[مصرية]

اقتباس المشاركة الأصلية كتبت بواسطة حشيش هل بعد الزواج بعدة سنوات لا زلت تقول كلمات حلوة لزوجتك كما كنت تفعل أثناء فترة الخطوبة؟ ... لى صديق (المصرى الوحيد الذى يعمل معى فى البنك) تشاجر مع زوجته لأنها عملت له (بيض عيون) بدلاً من (بيض أومليت) حسب ما طلب منها وبرغم تفاهة الموضوع فى ظاهره إلا أنه قد تطور إلى مشادة كلامية كانت على ما يبدو عنيفة وفتح صفحة خلافات قديمة كانت قد حدثت بينهما منذ سنوات ! ... المهم علشان ما اطولش على حضراتكم (قولوا طول) طلبت الزوجة أن تسافر إلى أهلها فى مصر وأنها لن تعود إليه مرةً أخرى ومن ناحيته قام بحجز تذكرة وشحنها على أول طيارة نازلة مصر!!! ... ولما تغيب عن العمل ليومين إتصلت به لأطمئن عليه فقال لى أنه (متضايق شوية) فقلت له أننى سأمر عليه بعد إنتهاء العمل وهناك علمت بالقصة وبأن زوجته وابنتيه قد سافروا إلى مصر بسبب هذا الموضوع التافه وأنه يفكر جدياً فى الطلاق! ... حاولت تقمص دور العاقل الحكيم وقلت له مخففاً من الأمر يا أخى بيض عيون ولا رموش ما كنت تطفح أى حاجة وخلاص! ... وأردفت قائلاً الست لما ... لما لما ... قصدى الست من دول بتكون هلكانه فى البيت ومع العيال وبردوا بيحبوا كل حين وحين (قول كل 3 -4 سنين) يسمعوا كلمة حلوة ... المهم حاولت قدر جهدى إقناعه بعدم إتخاذ أى قرارات عنترية وأن الأمر أتفه بكثير من أن يصل لذلك ولكنه قال أعلم أن الأمر بسيط لكن معظم النار من مستصغر الشرر (وش يوسف بك وهبى فى فيلم أيامنا السودة)

بص يا شيشو هو الموضوع اسمه "للرجال فقط" بس موجود في شؤون المرأة فأنا حرد بقى ورزقي على الله

هو قالك القصة كلها في كلمتين يا شيشو ... حسب كلامك إن الموضوع مش حكاية كلام حلو لكنه القشة التي قصمت ظهر البعير ... يعني هو شايل في نفسه وكاتم وهي كمان وما صدقوا سبب اتلككوا فيه علشان يتخانقوا خناقة زي دي ... أظن والله أعلم إنهم حيتصالحوا تاني بسرعة بس محتاجين فترة يبعدوا فيها عن بعض ويراجعوا نفسهم كويس وكل واحد فيهم يحس إنه فقد حاجة كبيرة أوي لما الطرف التاني بعد عنه