Arabic Discussion Forum with a Special Interest in Travel and Immigration

حرم ولاء · 13th March 2011, 07:52 AM

السلام عليكم ورحمة الله وبركاته الحمدلله والصلاة والسلام على رسول الله وعلى آله وصحبه أجمعين
اول حاجة ياريت تسامحونى عشان دى اول مرة افتح توبيك فى اى منتدى بس حبيت اشارككم تجربتى عشان ارد جميل كل الناس اللى كتبوا قبلى و افيد كل الناس اللى ممكن يتعرضوا لنفس الظروف
طبعا فيه بعض الناس قروا شوية مشاركات ليا و يعرفونى وفيه ناس لأ... فأنا هاقدم نفسى باختصار و بعدين اتكلم عن الولادة و احاول ارد على اى اسألة و سامحونى اذا غلطت او اتأخرت او كان فيه غلطات املائية.
انا اخصائية علاج طبيعى -1995 باشتغل فى السعودية و زوجى مدير تسويق لينا 11 سنة هنا عندنا 5 اطفال اخرهم اللى هاحكى عنها
اللاندينج كان فى يونيو 2009 نزلت فى مطار مونتريال بس باقى الاوراق عملتها فى بلد اسمها بيتربورو جنب تورنتو ( ساعة بالباص من سكاربورو) قعدت حوالى شهر و رجعت المهم ... نويت الاستقرار فى صيف 2011 عشان ال3 سنين بتوع الجنسية لكن حصل شىء مكانش فى الحسبان وهو الحمل ..
المشكلة انى كل مرة كنت باولد قيصرى و اخر ولدين كانوا ورا بعض ( فرق سنة واحدة) و الدكتورة قالت لى ان الرحم بتاعى مش هايستحمل حمل تانى بس قدر الله وما شاء فعل
طول الحمل كنت تعبانة جدا و خصوصا ان شغلى محتاج مجهود و بدأت الام الضهر من الشهر الخامس و بقيت ماشية بالمسكنات الشديدة( تايلينول4 مع كودايين) بس عشان اقدر انام بالليل و اروح الشغل .
المهم الدكاترة لما عرفوا انى ناوية اولد فى كندا حذرونى انى لازم اسافر قبل34 اسبوع عشان ضغط الطيارة و خايفين لو جالى طلق ممكن يحصل مضاعفات و حياتى هاتكون فى خطر.
معنى كدة انى هاسيب اولادى فى السعودية 4 اسابيع قبل الولادة و حوالى 5 اسابيع بعدها عشان اخلص اوراق البنت وده كان شىء صعب عليا.
طبعا هنا لازم اشكر كل الناس اللى عرفونى الاجراءات فى موضوع اسمه ( بخصوص الولادة فى كندا) لان ده ساعدنى كتير ووفر وقت جامد لدرجة ان الناس اللى عايشة هناك استغربوا انى خلصت بسرعة.
ودلوقت نبدأ رحلة الولادة على بركة الله
الاسبوع 37 فى نصفة : الدكاترة كلهم بيزعقوا لى انى لسة ما سافرتش .. يوم الاثنين 24 يناير الساعة 7 مساء اشعر بالم فى اسفل البطن .. اتصلت بزميلتى و دكتورتى فى نفس الوقت عشان الدوا ما عملش حاجة قالت لى جرى على المستشفى .. رحت الطوارىء طلعونى على غرفة الولادة. حطوا التخطيط ...... مفيش طلق بس لازم تقعدى معانا شوية .... جوزى فى مصر.. معايا بنتى الكبيرة.. الاولاد فى البيت مع الشغالة ... تانى يوم فيه مدرسة و الاولاد عندهم fun day و مشتركين ... كلمت الشغالة قلتلها بلاش مدرسة بكرة و انا ها ابيت فى المستشفى.. طبعا غرفة الولادة فيها بس سرير و كرسى .. البنت ما ينفعش تروح لوحدها مع السواق ... و اضطرت تنام على الكرسى...
الثلاثاء 25 يناير الدكتور الاستشارى يحضر صباحا.. حالتك مش مريحانى و لازم تدخلى اولدك دلوقت.. ازاى يا دكتور انا لسة فى التامن و فاضل عشرة ايام بحالهم . البيبى لسة صغيرة... ولو.. انتى فى خطر والبيبى تدخل الحضانة مش مشكلة ... طيب يا دكتور انا التأمين بتاعى مش يغطى الولادة ولا البيبى و بالتالى مين ها ياخدها يدور لها على حضانة ( هنا لما زوجك يكون بيشتغل فى السعودية يبقى عقدك سينجل الا اذا كنتى خواجاية) ...مش مهم دلوقت المهم تجهزى عشان الولادة...
فاصل و نواصل

حسام · 13th March 2011, 08:56 AM

يااااااااااااااااااااااااااااااااااااه
كان الله فى عون حضرتك
وحمدالله ع السلامة

حرم ولاء · 13th March 2011, 10:56 AM

شكرا يا استاذ حسام والله يسلمك
اسفة على الانقطاع ونواصل من تانى
طبعا انا رفضت اولد فى الوقت ده لان البنت اكيد ها تنزل تعبانة وقولت زى ما تيجى ... ولما الدكتور لقانى مصممة قال خلاص ها اخليكى معانا كمان يوم ولو الألم ذاد يبقى لازم نفتح ...
الاربعاء 26 يناير سيول فى جدة ..الحمد لله الاولاد فى البيت .. مفيش الم .. الدكتور كتب لى خروج و روحت البيت على خير
السبت 29 يناير ميعاد رجوع زوجى من مصر ... جدة غرقانة فى السيول و مصر غرقانة فى المظاهرات وانا على وش ولادة ... الدكتور زعلان و كتب التقريلر وهو متضايق ... زوجى وصل المطار الساعة5 و الطيارة 7.5 ............مفاجأة ........الطيارة مشيت ...... ملأوها سعوديين و نقلتهم على السعودية...طب الحل؟ ... استنى الطيارة اللى بعدها و الاولوية للسعوديين...... المهم ركب طيارة على الرياض و من الرياض لجدة وصل الساعة 7 صباحا
غيرت الحجز من الاتنين مساءا للاربعاء مساءا و الحمد لله اننا لقينا مكان
3 ايام متتالية مشاوير لزوم السفر و طلبات البيت لمدة شهر تقريبا
الاربعاء ليلا الاقلاع من جدة الى تورنتو
الخميس 3 فبراير الوصول مطار تورنتو6.5 مساءا .. تاكسى و على بيتر بورو وصلنل الساعة 9 مساءا
الجمعة 4 فبراير معزومين على العشاء عند اسرة مصرية بمناسبة استقرارهم وشراء منزل جديد .. قابلنا مجموعة جميلة من العرب المهاجرين من زمان والكل منشغل بالحديث عن الثورة وانا مش على بعضى قايمة قاعدة والستات قالولى شكلك بتولدى دلوقت قلتلهم لأ اتعشوا كويس و اصحوا بكرة براحتكم عشان بكرة ويك اند.
السبت 5 فبراير صحيت الفجر صليت وانا قاعدة على السرير و خلاص مش قادرة اتحرك ولا ارفع رجلى و جوزى بيتفرج على التليفزيون لمتابعة الاحداث فى مصر .. قلت استحمل شوية لحد الساعة 10.5 حسيت احسن لبست ونزلت عند زوجى قاللى مالك قلت تعبانة شوية .. قاللى طبعا من مجهود السفر ..طنط قالتلى اعملك ساندوتش .. اونكل قاللى اطلب 911؟ رديت ياريت 911 وبلاش الساندوتش عشان غالبا هاخد بنج
زوجى قال بنج ليه؟ قولت عشان شكلى باولد
طبعا زوجى اتخض وجرى عشان يلبس ( كل مرة الولادة بتبقى مترتبة و بميعاد اول مرة يتفاجىء) و بعد 4 دقايق بالضبط نلاقى الاسعاف داخلين بالنقاة و زوجى لسة حتى ما كملش لبس حتى انا استغربت اول مرة اشوف اسعاف يجيي فى اربع دقايق مع العلم ان البيت برة المدينة.
طبعا من الاسعاف على غرفة الولادة ... التخطيط اظهر و جود انقباضات.. سألونى عندك دكتور.. لأ...عندك طبيب عائلة..لأ...طيب يللا على العمليات... دخل دكتور صغير فى السن ..قلت بس ها يتعلموا فيا...عرفنى بنفسة. انا الدكتور هارينجتون..اهلا وسهلا...تحبى بنج نصفى . ياريت .... دكتور التخدير يبدأ ( من اصل هندى) يحاول يحط كانيولا ( الممرضات ماعرفوش عشان الاوردة عندى ضعيفة ) بدأ يجرب بس الكويس انه كان بيدينى بنج موضعى الاول

فاصل و نواصل

أكسيلانس · 13th March 2011, 11:12 AM

الف حمد لله علي السلامه يا أم ولاء

ربنا يطمنا عليكم جميعا

متابعين

alfotouh · 13th March 2011, 11:19 AM

ألف حمد لله على السلامه و مبروك لكم المولوده

نسيم الحرية · 13th March 2011, 11:43 AM

مبروك وحمدا على السلامة وربنا يبارك فيه

المتنبي · 13th March 2011, 12:54 PM

ألف مبروك ربنا يبارك لك فيها
حمدالله على السلامة
متابعين
و طمنينا عليكي

حرم ولاء · 13th March 2011, 01:00 PM

ميرس اكسلانسو فتوح و نسيم الحرية
معلش على التقطيع بس اصل انا نزلت الشغل من امبارح و باكتب بين الحالات
المهم بدأت العملية و صدق المثل اللى تخاف منه ما يجيش احسن منه ..الدكتور فعلا ممتاز و رغم انها خامس قيصرية و متوقع صعوبات كتير الا ان الدكتور كان ممتاز و خلص العملية بسرعة بس البيبى كانت تعبانة و ما سمعتش صوتها اول ما اتولدت و على طول استلمتها طبيبة الاطفال ست كبيرة فى السن و ملامحها شرقية ( طلعت ايرانية ) فاصل و نواصل

OmarDent · 13th March 2011, 02:13 PM

ألف حمدا لله علي سلامة حضرتك
أهم حاجة ان حضرتك بتكتبي بين الحالات معناها انه كل تم بخير ان شاء الله

منتظرين باقي القصة

مسلمة معاصرة · 13th March 2011, 02:26 PM

الف حمد لله والشكر على سلامتك والمولوده انشاء الله تكون كويسه انا بجد عينى دمعت وانا بقرا كلامك بس انتى ست جدعه انا حاسه انى فخوره بيكى مع انى معرفكيش (هى دى مصر ) بس خلى بالك على نفسك اكتر ومستنيه اسمع تكملة الحكايه

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

Latest Threads By This Member
Thread	Forum	Last Poster	Replies	Views	Last Post
قانون جديد تم تقديمة بخصوص المعونات الحكومية	الهجرة إلى كندا	shawi	7	1402	24th September 2014 12:31 AM
رحلة الولادة القيصرية فى الاراضى الكندية	الهجرة إلى كندا	shawi	56	19415	13th March 2011 07:52 AM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الولادة القيصرية بالصور .. نصيحة بجد .. اللى عايزة تخلف متدخلش	النجم الثاقب	منقوووووووووووولات	22	8th September 2009 12:03 AM
طائرات اجنبية دمرت شحنة اسلحة داخل الاراضي السودانية	Ghost	فلسطين أرض الرباط	13	4th April 2009 08:27 PM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

الهجرة إلى كندا

رحلة الولادة القيصرية فى الاراضى الكندية