شفت الفيديو ... شوية ملاحظات بقى عشان محدش يضحك على حد :
1- الفيديو تجسيد واضح و صريح لنظرية (( شعب الله المختار )) اللى بيتبناها تيار اليمين المتطرف أو الاسلام السياسى أو الاسلاميين - زى ما تحب -
قبل 30 يونيو كان رهان التيار دا ان محدش هينزل و الشعب ((هيديكم على قفاكم )) ... بس الناس نزلت فعلا
لدرجة ان خالد عبد الله قبل ما يتقبض عليه قال نصا ان عدد الناس فى الشوارع اللى نازله ضد الاسلاميين اصابه بالاحباط !
قدام الحقيقة المرة دى كان للتيار دا حلتين نفسيتين للدفاع عن نفسه و تفسير الموقف
الأولى ان الحشود دى خيالية و مش موجودة على ارض الواقع و ان الصور و الفيديوهات اللى هما شايفينها
ماهى الا خدع سينمائية عملها خالد يوسف ... دا تكرار ممل و سمج لنظرية (( الفوتوشوب )) الى انتهجها نظام مبارك .. فمبارك و نظامه مقتلوش حد ...كل دا ...فوتوشوب .
يمكن الفيديو دا كان افضل رد على ....الاستعباط دا ... لكن الاسلاميين -بالتخصص - اعادوا نفس الاستعباط
الحيل التانية كانت ...الاعلام العاهر .. الاعلام هو اللى أثر فى الناس و خلاها تكره الاخوان و الاسلاميين .
ماهو مش معقولة حد يكرهنا .... احنا شعب الله المختار !!
احنا الانقياء ..الأطهار ...الأخيار ...لا يأتينا الباطل من بين يدينا و لا من خلفنا ...احنا اصحاب الدعوة الربانيين
المجاهديين !
و يمكن التوبك دا و الفيديو دا هو مثال واضح للحيلة النفسية التانية ...الاعلام العاهر !
وهنا فى كام سؤال ...اكيد بيضحدوا الاستعباط دا برده و التيار دا لا يملك رد عليهم
- هو الاعلام دا مش كان موجود أيام مبارك ...وكان بيتغنى بالضربة الجوية اللى فتحت باب الحرية ... وهاجم الثورة أشد هجوم فى بدايتها و حتى التنحى ... وقالوا كتناكى و متين دولار ... تشويها لأطهر شباب فى البلد ..وقالوا مأجورين و مؤامرة على البلد !
وسقط مبارك ...
-- طاب هو الاعلام دا مش كان موجود برده ايام مجلس طنطاوى و عنان و مع الاسلاميين كانوا بيشوهوا اى حركات احتجاجية ضد المجلس العسكرى و كانوا بيقولوا مخطط اسقاط مصر و لو سقط الملس العسكرى سقط الجيش .. و الجيش لم يطق رصاصة واحدة على مصرى واحد ..والجيش حمى الثورة ....
و منفعهمش كل دا و اضطروا يدوروا على خروج آمن و سلموا السلطة للاسلاميين !
اذن انت قدام شعب ...مانتاش قدام شوية عيال صغيرة حد هيضحك عليهم ويقولهم بصوا العصفورة ..!
شعب وثق فى الاسلاميين و اداهم السلطة لأنه كان معتقد انهم ناس بتوع ربنا و داقوا الظلم و الجور و البطش قبل كدا فأكيد مش هيكرروه ... شعب صدق انهم التيار الأقوى و الأكثر جاهزية فانتخبهم كل مرة على أمل !
اعلام مبارك قعد سنيييييين بيشوه فى الاسلاميين فى الاخوان تحديدا ..انا فاكر كان فى برنامج اسمه حالة حمار - حالة حوار - و كان بيقدمه حمار ملهوش سيرة الا الهجوم على الاخوان !
ومع ذلك الشعب دا انتخب الاسلاميين وادى الجماعة اغلبية برلمانية و اداها كرسى الرئاسة بعد كدا !
الاعلام دا لم ينقذ مبارك ...لم ينقذ طنطاوى و عنان ...لم ينجح فى تنصيب أحمد شفيق ...!
الاعلام دا لم يغير شىء فى ارادة المصريين !
الاعلام دا عمره ما ضحك على حد ولا نجح انه يلعب بعقول الناس .... !
دايما اختيارات الناس و فرضهم لقرار سياسى عكس ما يروج له الاعلام كان هو اللى بيحصل .
2-- خاطرة مهمة برده ... هو الاسلاميين مش كان عندهم اعلامهم برده !
كان عندهم قنواتهم و جرايدهم و لجانهم الالكترونية و شيوخهم ...فمش فاهم اشمعنى الناس صدقت الاعلام اللى ضد الاخوان و مصدقتش اعلام الاخوان ؟؟؟؟
و ناخد بالنا ان كل اللى بينقده الفيديو ... اعلام الاسلاميين عمله بالمللى ..
هما الليبرالين و العلمانيين بتوع دعارة و شذوذ فعلا ؟؟؟ لاء ...بس اعلام الاسلاميين مكنش بيقول غير كدا
هو البرادعى هو اللى ضيع العراق فعلا ؟.؟؟ لاء ...بس اعلام الاسلاميين مكنش بيقول غير كدا
هى الليبرالية يعنى امك متلبسش حجاب .؟؟ لاء ...بس اعلام الاسلاميين مكنش بيقول غير كدا
هى جبهة الانقاذ كانت اكبر خطر على مصرو على المشروع الاسلامى ؟؟؟ لاء ..بس اعلام الاسلاميين مكنش بيقول غير كدا !
نزع صفة الانسانية عن الخصوم السياسين حتى تبرر ما يرتكب فيهم من جرائم ...فدا عمله اعلام الاسلاميين باحتراف الحقيقة ...
- العيل من دول بياخد متين جنيه و وجبتين و شريط ترامادول !
- جبهة المولتوف !
- بتوع الدعارة و الشذوذ !
- كفار قولا واحدا ..لا اقول حداثى و ليبرالى و علمانى .... كفار !
- انكارييين و فوضويين !
- طلعنا ميت جنيه من مؤخرة معتصم فى الاتحادية !
- باسم سوستة ابن نادية الخمورجى . !
- حامضين اللى قال للمستثمرين الاجانب اوعوا تحطوا قرش واحد فى مصر !
- عمرو حمزاوى بتاع بسمة ! - مراته على فكرة على سنة الله و رسوله -
- البرداعى اللى بينته متجوزة مسيحى ( كافر ) !
** الاسلاميين فى حاجة لتقييم التجرية و الاعتراف بالأخطاء و تلافيها .... فكرة الاعلام العاهر هو السبب ...فكرة بتضرهم اكتر ما بتنفعهم ....
نظرية شعب الله المختار لا تصلح للسياسة و ستبقى الأسلاميين أسرى الوهم .
حذار ممن يعتقد أنه يدفع و يصد ...لكنه فى الواقع .... يثكل الجراح و يزيدها .
