رجاء بمناسبة الدعوة لمظاهرات غدا الثلاثاء

[مصرية]

الصحف المصرية والعربية

أتمنى محدش ينزل بكرة في المظاهرات ... اللي بيحصل ده فتنة كبيرة من ضمن الفتن اللي حذر منها الرسول الكريم فيما رواه أبو هريرة رضي الله عنه أن النبي صلى الله عليه وسلم قال:

( سَتَكُونُ فِتَنٌ ، الْقَاعِدُ فِيهَا خَيْرٌ مِنْ الْقَائِمِ ، وَالْقَائِمُ فِيهَا خَيْرٌ مِنْ الْمَاشِي ، وَالْمَاشِي فِيهَا خَيْرٌ مِنْ السَّاعِي ، وَمَنْ يُشْرِفْ لَهَا تَسْتَشْرِفْهُ ، وَمَنْ وَجَدَ مَلْجَأً أَوْ مَعَاذًا فَلْيَعُذْ بِهِ ) رواه البخاري (3601) ومسلم (2886)

المقصود من الحديث إن الفتنة دي اللي يستسلم لها حتسحبه لها والملجأ الوحيد منها هو إن الواحد يكون من القاعدين مش من الساعيين

علشان البلد ومصلحة البلد ياريت لا ننساق وراء الفتنة ونعمل زي ما ربنا قال" (ولنبلونكم بشيء من الخوف والجوع ونقص من الأموال والأنفس والثمرات وبشر الصابرين ( 155 ) الذين إذا أصابتهم مصيبة قالوا إنا لله وإنا إليه راجعون ( 156 ) أولئك عليهم صلوات من ربهم ورحمة وأولئك هم المهتدون ( 157 )) سورة البقرة

الاعتراض بالحشد اللي حيحصل بكرة ده ملهوش غير اتنين سيناريو ... حرب أهلية أو انقلاب عسكري والاتنين ربنا يحمي البلد ويحمينا منهم

فليكن دعائنا "إنا لله وإنا إليه راجعون" .... ربنا يحمي مصر ويبعد عننا وعنها الفتن ... آمين

 

[Dr.Samo]

حمد الله على السلامة يا دكتورة
وانا اؤيدك بشدة
ياريت ماحدش ينزل بكرة فى المظاهرات ... كفاية فتن
لا اخوان ولا ليبراليين ولا سلفيين ولا علمانيين ولا معتدليين
يا اخوانا كلنا مصريين .....والدم المصرى كله حراااااااااااام

 

 

[Eng Hesham]

الحل الوحيد هو تراجع مرسى عن اعلانه الكستورى

غير كده يبقى ملهاش حل تانى

وكل نداءات السلميه مش هاتجدى اطلاقا

 

 

[abo_hammad]

كل المسلم على المسلم حرام ,دمه و ماله و عرضه .

و لكن يا دكتور لما نلاقي الكيد و المكر برئيس -لم اكن مقتنع به بدرجة كبيرة و لكنه اثبت لكل ذي لب العكس- منتخب و يعمل بصدق لصالح هذا البلد و يتخذ القرارات التي كان يعيب عليه معارضيه عدم اتخاذها و لما يخدهل ينزلوا ضده , و بعدين اسمع هتافات التحرير يتبين لك ان الموضوع مش موضوع اعلات دستوري او غيره ,يعني هما نزلوا قبل الاعلان بايام و احتكوا بالشرطة و المولوتوف و اغتصاب الفتيات و غيره بجانب هتاف الشعب يريد اسقاط النظام ,

بعد كل ده بالله عليك منين يجيني قلب اني منزلش ؟؟؟؟

 

 

[Raouf]

انا مع حق التظاهر السلمى . و ضد العنف بكل اشكاله
الناس من حقها تتظاهر و ماتنضربش و ماتضربش " خصوصا الداخلية لانها استوت خلاص كدة فوق طاقتها "
كل واحد ممكن يعبر عن رأيه فى البلد من غير احتكاكات
يعنى معارضين فى التحرير و مؤيدين فى الاتحادية و محدش يتعمد الاحتكاك بالاخر الفكرة امام الفكرة

 

 

[دكتور مهندس جمال الشربيني]

دعوه لموضوعي

مستر "عاوز" وأنـــــــــــــــــــــــــا

كفانا كلام منتديات
وجلوس على الكنبة
زهقنا خلاص من السلبية
وأنه الجبن بعينه
أنا نترك الريس المنتخب البروف مرسي
وحيدا أمام جحافل الفساد
سواء كانوا صبية مغرر بهم
أو إعلاميين يقبضون من فلول النظام المخلوع
أو كانوا فسدة أمثال شفيق وعمرموسي والزند
وتهاني الجبالي
أو كانوا من يديرون العملية الخبيثة من داخل زنازين طرة


خليكم أنتم قاعدين مستريحين على الكنبة

وخلوا الناس الحقيقية والغير متفزلكة
تغير ما بأنفسها بالفعل والعمل وليس بالكلام فقط

وأسترجعوا ما قال الله سبحانه وتعالى
لعلكم تفعلون وبالتالي تفلحون

 

 

[brain]

اطمني يا استاذه مصريه
مافيش حاجه هتحصل بكره
لا حرب اهليه
ولا انقلاب عسكري
و المظاهرات هتعدي على خير
و الحشد مش هيكون زي ما حضرتك متصوره
لا هنا ولا هنا

 

 

[Eng Hesham]

مشاركه جات غلط معلش

 

 

[دكتور مهندس جمال الشربيني]

دعوه لموضوعي

مستر "عاوز" وأنـــــــــــــــــــــــــا

مليونية تأييد الرئيس أمام جامعة القاهرة غدا
25/11/2012
أعلنت جماعة الإخوان المسلمين أن المليونية المقرر تنظيمها غدا الثلاثاء لدعم الرئيس مرسي سيتم تنظيمها أمام جامعة القاهرة بدلا من ميدان عابدين كما كان مقررا من قبل بسبب المخاوف من امكانية وقوع صدام بين انصار الرئيس ومعارضيه‏.‏

 

 

[مصرية]

اقتباس المشاركة الأصلية كتبت بواسطة Dr.Samo حمد الله على السلامة يا دكتورة وانا اؤيدك بشدة ياريت ماحدش ينزل بكرة فى المظاهرات ... كفاية فتن لا اخوان ولا ليبراليين ولا سلفيين ولا علمانيين ولا معتدليين يا اخوانا كلنا مصريين .....والدم المصرى كله حراااااااااااام

الله يسلمك يا دكتور ... ربنا يهدينا جميعا للي فيه الخير

اقتباس المشاركة الأصلية كتبت بواسطة Eng Hesham الحل الوحيد هو تراجع مرسى عن اعلانه الكستورى غير كده يبقى ملهاش حل تانى وكل نداءات السلميه مش هاتجدى اطلاقا

اقتباس المشاركة الأصلية كتبت بواسطة abo_hammad كل المسلم على المسلم حرام ,دمه و ماله و عرضه . و لكن يا دكتور لما نلاقي الكيد و المكر برئيس -لم اكن مقتنع به بدرجة كبيرة و لكنه اثبت لكل ذي لب العكس- منتخب و يعمل بصدق لصالح هذا البلد و يتخذ القرارات التي كان يعيب عليه معارضيه عدم اتخاذها و لما يخدهل ينزلوا ضده , و بعدين اسمع هتافات التحرير يتبين لك ان الموضوع مش موضوع اعلات دستوري او غيره ,يعني هما نزلوا قبل الاعلان بايام و احتكوا بالشرطة و المولوتوف و اغتصاب الفتيات و غيره بجانب هتاف الشعب يريد اسقاط النظام , بعد كل ده بالله عليك منين يجيني قلب اني منزلش ؟؟؟؟

يا جماعة الخير لما الرسول يبقى بيقولنا لما يحصل فتنة زي دي أقعدوا ومتتحركوش وهو من لا ينطق عن الهوى يبقى الأفضل نقول سمعنا وأطعنا

اقتباس المشاركة الأصلية كتبت بواسطة Raouf انا مع حق التظاهر السلمى . و ضد العنف بكل اشكاله الناس من حقها تتظاهر و ماتنضربش و ماتضربش " خصوصا الداخلية لانها استوت خلاص كدة فوق طاقتها " كل واحد ممكن يعبر عن رأيه فى البلد من غير احتكاكات يعنى معارضين فى التحرير و مؤيدين فى الاتحادية و محدش يتعمد الاحتكاك بالاخر الفكرة امام الفكرة

القلق يا رؤوف إن الموضوع بيبدأ دائما سلمي وبعدين يقلب نكد .... دائما النية حسنة وتقلب بلطجة ومولوتوف وحجارة وغاز يقتل البرئ قبل المذنب

حضرتك عارف عندنا في اسكندرية مقر الحرية والعدالة اللي اتحرق في سموحة ده جنب 3 مستشفيات منهم مستشفى للقلب طيب ذنبهم إيه المرضى يموتوا من ريحة الحريق والرعب والحجارة والغاز المسيل للدموع الخانق!!!!!

حق التظاهر مكفول بس مش لما يكون بيهدد الناس كفاية الرعب اللي عند كل الناس في مصر ... محدش حيودي ولاده بكرة المدارس ومعظم الناس واخدين أجازة من أشغالهم ... في مصلحة مين كل ده؟

يبقى ليه ننزل ونسيب فرصة لحد يإذي حد تاني ويبقى الذنب في رقبتنا؟

اقتباس المشاركة الأصلية كتبت بواسطة brain اطمني يا استاذه مصريه مافيش حاجه هتحصل بكره لا حرب اهليه ولا انقلاب عسكري و المظاهرات هتعدي على خير و الحشد مش هيكون زي ما حضرتك متصوره لا هنا ولا هنا

والله قلقانة يا أستاذنا وقلقانة أوي كمان مع إن في حاجة جوايا برضه بتقول مش حيحصل حاجة بس اللي شوفناه يوم الجمعة الماضية مش مطمئن أبدا ... ربنا يستر