المختصر المفيد في نظام الهجرة الجديد لكندا Express Entry

[burner]

الصحف المصرية والعربية

متابع مع حضرتك عشانانا خلاص خلصت ال WES و ال IELTS و جاهز عشان اعمل الابليكيشن
بس للاسف زوجتي النجليزي بتاعها ضعيف و الكلية بتاعتها ما رضيوش يعملولها موضوع الظرف عشان ال WES
يارب بقا درجات ال CRS بتاعتنا تكون معقوله عشان ناخد ITA
دعواتكم

 

 

[علا]

ازيكم يا جماعة
محتاجة مدرس او مدرسة فرنساوي كويس للTEF ومتجرررررررررررب
انا شوفت مدرسة علي النت اسمها حنان عبد المنعم بس انا في الحقيقة معرفهاش لو حد يعرفها ياريت يفيدنا
شكرا ااااااااااا

 

 

[shawi]

اقتباس المشاركة الأصلية كتبت بواسطة علا ازيكم يا جماعة محتاجة مدرس او مدرسة فرنساوي كويس للTEF ومتجرررررررررررب انا شوفت مدرسة علي النت اسمها حنان عبد المنعم بس انا في الحقيقة معرفهاش لو حد يعرفها ياريت يفيدنا شكرا ااااااااااا

للاسف زمان كان فيه كلام على الاسم ده هنا في المنتدى
لا ادري اذا خاصيه البحث ممكن توصلك لحاجه والا لا
واعتقد انها كانت متسجله باكثر من اسم وتم وقف عضويتها

 

 

[sano-ro]

[
ثالثا: يكون معاك اثباتات ورق لكل الحاجات المطلوبة فوق دى:

• شهادات التقييم من WES ليك و لزوجتك او زوجك (المهن الطبية ليهم تقييم مختلف ماعرفش عنه كتير .. ممكن حد من الدكاترة او الصيادلة هنا يفيدكم و ما اكثرهم ما شاء الله)
• شهادات الايلتس او التيف او كلاهما ليكو انتو الاتنين

بعد التحية
لو ممكن اسال بخصوص النقطه دى من كلام حضرتك افهم ان لازم اعمل تقييم على wes لشهادة زوجتى و ايضا لازم زوجتى يكون معاها الايلتس .
لو انا معملتش كده لن يتم قبول الطلب ......
السؤال التانى من فضلك من كلام حضرتك انى مش ببعت اصول الورق ان انا مثلا بسحب الورق اسكانر و يتبعت اتاش .

وشكرا

 

 

[Remon.soliman]

دعوه لموضوعي

مطاريد الكويت

مجهود رائع في انتظار الباقي بفارغ الصبر

 

 

[mr_hyip]

اقتباس المشاركة الأصلية كتبت بواسطة sano-ro [ ثالثا: يكون معاك اثباتات ورق لكل الحاجات المطلوبة فوق دى: شهادات التقييم من WES ليك و لزوجتك او زوجك (المهن الطبية ليهم تقييم مختلف ماعرفش عنه كتير .. ممكن حد من الدكاترة او الصيادلة هنا يفيدكم و ما اكثرهم ما شاء الله) شهادات الايلتس او التيف او كلاهما ليكو انتو الاتنين بعد التحية لو ممكن اسال بخصوص النقطه دى من كلام حضرتك افهم ان لازم اعمل تقييم على wes لشهادة زوجتى و ايضا لازم زوجتى يكون معاها الايلتس . لو انا معملتش كده لن يتم قبول الطلب ...... السؤال التانى من فضلك من كلام حضرتك انى مش ببعت اصول الورق ان انا مثلا بسحب الورق اسكانر و يتبعت اتاش . وشكرا

لازم لكم انتو الاتنين ممكن تروح الكلية معاها حضرتك و تشوف الموضوع

 

 

[Remon.soliman]

دعوه لموضوعي

مطاريد الكويت

ياريت الموضوع ده يكمل بجد لأنه جميل جداً واستفدت من ه جداً

 

 

[eltahan]

لو سحمت استفسار عن WES
ببعت اصول الشهادات ولا ابعتها اسكانر!
كمان لازم اترجم الشهادات ولا هما بيتعاملوا معاها بمعرفتهم !
سوال كمان !
بالنسبه للخبره العمليه عندهم ,, بتتحسب بعد الكليه ولا عادى لو كنت شغال اثناء وانا فى الكليه !
انا خريج بكالريوس مدنى 2015 , وكنت اعمل بمكتب تصميم اثناء الدراسه , هل هيعترفوا بهذه الشهاده

 

 

[M. Yousef]

ياااااااااااااه... معقول شهر و نص عدو كدا!!!
معلش.. ارجو تلتمسولى العذر.. كانت نيتى اكمل كتابة اول ما انزل اجازة.. بس للأسف الدنيا ملخبطة معايا و الروح المعدنية مصدية ع الآخر. دعواتكم

اقتباس المشاركة الأصلية كتبت بواسطة sano-ro [ لو ممكن اسال بخصوص النقطه دى من كلام حضرتك افهم ان لازم اعمل تقييم على wes لشهادة زوجتى و ايضا لازم زوجتى يكون معاها الايلتس . لو انا معملتش كده لن يتم قبول الطلب ...... السؤال التانى من فضلك من كلام حضرتك انى مش ببعت اصول الورق ان انا مثلا بسحب الورق اسكانر و يتبعت اتاش .

زوجتك هتحتاج تقييم WES علشان تاخد النقط بتوعها فى التعليم (حد اقصى 10 نقط) و هتحتاج بردو ايلتس علشان تاخد النقط بتاعتها فى اللغة الاساسية (حد اقصى 20 نقطة).
لو ما قدمتش اى حاجة من دول الطلب مش هيترفض ولا حاجة.. بس مش هتاخد النقط دى.
فعلا بتسحب الورق سكان و جزء منه بيترفع على الموقع اثناء عمل البروفايل و الباقى بعد ما توصلك دعوة ان شاء الله. الكلام دا لبروفايل الاكسبريس انترى. لو بتتكلم على WES بتبعتلهم الورق بالبريد و توصلك الشهادة بالبريد.

اقتباس المشاركة الأصلية كتبت بواسطة eltahan لو سحمت استفسار عن WES ببعت اصول الشهادات ولا ابعتها اسكانر! كمان لازم اترجم الشهادات ولا هما بيتعاملوا معاها بمعرفتهم ! سوال كمان ! بالنسبه للخبره العمليه عندهم ,, بتتحسب بعد الكليه ولا عادى لو كنت شغال اثناء وانا فى الكليه ! انا خريج بكالريوس مدنى 2015 , وكنت اعمل بمكتب تصميم اثناء الدراسه , هل هيعترفوا بهذه الشهاده

موقع WES هتلاقى عليه كل تفاصيل ايه المطلوب. https://www.wes.org/ca/fswp/requireddocuments/
مافيش خبرة بتتحسب مع الدراسة ال Full time. خلى شهادة الخبرة تبدأ بعد التخرج.

رجاء بس نخلى الاسئلة هنا
https://www.almatareed.org/vb/showthread.php?t=672914
او فى توبك المستشار المجانى هنا https://www.almatareed.org/vb/showthread.php?t=15771

و ادعولى افوق و اعرف اجمع البوست بتاع عمل البروفايل.
بالتوفيق جميعاَ

 

 

[M. Yousef]

بدأنا الكلام الجد اهو... مرحلة عمل البروفايل

اخيييييييييراً يا عم..... لقد هرمناااااااااا!!

استنى بس... قبل ما تاخد اول شفطة من كوباية النسكافيه او الشاى بالقرنفل اللى معاك و تشمر دراعك و تبدأ فى البروفايل.. عملت تقييم WES ليك و لزوجتك/زوجك و استلمت الشهادات؟
امتحنت ايلتس (او تيف لو اللغة الاساسية فرنساوى او عاوز درجات لغة تانية) ليك و لزوجتك/زوجك و معاك الشهادات؟ حولت السكور لمقياس CLB ؟
حسبت السكور بتاعك لل FSW و اتأكدت انك مستوفى الشروط؟

لو اجابة اى سؤال من دول (لأ) او (مش عارف/مش متأكد) يبقى راجع المشاركات السابقة تانى ..
لو لسا محتار فى حاجة و مش عارفها... اسأل فى التوبك بتاع

اقتباس المستشار المجانى https://www.almatareed.org/vb/showthread.php?t=15771

او التوبك بتاع

اقتباس كل شئ عن نظام الهجرة الجديد https://www.almatareed.org/vb/showthread.php?t=672914

سألت و لسا محدش رد عليك؟ ممكن يكون سؤالك حد جاوب عليه قبل كدا... استعمل

اقتباس خاصية البحث فى المنتدى https://www.almatareed.org/vb/showthread.php?t=737752

و فى التوبك و انت هتلاقى اجابات جاهزة و سريعة.

خلاص معاك كل حاجة و جاهز؟؟ يبقى يلا بينا.. بسم الله توكلنا على الله .. اللهم وفقنا و يسر امورنا .. اللهم هون علينا ما بقى لنا فى هذا البلد و اخرجنا منه سالمين غير آسفين.. آمين

الخطوة الأولى: عمل ال GC-Key

و دا هيبقى هو وسيلة دخولك لبوابة MyCIC الحكومية و استعمال كل خدماتها. من اول التقديم على الهجرة لحد ما توصل بالسلامة و بعد ما توصل و لما تحب تجيب حد من قرايبك زيارة و لحد ما تقدم على الجنسية و تاخدها بعون الله و تبقى مواطن كندى زى الورد.

1. هنبدأ بالدخول على اللينك دا

https://www.cic.gc.ca/english/e-services/mycic.asp

و ال GC-Key دا هو وسيلة تعريف الكترونية ممكن لو ليك حساب و بتستعمل Online Banking فى بنك كندى زى TD او Tangerine او سكوتشيا بنك او غيرهم تنقل هويتك الالكترونية منهم و تستعملها فى الدخول على MyCIC (دا لو حضرتك كان سبق لك التواجد جوا كندا بداعى العمل او الدراسة) اما لو زى غالبية الناس يبقى هنبدأ نعمله مع بعض.

2. هننزل لتحت نلاقى زرارين لونهم ازرق.. واحد منهم اسمه Continue to Sign-In Partner و دا زى ما قلنا للى عنده هوية الكترونية فى بنك كندى. الزرار التانى هو اللى يهمنا Continue to GC-Key

3. الصفحة اللى هتفتح هتطلب مننا نختار اسم مستخدم و كلمة مرور علشان ندخل... بس احنا ما عندناش و جايين اساسا نعملهم
فهنلاقى تحت كلمة المرور بخد صغير كدا Register for a new GCKey
هندوس I agree و ندخل لصفحة التسجيل
و هنا هنختار اسم المستخدم و كلمة المرور و هنختار 3 اسئلة سرية و اجابتهم علشان لو نسينا كلمة المرور. اول سؤال سرى اختار اللى يعجبك من اللستة و السؤالين التانيين ثابتين. شخص مميز و تاريخ مميز من حياتك. و طبعا مش لازم اقول قد ايه ضرورى ما نكتبش اى كلام وننساه لأن لازم هيجى يوم و نحتاجه. زى ما قلنا ال GC-Key دا شغال معاك لحد الجنسية.

4. بعد ما يعذبنا شوية ما بين اسم مستخدم مكرر و كلمة مرور مش عاجباه و وجع الدماغ المعتاد ... هنوصل اخيرا اننا نخلص و نعمل continue
و دا هيرجعنا لصفحة MyCIC
MyCIC Terms and Conditions

الخطوة الثانية: عمل اكاونت MyCIC

1. طبعاً ندوس I Accept و نوصل لصفحة Enrol for a MyCIC account
دخل الاسم الأول و الأخير (زى ما مكتوبين فى الباسبور) و اعترف انك اكبر من 16 سنة و اديهم ايميلك (يفضل ايميل منفصل مخصص ليهم او لو عندك ايميل مخليه للحاجات المهمة فقط ممكن تستعمله.. بس اكيد بلاش الايميل بتاع الفيسبوك و المنتديات و اللى بيتهرى رسايل دعائية و مليان باى كلام فاضى)

2. بعد كدا هتختار 4 اسئلة سرية تانيين و اجاباتهم (اه.. الموضوع مش هزار) بس الفرق هنا هيسيبك انت تكتب الأسئلة اللى على مزاجك و اجاباتها. الفرق التانى ان دول مش بس ساعة استرجاع الباسورد لو نسيته.... لأ خالص
ال 4 اسئلة دول هيحدفك بواحد منهم عشوائيا كل مرة تيجى داخل على اكاونت MyCIC بتاعك او تعدل فى ابلكيشن او تحذفه/تلغيه. طبعاً لازم تختار اسئلة و اجاباتها ما تنساهاش و إلا.....

3. بعد ما تدخل الاسئلة و الاجابات و تعمل Continue اخيرا هيوصلك للصفحة الرئيسية للأكاونت بتاعك
زى ما انت شايف .. من هنا تقدر تعمل حاجات كتيييير ... و هنا هتشوف بردو حالة اى ابلكيشن لأى حاجة من دول.

الخطوة الثالثة: انشاء ابلكيشن الـ EE

لو نزلنا تحت خالص هنلاقى جدولين فاضيين: اول واحد هيبقى فيه اى ابلكيشن شغالين فيه و لسا ما عملنالوش Submit علشان نعرف نرجع له نكمل شغل فيه ف اى وقت. و لو فيه اى مشكلة و عاوزين نلغيه ممكن نعمل له Delete و نبدأ واحد جديد. و ف كل الأحوال اى ابلكيشن عدا عليه 60 يوم و ما اتعملوش Submit هيتلغى لوحده. خلى بالك!

الجدول التانى هنلاقى فيه اى ابلكيشن عملناله Submit و حالته وصل لفين ... و ممكن بردو ندخل منه نعدل اى بيانات عملنالها Submit قبل كدا. زى مثلا امتحنت ايلتس و جبت سكور اعلى و عاوز تحطه عشان يحسب لك السكور الجديد فى البوول

1. طبعا اللى يهمنا دلوقت هو زرار Express Entry
اول ما هندخل هنلاقيه طلب مننا personal reference code .. ايه الكلام دا يا عم الحاج؟؟ ما اتفقناش على كدا
ما تقلقش.. فاكر الحتة دى من المشاركة اللى فوق؟

اقتباس المشاركة الأصلية كتبت بواسطة M. Yousef و فى كمان ال come to Canada tool هنا https://www.cic.gc.ca/ctc-vac/ee-start.asp و دى ليها اكتر من ميزة و عيب ف نفس الوقت.. انها بتعمل كل حاجة .. بتحسب سكور ال FSW و سكور ال EE. و بعد ما بتخلص بتديك النتيجة و بتديك معاه reference code . الكود دا مفيد لو انت كنت بتكتب بياناتك الحقيقية و الكاملة انك ممكن تستخدمه فى عمل بروفايل الاكسبريس انترى EE و توفر على نفسك ادخال البيانات من اول و جديد (فى خلال 30 يوم فقط.. بعدها الكود هيتلغى اوتوماتيك سواء استعملته او لأ). لكن ممكن لو مش عاوزه خلاص انساه ولا كأنك شفته. عادى و ابدأ من الأول و جرب بيانات تانية. و ممكن فى كل الأحوال تعمل بروفايل ال EE من غيره اساسا. عادى ما تخليهوش يعمل لك ازمة خالص.

لو كنت استعملت come to Canada tool و معاك الكود... زى الفل مش هتحتاج تعيد البيانات اللى دخلتها هناك ... دخل الكود و دوس Continue
هيوديك على صفحة شبه اللى ظهرت لك قبل كدا مكتوب فيها Based on your answers, you appear to be eligible for Express Entry
هتكمل و تدخل لصفحة Creating your profile و من هنا تبدأ رحلة ادخال باقى البيانات و تكمل البروفايل

2. لو نسيت الكود او ضاع منك او صلاحيته خلصت او ما استعملتش الأداة دى خالص... مش مشكلة
زى الباشا انزل لتحت و دوس على زرار Determine your eligibility and complete an online express entry profile و هو هيوديك على نفس الأداة تدخل البيانات.

اثناء ادخال البيانات بعد ما بتجاوب كل سؤال و تدوس Next اجابتك بتتخزن و ممكن تخرج فى اى وقت و ترجع من غير ما تعيد كل حاجة من الأول.. ف ما تخافش لو ما عندكش وقت تعمل كل حاجة مرة واحدة او بطارية اللابتوب هتفصل او فى البيت و الكهربا قطعت او الولاد بيلعبو حواليك و فجأة وقعوا كوباية الشاى بالحليب اللى انت نسيتها جنبك دى على الكمبيوتر و الشاشة ضلمت ... هترجع تلاقى كل اجاباتك موجودة مش مشكلة. مشكلتك بس هتكون تصليح الكمبيوتر اللى اتحرق دا

و بردو فى اى مرحلة افتكرت انك دخلت حاجة غلط او عاوز تغير اجابة سؤال من اللى خلصتهم ممكن عادى تدوس Modify My Answers من الزراير اللى فوق هيفتح لك صفحة فيها كل الأسئلة اللى انت جاوبتها. شوف الاجابة اللى عاوز تصلحها و هتلاقى جنبها رمز قلم رصاص صغير.. دوس عليه هيوديك للسؤال دا. صلح الإجابة و اعمل نكست هيخزن اجابتك الجديدة و يرجعك تانى للسؤال الأصلى اللى كان عليه الدور.

3. بعد ما تكمل ادخال البيانات فى أداة التقييم سواء جاى بريفرنس كود او بدأت من الأول... هتوصل لصفحة فيها 6 Forms زى الفورم اللى كنا بنملاها و نطبعها ورق و نبعتها بالبريد فى النظام القديم

هتملا كل فورم منهم بالبيانات المطلوبة .. هتلاحظ ان فى حاجات منهم هو ملاها لوحده من البيانات اللى انت دخلتها قبل كدا. و بعد ما تخلصهم كلهم و يبقو Complete هتلاقى تحت ظهر زرار Continue

4. هنا هتوصل لمرحلة انك تمضى على الأبلكيشن بتاعك.. الكترونياً طبعا
هتختار I Agree للجزئين و بعد كدا تكتب اسمك (زى الباسبور كالعادة) و تجاوب على السؤال السرى العشوائى اللى هيظهر لك من الأسئلة بتاعتك و تضغط Sign و بعدها Transmit.

هتطلع لك صفحة تهنيك على الإنجاز اللى انت عملته
دوس على Exit Questionnaire و ارجع للصفحة الرئيسية.. و هنا هتكون سعيد لما تلاقى ان الأبلكيشن بتاعك اتنقل من الجدول الأولانى للجدول التانى و اخد Application Number.

فى حالة الرغبة فى تعديل اى بيانات تم ادخالها قدام الأبلكيشن هتدوس على Check status and messages هيدخلك لتفاصيل الأبلكيشن .. تحت خالص فى الصفحة هتلاقى جدول خاص بكل المراسلات اللى هتبعتهالك CIC بخصوص الأبلكيشن دا. كل ما يبعتولك رسالة هتلاقيها هنا و قدامها الحالة بتاعتها اذا كنت قريتها ولا لسا. و مع كل رسالة جديدة هيبعتولك ايميل عنوانه You have a new message in your MyCIC account for application:##### يقولك فيه لو سمحت بص على الأبلكيشن و شوف عاوزين نقولك ايه! تحت الجدول بتاع Correspondence دا هتلاقى زرار View Submitted Application... و دا اللى هيوصلك للفورم اللى انت مليتها لو حبيت تعدل فيها او تضيف امتحان جديد مثلا او تغير رقم الباسبور لو جددته او اى حاجة محتاجة تعديل. مع ملاحظة ان لو الأبلكيشن طلع not eligible يبقى كدا خلاص.. انساه و اعمل واحد تانى. مش هتعرف تعدل فيه و مش هتلاقى حتى قدامه زرار Delete زى ما كان فى الجدول الأولانى. بس عادى.. ما تقلقش من كدا.. اعرف بس ايه سبب الرفض و ابدأ ابلكيشن جديد من اول الخطوة الثالثة.

الخطوة الرابعة: تفعيل الأبلكيشن

المفروض دلوقت تكون حضرتك Eligible بس للأسف لسا البروفايل بتاعك ما دخلش البوول
هتلاقى قدام Application/profile status خانة فاضية.. لما الخانة دى يتكتب فيها Open يبقى انت كدا تمام

طيب ليه هيا مش Open؟
علشان لسا حضرتك ما كملتش شروط البروفايل.. لازم علشان يكمل:
تديهم رقم شهادة ترشيح المقاطعة (لو عندك) و انت ما دخلتوش..
او لو معاك عرض عمل مدعم ب LMIA و لسا ما قلتش (او عرفت تجيبه بعد ما عملت الأبلكيشن) ...
او آخر حاجة هى انك تسجل فى الجوب بانك.

و هتتأكد من كدا لما تبص على خانة Job Bank Registration هتلاقيها Pending... لما تخلص تسجيل الجوب بانك هتتحول ل Accepted و بكدا يبقى البروفايل بتاعك اكتمل.

ما تقلقش ... هما مش هيسيبوك محتار ... بص تحت فى جدول المراسلات هتلاقى رسالة عنوانها Express Entry profile received - Next Steps – JobBank
دوس عليها هيفتح تحتها سطر To view this message click here
و دا هيعمل دوانلود للرسالة على جهازك فى شكل ملف PDF

فى الملف دا هنلاقيهم بيهنوا سيادتك انك ممكن تتقبل فى نظام الإكسبريس انترى... بس علشان تدخل ال Pool محتاج تسجل فى الجوب بانك.
و لو نزلت تحت هتلاقيه جابلك لينك التسجيل على طول علشان يقصر عليك المشوار

بس الأهم من لينك التسجيل الرقمين اللى مديهم لك:
رقم الأبلكيشن (و دا نفس رقم الأبلكيشن المكتوب برا) your Express Entry profile number
و رقم التأكيد اللى هتربط بيه بين الأبلكيشن دا و بين اكاونت الجوب بانك (الرقم دا غالبا بيكون آخر 4 ارقام من اليمين من رقم الباسبور للمتقدم الرئيسى)

و هى دى الخطوة اللى فاضلة.... و اللى هاتكلم عنها فى المشاركة الجاية بعون الله

و كالعادة ... تحياتى و بالتوفيق ليكو جميعاً ...
انا نزلت الجزء دا قلت الناس تستفيد بيه دلوقت احسن ماهو مستنى يكمل الجزء بتاع الجوب بانك... و يا رب بس ما استانش شهر و نص كمان على ما اعرف اكمل احسن الناس هتحدفنى بالطماطم و البيض بعد كدا :)