شهادات مرئية من رابعة العدوية

[NazeeH]

الصحف المصرية والعربية

المشهد الرابع عشر : الرجوع ثانية الى رابعة ، حرق مسجد رابعة ، المطافي ترفض التدخل ،

رجعنا تاني رابعة ، دخلنا نشوف المسجد و المصابين اللي جوة ، لقيناه بيولع ، احنا لما سيبناه اول مرة ما كانش فيه حاجة و كان الجيش مسيطر ، طيب ولعوا فيه ليه ؟ ؟ ، و لقينا المطافي واقفة ، طفوا المسجد ، يردوا علينا و يقولوا ما خدناش اوامر ،
اوضة امام المسجد كانت في الوش ، على يمينها المسجد مولع ، على شمالها تقريبا ملحق بالمسجد لسة ما ولعش ، في نفس المكان ،
بابص على شمالى و باولع الكشاف ، لقيت واحد بيبصلنا نظرة لكم انتم ان تتخيلوها ،
ما بيتكلمش ، ما بيقولناش طلعوني من هنا النار هتيجي فيا ،

ما اتكلمش الا لما سألته ، انت كويس ، كان قاعد حتى ما كانش نايم ،
قالي ما تنقذنيش ، انا ايدي و رجلي اتكسروا و هاطلب منك طلب بس ،
قلتله ايه ، قالي عايز بق مية اشربه قبل ما اموت ،
كان قاعد محبط ، كان عايز فعلا يموت ، اعتقد انه مكلوم ، اعتقد انه شاف حد عزيز عليه مات ،
كان مصدوم صدمة نفسية غير طبيعية خلته حتى ما يهموش ان الدنيا بتولع حواليه و مش هامه ، عايز يموت ،
نادينا على الإسعاف ، اخده و نقله ، راح فين بعد كدة ، ماعرفش اي حاجة ،
الكلاب،، السفاحين ،،،

 

 

[NazeeH]

المشهد الخامس عشر والأخير : الرجوع الى مسجد الايمان ،
ابتدت عملية نقل الجثث في العربيات الملاكي لأن الاسعاف كانت بتنقل لأماكن تانية ، من رابعة لمسجد الايمان ،
وبعدين قالوا فضو المسجد ، كل الشهداء هيتنقلوا فيه ،
اللي اتنقل بس من المركز الطبي و الحتة الصغيرة اللي كنا فيها لحد الفجر بس اكتر من 500 جثة ،
غير كل الميدان اللي كان مليان جثث مرمية على الأرض ، غير كل مباني الميدان اللي الجثث اتحرقت جواها ،

عدد اللي ماتوا لا يحصى ، لو قلتلي 5000 مثلا في رابعة هقولك قليل ، قليل جدا ،
لك انك تتخيل ان الميدان بطوله بعرضه مليان جثث على الارض ، غير اللي اتنقلوا في مكان ما نعرفوش غير اللي اتولع فيهم جوة المسجد وجوة المباني ،

ده جزء فقط من الحقيقة ، ده اللي شفته بعيني ، او اللي فاكره من اللي شفته بعيني ، فيه حاجات تانية و مشاهد تانية في الميدان في مداخله و مخارجه ، في كل متر هتلاقي شهداء و هتلاقي شاهد على واقعة ، اللي حكيتهولكوا ده مش كل حاجة حصلت ، ده حاجة قليلة من اللي حصلت ،


وحق اخوانتنا بإذن الله ربنا مش هيضيعه ، بإيدينا ان شاء الله ،
ربنا يثبت الأقدام .

انتهت أول شهادة ... وتتوالى الشهادات ...

 

 

[NazeeH]

(2)

شهادة "عبدالله مصطفى" على مجزرة الفض الأربعاء الدامي


شهـادتى على مجزرة رابعــة :
يوم الثلاثـاء الموافق 13/8/2013
كان فرح أختى وكان الفرح بعد العصــر عشان الظروف اللى ف البلد، وصلت أختى بيتها ف زهراء م نصــر وطلعت على رابعة، كنت هنـاك تقريباً السـاعة 11 بالليل، ودى كانت تانى مرة أروح رابعة على فكرة ، المهم زى ما قولت كنت ف رابعة حوالى 11 بالليل، قابلت هنـاك جارى عمـر خالد رشــدى، وصديقى محمد صـلاح، ويدوبك أول ما قابلتهم قالولهم ياللا يا جماعة عشان تقعدوا تأمين ع الميـدان...

رحت رايح معاهم وقفنا تأمين على بوابة يوسف عبـاس
فضلنـا من السـاعة 11 بالليل واقفين تأمين لحد السـاعة 6 ونص أول ما بلغونا إن فى تحركــات للداخلية والجيش وداخلين علينـا بالجرافات والمدرعـات
ساعتها بقى كلمت والدتى ووالدى وطلبت منهم يسامحونى لو حصلى حاجة ويدعولى إن ربنا يغفرلى ذنوبى لإن الواحد حاله مع ربنا زى الزفت أصلاً، وكل اللى حواليـا نفس الكلام اللى يتصل بوالده ووالدته واللى يتصل بحد كان مزعله...

المهم البوابات كلها بقى عندها إستعداد وحالة تأهب
و الجرافات دخلت تشيل ومن وراها المدرعات والداخلية بيضربوا غـاز ورصاص حـى وخرطوش، بعد بداية الضرب بشوية رجعنا انا وعمر لنص الميدان كده جنب الخيمة بتاعتنا من كتر ضرب النار الحى
وكنا من لحظة للتانية بنتقدم ناحية البوابات ونساعد لو حد محتاج المساعدة ونصــور اللى بيحصــل، الوضع ده فضل مستمر لحد الضهـر تقريباً..

 

 

[NazeeH]

طبعاً مش عايز أقولكم ع الرعب اللى الواحد كان عايش فيه
الرصاص الحى حواليك ف كل ماكن، مضطر إنك تبقى ف مستوى منخفض عشان الرصاص اللى عمال ينضرب، بعد الضهـر القناصة كانوا طلعوا على العماير اللى ف محيط الميدان، وللأسف كانوا على مبنى تابع للقوات المسلحة كان ف نص الميدان..

واللى عايز يتأكد من سلمية التظاهرات كان فى 3 منشئات فى محيط رابعة تبع الجيش، الدفاع الشعبـى والمخابرات الحربية ومبنى كمان
محدش رمى طوبة واحدة عليهم
المهم بعد الضهـر إبتدى شغل القناصة يزيد بقى من جوه العماير لدرجة إنهم بقوا بيضربوا نار ع الخيم وكذا حد ف الخيمة اللى جنبنا مــات وهوا ف الخيمة
ساعتها إتقدمنـا إحنا انا وعمر روحنا ناحية بوابة يوسف عباس
فى هناك بنزينة العمارة اللى وراها بقى كان فيها حوالى 3 قناصين عمالين يصطادو ف النـاس بدم بارد
مقدرناش نعمل حاجة هناك للأسف قولت لعمر تعال نرجع نروح ناحية المنصة
لما روحنا ناحية المنصة كان الضرب هناك شغال على ودنه
اتقدمت أوى ناحية البوابة وسبت عمر ورا لإنه كان الغاز مبهدله جداً ومكنش قادر يتحرك، كان معايا 3 ساعتها معرفهمش، المهم ضربوا نار علينـا واحد من التلاتة اللى كانوا معايا جتله طلقة ف ضهـره
كان بينى وبينه مفيش 5 سنتى سبحان الله الطلقة إختارته هوا
شلناه ورجعنا بيه تانى
ف اللحظة دى بقى بعد ما شلناه ورجعنا اتضرب نار على واحد اللى انا صورته ف الفيديو بتاع القنص
ف أنا فتحت الفيديو وصورت المشهد ده وواحد شايله وكنت بصور عادى مكنتش متوقع إن ممكن حد يكون وسخ لدرجة إنه يضربه وهوا شايله
إتفاجئت ساعتها باللى حصل وإنه ضرب عليه نار وهوا شايله

 

 

[NazeeH]

ع العصـر كده عم عمـر إتصل بيه وقاله تعالالى ع المستشفى
خدنا بعضينا أنا وعمر وطلعنا ع المستشفى مكناش عارفين نوصل لعمه فضلنا مستنين بره المستشفى شوية وقعدنا نصور ف الشهدا والمصابين
شوفت انا البلتاجى ساعتها ف اللحظة دى والناس بتعزيه ف بنته الشهيدة بإذن الله أسماء وكان واضح عليه التأثر وكان بيحاول يدارى تأثره ده
المهم قدرنا نطلع فوق ف المستشفى كان فيها زميلنا أحمد فوزى من منيا القمح كان مصاب بطلقة ف ركبته دخلنا انا وعمر نتطمن عليه وبعد كده روحنا نساعد الدكاترة
شوية والدنيا بقت زحمة والدكاترة طلبت مننا نفضى المكان عشان خاطر الناس المصابة والشهدا يلاقوا مكان يحطوهم فيه
نزلت بقى ف المستشفى قعدت أصور ف الجثث والمصابين
لحد ما مدرعة أمن مركزى دخلت ع المستشفى ورمت قنبلة غـاز جوه المستشفى وبعدين ضربت حى بالمتعدد ع المستشفى
رغم إن المستشفى مكنش فيها غير يا إما :
جثث .. مصابين .. دكاترة .. صحفيين .. ناس بتساعد وبتنقل المصابين والجثث
المهم فى اللحظة دى بقى لما ضربوا حى ع المستشفى الإزاز إتكسر بتاع المستشفى ووقع أكتر من 6 شهداء منهم واحد كان واقف جنب منـى خد طلقة ف دماغه والمصابين كانوا بالجملة
فضل ضرب الحى مستمر من 7 : 10 دقايق متواصلة كله نام ف الأرض وقتها وكان الطوب بيطلع من الحيطة يخبط ف دماغنـا
ورموا قنبلة غاز تانية
بعد ما خلص ضرب النار الحى بدور على عمر جنبى ملقتوش جنبى فضلت أنادى عليه ملقتوش
روحت نازل ف الدور اللى تحته هرباً من الغاز وطلعت تانى ع السلم من الناحية التانية
ببص ع الباب التانى من الناحية التانية للمستشفى لقيتهم ولعوا النار من ناحيته والناس بتقول الطريق ده غير آمن محدش يخرج منه
المهم ف اللحظة دى كانوا جنود الأمن المركزى دخلوا المستشفى وقالوا اللى هنشوفه قدامنا هنموته
انا ف الأول مكنتش عايز أجرى وأهرب من شوية كلاب زيهم بس لقيت معظم الناس جريت ومبقاش الا أنا وعدد قليل روحت جريت
اللى كان بيجرى بقى ف الآخر كان بيتضرب بكعب البندقية بس الحمد لله ربنا سترها ومحدش لمسنى
طلعنا من المستشفى ولسه بنطلع ع الشارع ضربوا حى علينا تانى
المهم إتصلت بعدها بعـمر كان غير متاح لحد ما جمع معايا وقالى على مكانه
قابلت عمر وطلعنا على شارع كبير لقينا شوية منهم واقفين ضربوا غـاز علينا تانى بس الحمد لله الشباب إتصرفوا
خدنا تاكسى لعبود وبعد كده روحنـا....

دى شهادتى بإختصار شديد
اليوم كان كله رعب بس حاولت أختصر على أد ما أقدر وإن شاء الله أنزل مواقف حصلت تانية ف اليوم ده أثرت عليـا


انتهت تاني شهادة ... وتتوالى الشهادات ...

 

 

[NazeeH]

(3)


اللحظات الاخيره فى الجحيم
فى الدقائق الاخيره وقبل اقتحام الاعتصام بشكل كامل حملنا مصاب لمستشفى رابعه وهى لمن لا يعرف ليست المستشفى الميدانى بل هى مستشفى خاصه من عشرة طوابق تقريبا ... للمستشفى بابين واحد جهة المسجد والاخر يطل على شارع جانبى بصعوبه حاولنا ادخال المصاب صعدنا السلم الخارجى للمستشفى من ناحية المسجد المكان مزدحم عن اخره المصابين والجثث ملقاه على الارض وفى المدخل المصابون يعانون .
الاطباء لا يستطيعون فعل شى عاجزين بالكاد يضعون بعض الشاش ويفحصون المصاب سريعا وينتقلون الى اخر لكن الاعداد فاقت طاقتهم البشريه وصلنا بالمريض الى الدور الاول تركناه على الارض للاطباء فلا يوجد مكان اخر سوى الارض ..كان امام عينى طفل 10 سنوات يحمل المحلول لوالده المصاب باكيا .. ابويا ابويا .. واخر يحمل له اله تنفس صناعى بدائيه .. والد الطفل ينزف من كل مكان وملقى على الارض .. وحاولت الانصراف الى الخارج لكن كان الامر صعب جدا من الزحام خرجت فى النهايه .. وجدت مصاب بطلق نارى اسفل سلم المستشفى رفعناه ووضعناه تحته ملاءه ثم حملناه بواسطة الملاءه وفجاءه انهال علينا وابل من الرصاص انبطحنا ارض سقط احدهم فوق المصاب .. خاطبه احد الاشخاص قائلا .. اخى من فضلك اخوك مصاب قم من فوقه ... هزه عدة مرات من كتفه .. لكن لا اجابه ... كان يلبس قناع غاز .. ابعدت القناع عن وجه .. يالله انه Musaab ElShamy وكنت اعرفه شخصيا ويعمل مصور بشبكة رصد تفحصت الاصابه فوجد رصاصه بالكوع وكأن قنبله انفجرت .. ظننته مغمى عليه رفعت من فوقه الشنطه لنسعفه فوجدت رصاصه اخرى دخلت من الظهر وخرجت من الصدر ايقنت انه نال الشهاده.. لحظات .. وصعدت روحه الى بارئها .. استشهد مصعب وامام عينى .. حركته من فوق المصاب الذى كان يستغيث ... لكننا لم نستطع فعل شى للمصاب فالرصاص ينهال على باب المستشفى .. حدثنى قائلا انه ينزف بشده افعلوا شيئا .. كنت عاجز تمام .. الجثث تحيط بنا من كل جانب وعلى سلالم المستشفى .. بعد 5 دقائق حملنا المصاب اخلينا ممر بين الجثث تحركنا فوق السلم وفجاه انطلقت الرصاصات من الباب الاخر للمستشفى فقتل من كان بالطابق الارضى تركنا المصاب وانبطحنا ارض واستمر الضرب وفاضت ارواح المصابين وامتلى المكان بالجثث ..
هذه جزء مما رايته بنفسى واشهد الله على ذلك


انتهت تالت شهادة ... وتتوالى الشهادات ...

 

 

[NazeeH]

(4)

شهادتى على الاهوال اللى شفتها امبارح :

الساعة 6 ونص تقريبا كنت عند مدخل طيبة مول وكنت ناوية ارتاح شوية بعد يوم طويل من العمل والارهاق والتعب وعدم النوم ، حبيبة عبدالعزيز صديقتى الجميلة النقية كانت فى نفس المكان وكانت من الناس المتطوعة انها تشيل كاميرا عشان تنقل بث مباشر من قدام المدخل ، سلمت عليها وقالتلى يا رميساء انا بحب شكل حجابك ، بكرا نخرج ساعتين من الاعتصام اجيب زيه واتفقنا على كدا ولقيتها مدخله الطرحة جوا العباية وقولتلها خدى بالك يا حبيبة الطرحة قصرت قوى كدا قالتلى عشان مدايقش دراعى وانا بصور ، سيبتها وقعدت انا ومجموعة بنات نقول الأذكار وفجأة القنابل بتنفجر من كل حته ، من الطيارات ومن على المدرعات اللى كانت وصلت للمدخل ومن على البنايات اللى عند المدخل ، مفيش حد فينا بقا شايف أى حاجة ووشنا بيتحرق من الغاز ومحدش عارف يتنفس وفى نفس الوقت بنجرى فى كل حته ، وبدأ ضرب النار علينا بجنون من كل مكان ، مطر من الرصاص والناس بتقع قدامى وورايا وقدامى زى الرز ، جانب من جوانب الشارع فيه شوارع جانبيه صغيرة والجاتب التانى عبارة عن سور طويل ، معظم الشهداء وقعوا فى الجانب اللى ناحية السور لان مفيش اى حاجة يحتموا بيها ، وحبيبة كانت فى الاتجاه ده ، خدت الرصاص قدامى ، قدام عينى وانا بجرى ، كنت بصرخ وانا بجرى وانا شايفاها بتقع ،،


جرينا فى الشوارع الجانبية والضرب فضل شغال والشرطة بتضغط لقدام فى اتجاه قلب الاعتصام ، الشرطة مكنتش بتقتل بس . كانوا بيولعوا فى بعض الجثث بعد ما يقتلوها ، وكانوا بيدخلوا ع الناس الخيام يولعوها والناس أحياء فيها ، بعدها حاولت أوصل للمستشفى الميدانى من الشوارع الخلفية نجيب أى اسعافات للمصابين اللى عند طيبة مول لان عدد المصابين كان بقا أكبر من ان يستوعبه اى حاجة تنقلهم للمستشفى ،
على باب المستشفى كانوا بيدخلوا أسماء البلتاجى غرقانة فى دمها ، وقتها اتمنيت انى انتهى من على وش الدنيا قبل ما اشوف حبة قلبى الصغيرة الطاهرة فى المنظر ده صرخت وحضنتها جامد ولسة دمها على حجابى اللى كنت لابساه لحد دلوقتى ، ومش هغسلها لحد ما تارنا يرجع ، هفضل اشم فيه ريحتها العطرة اللى هتفكرنى بابتسامتها طول العمر ، حطيت قلبى تحت رجلى واخدت شوية ادوية تساعدنا فى الاسعافات وجريت على مدخل طيبة مول تانى ،



يتبع

 

 

[NazeeH]

حاولت انا واتنين كمان نجرى من الشوارع الجانبية لحد ما عدينا المدخل بتاع طيبة مول ، لقينا الجيش قفل المكان بالدبابات بالقرب من ميدان الساعة ، بقت مدرعات الشرطة كدا فى ضهرنا والجيش فى وشنا مباشرة وواخدين وضع الاستعداد من على الدبابات وجوا المدرعات وفى سلك شائك وورا السلك كان وصل عدد كبيير جدا من المتظاهرين بيحاولوا يدخلوا الميدان ولما الاعداد بدأت تزيد أوى بدأ الجيش يرمى قنابل تانى وفتح الرشاشات بجنون ، أقسم بالله ما شفت حتى فى افلام زيه ، رصاص زى المطر وفى كل اتجاه وبدأت الناس تقع على الارض زى الفراخ جرينا فى اما كن متفرقة ودخلت انا ومجموعة فى شارع جانبى ، والجنود ورانا ، وادوات الطبية لسه فى ايدى مش عارفة اسيبها عشان نلحق اللى نقدر عليه ،
فجأة قابلنا ولد اسمه محمود فى تانية ثانوى من اللى بيتقال عليه انه ولد بمليون راجل قالنا كل البنات بسرعة يدخلوا على العمارة دى على الشقة بتاعتنا ، دخلت انا ومجموعة هناك وطلعت على البلكونة اصور وبقا ضرب النار واصل لحد الشقة اللى احنا فيها لدرجة ان الرصاص اخترق الشباك وكسر مراية حجرة من الحجرات اللى فى الشقة ، اتوضينا وصلينا ولما حسينا ان الضرب خف نزلت تانى وطلعنا على الشارع الرئيسى "شارع النزهة " وبدأنا نعمل مستشفى ميدانى تانية صغيرة نحاول نلحق فيها الناس ، فى الوقت ده كنت ماسكة ادوات الطبية بايد والموبايل بايد بكلم الجزيرة وفجأة الضرب اشتغل تانى ، فكنت بجرى ببطء فأخدت خرطوش فى رجلى ، وصلت لبوابة العمارة اللى عملناها مستشفى بالعافية وشلت الخرطوش وربطت الجرح هناك ، وبدأ الشباب يلحقوا اللى يقدروا عليه من المصابين ، طلعت أصور بقية الضرب ،


يتبع

 

 

[NazeeH]

اللى كان بيحصل وقتها كان أبشع ما رأته عينى على الاطلاق ، الجنود بيضربوا بجنون ، بيولعوا فى الشجر اللى على الجانبين فى طريق النزهه ،حرقوا أوتوبيسين واقفين ، كان فى اتنيين من الشباب معديين بعربية عادى مش تبع الاعتصام اصلا اتصابوا واحد منهم مات والتانى لحقوه فى المستشفى ، القناصة فوق العمارات بيصوبوا على اى حد ماسك كاميرا ، وقتها واحد من الشباب اخد منى الكاميرا بتاعتى وقالى هتتقتلى وبحاول اوصل له دلوقتى عشان الفيديوهات اللى عليها ، فى ست جنود لما كانوا بيضربوا ويقع شهداء كنت بشوفهم وهم بيثلثوا على صدورهم ويرسموا الصليب ، بدأوا يجروا ورانا وهم بيضربوا بجنون فى شارع النزهه واحنا بنجرى لحد رجلى بقت مش شايلانى ، كل العمارات مقفوله ، مفيش اى شىء يمكن نحتمى بيه من الرصاص لحد ما لقينا باب عمارة واحد مفتوح دخلنا فيه انا وخمس بنات والباب مش بيتقفل والجنود قدام باب العمارة مباشرة وبيضربوا على كل اللى فى الشارع ، طبعا مفيش اى حد فتح من اللى فى العمارة ، الكل خايف ، طلعنا فى الدور الأول لحد ما نشوف هنعمل ايه ، موبايلى كان فصل طبعا ، بنت من البنات اهلها اتصلوا عليها فاتكلمت وصوتها كان عالى فى الوقت اللى بعض الجند كان فى باب العمارة وسمعنا صوته ع السلم طلعنا جرى على الادوار العليا ، لحق ثلاتة اعتقلهم وطلعنا انا وبنت على السطح لقينا لوح خشب استخبينا وراه ، كنت بدعى ربنا وقتها بحق كل اعمال الصالحة اللى عملها ابويا وأمى انها تبقى شهادة مش اعتقال ، وبفضل الله وحده ماشوفناش ونزلوا وفضل الضرب قدام العمارة 6 ساعات متواصل والشباب بيقع ، لحد ما صوت الضرب اختفى ومبقناش سامعين حاجة نزلنا ، جرينا لقدام خالص قابلت اتنيين من البنات اللى شوفتهم فى اول اليوم فجرينا لحد ما عديت كوبرى النزهه ، مفيش اى تاكسى راضى يقف ، منظر الحجاب بتاعى والدم اللى عليه كان ملفت جدا ، لحد ما ركبت اوتوبيس وصلت بيه لبيت واحدة من اصدقائى...


يتبع

 

 

[NazeeH]

،،اللى بينا وبينهم بقا اكبر من الشرعية والديمقراطية ، اللى بينى وبينهم بقا دم اخواتى اللى ماتوا قدام عينى ، انا فى الطريق عشان نصلى على حبيبة من مسجد الأرقم وبعدها ان شاء الله نزف أسماء البلتاجى ، هصلى عليها وهدفنها عشان اكرام الميت لكن صوت حبيبة ودمها ودم أسماء قايد فى جسمى كله نار مش بتهدى ، والنار مش هيطفيها غير اننا نرجع حق مصر اللى استشهدت حبيبة وأسماء عشانه ?مكملين

انتهت رابع شهادة ... وتتوالى الشهادات ...