ذكريات لحظة التنحي

[شينكاوي]

الصحف المصرية والعربية

"إن يمسسكم قرح فقد مس القوم قرح مثله وتلك الأيام نداولها بين الناس وليعلم الله الذين آمنوا ويتخذ منكم شهداء والله لا يحب الظالمين " صدقت ربنا
لحظة تنحي الطاغية كانت من اجمل بل هي اجمل لحظة في حياتي , لحظة التنحي كنت راكب عربية مع اتنين من الاخوة وكنا رايحين نشتري لاب توب -الله يرحمه- وكنا مهمومين ومغمومين وحالتنا النفسية سيئة فالاخبار والشواهد كانت بتقول ان المخلوع ماسك في الكرسي بإيديه وسنانه
المهم واحنا في العربية كنا مشغلين اذاعة البي بي سي وكنا مشغولين بالكلام ومحدش مركز مع الاذاعة
وإذ فجأة يقطع بث البرنامج ليأتينا صوت عدو نفسه عمر سليمان بالخبر المنتظر مش فاكر اللي لحقناه من بيان التنحي لكن بكل وضوح وصلتنا المعلومة
في اللحظة دي انا اللي كنت سايق مش عارف ايه اللي حصل هل دخلنا عكس السير هل وقفنا في نص الشارع للحظات وكنا علي طريق رئيسي سريع
كل اللي انا فاكره بعدها بكم ثانية كملنا مع التكبير و النشيد القومي ارحل يعني امشي يا اللي مبتفهمش
خلال كم دقيقة وصلنا الباركنج بتاع المجمع واول حاجة عملناها كانت سجدة لله علي الارض - الحمد لله الباركنج كان فاضي- مش قادر اوصف سعادتي
زوجتي بتكلمني في التليفون وهي بالبيت مع كلامها حسيت اني تنسمت نسمات الحرية وان كان بيني وبينها الاف الاف الاميال
تذكرت اخواني ممكن كانوا في سجون الطاغية وأفضوا الي ربهم وهم ينتظرون الخلاص
تذكرت اخواني ممن ضيق عليهم واوذوا وطردوا خارج مصر
تذكرت ايام التضييق والخوف علي الاهل والاصدقاء
تذكرت الغمز واللمز والتخويف من رفقتنا
تذكرت اياما كان الذي يصلي في المسجد يقال له يا شيخ

تذكرت غربتنا الي الله ومعها خفت ان تبسط الدنيا فنتغير

مش عارف كانت لحظة مليئة بمشاعر مختلطة وفي اللحظة دي كلمت معظم اللي اعرفهم مهنئاً ومباركاً
بعد ان تنحي حسني كنت علي يقين اني إن شاء الله سأكون من المحظوظين الذين سيرون بشريات النصر والتمكين
جاءت في بالي كلمات رسول الله صلي الله عليه وسلم بعز عزيز
او بذل ذليل

 

[سعد الفخم]

كانت لحظة تعيسة

 

 

[النجم الثاقب]

https://www.almatareed.org/vb/showthread.php?t=55712

 

 

[nash]

كاااانت أحلي واروع لحظات العمر فرحه لا يمكن تخيلها ولا اظن ابدا ابدا تتكرر تاني فرحه زيها ابدا

زي ماقولت ياشينكاوي جالي حاله يأس من انه ينخلع من الكرسي ... وكنا قبلها بيوم في الشارع انا والواد ياسر بنشتري اعلام وبطاطس ... ورجعنا البيت ننتظر آخر نتائج إجتماع العسكري وطلع خطاب المخلوع فالدنيا اسودت في وشي ...

بوم الخلع المهيب كنت في المطبخ بعمل نيسكافيه وواقفه بندب قدام صينيه المكرونه اللي مش عايزة تخلص في سنتها كان يوم في اوله نحس ... وإذ فجأة وبدون سابق إنذار اسمع البيان واطلع اجري من المطبخ ووقفت في نص الطريق لا قادرة ارجع ولا قادرة اوصل للتلفزيون خايفه ومرعوبه كلمه تفوتني ... ولقيتني بصرخ وبعيط وبضحك وفي ثواني قسما بالله كنت محطوطه في إسدال الصلاة وياسر طاير ورايا وعلي العربيه ولمده ساعه لفيت المكان لقيت الدنيا كلها في حاله هستيريا والزغاريط والناس اتلمت علي الجيش وهاتك يا هتاف وكان اللي يتصل فيا من أصحابي اللي عايشين برة يحسدنا علي الفرحه الرهيبه ... ورجعت البيت لبست في دقيقه وخرجنا نحتفل برة الرحاب لقيت واحده زي السكر بتقولي أطلعي ورانا علي قصر العروبه وياااااربنا علي الإحتفالات ... الناس كانت بتسلم علي بعض وبتوزع حلويات ولأول مرة اعشق اغنيه شاديه ( أصله ماعداش علي مصر ) العربيات كلها مشغلاها والشباب واقف حلقات بيغني ويهتف ( يامبارك قول بالحق فيها رجاله ولا لأ ) وحسيت بطيبه الشعب اللي نسيناها ظهرت تاني .... آياااااااام من أروع الايام مهما حكينا عنها ...مش هانوفيها حقها ...

ربنا يكمل فرحتنا يارب

 

 

[سيدة مصر الاولى]

من قبل التنحى بيوم و انا عند حماتى المصدر الاساسى للفلول فى مصر و بعد خطابه السخيف يوم الخميس كنت قاعدة مش طايقة نفسى و كل عيلة احمد مقتنعين جدا باللى قاله و لولا خوفى من زعلهم كنت قمت روحت
يوم الجمعة كنت خايفة على اخويا جدا و كل 10 دقايق اكلمه فى التحرير و اطمن عليه و اول ما سمعت الخطاب بتاع عمر سليمان قمت انط و اسوط زى المجانين و مش مركزة فى ردود فعل اللى حواليا و اذ فجأة بعد ما هديت شوية من الفرحة ببص حواليا لقيت اللى حاطط ايده على خده و اللى بتعيط و اللى قام دخل البلكونة متضايق لبست و نزلت انا و احمد فى العربية فورا قبل ما يعملوا فينا حاجة
احمد اخويا بيكلمنى من التحرير مبقتش سامعة صوته خالص كل اللى سمعاه (مع السلامة مع السلامة مع السلامة يا ابن الحرامية)
يوم مش هيتكرر فى حياتنا تانى بس كان يوم رائع

 

 

[mahir baik]

المصري اللي ساكن جاري كان بيصرخ
بلدنا رجعت لنا ......بلدنا رجعت لنا
أنا راجع دلوقتي ....... تحيا مصر
********
مصري تاني ...... برضه بيصرخ
حتسيبنا لمين يا ريس
داحنا مالناش غيرك
**********
الإتنين قرايب بعض و ساكنين في شقة واحدة

 

 

[ysma]

مبارك هيبقى زى القذافى شبح بيطارد كل مصرى سواء كان فرحان لمغادرته الحكم, أو زعلان, حى أو ميت...

 

 

[oskasan]

ليه كده يا شنكو تقلب علينا المواجع



اول ما سمعت الخبر


الفرحه خدتني



وما حسيتش بنفسي








والشيطان استغل ضعفي









وأخدت مراتي بالحضن






كان ندر ولازم أوفيه
وكما قالوا
مصائب قوم عند قوم فوائد






ومن يوميها وهي لابده قدام التليفزيون
وتقولي هما مش هايعينوا رئيس علشان يشيلوه



كرهت الثوره

 

 

[O.S.A.M.A]

أنا الحقيقة اليومين بتوع التنحي واليوم اللى قبله ذكراهم مش ممكن تتنسي

أنا طبعاً قبل يوم التنحي بيوم كنت معزوم عند جماعة أصحابي وكانوا عاملينلى حفلة بمناسبة عيد ميلادى

طبعاً قلبنا حفلة عيد الميلاد لحفلة سياسية فى إنتظار البيان الهام لسى حسنى وقد كان وأصابنا خيبة الأمل

يوم التنحي كان بقى انتظار وترقب

وقد كان أول ما أذيع بيان التنحي كنا كلنا فى البيت مشرأبين وكلنا أذان مطرطقة وقد كااااااااااااااااان

وهنا أنطلقت الزغاريط وسمعت يمكن لأول مرة فى حياتى زغروطة مراتي

وهاتك يا ترحبيات كل الناس من كل الجنسيات جات عندنا علشان تهنى وقعدنا فى الشارع فترة وبعدين نزلنا وعملنا الكلام ده ...

 

 

[O.S.A.M.A]