جبت لكم حاجة .. ربما .. يمكن حد يفهم نظامها ويستفيد منها
منح دراسات عليا في بريطانيا .. متوافرة على الموقع ده ..
www.chevening.org
بصراحة أنا دخلت الموقع لكن تايه فيه ومش فاهم حاجة خالص .. أنا واحد من الناس اللي لازم حد يساعده في فك طلاسم المواقع الأجنبية عموماً لأن معلوماتها سايحة على بعضها ودايماً غرقانة في التوهان
الموقع ده عرفته من خلال بوست في صفحة أنا مشترك فيها ع الفيسبوك ، وكان مكتوب فيه الكلام الآتي :
فرصة للسفر بريطانيا!
والدراسة في جامعة تختارها زي كامبريدج أو أوكسفورد مثلا.
منحة تشيفيننج لدراسة الماجستير.
س: إيه تشيفيننج؟
ج: برنامج منح بتقدمه الحكومة البريطانية وهو أقوى برنامج للسفر بريطانيا لدراسة الماجستير.
س: طيب إيه مميزاته؟
ج: في حالة قبولك للمنحة, الحكومة البريطانية بتتكفل بمصاريف الجامعة كاملة ومصاريف السفر وإجراءات الفيزا وبتديلك مصروف شهري حوالي ١٢٠٠ استرليني "١٥ ألف جنيه مصري" عشان تغطي بيهم مصاريف السكن والاكل والكتب... إلخ
س: إيه الشروط؟
ج: ١:تكون متخرج من جامعة وبتقدير جيد عالأقل.
٢: تجتاز اختبار اللغة الانجليزية وهشرح ازاي بالتفصيل في الآخر. بس الجميل إن معاك لغاية 15 يوليو 2015 عشان تجيب الدرجة المطلوبة في الامتحان.
٣:تكون اشتغلت سنتين والشغل ده مش شرط يكون رسمي بمقابل مادي ممكن يكون شغل تطوعي. "يعني خبرة سنتين حتى لو عمل تطوعي"
٤:تقدم على ٣ برامج للماجستير في بريطانيا ممكن في ٣ جامعات مختلفة وممكن يكونوا في جامعة واحد بس برامج مختلفة.
٥: متكونش سافرت على منحة لبريطانيا قبل كده ولا معاك جنسية بريطانية.
س: طب إيه التخصصات المطلوبة؟
ج: الواضح إنهم مش محددين تخصصات معينة يعني مفتوح لمعظم التخصصات بس كل سنة بيكون في تخصصات ليها الاولولية وده بيختلف حسب جنسية اللي بيقدم. البوست ده للمصريين عموما "لو حد مش مصري يقولي بلده وانا أعرفه المطلوب" التخصصات اللي ليها أولوية السنة دي بالنسبة للمصريين:
*اقتصاد وعلوم سياسية
*حقوق وشريعة وقانون.
*صحافة وإعلام.
*تجارة
أنا ذكرت الأربع كليات دي بس لان التخصصات اللي كاتبينها متوفرة في اللي بيتخرجوا من الكليات دي بس ده ميمنعش إن التخصصات والكليات التانية من حقهم التقديم.
س: طيب قولي أعمل إيه بالظبط خطوة بخطوة عشان أنا متلخبط؟
ج: أول حاجة تبدأ تقرأ عن الموضوع وتسجل عالموقع عشان تبدأ تملى استمارة التقديم.
طلب التقديم: https://www.chevening.org/apply/
اللينك اللي فات فيه كل ما يتعلق بعملية التقديم. ركز فيه.
تاني حاجة تبدأ تشوف الجامعات اللي نفسك تروحها وهل فيها برنامج ماجستير في التخصص بتاعك ولا لأ وتحدد ٣ جامعات عشان تجهز للتقديم فيهم.
تالت حاجة تبدأ تجهز لامتحان اللغة الإنجليزية وانت قدامك خيارين:
١: امتحان:Academic IELTS محتاج فيه ٦ ونص
٢: امتحان: TOEFL IBT محتاج فيه ٧٩
وللمنحة دي بالذات أنا برشح الاول. المنحة بتعترف بالاتنين عادي بس انت كده كده هتحتاج نتيجة الامتحان ده للتقديم للجامعات نفسها فيما بعد وبعض الجامعات هنا مش بتعترف إلا بالامتحان الاول: IELTS
هعمل بوست تفصيلي عن الامتحانين وهرفع الحاجات اللي عندي اللي ممكن تساعدكم في الإعداد ليهم إن شاء الله.
آخر ميعاد للتفديم: ١١ نوفمبر ٢٠١٤
#شير في الخير
#بريطانيا
#منحة
#ماجستير
#ابق معنا...
Ayman Yacoub
