في رأيك ... ماذا تمثل الصورة في الملف الشخصي لكل عضو

[Muhammad Zidan]

الصحف المصرية والعربية

صباح الخير جميعاً

أثناء مروري على بعض المواضيع في المنتدى ومشاركات المطاريد فيها

لقيت إن أغلب المطاريد حاطين صورة رمزية ليهم

يعني بدرية مثلاً رافعة العلم وماشية .. يعني وطنية وشغوفة ببلدها

وضبش كان الله في عونه

وحشيش كل ما أشوف صورته أفتكر برامج الأطفال ... يعني راجل فكاهي مثلاً

وجلاكسي حاسس إنها بتموت في الأطفال .. وبتحب شياكة الأطفال

وابتسامة مش فاهم .. لكن فيها غموض

وهوبة .. واضح إنها كمان بتحلم بالأطفال ..

هل الصور دي بتمثل جزء من شخصية صاحبها؟؟

واللا هي انعكاس حقيقي لطبيعة صاحبها برضه؟؟

وليه اختار الصورة دي بالذات؟

عاوز أقول إن الصورة دي لابد يكون لها رمز أو معنى في حياته !!!

ياريت كل واحد يقولنا رأيه في الصور الرمزية للأعضاء اللي يقدر يخمن مقصدهم بالصورة...

 

[قائد مدفعيه المطاريد]

بدريه هدت حيل البنت اللى ماشيه و شايله العلم, الغريب انى كل ما ادخل القيها بردو ماشيه قولت بمكن بالليل لو دخلت القيها نامت و لا قاعده بتاكل سندوتش بردو لقيتها ماشيه, حرام عليكى يا بدريه اديها فرصه تستريح, الرحمه حلوه بردو

 

 

[MFaisal]

اقتباس المشاركة الأصلية كتبت بواسطة Muhammad Zidan وضبش كان الله في عونه

متهيألك الصورة ولا بتعبر عن شخصيتى ولا يحزنون .. أنا أصلا لازم أغير الصورة الشخصية كل فترة .. وعلشان خاطرك ياعم محمد هغيرها ..

وبعدين روح بص على صورة الأدمن 1 أو 2 مش فاكر

 

 

[MFaisal]

أهى الصورة اللى أنا حاططها دلوقتى دى فعلا هى اللى بتعبر عن شخصيتى فعلا وباستخدمها فى كل المنتديات .. كل اللى فيها أنى كنت عايز أغير شوية

 

 

[ابتسامــة]

اقتباس المشاركة الأصلية كتبت بواسطة Muhammad Zidan وابتسامة مش فاهم .. لكن فيها غموض

غموض مين دي طفلة ونايمة وبتحرك رجليها وبتغني ماما زمانها جاية .... واللي قبلها كانت صورة طفلة أيضا بتشاور بإيدها ولابسة تاج زغنن كده إدوهولها في المدرسة لما كانت بتمثل مسرحية سنو هوايت في K G ....


بالنسبة لي أنا من هواة تغيير الصورة الرمزية .... وغالبا اختارها بالصدفة يعني صورة تعجبني أحطها بدون ما تكون بتمثل شيء معين ....أكيدأحيانا الحالة النفسية بيكون لها تأثير ... يعني لما أكون في مود كئيب شوية هتلاقي بأه صور دموع وظلام وشمع مطفي .... لما يدخل الشتا هتلاقي صورة مطر وثلج وحاجات كده .... لما المود الرومانسي يشتغل هتلاقي قلوب وورد والدنيا ربيع .....

بالنسبة لباقي صور الأعضاء مش بركز في معناها أو ليه حاطينها بقدر ما بيرتبط لقب العضو عندي بصورته الرمزية خاصة لو مش بيغيرها ... بالتعامل مع الأعضاء قد يتكشف سر اختياره لصورته الرمزية ... مثلا مدام توتا عرفت انها بتعشق القطط ففهمت سبب وضعها لصورتها ... وهكذا .....


تحيتي

 

 

[galaxy]

انا بحس في الصورة اللي اخترتها معني للبراءه وللخجل........وش البنت برئ جدا ودا بحبه وكمان عينيها خجوله جداوفيها حياء برئ وتحسها بتنطق ببراءة ودا بعشقه جدا في عيون اي حدكبير او صغيربصراحه ...............اما عن حبي للاطفال .......مين مش بيحبهم ...لكن مش دا سبب اختياري للصورة.تقبل تحياتي

 

 

[هيثم نافع]

أنا كده كويّس ...

 

 

[Badroora]

مخدتش بالى ان اسمى مكتوب سورى ع التأخير

شوية فلسفة كدا ع الماشي

انا من الصعب اجد صورة تمثلنى فعلا عندى صعوبة شديدة جدا عند اختيار اى صورة معينة لبروفايل لانى اعتقد ان الصورة الرمزية بتعكس كتير عن طبيعة الشخص اوجزء بسيط من شخصيته .
اختيارى للصورة يتختصر عدة اشياء

الاولى ..مصرية لدرجة العشق وعمرى ماكنت ولا هاكون راضيه عن جودى خارجها ..و مقدرش ارجع تانى .

الثانية ..انى اهلاوية واللون الاحمر خلاف الدم بحبه جدا يمكن فى الحقيقة صعب او قليل جدا ان ارتدى زى احمر لكنى احب اراه على اى حد .

الثالثة ..الحركة او المشي ..انا فعلا من النوع المتعب جدا "نفسي" وليس الاخرين ..دائمة الحلم والتفكير فى المستقبل ومش مريحة نفسي ,احيانا باتمنى اكون انسانة عادية اقصي حلمى ه بيت وزوج واسرة وخلاص لكن انا للاسف طموحى اكبر من كدا وبياخدنى من حاجات كتير المفروض تكون فى اولوياتى ولكنى منساقة وراء احلامي واللى بيشجعنى على كدا هو انى باخطط كتير وبانجح الحمدلله فدا بيشجعنى اكتر لامتداد الحلم والطموح وفى الحقيقة مش عارفه نهايته ايه او هيخدنى لفين.
احيانا باقف كدا ارتاح لمدة ثوانى واتخيل نفسي ه انا هابقي فين طيب هاستقر فين طيب هاتجوز مين طيب عيالى هيبقي شكلهم ايه طيب هالحق اربيهم ........الخ وبعدين بلاقى الدنيا بتغمق اروح قلبه على الوش التانى وخلاص وادينى عايشة لما اشوف اخرتى فين .

باختصار فعلا الصورة بتاعتى بتمثل جزء كبير من شخصيتى ..ما عدا حاجة واحدة انا احلى من البنت اللى شايلة العلم

 

 

[قائد مدفعيه المطاريد]

ربنا يرزقك راحه البال و الاستقرار فى كل حياتك ان شاء الله

 

 

[Muhammad Zidan]

اقتباس المشاركة الأصلية كتبت بواسطة ابتسامــة غموض مين دي طفلة ونايمة وبتحرك رجليها وبتغني ماما زمانها جاية .... واللي قبلها كانت صورة طفلة أيضا بتشاور بإيدها ولابسة تاج زغنن كده إدوهولها في المدرسة لما كانت بتمثل مسرحية سنو هوايت في k g .... بالنسبة لي أنا من هواة تغيير الصورة الرمزية .... وغالبا اختارها بالصدفة يعني صورة تعجبني أحطها بدون ما تكون بتمثل شيء معين ....أكيدأحيانا الحالة النفسية بيكون لها تأثير ... يعني لما أكون في مود كئيب شوية هتلاقي بأه صور دموع وظلام وشمع مطفي .... لما يدخل الشتا هتلاقي صورة مطر وثلج وحاجات كده .... لما المود الرومانسي يشتغل هتلاقي قلوب وورد والدنيا ربيع ..... بالنسبة لباقي صور الأعضاء مش بركز في معناها أو ليه حاطينها بقدر ما بيرتبط لقب العضو عندي بصورته الرمزية خاصة لو مش بيغيرها ... بالتعامل مع الأعضاء قد يتكشف سر اختياره لصورته الرمزية ... مثلا مدام توتا عرفت انها بتعشق القطط ففهمت سبب وضعها لصورتها ... وهكذا ..... تحيتي

فهمت والله

معلش البعيد مخه تخين

لكن المشكلة إني دايما بأربط بين الصورة وصاحبها وأسلوبه في الردود والمشاركات ونوعية مواضيعه

لدرجة إني بقيت متخيل شكل كل واحد أو واحدة وأنا بأرد عليه

يعني وأنا بأرد عليكي دلوقتي شايفك بشكل معين وبأحاول أكلمك على أساسه

معلش تقولي إيه بقى مطرقع