النتيجة الحتمية.. للَّهوَجَة.. و السَّربَعَة..!
ده الطابع الثلاثي الجديد .. بعد الفضايح.. لقناة السويس الجديدة...
اللي اصرت هيئة البريد علي صدوره فورا.. عشان إراقة ماء الوجه.. فوافقوا علي التصميم النهائي في اقل من 72 ساعة من كارثة الطابع الاول..!
و المصمم هو استاذ في كلية الفنون الجميلة.. و صديق شخصي..
انما ده ما انقذش الطابع.. و ما خدمش سمعة هيئة البريد.. و لا سمعة حرفية المصمم !
و طبعا .. مش حا يمنعني من اني اقدم.. للي عاوز يفهم.. عرض كامل للمشكلة..!
في اسفل البوست.. نقد فني محايد للطابع الجديد..
انما في الاول .. لازم نفهم ان العمل الفني محتاج ياخد وقته عشان يستوي..
و لازم يتعرض التصميم علي اكتر من عين ( مدربة و فاهمة ) قبل ما يتنفذ.. حتي لو كان المصمم عبقري.. لأن الطابع - في الآخر - مش بيمثل شخص الفنان .. و لا حتي هيئة البريد.. او هيئة قناة السويس.. انما بيمثل مصر كلها..!
و الطابع.. كتصميم .. فيه مشاكل فنية كتيرة حا حاول الخصها في الآتي .. و ممكن تتابعوا بالارقام .. اللي باللون الاحمر :
1ـ المنظور بنقطة هروب واحدة في نص المجموعة.. و خط الافق تقريبا في منتصف ارتفاع الطابع … و دي اكثر التكوينات بدائية.. و اقلها جاذبية علي الإطلاق.. و طبعا اسهلها و اسرعها .. و المفروض ان المنظور ( لو لابد من استعماله..) يبقي علي الاقل يعطي صورة جمالية للمشروع تتماشي مع حجمه و معناه لمستقبل مصر.. يعني مش شرط ابدا اننا نستعمل نفس التكوين.. بنفس الالوان.. بتاع الطابع السابق اللي فيه قناة باناما..!
2ـ في مركز التكوين .. و عند نقطة الهروب بالظبط.. "كراكة عملاقة"..!
يعني مش مبني القناة التاريخي.. ( اللي مركون علي جنب ) .. و مش مجموعة سفن بتمر في القناة .. او حتي اي مشروع سياحي من اللي حا يكونوا المجتمعات الجديدة.. لا.. مجرد كراكة ضخمة..شكلها قبيح.. وكل لازمتها هي الصيانة الدورية..!
3ـ شعار قناة السويس موجود علي طابع واحد فقط.. من التلاتة..!
و غالبا .. شغلته هنا انه يوزن التكوين فقط.. لأن من غيره.. حا يبقي الطابع ده فاضي و مالوش معني..!
انما من اصول مجموعات الطوابع.. حتي الثلاثية زي في الحالة دي.. اننا لو استعملنا الشعار .. يبقي نستعمله علي التلات طوابع… علشان امكانية استعمالهم علي انفراد..!
4ـ و في الطابع الاوسط.. اكبر مساحة مخصصة "لقطعة ارض متسفلته.. و فاضية"!
يعني لو استعمل الطابع ده لوحده.. حا يبقي فيه "كراكة عملاقة" و "ارض فاضية" و علي الجنبين ترعتين ما لهمش اي معني !
5ـ ناقلة حاويات containers متاخدة من
جوجل ( تاني ؟) يعني اكتر السفن ضخامة.. و قبحاً..! و حجمها اصغر من حجم الكراكة اللي مفروض انها ابعد بكتير ..! يعني يحصل ايه لو استعملنا ( مثلا ) باخرة ركاب سياحية.. تلهب الخيال علي ما سوف يكون من مشاريع تنمية الضفتين ..؟
6ـ و بمناسبة الضفتين.. هل قطعة الارض الجرداء دي .. هي كل ما نتمني من المستقبل..؟ هو المشروع ده.. مجرد توسيع للقناة.. عشان نخدم النقل العالمي.. للشركات العملاقة اللي بتسيطر علي كل صغيرة و كبيرة في حياتنا النهارده ؟ و الا هو مشروع تنمية لمجتمعات جديدة .. و مدن جميلة تخف الضغط علي القاهرة و الدلتا.. و تكون بداية لتعمير سيناء..؟
7ـ و لما نبقي .. عشان السربعة.. بناخد من صور
جوجل.. و نحط علي الطابع.. مش ناخد بالنا من التناسب بين القطع المختلفة..؟ يعني المركب التانية دي.. معقول تكون بالحجم ده .. بالقياس بتفاصيل الحياة الآدمية اللي علي الضفة..؟
و اخيرا.. لما يبقي التكوين بالضحالة دي.. مافتكرش ان وضع خريطة تقنية لتطوير القناه.. حا يضيف اي معلومات او جماليات للطابع..!
انا عارف ان التصميم اتعمل بسرعة لإنقاذ رقبة رئيس هيئة البريد.. و اتعمل من غير تفكير مُتروّي عشان الفضيحة ما تضحّكش العالم علينا..
انما .. صديقي الفنان.. كان لازم يطلب وقت اكتر.. و يصر عليه !
و كان لازم يبقي عارف تماما ان..
"الطريق الي الجحيم.. مفروش بالنوايا الحسنة !"
آخر 10 مشاركات
17th September 2014, 01:22 PM
اصلاح فضيحة طابع قناة السويس بطابع اكثر قبحاًَ
العرض العادي
