حكاية مهاجر (يومياتي في الطريق الى الهجرة)

[Osamaa]

الصحف المصرية والعربية

الف مبروك على الموضوع الجديد

تسجيل متابعة

انا لي 10 سنين بقدم هجرة امريكا وكل سنة بخ ..نو سيليكتد

لكن انشاء رب العالمين حندخلها من كندا ... حتى ولو فسحة ... لي اصدقاء عايشين في نيويورك

 

 

[tiopf]

مبروك على المغارة وتسجيل متابعة

 

 

[hanydlt]

دعوه لموضوعي

المشوار الى امريكا

السلام عليكم ورحمة الله وبركاته
ربنا يوفقك فى حياتك الجديده وياريت متتاخرش فى اليوميات

 

 

[ايهاب المصرى]

اقتباس المشاركة الأصلية كتبت بواسطة Osamaa الف مبروك على الموضوع الجديد تسجيل متابعة انا لي 10 سنين بقدم هجرة امريكا وكل سنة بخ ..نو سيليكتد لكن انشاء رب العالمين حندخلها من كندا ... حتى ولو فسحة ... لي اصدقاء عايشين في نيويورك

 

 

[ايهاب المصرى]

انا بقالى 3سنين بقدم امريكا والرد يجيلى مفيش ويجعله عامر تحياتى للجميع

 

 

[CanadaCloser]

اقتباس المشاركة الأصلية كتبت بواسطة max تسجيل متابعه .... سبحان الله انت شوفت النتيجه بعدها باكتر من شهرين ... عملت ايه و انت كنت لسه خاطب ؟؟؟ ينفع تعدل الحاله في الاوراق ال متزوج؟

طبعا ينفع وحقولك حصل معايا ايه في الحلقة الجاية ان شاء الله

 

 

[CanadaCloser]

اقتباس المشاركة الأصلية كتبت بواسطة Ali Mokhtar عمر باشا مبرووووووك الموضوع الجديد.....اكيد تجربتك هتفيدنا كلنا وشكرا لانك استجبت لطلبنا بفتح الموضوع بالتوفيق دائما .....ومنتظرين الحكاية فى الصفوف الامامية

حبيبي علي باشا، واهلا بالجميع انا عارف اني برغي كتير لكن اذا حسيتو ان رغيي بدون فايدة ممكن تقولولي وانا حخفف شويه

 

 

[CanadaCloser]

اقتباس المشاركة الأصلية كتبت بواسطة hanydlt السلام عليكم ورحمة الله وبركاته ربنا يوفقك فى حياتك الجديده وياريت متتاخرش فى اليوميات

هاني باشا لك وحشة زمان ما دخلتش المنتدى، طبعا في اسئلة كتير بتسألها لنفسك ان قدر ربنا واتقابلنا ححكيها لك

 

 

[CanadaCloser]

طبعا انا بشكر كل الناس اللي دخلت الموضوع واثروه بتعليقاتهم اللي رفعت معنوياتي شوية وادوني دفعة معنوية كبيرة اني اكمل واكتب الحلقة التانية اليوم. صلو على النبي.
المهم يا رجاله بعد ما عرفت انهم اختاروني كان فيه رابط بفتحلك صفحة على موقع الفيزا الخاص بالحكومة الامريكية وفيها كل التعليمات اللي ممكن تعرفها مبدأيا عن الورق المطلوب تعبيه وترسله في الرابط ده: https://travel.state.gov/content/visa...plication.html
في حالتي انا كانت بتواجهني مشكلتين، المشكلة الأولى كانت انه الوقت قليل جدا لحد 30 سبتمبر وبعد التاريخ ده بتلتغي معاملتي تماما واحنا انهارده 13/7/2012 يعني ما فيش يا دوبك، والمشكلة التانية اني كنت خطبت ولما قدمت كانت حالتي اعزب، المهم استعنا على الشقة بالله وقررت اعبي الطلب بنفسي بعد ما قرأت التعليمات ولاحظت ان المطلوب يتعبو طلبين، الاول رقمه DS-230 وده بيتعبى للفائز باللوتري والتابعين له من زوجة او اب او ام او ابناء تحت 21 سنة، والتاني رقمه DSP-122 وده بيتعبى بس للفائز باللوتري، طبعا المشكلة اني خاطب مش متجوز بس كنت كاتب كتابي وده اللي ممكن اقوله للسفارة وقت الانترفيو عشان خطيبتي تاخد القرين كارد معايا.
وللاسف لاني ما كانش عندي خبرة في تعبئة الورق او انا كنت خايف اوي ومرتبك جدا فما عرفتش اعبي الورق، اخد مني تعبئة الورق تقريبا اسبوع بعد ما استشرت 30 واحد انه الورق مظبوط (اذا حابين تعرفوا تفاصيل اكتر عن الطلبين وازاي تعبوهم ممكن احطهم في رد منفصل على الموضوع ده)، وفضل عندي مشكلة واحدة بس في الطلب (DS-230) اللي هو عنوانك في امريكا وبعد ما بحثت في النقطة دي عرفت انه هو ده العنوان اللي بيترسل عليه القرين كارد ورقم السوشيال سيكيوريتي بتاعي، وبعد البحث افتكرت واحد من اصحابي كان فلسطيني ومعاه بسبور امريكي وبيشتغل في السعودية ومراته واولاده في امريكا واتصلت فيه الله يكرمه وقرر يعطيني عنوان بيته في امريكا عشان توصل عليه القرين كارد، واخيرا خلص الورق وارسلته بالفيديكس على ولاية كنتاكي والعنوان كان موجود في الرابط اللي فتحته اول مرة، الورق كان بيشمل الطلب (DS-230) لي انا وخطيبتي وطلب (DSP-122) لي انا وصورة من رسالة الفوز وعلى الظرف من بره طبعت الباركود اللي كان في رسالة الفوز ورقم "Confirmation" زيادة في التأكيد. وفضلت كل يوم اشيك على موقع الفيديكس اشوف وصلت فين، في الحقيقة الطرد بتاعي لف العالم من الرياض لدبي لباريس وبعدين لندن وبعدين نيويورك وبعدها كنتاكي ووصل تقريبا بعد 3 ايام وفضلت استنى طبعا هما قالولي ان الرد حيكون من خلال الايميل عن أي تحديثات جديدة بخصوص طلبك، وفي تاريخ 9/8/ 2012 كان بوافق 21 رمضان وصلني ايميل بيقولي شيك على التحديث على طلبك ودة طبعا من خلال موقع اللوتري وبنفس Confirmation وشيكت على الموقع ولقيت انه المقابلة بتاعتي انا وخطيبتي يوم 4/9/2012 وفي رابط تاني ده للتحضير للمقابلة، يعني انا كدة ما معيش وقت الا 25 يوم عشان احضر الورق كله على ده الرابط: https://travel.state.gov/content/visa...interview.html
الورق كان ينحصر في التالي:
جوازات السفر
الشهادات الدراسية (انا جبت شهادة الجامعة باللغة العربية والانجليزية)
شهادة الميلاد الاصلية نسخة مترجمة بالانجليزي من مترجم معتمد
شهادة الزواج الاصلية ونسخة مترجمة بالانجليزي من مترجم معتمد
الكشف الطبي لي انا وخطيبتي، وده على فكرة مش متوفر في كل المستشفيات بس مستشفى اسمه عبيد (المقيمين في الرياض يعرفوه اكيد) ومستشفى تاني هما دول المعتمدين من السفارة الامريكية ولازم تطبع رسالة الفوز باللوتري وتاخدها معاك والا مش حيعملولك الكشف.
وشهادة الادلة الجنائية من السعودية او من أي بلد سكنت فيه اكتر من 6 شهور
واجهتني اكتر من مشكلة في الورق المطلوب اول مشكلة واجهتني انه في الكشف الطبي في لقاح لازم ياخده كل اللي ناوي يروح امريكا صراحة انا ما عرفش هو بتاع ايه وما اهتميتش اعرف انا قالولي في لقاح اديتهم دراعي وهما عملو كل حاجة، المشكلة فين بقا انه اللقاح اللي في مستشفى عبيد ما يكفيش غير شخض واحد، طبع ما فيش وقت ليوم المقابلة من جهة ومن جهة تانية نتيجة الكشف عايزالها من 3 ايام لاسبوع عشان تظهر، واخدت اللقاح انا وفضلت خطيبتي وبدات رحلة البحث عن اللقاح ولا مستشفى في الرياض فيه اللقاح ده وكنا قربنا على العيد خلاص وقررت اتوكل على الله واستنى لبعد العيد جايز يكون وصل اللقاح بعد العيد باسبوع رجعت لمستشفى عبيد وقالولي لسا ما وصلش اللقاح، وبدأت الف من جديد ولفيت كل المستشفيات تاني مش موجود اللقاح، وسبحان الله وانا مروح وفاقد الامل وفي طريق عودتي الى البيت بضرب بعيني كدا لقيت مستشفى انا كنت ناسيه من الاول (مستشفى الحمادي للي يعرفه من اهل الرياض) وقررت اسأل فيه، وهبااا قاللي ايوا موجود (واخيرا) حسيت نفسي ساعتها كأني ميسي وجبت قووول وكنت عايز اجري في المستشفى واوزع بوسات على الجمهور بس مسكت نفسي، المهم خدت اللقاح وطيران على خطيبتي وطلعنا المستشفى واخيرا ارتحت.
المشكلة التانية هي شهادة الأدلة الجنائية (الفيش والتشبيه) من مصر بحكم اني درست فيها وقعدت اكتر من ست شهور وهنا قرأت في موقع اللوتري ازاي بتطلع وفهمت انها من السفارة بتروح عندهم وبيبصموك ويطلعوها في وقت اقصاها اسبوعين، قلت قشطة وروحت على السفارة وفعلا اداني ورقة الفيش وبصمني ووقع عليها باسمه اني انا اللي بصمت بنفسي وختم عليها بختم السفارة وهنا قاللي خلاص ابعتها لواحد من اصحابك في مصر ويروح قسم العباسية ويختمها لك من هناك انا قلت له هو مش المفروض انو انتو اللي تبعتوها قاللي لا عادي أي حد هناك يخلصها لك، وفعلا ارسلتها لصاحبي وراح العباسيه وهناك قاله الموظف انت بتستهبل ايه اللي عرفني انه عمر هو اللي مبصم مش ممكن يكون حد تاني مكانه قاله ازاي ده موظف السفارة مصادق على البصمات قاله شايف الباب اللي دخلت منه اطلع منه ومش عايز اشوف وشك تاني الا وعمر معاك، هنا لما قالي صاحبي الكلام ده انا انهرت لانه خلاص ما فضلش الا 3 او 4 ايام على المقابلة، وبدأت افكر اعمل ايه قلت اروح يوم وارجع بسرعة قلت لا اروح السفارة جايز يحلولي المشكلة وقررت اروح السفارة، ورجعت لنفس الموظف وقلت له انت مش فاكرني انا بتاع الفيش والتشبيه، قاللي طبعا مش فاكرك انا بشوف الف واحد في اليوم حفتكر مين ولا مين، قلت له ماشي وحكيت له القصة قاللي انت بتستعبط لازم انت تروح بنفسك!!! نعم حضرتك بتقول ايه مش انت اللي قلتلي ابعتها لواحد من اصحابك قاللي مستحيل في العباسية مش حيمشوها الا لما تروح بنفسك وقررت اكلم قنصل في السفارة لانه الاخ ما كانش بتفاهم بالمرة، وبعد ما قابلت القنصل قاللي انا ممكن اساعدك وارسلها بحقيبة دبلوماسية تتختم وترجع ايه رايك، قلت يا ما انت كريم يا رب وحتاخد قد ايه قاللي شهرين ، (قلت له حمرا) قلت له لا ما ينفعش طبعا لان الوقت حيكون خلص وللاسف ما قدرش يساعدني. الفيش السعودي كان سهل جدا بتروح على قسم الادلة الجنائية في منطقة اسمها الديرة وهناك بيبصموك وبعد يومين بتستلمها من نفس المكان.
وجه يوم المقابلة وانا ما معيش الفيش المصري وقررت اغامر وصليت استخارة وقلت لو فيها خير حتمشي، واول ما دخلت انا وخطيبتي قابلنا اخ كان عربي (سوداني تحديدا) وخد مني الورق كله واتاكد انه كله موجود وبعدين قاللي ابصم على الالة دي وبعدين قاللي انت عارف انه في ورق ناقص قلت اله زي ايه (انا قلت حيقول ورقة الفيش المصري) قاللي كشف حساب!!، انا قلت بس كشف الحساب ما كنش ضمن الورق المطلوب ولا كنت جبته، قاللي كم معاك في البنك وانا حوثق في كلامك قلته اله معايا كذا (بكل صدق والله) قاللي خلاص استنى شوية لموعد المقابلة (قلت في نفسي امال انت بتعمل ايه)، استنيت لموعد المقابلة ودخلت المقابلة وكانت موظفة صغيرة في العمر وكانت بشوشة صراحة وقمة في الذوق، قالتلي السلام عليكم بالعربي قلت الها عليكم السلام وبعدين قالتلي ارفع ايدك اليمين وهل تقسم على ان كل المعلومات صحيحة (قلت وحيات ربنا صحيحة بس اعطوني الفيزا) سالتني انا وخطيبتي كم سؤال يمكن كانو تحصيل حاصل السؤال المهم واللي ركزت عليه كان انت كنت اعزب في الطلب لما قدمته ودلوقتي متجوز احكيلنا ازاي اتعرفتو علي بعض وبعدين اخدت خطيبتي على جنب وسألتها اتجوزتو امتى وبعدين رجعتلي وسالتني نفس السؤال المهم طلعت اجابتنا زي بعض وقلت لها ان تاريخ الموجود في شهادة الزواج كان قبل ما اعرف اني فزت باللوتري اساسا، ووقفت في الاخر وقالتي نفس كلام الاخ السوداني، قالتي انت عندك ورق ناقص كشف الحساب وورقة الفيش المصري، بالنسبة لكشف الحساب انا مش عايزاه انا عايزه ضامن امريكي يضمن انك مش حتكون عالة على حكومة الولايات المتحدة الامريكية ويتكفل فيك وقت الحاجة، ولازم تجيب ورقة الفيش المصري وقالتلي معاك لحد يوم 30/9 اخر موعد والا حيلتغي طلبك.
خرجت من السفارة وانا يائس بصراحة وفكرت ازاي ححل المشكلتين دول، وبدأت انظم تفكيري وقلت احلها واحدة واحدة، قلت موضوع الضامن هو اللي اصعب لاني معرفش حد في امريكا، وبعد محاولات افتكرت صاحبي الفلسطيني الامريكي وطلعت له طيران وصراحة هو قاللي انا ما اقدرش افرض حاجة على مراتي ، لو عايزه تساعدك تساعدك بكيفها، المهم كلمناها في وقتها وقالها صاحبي محتاج تضمنيه هي بصراحة رفضت لانها مسؤولية لكن صاحبي قاللها انا اعرفه واضمنه برقبتي وبعد محاولات وافقت وبدأ الامل يرجع تاني، طبعا ورقة الضامن هي عبارة عن Form ورقمه I-134 واسمه " Affidavit of Support" ولازم بتوقع من البنك ويتختم من عمدة المدينة اللي عايش فيها الضامن وفعلا ختمته وارسلته بالفيديكس وبعد 3 ايام وصل والحمد لله، وفضل بس الفيش و طلع خالي بعرف ناس في الحكومة صراحة (وبشوية واسطة ) اتختمت الورقة من هناك وارسلوها ليا (بعد ما لهف الموظف 3000 جنيه طبعا ) وارسله ليا بالبريد، ومجرد ما وصل الفيش ووصلت ورقة الضامن بسرعة ارسلتها بالفيديكس على السفارة وكان تقريبا التاريخ 20 او 21 من شهر سبتمبر، بعدها بيومين اتصل بيا رقم غريب ورديت عليه، وعرف بنفسة انه من السفارة الامريكية وقاللي سوري ورقك ناقص!!!!! لا مستحيل مش مرة تانية قلت اله ايه الورق الناقص قاللي ورق الضرايب للضامن لسنة 2011 وسنة 2012 قلت له ليه ما قلتوش من الاول (يا ولاد .....) قاللي لا احنا قلنا لك وانت نسيت او ماركزتش في الكلام وطلعت يومها من الشغل طيران على صاحبي، والله انه طلع راجل وخد اذن وطلعنا البيت واتصل على مراته وقال لها ارسليلي ورق الضرايب بتاعك دلوقتي اعمليها سكان وارسليها على ايميلي بسرعة وفعلا بعد نص ساعة تقريبا ارسلته وطبعته ورحت طيران على الفيديكس (طبعا مش أي فيديكس بس فرع حي السفارات هو اللي بيرسل للسفارة الامريكية) وارسلته وبتاريخ 11/10/2012 كان يوم خميس وصلنتي رسالة من فيديكس انه ليك ارسالية عندنا تعال استلمها ورحت وفتحت الظرف وفتحت الجواز ولقيت عليه الفيزا ومدتها 6 شهور بس وعندها بس ارتحت ونمت يومها نوم عميق جدا.
الحلقة الجاية ححكيلكو ازاي سافرت وايه انطباعي اول مرة لما شفت امريكا وكيف الحياة هناك,,, دمتم بخير

 

 

[AhmedBadawi]

دعوه لموضوعي

مجموعة مطاريد لاندنج 2015

واضح أنه هيبقى موضوع مميز. أنا جبت الشاي وقاعد