خطوات الإستقرار فى كيبك من الألف إلى الياء

[أدهم الشرقاوى]

الصحف المصرية والعربية

الهجرة الى كيبك مشروع يحتاج لتخطيط ودراسة لذلك سنقوم بسرد اهم خطوات الاستقرار في كيبك من الالف الى الياء ابتداء بالمديكال وانتهاء بالبحث عن عمل والاستقرار

بسم الله الرحمن الرحيم

إخوتى و أخواتى الأفاضل,

أنا أدهم, مقدم كيبك وأنا عامل بحث طويل مغطى جوانب كثيرة عن الهجرة لكيبك و لكندا عموماً من أول التفكير فى الهجرة لتقديم الأوراق لحد الإستقرار و شراء البيت مروراً بأدق التفاصيل الحياتية هناك و بناءً على طلب بعض الأعضاء الأفاضل قررت اشارك الناس بمعلوماتى.

معظم المعلومات اللى عندى أنا واخدها من أكثر من منتدى و من أناس شافوا المشاكل قدامهم و إتعاملوا معاها بنفسهم و حذرونا منها, يعنى أنا بنقل معلومات على تجارب شخصية و إن شاء الله هحاول أوثق المعلومة بالدليل على قد ما اقدر.

أنا مرحب بأى أسئلة ممكن تخطر على بال أى عضو و هرد لو عندى الإجابة و مرحب أيضاً بأى تعليق أو تصحيح لمعلومة فلا عصمة إلا لنبى و لن أجادل

يمكن تكون معلوماتى مكررة و مستهلكه و لكن اللى متأكد منه إنى أكيد هذكر معلومات جديدة على بعض الأعضاء.

الهدف من التوبيك دة هو مساعدة المهاجرين من أول الحصول على الفيزا لحد الإستقرار مروراً بكل الخطوات المعروفة و توفير الوقت و المجهود على الناس فى البحث فى المنتديات و فى التوبيكات المختلفة.

نبدأ و على بركة الله.

 

[أدهم الشرقاوى]

• مفاتيح النجاح فى مشوار الهجرة:
1. الشغل و الدراسة:
- هم الكومبو المطلوب و أنجح Model رسمى لأى مهاجر جديد.
- الدراسة هى رقم واحد و إتنين و تلاتة فى رحلة الإستقرار, كندا لازم تاخد منها شهادة أو معادلة لأن المتعلمين فى هذة البلد مقدرين جداً مادياً.
- الشغل مهما كان بسيط مش عيب – العيب إنك تبقى قادر على الشغل و تشحت.

2. الصبر و المثابرة حتى الموت:
- محدش بياكلها بالساهل سواء هنا أو هناك.
- كندا حلوة بس لن تاخذ احلي ما فيها الا بالتضحيات والاجتهاد و الصبر و طولة البال.
- هتتعب فى أول سنتين تلاتة على ما تاخد شهادة و ترستق نفسك مادياً بس هترتاح أوى باقى عمرك.
- البداية تكون دائما محبطه من كل النواحى و مكلفه و بالرغبة و الإصرار و الإستفاده من الفرص المتاحه والخدمات المقدمه هتنجح.
- أصعب يوم اول يوم و اصعب اسبوع هو اول اسبوع و اصعب شهر هو اول شهر.
- المجتمع "بيفرز" المتفاني في عمله من الشخص الي مبيشتغلش.
- اللي رايح وناوي يَـجـِـد سـَــيـَــجـِـد وعلى قد جهدك حتلاقي المجتمع بيديك نجاحات.
- لا أجد بأسا من الكدح و العمل الشاق حتى أصل إلي ما أريد.
- "مفيش حلاوة من غير نار و ما فيش حاجة بتيجي ببلاش".
- مفيش إنجاز حقيقى هتحس بيه إلا بعد أول 3 سنين فحت و ردم و عمل, بعد ما تاخد الجنسية و الشهادة و تلاقى عمل محترم.
- فكر الهجرة إلى كندا هو فكر مافيا, من الأخر عملية منظمة لأستدراج المؤهلات العليا و ذوى الخبرات من كل أنحاء العالم بخبراتهم و بفلوسهم
- مهما واجهتك مصاعب و عراقيل إوعى تحبط ولا تزهق.

3. العودة للوطن الأصلى ليست إختيار:
- أنت بدأت مشوار و لازم تكمله للآخر كما يجب, لو رجعت مصر شهرين تلاتة ستة مش هتطيق نفسك و هتقول البلد إتغيرت عن ما سبتها, لأ هى مش هتكون إتغيرت, أنت بس اللى هتكون نسيت.
- مفيش أى تعارض بين وطنيتى و انتمائي لمصر كرمز وتاريخ وجزء من بنائي الشخصي و الهجرة.
- بالنسبة للعلاقات الإجتماعية و العواطف ليست حكراً على بلاد الشرق التي تفيض لبناً وعسلاً و كل ما يقال عنها ما هو إلا كلام رومانسي جميل بنحاول نصبّر نفسنا بيه على حياتنا عشان مانتقهرش.

4. كندا مش جنة:
- كندا مش هي النعيم ولا مصر هي الجحيم.
- إحنا على الأرض يعنى مفيش هناك ملايكة و فى اللى بيكسر القوانين و فى اللى بيحترمها, فى العنصرى و فى المتسامح.

5. الإيجابية:
- إشغل نفسك بالمييزات اللي الحكومة بتديهالك و أستغلها علشان توصل لهدفك.
- إبتعد عن الفاشلين و أصحاب الرأي و التفكير السالبي , كل واحد له قصة مختلفة و بالتأكيد نصيب مختلف , مش كل الناس قدرها واحد و مفيش حاجة إسمها فشل, فى خبرات تستخدامها للنجاح في المرة القادمة.

6. شركة حياة عاقلة جداً:
- لو إتجننت فى دماغك و إتجوزت قبل ما تسافر, لازم تكون البنت متفهمة و عاقلة إلى أبعد الحدود.
- البنت لو مجنونة ممكن تضيعك و تلبسك فى ديون البيت و العربية .
- البنت لو عبيطة, مطيورة, عيلة صغيرة و فاكرة كندا فسحة ولا لعبة حياتك هتتحول لجحيم.

7. الإستمتاع بالبلد, بالهدوء, بالإحترام, بالأخلاق, بالنقاء, بالحياة.

8. تبدأ فى بناء كريديت هيستورى محترم من أول يوم ليك فى البلد.

 

 

[أدهم الشرقاوى]

• شكل الحياة فى كندا:

1. النظام هو رقم واحد و إتنين و تلاته فى كندا.

2. الإستقرار و الراحة النفسية ,حياة مستقرة مرتاحة البال, بلد غاية فى الجمال وتشعر فيها براحة نفسية وصحية غير عادية بعيداً عن التلوث و الصخب.

3. المساواة, حتى لو مستوى أقل بس تحس إنك مواطن زيك زي كل الناس, ليك نفس الحقوق اللي مكفوله للجميع.

4. القانون, البلد بلد قانون, أنت و غيرك مطالبين إنكوا تحترموا هذا القانون و جهلك بالقانون لا يشفعلك, المجتمع هناك يحكمه القوانين (وليس الدراع والواسطة).

5. الصدق, هناك المفترض فيك انك صادق لكن لو ثبت عكس ذلك فالمفترض انك تتعلق من رجليك على باب كيبك سيتى الواحد بيقول الحاجة تتصدق على طول

6. الورق, البلد بلد ورق لازم اي شئ بورقة ممضية مافيهاش كسوف و لا احراج و لا مجاملات لأن من غير ورق أنت ملكش حق.

7. السلوك الراقى, الناس غاية فى الذوق والشياكة فى المعاملة, كلمة الشكر هتسمعها من كل شخص تتعامل معه ,والوجوة المبتسمة حقيقى هتشعر بحلاوة الحياة.

8. الطبيعة, هتلاقي نقاء وجمال الطبيعة وصفاء وبعد عن التلوث, تشعر كأنك حر طليق فى حدائق تستنشق النسيم الحقيقى وتبتسم من قلبك وترى المناظر الخلابة

9. الحكمة, هتلاقي اللي مش هتلاقيه في أمريكا ؛ حكومة عاقلة ومتسامحة لأقصى حد ، لدرجة الغباء في أحيان كتير.

10. العدالة الإجتماعية, فلا يوجد الغنا الفاحش مثل مصر لانه على قدر ما هتكسب على قدر ما هياخدوا ضرائب.

11. كرامة الإنسان, مع صعوبة الطقس ، وأثناء هبوب عاصفة ثلجية بيمروا بعربيات في الشوارع يندهوا ع الناس الهومليس والمشردين ، ويجمعوهم في ملاجئ تحميهم من الجوع والبرد اللي ممكن يموتوا بسببه.

12. الوفاء, اقتصاد البلد متشال على أكتافنا، واللي بيتنعم بيه المجتمع كله. بس ما عندكش أي مشكلة في البلد اللي تستهلكك في شبابك ، بس تشيلك على كفوف الراحة في شيخوختك. إحساسك إن اللي بتقدمه بتلاقيه ، وإن الخير اللي بتعمله ما بيروحش ، ولا بلدك بتتنكر ليك بعد ما تمص دمك.

13. البلد مش جنة, فى ناس ملتزمة و مؤدبة و كويسة و خدومة و فى ناس شرانية و غاوية فوضى و كسر قوانين و بيحبوا الأذية زى أى مكان فى الدنيا.

14. الخصوصية, كل واحد فى حاله محدش له دعوه بحد, الحرية الشخصية مقدسة و لا مساس بها طالما لم تتعدى على حريات الغير أو المصلحة العامة.

15. مواصلات آدمية.

 

 

[أدهم الشرقاوى]

• عيوب كيبك و الهجرة عموماً:
- جودة المنتجات أقل من مصر و سعرها أعلى بكتير.
- إحنا مازلنا علي الأرض , يعني مفيش ملائكة , في بشر بيحكمها قانون بيمشي علي الكل بدون تمييز.
- الحياة صعبة في الأول , الدراسة مش سهلة و فحت و إمتحانات لكن و ماله بتتعلم كويس و شهادة محترمة في العالم كله.
- انخفاض درجات الحرارة و الثلج و الزحلقة فى السواقة و الفرامل ما تقفش و العجل يلف ع الفاضى.
- إبن الناس , اللى عايش مرتاح و بيقبض كام ألف كل شهر هيتعب أوى و هيتمرمط فى البلد هناك.
- الوحدة القاتلة.
- مفيش إنجاز حقيقى هتحس بيه إلا بعد أول 3 سنين فحت و ردم و عمل.
- You are on your own
- مش هتلاقي وقت تهرش راسك بمعنى الكلمه.
- افتقاد العلاقات الأسرية والاجتماعية الشرقية.
- مفيش تتصل على المحل يبعتلك الطلبات.
- مفيش تتعب تيجى شغاله تنضف البيت وتمشي.
- مفيش حد يطبخلك لقمه.
- مفيش تمرض وتلاقى حد يوصلك.
- مشاوير مشاوير لحد لما تقرب تعيط اخر اليوم.
- لو كنت تدرس وتشتغل هتطحن فى الخلاط بس كل شيء له تمن وتمن غالى اوى.
- عدم وجود معنى للحياة و لا وجود أهداف.
- دي الحاجة الي حيشوفها المهاجر الجديد و ممكن يقعد بالسنين مستني حد يرفع سماعة التلفون يسأل عليه حيفتكر انه عشان جديد بس البشر هما كده هنا الحياة دي تنفع مع ناس كتير.
- حالات نفسية سيئة بسبب الغياب المستمر للشمس.
- النظام الصحى السيئ.
- ارتفاع مستوى المعيشة.
- سمعة العرب مش كويسة عشان بيسافروا هناك و يعيشوا عالة على الحكومة و مقضينها معونات.
- قلة فرص العمل لغير الحاصلين على الشهادات المعادلة و الخبرة الكندية.
- عدم وجود تغطية التأمين الصحي الا بعد مرور 3 شهور من دخولك كندا كمهاجر.
- ارتفاع معدل الضرائب في بعض المقاطعات.
- الشعور ببعض التفرقة داخل مكان العمل كوننا أفارقة ومسلمين.
- ارتفاع أسعار شراء المنازل.

 

 

[أدهم الشرقاوى]

أنا حبيت اذكر الكلمتين اللى فوق دول عشان نبدأ على نضافة و على أرض واقعية فلا نغوص فى الأحلام ولا نكسر المقاديف, الوسطية و الواقعية هم الأقرب للحقيقة فكندا ليست هى الخلاص من كل شرور الدنيا ولا مصر هى قاع الجحيم فى العالم.

خطواط الإستقرار من الألف إلى الياء:

- الميديكال.
- الفيزا.
- كيف تحجز من شركة الطيران
- تحديد ميعاد السفر
- حجز فندق
- ما يجب اخذة معنا من الاوراق و الشهادات
- ما يجب اخذه من ملابس
- ما يجب اخذه من عفش البيت
- ما يجب اخذة من المتعلقات الشخصية
- الوصول الى مطار المغادرة
- ركوب الطائرة, داخل الطائرة
- الترانزيت
- الوصول الى مطار مونتريال
- التقديم على كارت الاقامة PR CARD
- استلام الشنط
- الذهاب الى الفندق
- البحث عن سكن دائم
- عفش البيت
- استخراج SIN CARD
- فتح حساب بنكى
- الحصول على كارت التامين الصحى OHIP
- التقديم على مدارس الاولاد
- عمل الـ CV على الطريقة الكندية
- البحث عن مراكزخدمة المهاجرين الجدد
- كورسات التعايش مع المجتمع الكيبكى و البحث عن وظيفة.
- Session توعية من الحكومة لمساعدة الكهاجرين الجدد فى إختيار المدينة الأنسب لهم للإستقرار
- البحث عن عمل تطوعى
- التفكير فى الدراسة
- التعرف على اماكن المساجد
- الشراء من السوبر ماركت
- اماكن اللحم الحلال
- الحصول على رخصة قيادة
- امتحان الرخصة
- شراء سيارة
- الحصول على خط تليفون ارضى
- الحصول على محمول
- تركيب الانترنت فى البيت
- شراء مستلزمات الكمبيوتر
- شراء الملابس
- شراء ادوات المطبخ
- الاشتراك فى المكتبة
- الاتصال بمصر
- التقديم على كورسات اللغة الفرنسية
- الحصول على خبرة كندية
- البحث عن عمل

أنا إن شاء الله همسك كل خطوة من دول و أفنطها واحدة واحدة..

أصلى بحب النظام و الترتيب

 

 

[أدهم الشرقاوى]

- الميديكال:

- شوية ملاحيظ مهمة:

- صلاحية جواب الميديكال شهر من تاريخ إرساله ليك سواء كان إيميل أو بريد عادى يعنى لازم تعمل الميديكال فى خلال شهر.
- ممكن تقعد سنة كحد أقصى بين الميديكال و إرسال الجوازات لطبع الفيزا.
- يقوم الطبيب بإرسال النتايج بالأرامكس (على حسابك) الى لندن في حالتنا و حسب المتبع تقوم الاداره الكنديه بطلب الباسبورات لوضع الفيزا عليها في خلال 10 الى 12 اسبوع.
- الـ DHLبيستلم الجوابات من السفاره يوم الاتنين من كل اسبوع.
- مع التنبيه علي ان ارسال جواز السفر يكون عن طريق البريد السريع الخاص مثل DHL or TNT or Aramex وفي اي يوم خميس من الساعة 8:30 الي الساعة 10:00 صباحا.
- إلي يفشل بالفحص بالغالب الي يعاني من أمراض التدرن / الصدر / بالدجة الأساس وأمراض الكبد الفايروسي الوبائي.
- بعد أما تعمل الميديكال بيومين تكلم الدكتور يطمنك ع النتيجة عشان تروح تدفع مصاريف اللاندنج.

- أشكال خطاب الميديكال:

- إيميل ينبهك بأن فى سيصلك جواب الميديكال.
- إيميل و ممكن يحوي اشياء:
- الابليكيشن بتاع طلب الاقامة الدائمة.
- الابليكيشن الخاص بالاقرار محدثين بالانشطة التي قمت بها خلال هذه التسعة اشهر.
- شهادة اتمام كورسات اللغة الفرنسية.
- جواز السفر ، ان لم اكن في حاجة اليه خلال الشهرين القادمين.
- و بعد تاريخ إستلام الإيميل دة بـ 5 أيام الـ DHL هيكلمك يا إما تيجى تستلم الجواب من عنده يا إما هو يبعتهولك على المكان اللى أنت فيه.
- مندوب الـ DHL بيدخل السفارة كل يوم الساعة 3 عصراً لإستلام عدد 100 طرد فقط يومياً.
- هتروح أنت تستلم الجواب من الفرع اللي في شارع رستم بجاردن سيتي.

شكل إيميل الميديكال:

اقتباس Dear Sir, This refers to your application for permanent residence in Canada. Please be informed that the medical examination forms have been issued for yourself and your family. They will be sent to your mailing address within the coming few days through DHL based on cash on delivery system; which means that you will have to pay the courier delivery charges directly to the DHL representative. Your DHL tracking number is: *********** ** A visa officer requires the following documents in order to continue processing your application: (X) You and your spouse are required to pay the Right of Permanent Residence Fee in the amount of $490 or (EGP 3020) each. This fee is refundable in the event that you decide not to proceed to Canada to be granted permanent residence. Please note the method of payment attached. The medical we have requested must be completed within 30 days of the date of this email. Subsection 16(1) of the Immigration and Refugee Protection Act, 2001 states that all questions pertaining to an immigration application must be answered truthfully and must provide relevant evidence and documents that the examining officer reasonably requires. Failure to provide the requested documentation within 30 days will result in the application being assessed on the basis of the documentation presently on file. Please be advised that, as the documentation requested in this email is relevant to the final assessment of the file, failure to provide it will likely result in the refusal of the application. Regards, Visa Section Canadian Embassy / Ambassade du Canada 6, Mohamed Fahmy El Sayed Street Garden City, Cairo, Egypt Fax: 202-2791-8864 E-mail: [email protected]

- الجواب:

- هيوصلك لحد البيت فى خلال يومين او تلاتة وهما هيتصلوا بيك قبل ماييجوا وخلى بالك اوعى تفتح الظرف اللى جوه لانه بيبقى خاص بالطبيب وهو الوحيد اللى ممكن يفتحه.
- هتلاقى جواه ورقة الكشف الطبي و متدبس فيها ظرف داخلي مغلق و لا يتم فتحه الا بمعرفة الطبيب.
- بعد الكشف الطبيب سوف يرسل نتائج الكشف و التحاليل الي مكتب لندن و الذي بدوره سيرسل النتيجة النهائية الي السفارة بالقاهرة .
- الطبيب غير مصرح له بذكر اي معلومات للمهاجر و ان لا يجب مراجعته في ذلك.
- إحتمال يأتى مع خطاب الكشف الطبي خطاب اخر لطلب دفع رسوم الاقامة الدائمة وتسليم الشيك البنكي و ثلاثة نسخ منه الي السفارة يوم الخميس من الساعة 10 الي 12 ظهرا.

- لإختيار دكتور لعمل الكشف الطبى:

- أسماء الاطباء المعتمدين من السفارة و عناوينهم و ارقام تليفوناتهم موجودة علي الموقع في القاهرة و الاسكندرية. https://www.cic.gc.ca/dmp-md/medicali...ntryName=Egypt
- صبرى غالى افضل وبيبعت النتايج بسرعة عن طريق الفيديكس كل خميس من كل اسبوع وبيوصل لندن بعد اربعة ايام ولكنه اغلى (710 جنية).

- تكاليف الكشف الطبي: 500 – 700 جنية للفرد على حسب الدكتور.

- خطوات الكشف الطبى:

- تحدد ميعاد معه بالتليفون.
- تجيب معاك جواز السفر و صورتين شخصيتين و خطاب السفارة المغلق.
- هيستقبلك السكرتير و هيفتح الجواب.
- الطبيب معاملته راقية.
- هل اصبت من قبل باي مشاكل في القلب او الصدر او الكلية او صبت بالسكر او فيروس الكبد ؟
- هل قمت باي عمليات جراحية من قبل ؟
- هل اتناول حاليا اي ادوية بصفة مستمرة ؟
- هل اعاني من مشاكل في الظهر او المفاصل ؟
- العمليات الجراحية التي أجريتومها أنت وجميع افراد عائلتك طوال حياتك ومتى؟
- أو هل نمت في مستشفى لأي سبب من الأسباب ؟ وفي أي مستشفى ؟ والمكان؟
- وأحياناً الطبيب يطلب منك وصفات الأطباء الي راجعتهم خلال السنوات الأخيرة أو أي تقارير طبية موجودة
- هل هذه اول مرة اقدم فيها للهجرة الي كندا ؟
- قياس الوزن والطول لكل فرد .
- يجري الفحص الطبي السريري.
- بعدها يجري الطبيب كشف ومعاينة للصدر والبطن والظهر
- كشف عادي بالسماعة وتم قياس ضغط الدم و الطول و الوزن.
- ومن ثم يجري فحص للأطراف بتحريكها الى الأعلى والأسفل والضغط عليها، و من ثم راح يقيس ضغط الدم .
- بعدها يتم فحص النظر بواسطة مختص في العيادة .
- قياس النظر علي اللوحة.
- وثم يجري التحاليل بواسطة مختبرات متخصصة
- سحب الدم للكبار / لأجراء فحص الدم / لمن أكثر من أثني عشر سنة.
- فحص ( البول ) للجميع حتى الأطفال والرضع.
- اشعة اكس علي الصدر وبرضه مع ظرف من الطبيب و بعد ان تم رؤية الجواز" شد نفس عميييق و اكتمه ثواني و خلاص".

- الميديكال للحامل:

- لو جالك الميديكال و كنتي في الشهر السادس او التامن ممكن تعملي الميديكال بس على مسؤوليتك الشخصية و تسافري على طول اول ما تجيلك الفيزا و ان شاء الله تولدي هناك.

- لو عايزة تولدي في مصر يبقى بتنتظري تولدي و بعدين بصورة جواز سفر المولود الجديد المنفصل اللي حتعمليهوله و اصل مترجم لشهادة ميلاده و شيك فلوس كيبيك 152 دولار تبعتي للمستشار بتاع الهجرة اللي قابلك و يبعتله سي اس كيو و تدفعيله برضه شيك فيدرال 150 دولار و يتضاف على ملفك الفيدرال و يطلعله فيزا زيكم و يسافر معاكم عادي.

- لو جالك و انت في السابع او التاسع ممكن الدكتور يعديها و مكن لأ لان الوقت ده خطر و ممكن تولدي فيه و حتى لو جاتلك الفيز ممكن الطيران ما يرضوش يحجزولك علشان حامل في وقت خطر و ربنا معاكي.
- طبعا الميديكال قبل المواعيد دي عادي ما فيش حاجة حتتصرفي طبيعي بس طبعا حسب راي الدكتور لانك بتعملي اشعة على الصدر و اكس راي فممكن يكون وحش للجنين و مممكن لأ فيه ناس عملت الاشعة و الحمد لله ما حصلش حاجة

- شهادة تطعيم الاطفال:
- يتم الذهاب لمكتب الصحة المقيد به الطفل بشهادة الميلاد كمبيوتر ودفتر لتطعيمات وتقوم الدكتورة المسئولة بنقل التطعيمات كلها خلف شهادة الميلاد ثم تقوم بختم الشهادة بختم النسر .يتم بعد ذلك ترجمة الشهادة فى اى مكتب ترجمة.


وخلص الكشف الطبي

 

 

[أدهم الشرقاوى]

حاجة مهمه جداً للعزاب اللى زى حالاتى و ناس كتيرة بتحصلها مشاكل بسبب تعارض معظم خطوات الهجرة مع الجواز و لما سألنا المتنبى الله يمسية بالخير, إدانا خلاصة الخلاصة فى الحكاية دى و قالنا ع الحل السحرى للجواز و الهجرة من غير أى مشاكل :

- الجواز و معاك الـ CSQ:
- ملفك هيتعطل.
- هتبعت كل ورق مراتك و شهادة لغتها.
- هيعملوا إعادة تقييم للملف على أساس إنك متجوز بدرجات جديدة ببروفايل المتزوج و لازم الدرجات تفتح الملف.
- مش هيسحبوا الـ CSQ منك.
- هيبعتوا الـ CSQ بتاعة مراتك
- فى أسوأ الظرف هيطلبوا مقابلتها.

- الجواز و مستنى الميديكال:
- إتجوز دلوقتي قبل الميديكال.
- ما تعملش الميديكال لغاية ما يجيلك الـCSQ بتاعة مراتك.
- هتقدم لمراتك لـ CSQ كأنك بتقدم من أول و جديد.
- هتقدملها فيدرال و تستنوا الميديكال بتاعكم أنتم الإتنين.
- جواب الميديكال بتاعك هييجى قبليها و صلاحيته شهر و أكيد هتنتهى قبل ما جواب الميديكال بتاعها ييجى.
- ما ينفعش تتجوز بعد الميديكال و قبل اللاندنج الفترة دي فترة ميتة.

- الجواز و معاك الفيزا:
- ماينفعش لأن الفيزا بتاعتك حتنتهي صلاحيتها بعد سنة الا يوم من تاريخ الميديكال.
- أنت مضطر تقدم لمراتك من مصر على CSQ و تخش سايكل فيدرال كاملة و تعملها ميديكال و تاخد فيزيتها و كل دة فى خلال سنة عشان تكون فيزتك لسة صالحة و طبعاً دة مستحيل.
- الفيزا بتاعتك هتبقى غير صالحة حتى لو المستحيل حصل لأنها فيزا سينجل و أنت راجل متجوز, بيقى هتطلب فيزا تانية بـ 490 دولار.
- هتعمل ميديكال من تانى معاها لأن صلاحية الميديكال هتكون خلصت.
- ماينفعش تروح تعمل لاندنج و تبعت تستقدم مراتك من هناك لأن تاريخ الجواز قبل إستصدار الـ PR و الفيزا سينجل.

- الجواز و معاك الـ PR:
- دة أحسن و أفضل نموذج للجواز مع الهجرة.
- لو اتجوزت بعد اللاندنج مراتك هتاخد CSQ من وزارة الهجرة من موريال و حتدخل بروسيس فيدرال و ميديكال كاملين زي بتاعتك بالظبط بس الدنيا هتبقى أسرع.

 

 

[أدهم الشرقاوى]

من إستلام الفيزا لحد هبوط الطيارة فى مطار مونتريال:

- السنان و النظر: تظبط كل أسنانك كويس لأنها برة التأمين و أطباء الأسنان غاليين جداً و كذلك النظر, تعمل نظارتين جداد غير نظارتك الأصلية.

- شراء تأمين صحى خاص: لتغطية أول 3 أشهر على الأقل.

- حجز السكن فى الفترة الأولى: قبل وصولك حاول أن تحجز في فندق في الـ downtown لمدة عشرة ايام على الأقل فهناك ستكون قريباً من جميع المكاتب لإستخراج كارت التأمين الصحي والـ SIN وكذلك ستكون قريباً من وسائل المواصلات الرئيسية.

- رخصة القيادة الدولية (زعم البعض إن مالهاش أى لازمة).

- الرخصة الدولية مفيدة فقط فى القيادة فى أول 60 يوم و ليست إثبات بأى شكل من الأشكال على خبرة القيادة.

- شهادة شهادة خبرة/ بيانات القيادة, مهمة لإستخاج الرخصة فى كيبك.

- ترجم الرخصة المصرية السارية المفعول و ممكن تسوق بيها أول 6 أشهر (180 يوم) من تاريخ دخولك كندا, ترجمها فى كندا فى مكتب معتمد من الـ SAAQ.

يتبع..

 

 

[rania]

توبيك رائع استاذ ادهم

ومجهود مميز من حضرتك كالعادة

بانتظار المزيد وبالتوفيق ان شاء الله

 

 

[أدهم الشرقاوى]

بالنسبة لشراء التأمين الصحى لأول 3 شهور https://www.useblue.com/en/assurance-...oumission.html

- رخصة القيادة الدولية:
- الرخصة الدولية مفيدة فقط فى القيادة فى أول 60 يوم و ليست إثبات بأى شكل من الأشكال على خبرة القيادة.

- من نقطة المرور:
- تذهب أولا إلى الإدارة العامة للمرور في رابعة العدوية (المبنى الأحمر) الدور الرابع ويتم استخراج إيصال (مجاني) يفيد بأنك تحمل رخصة قيادة مصرية وبأنه لامانع من استخراجك للرخصة الدولية و تذهب بهذا الإيصال إلى مقر النادي الدولي للسيارات.

- نادى السيارات (يفضل قبل الثانية عشر صباحا):
- صورة شخصية.
- صورة الرخصة.
- أصل الرخصة (يتم استردادها عند استلام الرخصة الدولية).
- صورة البطاقة.
- نموذج ابلكيشن خارجية (من كشك تصوير الورق الموجود فى المرور).
- تملا الأبلكيشن و تسلمها وتغادر ثم تعاود بعد ساعتين أو ثلاثة لاستلام الرخصة الدولية ويتكلف هذا مبلغ (100).
- إذا كنت في عجلة من أمرك يمكنك محادثة أحد الشبان الذين ينظمون وقوف السيارات في الباركنج المجاور ويبيعون الكروت الخاصة بالانتظار إذا يمكنهم تخليص الرخصة في ربع الساعة قابل مبلغ بسيط (10 أو 20 جنيها)
- تعتمدها من الخارجية
- ختم الخارجية مهم لية: في مركز drive test اللي بتقدم عليه للرخصة ما يهمهش الاختام دي ولا يعرفوا هي بتاعت ايه كل اللي عايزينه ترجمة من عند مترجم معتمد او ختم السفارة المصرية في كندا السفارة المصرية في كندا أكيد مش هتختم حاجه من غير ختم الخارجية والمترجم المعتمد مش عارف هيرضى يترجمها ولا لأ.
- عناوين نادى السيارات المصرى: رمسيس 10 ش قصر النيل وسط البلد
25743176 - 25743418 - 25743355 - 25768171 - 25791666