أتذكر أيضا أن مفعول الواسطه إنتهى عند مرحلة توزيعي على وحده داخل القاهره و إن الضابط المسؤول عن الخدمه كان بيوقفني شنجي كل يوم لأني كنت العسكري الوحيد المؤهلات عليا و كان عايز يكسر مناخيري و كتير من العساكر زمايلي كانوا بينصحوني أمسحله جوخ أو أجيبله هديه عشان يريحني و مكنتش برضى
يا عالم أنا عايز نظام عادل يمشي على الكل .. صعبه دي وعمري ما كنت راضى عن الغلط حتى لو إستفدت منه أحيانا

 

 

[أكسيلانس]

ألف حمدلله علي السلامه يا بشمهندس أيهاب ,, أنا سعيد أن كل المطاريد أتجمعوا في المغاره الكبيره ديه تاني
و أهم حاجه أن كل كبرات الجبل وصلوا بالسلامه

منور بيتك الجديد ,و منتظرين أخر ابدعاتك ,,و صورك و أنطبعاتك الجميله


خالص التحيه و أطيب امنياتي

 

 

[Ehab Salem]

كنت مره راجع مع واحد صاحبي في عربيته من إسكندريه و إتلقط رادار
طبعا أنا عشان خايب و إبن مدارس قلت له مفزوع هتعمل أيه هيسحبو الرخصه و هتدفع غرامه قالي إنت عبيط أنا هألاغي أمين الشرطه و هو هيقسم مع الظابط اللي قاعد هناك ده و عامل فيها إنه شريف و ميعرفش إن الأمين بياخد فلوس وفعلا ده اللي حصل
نفس الموقف ده حصل معايا بعدها و إتسحبت رخصتي لأني معنديش المهارات اللي عند صاحبي ده
هأقول أيه و ألا أيه
أخو جوز أختي مات في حادث بشع على طريق سريع لأن كان فيه كمين شرطه موقف سياره نقل في وسط الطريق بالليل بدون أي أنوار أو عواكس و إصطدمت سيارة المسكين بالسياره النقل من الخلف و مات و ترك ٣ أطفال أيتام بسبب غلطة الشرطه اللي هيا المفروض إنها تحمي الناس مش تكون السبب في موتهم

أما القاصمه فكانت وفاة أختي نفسها رحمها الله بسبب غلطة و إهمال طبيب في مستشفى خاص و لم نستطع إثبات أي شئ على الطبيب و المستشفى لتواطؤ الجميع
عندها نفسي قفلت تماما من مصر

 

 

[znaty]

منور الدنيا كلها يا كنج هوبا
موضوعك دة كنت مستنيه من زماااااااااااااااااااااااان ..
واخيرا ..عندنا الفرصة ..نعيش القصة لحظة بلحظة انت ود هيتش هود

كدة ..الحبايب كلهم اتلموا ..فينك يا تومي ..وتبقي الفرحة كملت

عندي تعليق صغنن على موضوع الجيش

بجد احمد ربنا انك ماكنتش عسكري بورسعيدي

كان زمانك اتجندت في سلاح المهربين من الجمرك لحساب الظباط و صف الظباط
صحيح ماكنتش هاتقعد يومين في الوحدة
بس كنت هاتبيع اللي وراك واللي قدامك

 

 

[سيف الدولة]

يسلموا استاذ ايهاب ..ومبروك على التوبيك الجديد...تانيا ...تعرف انا غايتي اهاجر لنفس السبب بتاعك ..بس مش عشاني عشان ابني اللي عمرو خمس سنين واللي امو بتربيه تربية ما تنفعش عندنا ..الولد صادق ..مثالي ..بيتكلم كلام حتى بالدين اكبر من سنه ..بحسو رهيف قوي ..طبعا انا عاوز اهاجر لنفس اسبابك تقريبا ..بس انا بعكسك ..انا دايما بحارب عشان حقي ..واحيانا باخدوا ..وكتير احيانا ما باخدوا ..بس تعبت ..تعبت انو احارب عشان حقي ..والمفروض آخدو بسهولة ..بس ابني شايفو موش بتاع حرب .والذئاب حتاكلو ..لذلك بتمنى يظبط معايا مشروع الهجرة ...وبتمنالك التوفيق ..تابع واحنه متابعين معاك

 

 

[ناوية ع الهجرة]

باشمهندس ايهاب كنت اود الا اقطع الموضوع بس بصراحة البداية قوية جدا ما شاء الله
ألف مبروك .. افتتاح المغارة
حضرتك عارف ان احنا مستنين الموضوع ده بلهفة من ايام ايبك
متابعين وفي الصف الاول امام المغارة

 

 

[great expectations]

ايهاب سالم يعني المخ يعني العبقرية مصر خسرته اكيد مرحب بسبع الليل (الاسم الكودي للمطاريد)

 

 

[ehabtaher]

خدى منى دى هديه علىشان الافتتاح
وما تكسفشى ايدى

 

 

[Precanadian]

عمار يا كندا
وعمار يا جبل بوجود كبارات للجبل زي المهندس ايهاب والدكتور هشام وقائد التنظيم المهندس Z والاستاذه الفاضله المهندسه سميه والبقيه تاتي
وانتظروا قريبا ان شاء الله الدكتور الشامي والدكتور T

تحياتي ليك يا كنج