[أحمد فاروق]

اقتباس المشاركة الأصلية كتبت بواسطة biopasha وصفت الدكتورة مؤمنة كامل الفائزة عن الحزب الوطنى بمقعد الفئات على كوتة المرأة فى محافظة 6 أكتوبر فى الجولة الأولى من انتخابات الشعب، القاضى وليد الشافعى، بأنه مجنون وكاذب ومختل عقليا وأهوج ...

طب بقية القضاة اللي سكتوا على التزوير في بقية دواير مصر صفاتهم ايه؟ حكماء ونبهاء وعقلاء أكيد.
ورئيس محكمة استئناف مجنون؟ ومختل عقليًا؟ يعني فيه كام حكم نهائي صدر بالباطل من قاضي مجنون؟!

اقتباس المشاركة الأصلية كتبت بواسطة biopasha وصفت الدكتورة مؤمنة كامل ... القاضى وليد الشافعى ... وأن كل ما قاله عن تسويد البطاقات الانتخابية وتزويرها لصالحها هى ونرمين بدراوى الفائزة بمقعد العمال عن نفس الدائرة، هو محض افتراء لا أساس له من الصحة.

يا مؤمنة ده شغل القاضي إنه يراقب الانتخابات. ولما قام بشغله لقى تزوير. ايه مصلحته في إنه يفتري عليكوا؟ طب افترضي يا مؤمنة إنه كان فيه تزوير فعلاً، المفروض القاضي يعمل ايه؟!

اقتباس المشاركة الأصلية كتبت بواسطة biopasha وأكدت مؤمنة كامل فى حوار مسجل مع «الشروق» إن القاضى وليد الشافعى ليس ضمن أعضاء اللجنة العامة المشرفة على الانتخابات بالبدرشين ...

أمال الراجل قام بالشغل ده بأي صفة؟ وكتب مذكرة لرئيس اللجنة العامة بأي صفة؟ وكتب مذكرة لرئيس اللجنة العليا بأي صفة؟ يبقى يتحاسب وليد الشافعي على الجريمة دي.

اقتباس المشاركة الأصلية كتبت بواسطة biopasha ... وأن اسمه لم يكن ضمن أسماء القضاة المبلغة للأمن باعتبارهم ضمن اعضاء اللجنة المشرفة على الانتخابات هناك، وإلا كان الأمن قد تعرف عليه سريعا ولا يمكن أن يرتكب تجاوزا فى حقه.

هيتعرفوا عليه إزاي لما يكون اسمه متبلغ ليهم؟ من تحقيق الشخصية أكيد. ماهو مابيقولش إنهم ماتعرفوش عليه. هو بيقول أنا عرفتهم بنفسي وعادي اتصرفوا معايا التصرفات المذكورة. فموضوع إن اسمه متبلغ ليهم أو لأ مالوش معنى خلاص لأنه عرّف نفسه لرئيس المباحث.

اقتباس المشاركة الأصلية كتبت بواسطة biopasha ... ولأن عماد المتناوى أمين الحزب الوطنى فى البدرشين، محام فهو يعرف هذا القاضى جيدا ولذا حينما رآه على باب اللجنة تعرف عليه وقدمه لرئيس المباحث أحمد مبروك وطلب منه أن يسمح له بالدخول.

أمين الحزب سمح للقاضي بالدخول؟ هو أمين الحزب الوطني هو اللي واقف على باب اللجان وبيسمح وبيمنع الناخبين؟! بأي صفة؟ هو ده شغله؟ طب وأمناء بقية الأحزاب ومندوبي المرشحين موقفهم ايه؟

وبعدين هو انتي كنتي هناك عشان تحكي؟ الراجل اللي كان هناك بيقول حصل كذه وكذه. انتي ماكنتيش هناك. وليه ماطلعش أمين الحزب اللي بتتكلمي عنه وقال الكلام ده طالما هو كان هناك؟

اقتباس المشاركة الأصلية كتبت بواسطة biopasha ... وأوضحت أن أمين الحزب الوطنى سمح للقاضى وليد الشافعى بدخول اللجنة باعتباره قاضيا وليس عضوا فى اللجنة المشرفة على الانتخابات، بينما الشافعى ليس من حقه دخول اللجنة

يبقى أمين الحزب ارتكب جريمة. فلو افترضنا إن أمين الحزب هو اللي بيسمح وبيمنع الناس من دخول اللجان، وسمح للشافعي بالدخول، مع إنه مش من حقه، يبقى ارتكب جريمة.

اقتباس المشاركة الأصلية كتبت بواسطة biopasha ... بينما الشافعى ليس من حقه دخول اللجنة والتفتيش عليها لأنه ليس ضمن اعضاء اللجنة العامة المشرفة على الانتخابات، وكونه قاضيا فهذا لا يعطيه الحق أن يفتش على اللجان الانتخابية، فليس أى طبيب من حقه أن يفتش على العيادات إلا إذا كان مسئولا حكوميا أو يحمل صفة تخول له ذلك.

يبقى القاضي الشافعي ارتكب جريمة وعلى حضرتك إبلاغ وزير العدل لاتخاذ الإجراءات القانونية ضد الشافعي.

اقتباس المشاركة الأصلية كتبت بواسطة biopasha وعن صلاحية أمين الحزب الوطنى فى منع أو السماح بدخول قضاة للجنة الانتخابية قالت مؤمنة كامل أمين الحزب الوطنى هو وكيل كل المرشحين عن الحزب هناك وهو العين التى يرون بها ما يجرى فى اللجنة والدائرة ككل.

بمنعه وسماحه للناس بالدخول تجاوز دوره كعين فقط، ده بقى عين وإيد ورجل.

اقتباس المشاركة الأصلية كتبت بواسطة biopasha وأشارت إلى أن الحزب الوطنى وضع إجراءات أمنية شديدة ... أمام اللجان لمنع التزوير الذى قد يحدث لصالح الإخوان وليس لمنع الناخبين من دخول اللجان

هو الحزب الوطني عنده جناح عسكري مثلاً بيستعمله في الإجراءات الأمنية؟ واللا كلامك ده معناه إن الحزب الوطني بيشغل الداخلية لحسابه؟ طب وبقية الأحزاب مالهاش حق في الداخلية برضه؟!

اقتباس المشاركة الأصلية كتبت بواسطة biopasha وقالت إن أمين الحزب الوطنى فى البدرشين باعتباره وكيلا عن كل مرشحى الحزب الوطنى بالمحافظة سمح للقاضى وليد بالدخول

تاني سمح له بالدخول؟ هو أمين الحزب يسمح له بأي صفة؟ طب ليه ماتقوليش أمين حزب الوفد مثلا سمح له؟ أو أمين حزب التجمع؟ اشمعنا أمين الحزب الوطني هو اللي يسمح أو يمنع؟
يا إخوانا كده التمثيلية هتبوظ منكم. حاولوا تفهموا الأدوار والسيناريو وتذاكروه كويس بقى.

اقتباس المشاركة الأصلية كتبت بواسطة biopasha ... والادعاء بأنه رأى سيدة تسود البطاقات لصالحى أنا والمرشحة الأخرى هو ادعاء باطل

اللي مهمته المراقبة بيقول كان فيه تزوير. هو طرف محايد وكلامه مصدق. هيفتري عليكوا ليه؟ لكن انتي طرف في المنافسة، يعني مش طرف محايد.

اقتباس المشاركة الأصلية كتبت بواسطة biopasha ... لأننى من الأساس لا اعرف أى مندوبة من المندوبين الخاصين بى فى اللجان،

ماهو انتي ماتعرفيش، بس أمين الحزب كان هناك وعارفهم. وعمومًا كونك تعرفي أو ماتعرفيش لا ينفي التزوير.

اقتباس المشاركة الأصلية كتبت بواسطة biopasha ... كما أننى أشرفت على لجان مرشحين للحزب الوطنى فى انتخابات سابقة ولم أزور أبدا لصالح أحدهم ومن ثم فمن غير المعقول أن أقوم بالتزوير لصالحى.

ايه المنطق الغريب ده.
- عدم تزويرك سابقًا لا يمنع تزويرك المرة دي. There is always first time
- أكيد تزويرك لنفسك أولى من تزويرك لغيرك. فبالعكس، من المعقول جدًا إنك تزوري المرة ده عشان لصالحك.

اقتباس المشاركة الأصلية كتبت بواسطة biopasha ... وشددت على أن ما قاله القاضى الشافعى أشبه بنكتة غير مقبولة ومضحكة «لأننى باعتبارى كنت أمين الحزب الوطنى بمحافظة 6 أكتوبر على مدى سنوات فالكبير والصغير يعرفنى ومن ثم لم أكن أخشى منافسة أى مرشحة وبالتالى فلم أكن أخاف من السقوط فى الانتخابات حتى ألجأ للتزوير، بل إن دائرة البدرشين لم اهتم بالدعاية لنفسى بها لأننى كنت أضمنها فى جيبى وليس هناك من ينافسنى بها بين الناس».

طب ده كلام مرشحة بتحترم أبناء دائرتها؟
- إنك كنتي أمينة الحزب في المحافظة والكبير والصغير عارفك مش معناه إنك تكسبي. ما احنا كلنا عارفين إبليس. تفتكري لو رشح نفسه هننتخبه؟
- لم تهتمي بالدعاية لإنك ضامنة الدايرة في جيبك؟ عيب عليكي الاستهزاء برغبة الناس اللي المفروض بتمثليهم.
- ضمانك للفوز ليس كافيًا لنفي التزوير. العبرة بالوقائع، واللي سجلها القاضي المسئول.

اقتباس المشاركة الأصلية كتبت بواسطة biopasha ... «فما فعله الشافعى لعبة سخيفة وغير محبوكة».

لعبة؟ هو ده احترام القضاء اللي بتتغنوا بيه ليل نهار؟ وهو هيلعب ليه؟ بينافسك في الانتخابات مثلاً؟!

اقتباس المشاركة الأصلية كتبت بواسطة biopasha وعن غرض الشافعى من الضجة التى أثارها قالت مؤمنة إنها لا تعلم أغراضه ...

يبقى تسكتي.

اقتباس المشاركة الأصلية كتبت بواسطة biopasha ...ولكن قد يكون يريد أن يساند تيار الإخوان أو تيارات إسلامية أخرى...

يبقى تبلغي وزير العدل بكده.

اقتباس المشاركة الأصلية كتبت بواسطة biopasha ... وأن الشافعى قال ذلك عليها وعلى نرمين بدراوى خصيصا لأنه يريد أن يضرب الحزب الوطنى فى الدائرة ...

هيضرب الحزب الوطني إزاي وهو الحزب الأكثر شعبية وحزب الأغلبية واللي كل الناس بتحبه وخد 96% من مقاعد مجلس الشعب؟ هو الشافعي مش برضه من الشعب اللي بيموت في الحزب الوطني وانتخب مرشحيه؟

اقتباس المشاركة الأصلية كتبت بواسطة biopasha ... ولكنه لم يستطع قول ذلك على مرشحى الحزب الوطنى الرجال فى الدائرة لأنه خاف منهما لأنهما شخصيتان كبيرتان ومن الآخر «كانوا هيدولوا فوق دماغه».

ما شاء الله. فعلاً كلام ست فاضلة ونائبة محترمة. مرشحين الحزب الوطني كانوا هيدوا القاضي فوق دماغه؟! ده احترام جامد أوي للقضاة ده. دانتي كده ارتكبتي في حقه أكتر من اللي هو بيقوله عن رئيس المباحث، واللي انتي نفسك بتنفي حدوثه.

اقتباس المشاركة الأصلية كتبت بواسطة biopasha وختمت بأن ما فعله الشافعى زوبعة لا تعنيها فى شىء ... ومن حقى أن أقاضى كل الصحف التى نشرت فى هذا الموضوع وشاركت فى الإساءة لى دون السماع لوجهة نظرى أو ردى على كل تلك الافتراءات التى شوهت صورتى رغم أننى أقوى مرشحة بالانتخابات البرلمانية فى 2010.

أمال لو تعنيكي في شيء كنتي عملتي ايه؟

اقتباس المشاركة الأصلية كتبت بواسطة biopasha وختمت بأن ما فعله الشافعى زوبعة لا تعنيها فى شىء ... ولكن ما قاله لا يسىء إلى فقط بل يسىء للمؤسسة التى أرأسها وهى مؤسسة قومية مصرية لها سمعتها ومن حقى أن أقاضى كل الصحف التى نشرت فى هذا الموضوع وشاركت فى الإساءة لى دون السماع لوجهة نظرى أو ردى على كل تلك الافتراءات التى شوهت صورتى رغم أننى أقوى مرشحة بالانتخابات البرلمانية فى 2010.

حددي موقفك. منين لا تعنيكي في شيء لأنها تسيء للمؤسسة، ومنين بتتكلمي عن تشويه صورتك؟
وعمومًا لو انتي فعلاً حريصة على المؤسسة، وشايفة إنها مرتبطة أوي بيكي (زي مصر مبارك كده)، وأي كلام يمسك يبقى بيمس المؤسسة ، يبقى استقيلي من المؤسسة طالما طالك كلام يمسّك، وبالتالي يمس المؤسسة، حتى لو انتي شايفاه مش صحيح. ضحي شوية بقى عشان المؤسسة اللي قلبك عليها.