Arabic Discussion Forum with a Special Interest in Travel and Immigration

Ehab Salem · 5th July 2010, 08:02 PM

صورتين كمان من إحتفال Canada day .... من تصوير جاري ...

دي صورة إبنه في عربية المطافي ...

من ضمن الإحتفال بيجيبوا عربية مطافي بالطقم بتاعها عشان يشرحوا للأطفال إزاي بتشتغل و يتصوروا فيها

Ehab Salem · 9th July 2010, 04:47 AM

الحمد لله
وصل الوالد بسلامة الله إلى كندا

كانت لحظة اللقاء مفعمه بالأحاسيس الجياشه و الدموع الفياضه ... أيه الكلام الكبير ده ... نجيب محفوظ يا جماعه
طبعا الاولاد كانوا متشوقين جدا و فضلت أحفظهم طول الطريق إن إسمه جدو مش جراند با
أول إنطباع للوالد ...

هو انا ليه مكسوف أقول بابا ... أيه الكلاكيع دي ..
أول إنطباع للحاج

.... إنه كان مبسوط جدا من مطار كندا و إجراءاته و موظفيه و مستاء جدا من مطار هيثرو و إجراءاته و موظفيه
بعد ما سيبنا المطار و خرجنا من الهاي واي و دخلنا ميلتون ... كان اول سؤال له
فين الناس ؟ هو محدش ماشي في الشارع ليه ...
تاني سؤال
هو مفيش عمارات ليه
تالت سؤال
هو مفيش زحمة عربيات ليه
رابع سؤال
هو مفيش كلاكسات ليه
قلت له بابا
صلي ع النبي .. ويلكوم تو كندا يا أبو أسامه

أه نسيت أقول .. إن شنطه من شنطه إتخلفت
و اخدوا العنوان عشان يبعتوها عليه
بابا مكنش عايز يصدق إنهم هيبعتوا الشنطه على البيت و فضل مصمم إني مفهمتش منهم كويس و إن إحنا اللي هنروح المطار نستلمها و فضل يفكرني ... فاكر لما شنطه من شنطك إتخلفت و إنت جاي من قطر مره .. و لما رحت معاك المطار و دخلنا مخزن الشنط المتخلفه و فضلنا ندور وسط أكوام الشنط و نوزع الفلوس على العمال هنا و هنا عشان يساعدونا
أقول له يا بابا ... هنا كندا مش مصر
يقول لي طب فاكر لما أختك كانت راجعه من دبي و شنطه من شنطهم ضاعت و ما رجعتش خالص
أقول له يابابا متخافش .... هيوصلوا الشنطه لحد باب البيت .. و بعدين هو إنت خايف عليها قوي كده ليه .... لو فيها هدومك كلها مش مشكله ... هنتصرف

قالي يا أبني هدومي كلها في الشنطه اللي وصلت بالسلامه
قلت له طب وأيه اللي إنت قلقان عليه في الشنطه التانيه
قالي الجبنه الرومي و البسطرمه و اللب و المشبك و الحلويات الشرقي و ووووو

أتاري بابا .. قصدي الوالد .. كان عامل شنطه كامله للأكل .... 23 كيلو أكل يا رجاله

عمار يا أبهات مصر
المهم الشنطه وصلت اليوم بالسلامه لحد البيت و طبعا بابا كان مذهول ...بيوصولوا الشنطه لحد البيت ... قلت له ويلكوم تو كندا يا أبو أسامه
الحمد لله وصل الاكل كله بالسلامه و تم بفضل الله و توفيقه و ستره تهريب قرص جبنه رومي كامل متكامل زنة 12 كيلو و خرطتين أو كوزين بسطرمه زنة الواحد 2 كيلو تقريبا و كام كيلو لب متنوع و شويه تحابيش بقى مشبك على حلويات شرقي على حبشتكانات اخرى
و عمار يا جمارك كندا و يدوم التفويت

الحاج أخد اكتر من صدمه حضاريه في يومين
.... الهدوء .... الكثافه السكانيه المنخفضه ... الكثافه المروريه المنعدمه .... المباني المنخفضه و عدم وجود عمارات .... نقاء الهواء
الصدمه الكبيره .. كانت لما سألني على مكنة قص الحشيش الأليه اللي كنت إشتريتها و حكيتله عليها في التليفون و إني بأستعملها
قلتله رجعتها .. معجبتنيش .... و جبت واحد تانيه بالكهربا
طبعا مكانش مصدق إني رجعتها بعد ما إستعملتها كذا مره
قلت له عادي يا بابا ... ويلكوم تو كندا
ده انا حتى مفكتش المكنه .... خدتها زي ما هيا متركبه و مليانه نجيله مقطعه من تحت و الكرتونه متهربده من رميتها في مية المطر في الجنينه
أخدوها و رجعولي الفلوس و لما سألوني عن السبب قلتلهم ....
I don't like it
طبعا الراجل كان بيضرب كف بكف و يقولي يا أبني في مصر لو إشتريت ..........
قلت له يا حاج إنسى مصر بقى شويه ... مش قلت لك ويلكوم تو كندا

المهم

أخدت بكره الجمعه اجازه .... وهأخده للصلاه في مسجد إسنا في مسيساجا و إن شاء الله بداية من الأسبوع القادم نبدأ الجولات السياحيه

تمنياتي للجميع بالصحه و السعاده و التمتع بصحبة الأهل و الأحباب دائما

الأهلاوي الأصيل · 9th July 2010, 04:57 AM

ألف حمد لله على سلامة الوالد...تحياتي الحارة ليه وإن شاء الله إقامة سعيدة في كندا
فكرتني بموضوع الشنط ده برضه ، شنطي كانت اتأخرت يومين وبعتوهالي لغاية البيت برضه

Dr.Samo · 9th July 2010, 05:26 AM

ألف حمد الله على السلامة للوالد يا باشمهندس
وإن شاء الله يستمتع بالرحلة ويزيد عليكو بركة البيت ويملا كندا بركة
وربنا يبراك لك فى أولادك ويرزقك برهم
تحياتى

شريف محمد · 9th July 2010, 07:33 AM

الحمد لله على سلامة الوالد وربنا ميحرمكوش من بعض ابدا
ومتنساش تحكلنا كل انطباعاته عن كندا

Aquaculture · 9th July 2010, 07:53 AM

حمداً لله على سلامة الوالد و ربنا يباركلوا فى عمره و يفضل حسه معاكوا فى الدنيا

ramyfathalla · 9th July 2010, 08:14 AM

أولا ألف مليون حمد لله على السلامة للحاج و كندا منورة به و بك يا كنج هوبا

ثانيا سؤال تطفلى شوية معلش

ايه هى أنواع الغلاسة اللى الحاج شافها فى مطار هيثرو هل أكتر من مطار القاهرة
يعنى ايه هى الغلاسة اللى الحاج شاف انها over من باب العلم

و ربنا يا رب ينبسط و يستمتع بكندا و بجو كندا و دعواتى لكل الأسرة بألف خير و سعادة

هنداوي · 9th July 2010, 08:14 AM

حمد الله على سلامة الحج
تعيش الجبنة الرومي رغم كل آهات الحموضة

سيف الدولة · 9th July 2010, 09:16 AM

الحمدلله على سلامة الحاج ابو اسامة ووصوله بالسلامة..ربنا يديمو على راسكم ..وان شاء الله تكون زيارة حلوة وينبسط الحاج وأهم حاجة يطمن عليك ..أصل ابهاتنا دايما قلقانين علينا ..ربنا يرحمك يا والدي ..كان يقلق علي ويقول عني لسه صغير(وكان عمري تلاتين سنة !! عشان انا الصغير بين اخوتي ) ..والحمدلله على تفويت الجبنة والبسطرمة ..الا بالحق انا سمعت أنهم أول مرة بس بيفوتوا للمهاجر كم حاجة زي الجبنة..بس بعدين ..مابيفوتوش ..ألف سلامة وإجازة حلوة للحاج بربوع كندا ..

VERDI · 9th July 2010, 10:57 AM

الف حمد الله على سلامة الوالد يا باشمهندس ايهاب
ربنا ما يحرمكوا من بعض
وان شاء الله يقضي وقت ممتع في كندا
تحياتي لحضرتك وللوالد وسلامي له

مواقع هامة وإعلانات نصية
البحث فى القرآن الكريم	القرآن الكريم - الشيخ البنا	الصحف المصرية والعربية	المصحف المرتل المنشاوي	تلاوات نادرة لمشاهير القراء	Pass Medical Exams

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
♥´ من أجمل القصص `♥	أم محمد إيهاب	الأسرة والطفل	413	2nd December 2015 01:39 PM
♥ أنـــــــت لــــــي ♥	مدى	المكتبة	291	16th November 2013 11:07 AM
█▄ ♥ عـقـيـــــدة أهـــــل الـسـنـــــة والـجـمـاعـــــة ♥ ▀█	مسلم	شؤون إسلامية	10	21st September 2012 01:13 AM
█▄ ♥ فضــــــــــل الصحـــــــابــــــــة ♥ ▀█	مسلم	شؤون إسلامية	2	19th January 2009 03:44 PM
█▄ ♥ نصرةً لغزة ♥ ▀█ حملة مقاطعة قناة العبرية [شارك معنا]	مسلم	شؤون عربية ودولية	6	15th January 2009 10:44 AM

Arabic Discussion Forum with a Special Interest in Travel and Immigration

Immigration to Canada, Australia, and New Zealand

Egypt and Middle East Politics, History and Economy

Jobs in Saudi Arabia, USA, Canada, Australia, and New Zealand

عمار يا كندا

♥♥♥♥ عمار يا كندا ♥♥♥♥