تحريف الكلام على ألسنة العوام

[RMG]

الصحف المصرية والعربية

هذا الموضوع مكرر
لكن لم يكرر هنا بل سبق كتابته اعتقد ايام المحاورات
والحقيقة اني استمتعت جدا بكتابته
واستمتعت اكثر بمشاركات الأخوة الزملاء
وكمقدمة صغيرة اقول انني احب كثيرا حوارات العامة
كلامهم دائما لا يخلو من الفكاهة
والحكمة احيانا
وتحريف الكلام دائما !!
فمثلا حرف السين والشين
ما ان وجدا في كلمة الا وتشقلبت الدنيا
فالساندوتش شندوتش
والمستشفى مشتشفى
والمرسيدس مرشيدس ومش عارف السبب
والشويبس سويبش واحيانا شوبش
اما الحديث عن العلاج والعيادات فحدث ولا حرج
قال لي واحد مرة
انا رحت المشتشفى وقطعت دسكره الدكتور حولني على عيادة المساكن الدولية (المسالك البولية) !!
وممكن تتحول (ضرسي بينقح عليا) إلى ضرسي بينبح عليا
والعاهة المستديمة عند عم رزق المقاول هي عاهة مش سليمة !
وطبعا الأجزاخانه أرزاخانه
وحاجات كتيير
لازم نقولها مع بعض
ومش عايز حد يكلسن على الموضوع
قصدي يكنسل لامؤاخذه

 

[hoppa]

اغرب حاجة سمعت عن تحريفها و بتوهنى صراحة
ازاى كلمت مكان بقت "بكان"
الميم اصبح بقدر قادر باااااااء
ازاى...ازاى
رغم ان الميم اخف و التحريف احيانا يكون لان الحرف تقيل على النطق

 

 

[نانا]

اقتباس المشاركة الأصلية كتبت بواسطة RMG هذا الموضوع مكرر لكن لم يكرر هنا بل سبق كتابته اعتقد ايام المحاورات والحقيقة اني استمتعت جدا بكتابته واستمتعت اكثر بمشاركات الأخوة الزملاء وكمقدمة صغيرة اقول انني احب كثيرا حوارات العامة كلامهم دائما لا يخلو من الفكاهة والحكمة احيانا وتحريف الكلام دائما !! فمثلا حرف السين والشين ما ان وجدا في كلمة الا وتشقلبت الدنيا فالساندوتش شندوتش والمستشفى مشتشفى والمرسيدس مرشيدس ومش عارف السبب والشويبس سويبش واحيانا شوبش اما الحديث عن العلاج والعيادات فحدث ولا حرج قال لي واحد مرة انا رحت المشتشفى وقطعت دسكره الدكتور حولني على عيادة المساكن الدولية (المسالك البولية) !! وممكن تتحول (ضرسي بينقح عليا) إلى ضرسي بينبح عليا والعاهة المستديمة عند عم رزق المقاول هي عاهة مش سليمة ! وطبعا الأجزاخانه أرزاخانه وحاجات كتيير لازم نقولها مع بعض ومش عايز حد يكلسن على الموضوع قصدي يكنسل لامؤاخذه

فعلا شيء مستفز اوي تحريف الكلام
لكن بنعذر قليل العلم او لو د كبير في السن او مش متعلم في النطق دا

لكن ما يتعذرش أبدا لو حد عارف النطق الصح وينطق غلط مع قدرته على النطق الصحيح
بجد بيبقى موقف مستفز جدا

لكن بردو انا إلى حد كبير بعذر خصوصا لما بقابل ناس بسطاء
وأحيانا لو حد نطق ادامي غلط وحساه يقدر ينطق صح ولقلة الخبرة عنده ممكن انبهه وأقول النطق الصح لكن اخدها على محمل التهريج بدون ما احرجه

لكن ساعات بتحصل مواقف كدة وما بتعرفش تواجه اللي ادامك بطريقة نطقها

عندي كلمات فعلا متحرفة كتير بس مش في دماغي حاجة دلوقتي

هحاول افتكر وايد هآجي واقول كل ما افتكر

اديني بحاول اهو

 

 

[نانا]

من ضمن الكلمات
كلمة برتقال
بصراحة كتير ممكن تتقال برتقان
ومرة سمعت ناس بتقول بردقان ( بصراحة مش عارفة ازاي يقولوا كدة )

واليوسفي بقى بيبدعوا فيه
فيه يقول يوسفندي
واللي يقول يوستفندي
واللي يقول سفندي

بصراحة انا لما بآجي أنطقه بتكسف انطقه وبقوله بقى على حسب ما بتطلع
غالبا بقول عليه يوستفندي بس بفضل اخطفها بسرعة عشان ما حدش يأخد باله من طريقة نطقها
( ألا صحيح هي المفروض تتنطق إزاي بالعامية )


ايه تاني ايه تاني

 

 

[RMG]

اقتباس المشاركة الأصلية كتبت بواسطة hoppa اغرب حاجة سمعت عن تحريفها و بتوهنى صراحة ازاى كلمت مكان بقت "بكان" الميم اصبح بقدر قادر باااااااء ازاى...ازاى رغم ان الميم اخف و التحريف احيانا يكون لان الحرف تقيل على النطق

يمكن زكام ؟

 

 

[hoppa]

لا يا دوك دى كلمة دارجة فى اللهجة الصعيدية و الكبار بيقولوها بالشكل ده لكن انا عن نفسى بقول مكان...الجيل الجديد بقى

 

 

[RMG]

اقتباس المشاركة الأصلية كتبت بواسطة hoppa لا يا دوك دى كلمة دارجة فى اللهجة الصعيدية و الكبار بيقولوها بالشكل ده لكن انا عن نفسى بقول مكان...الجيل الجديد بقى

والله ما اعرف
بجد؟
ماسمعناش يعني في اي فيلم قديم عسكري بيقول لحرامي : أوجف بكانك!!

 

 

[أحمد باشــا]

موضوع هايل يا دكتور رجائي

لتعاملي الدائم مع الصنايعية اجد دائما تحريفا او قلبا للكلمات ... لكنني اتعامل معها على كونها مصطلحات محلية ... لكنني انزعج جدا عندما اسمع نفس التحريفات من اناس متعلمون ... يعني مثلا عندما اجد مهندس ينطق بنفس نطق الصنايعية ... و الأمر عندما تجده يظن ان ذلك النطق هو الصحيح ... و هذا معناه ببساطة ان المهندس تعلمها من الصنايعي و قبل ذلك كان ابيض يا ورد

موش هأذكر هذه المصطلحات لأن صحيحها و خطأها ربما لا يعني شئ لمعظم الناس

لكنني احيانا انزعج من اناس .... المفروض انهم محترمون و تجده يقول العلوان بدلا من العنوان

و رجل اعمال مشهور جدا نطق كلمة مناخيرة ب مراخيره و كذبت نفسي حتى اعادها تكرارا

و القاهريون يدلعون الطماطم بالقوطة و البذنجان ب بتنجان و المطر بالنطرة و الدكان بالدكانة و الفرن بالفرنة و الفلافل بالطعمية

و السكندريون متأثرون بلغات اخرى فينطقون الجنيه جني كما تنطق بالأنكليزية و يطلقون اسم البياصة على الميدان مثلما هو اسمه بالأيطالية PIAZZA او بياتسا و شركة الماء و الكهرباء بالكوبانية مثلما تنطق بالأيطالية و قديما المصنع كان فابريقة ايضا كما تنطق بالأيطالية و الترام او كما تنطق مترو بالقاهرة تجدها ترمواي كما هي بالأنجليزية و الناصية قمة و السمك الصغير بيساريا كما تنطق باليونانية بمعنى سمك

و في بعض مدن الدلتا يطلقون اسم سفرة على المطعم

و لما اتذكر حاجه تانيه هأضيفها

 

 

[RMG]

بمناسبة حديث الأستاذ احمد عن التحدث بلغة الصنايعية بدون سبب :
مش عارف ليه الناس كلها تقريبا بتقول ستايتر على البادئ بتاع اللمبة النيون مع ان اسمه ستارتر
وزيت الفاكيوم بتاع الفرامل بقت الناس كلها بتقول زيت باكم زي الصنايعية
واللمبة النيون : لنضة نايلون!!
والألوميتال: الومنتال ومش عارف ليه الأصرار على زيادة النون دي
وكله كوم والسكس بلف دي كوم تاني حد يتصور انها Safety Valve؟

 

 

[الشامسي]

مره من المرات كنت بقول لصديق رقم مكتوب بالانجليزي 58 واقراه فذهني بالانجليزي ونطقته بالعربي 85 .. قلت لا باس لخبطة .. لكن لاحظت ان معظم الناس يتكرر عندهم الخطأ هذا .. بعد شوية تحليل وجدت ان النطق بالعربي عكس النطق الانجليزي للحروف يعني فيفتي ايت بالعربي ثمانيه وخمسين وعارف ان كل واحد فيكم قراها فباله خمسه وثمانين

السبب الاساسي هو وصلات الاعصاب الدماغية واللي توصل المعلومه مع الارقام واسلوب الكتابة

وملاحظتي ان اكثر ناس تلخبط اللغه هيه الناس الي عايشت الاستعمار مثلا اللهجة المصرية فيها اربع مفردات تركية وعربية وانجليزيه وفرنسيه .. النظق والترتيب اللغوي للجمل والحروف مختلف بين اللغات بالتالي صعب جدا على اللسان المصري التلفظ بلفظ صحيح 100%
مثال كذب تلفظ مصريا كدب

في الامارات بلاحظ تاثير اللغة الانجليزيه على العربية مؤخرا في الجيل الجديد حيث يصعب عليهم لفظ الفاظ من اللهجه البحته

وكل هذا اسباب بيلوجيه وثقافيه بحته فدماغ الانسان لايعترف الا بلغه واحده مثل استخدام اليد اليمنى واتخدام اليسرى مهاره صعبه ولكن غالبا ماتجد لها هفوات بسبب تحريك اليد اليمنى والسبب يعود للنخا هنا ولكن بشكل عام بسبب تصميم الاعصاب وقطبيتها الكهربائية التي تشكل الروابط العصبية في حلقه قطبيه لتشكل دائره

انا بديت الخبط كفايه لهنه وتصبحوا على خير