الحمد لله و الصلاة و السلام علي رسول الله.
بعد لما تم قبول ملفي في مقاطعة نيوبرونزويك فكرت اعمل الموضوع ده علشان اتواصل مع كل اللي حضر المحاضرة سواء في مصر او الدول العربية علشان نساعد بعض في اي خطوات مستقبلية.
شوية معلومات عن المقاطعة:
المقاطعة هي الوحيدة تقريبا في العالم (بخلاف غانا) اللي بتتلاقي فيها اللغتنين الفرنسية و الانجليزية, حتي انهم بقي ليهم لغة خاصة بيهم خليط بين الاتنين.
فثلث المقاطعة بيتكلم فرنساوي و الثلثين الاخرين انجليزي.
من وجهة نظري ده ميزة لان ولادك بيتعلموا اللغتين غصب عنهم.
ميزة اخري هي انها مقاطعة ساحلية بتطل علي الاطلنطي و اللي زيي من اسكندرية بيقدر اوي البحر و علشان كده حختار مدينة (سانت جونز). و ميزة رابعة هي انها علي حدود امريكا و ده بيخلي امريكا اقرب للمقاطعة ديه من مونتريال و هاليفاكس!
جدول المحاضرات اللي نازل مكتوب فيه الاتي:...
الدوحة ..يومين
اسكندرية .. يومين
ابوظبي .. يومين
دبي .. اربع ايام
القاهرة ..3 ايام
و ده معناه حاجة واحدة بس و هي انهم عايزين مصريين!!
و لما دورت شوية في الموضوع ده لقيت ان اكبر راس هناك بتدرس ملفات الهجرة, مصري :)
ياريت كل اللي حضر او حيحضر في السيشن ديه يجمع معانا هنا علشان نساعد بعض في التقديم و المشورة.
خصوصا ان المقاطعة مش هب للعرب و تقريبا دول اقل عنصر موجود هناك!
بالتوفيق للجميع
