مشترك في الواحة 3 سنين وملوش ولا مداخلة

[Sonic]

علي الرغم إني مشترك في الواحة بقي لي بتاع 3 سنين إلا إني ماليش هناك ولا مداخلة لأني باحب أقرأ وبس , إلا إني وصلت هنا عن طريق رابط للمنتدي في موضوع عن المنتديات الصديقة و بعد يومين من القراءة هالني ما رأيت من قلة موضوعية في طرح المواضيع و الزبدة كانت في هذا الموضوع الذي تحول إلي هجوم كالعادة علي الواحة ونظامها .

و خصوصاً من الاخ أبو زيد اللي مافيش و لا مداخلة إلا لما يحشر الواحة حشر في كلامه و كلها إتهامات مرسلة لا دليل عليها و لا برهان .

الواحة اللي صاحبها إتحذف له مواضيع و مداخلات و اللي إتنازل بنفسه عن إدارتها علي عكس ما إحنا شايفين هنا , الاخ أبو زيد بيتعامل مع عقولنا زي ما بيتعامل في مواضيع السعودية و يرسل كلام عن ديكتاتورية و إنفراد بالقرار علي الرغم إني عارف إنه بره إدارة الواحة من زمن و إنه ما يعرفش أي حاجة عن كواليسها و لكن كما عودنا في دفاعه , مجرد كلام مرسل

الغريب إن عندنا مثال واضح عن سياسه حضرته لما تغاضي عن إنتهاك للقانون بإعادة المحذوف و حتي ما قدرش يحذفه تاني في مثال علي إن المواضيع بتمشي بالمزاج و ليس بالقانون , بس كل شوية يقول لنا الواحة وحشة و الواحة مافيهاش قانون مع إن صاحب المنتدي نفسه بيتقفل له مواضيع و يتحذف له مداخلات ده غير تنازله عن الإدارة إيماناً منه بالديموقراطية اللي الناس اللي ماقدرتش تمشي كلامها هناك شايفاها حاجة تانية

الغريب إن البعض بيقول إن المنتدي هنا أعلي درجة من الحرية !!!!! , مع إني شفت إن أعضاء كتير إتوقفت هنا بس لانها بتنتقد المنتدي , و الاغرب هو رؤية إن الواحة لا تتمتع بنفس الحرية في حين إني أتحدي إن يكون أي حد إتوقف في الواحة لأنه إنتقد الواحة زي ما حصل في المنتدي هنا

مع إن النقد هناك بأشوفه لاذع و متجاوز في كثير من الاحيان و مع ذلك لم يحدث و لو لمرة إن عضو إتوقف بسبب نقده للمنتدي زي ما عملتوا هنا و نرجع نقول لا يجرؤ أحد في المنتديات الأخري !!!!!

و نروح بعيد ليه , شوفوا إيقافي و إنتم تعرفوا الفرق .

حتي لو نقد الواحةفي الواحة كان جارح ماحدش يقدر يوقف صاحبه علي عكس نقد محترم هنا إتوقف أصحابه بسببه و الاخ أبو زيد يرجع يقول لك هناك فارق !

لو عدينا كام مرة ذكر فيها إسم الواحة هنا و كلها بالسلب و كلها إفترا و كذب و كلام بلا دليل هنعرف الفرق بين هنا و الواحة

الواحة اللي فيها نظام ديموقراطي بجد نتمني نعيش و نشوفه في حياتنا الواقعية , الواحة اللي مواضيعها كلها ثقافة و تنوير, مش إزيك و إزي الولاد و إنت عامل إيه النهاردة و كركر و هأهأ هأهأ .

الواحة اللي فيها شفافية بجد و إحترام بجد , و رقي بجد, مش ( تفتيح ) علي العام بشكل لا يقبله أي واحد بيحترم نفسه و اللي يغيظ إن أبو زيد بيسمي الفضيحة دي شفافية

خليكو في حالكو و مش كل شوية تجيبوا سيرة منتدي محترم و متفوق زي الواحة و بعدين ترجعوا تتهموا الناس هناك إنها بتلاحقكم مع إن إسم المطاريد مش مكتوب مرتين علي بعض هناك

خليكو في حالكو عشان لسه قدامكو كتير قوي علي ما توصلوا لنص مستوي الواحة في نظامها أو في ثقل مواضيعها و أعضاءها

و يا ريت يا أستاذ أبوزيد تبطل تذكر الواحة بالسلب لان ماحدش بقي يصدق كلامك و إذا كان في 2 إنسحبوا من الإشراف هناك ففي قدامهم 15 إستمروا و بيفتخروا زي ما أنا شايف بتواجدهم في وسط راقي و متميز و به حرية حقيقية و ليس دعائية .

طوروا منتداكم و حلوا مشاكلكم اللي بقت موضع سخرية من طوب الأرض و حاولوا ترقوا بمواضيعكم شوية بدل الدردشة اللي الواحد شايفها دي و إعملوا نظام بجد و دستور محترم مفصل بدل السطرين اللي ممكن نجيبهم يمين و بعدين نجيبهم شمال كل ما المزاج يحكم و شيلوا الواحة من دماغكم و بلاش إفترا و إدعاء بأشياء لا وجود لها إلا في عقولكم إنتم بس و بلاش كل شوية تجيبوا سيرتها لأنكم أكتر ناس بتزعل و توقف أعضاء و تفضح الدنيا لما حد يجيب سيرتكم .