كندا ..بداية ونهاية

[znaty]

بسم الله الرحمن الرحيم
اخواني الاعزاء
البعض يعرفني هنا والبعض الاخر لا
لذلك سريعا ..احب اوضح لكم خلفية بسيطة عن التوبيك دة
حلقات التوبيك دة تمت كتابتها لاول مرة في منتدي محاورات المصريين ..اثناء حدوثها تقريبا او بعدها بزمن قصير
ولكن نظرا للتغير الواضح في سياسة المنتدي ده ..وتحوله الى شيئ اشبه بالجرائد الحكومية ..وتحول مشرفيه الى مجموعه xxx..كما ان التوجه العام لهذا اللمنتدي اصبح مقلق ..بالاضافة الى افتقاد كثير من مشرفيه xxx ( الا ما رحم ربي )..ومن الواضح انه لا تهمهم اراء الاعضاء او مصالحهم.
ولاسباب اخري عديدة لا داعي لذكرها هنا..وبعد نصائح الكثير من الاخوة الاعزاء ..كما اني تعرفت على الكثير ممن اعتز بمعرفتهم كثيرا ..هناك منهم من لا يزال على طريق الهجرة ..وما زال يحتاج مساعدة من سبقوه ..
لذلك ..بعد اذن ادارة منتدي المطاريد ..اود ان انقل تجربتي الشخصية هنا حرفيا ...وبعدها استكمل هنا تساؤلات الاخوة سؤاء عن الهجرة مرحلة التقديم او اعدادات السفر حسب مقدرتي طبعا..
وان شاء الله ..سأعمل على تحديث التجربة كلما حدث فيها جديد

اشكركم كثيرا

زناتي

 

[astrophy]

اقتباس المشاركة الأصلية كتبت بواسطة znaty بسم الله الرحمن الرحيم اخواني الاعزاء البعض يعرفني هنا والبعض الاخر لا لذلك سريعا ..احب اوضح لكم خلفية بسيطة عن التوبيك دة حلقات التوبيك دة تمت كتابتها لاول مرة في منتدي محاورات المصريين ..اثناء حدوثها تقريبا او بعدها بزمن قصير ولكن نظرا للتغير الواضح في سياسة المنتدي ده ..وتحوله الى شيئ اشبه بالجرائد الحكومية ..وتحول مشرفيه الى مجموعه xxx..كما ان التوجه العام لهذا اللمنتدي اصبح مقلق ..بالاضافة الى افتقاد كثير من مشرفيه xxx( الا ما رحم ربي )..ومن الواضح انه لا تهمهم اراء الاعضاء او مصالحهم. ولاسباب اخري عديدة لا داعي لذكرها هنا..وبعد نصائح الكثير من الاخوة الاعزاء ..كما اني تعرفت على الكثير ممن اعتز بمعرفتهم كثيرا ..هناك منهم من لا يزال على طريق الهجرة ..وما زال يحتاج مساعدة من سبقوه .. لذلك ..بعد اذن ادارة منتدي المطاريد ..اود ان انقل تجربتي الشخصية هنا حرفيا ...وبعدها استكمل هنا تساؤلات الاخوة سؤاء عن الهجرة مرحلة التقديم او اعدادات السفر حسب مقدرتي طبعا.. وان شاء الله ..سأعمل على تحديث التجربة كلما حدث فيها جديد اشكركم كثيرا زناتي

منور يابشمهندس التوبيك

منتظريين مشاركاتك المتنوعة واكيد تجربتك هتثرى المنتدى

 

 

[مونتريال اليكس]

باشمهندس زناتى
طبعا الجمبع يعرف حضرتك -- وانا كنت متابع توبيك حضرتك على المحاورات --الذى ارجو الا يتكرر بنفس الشكل هنا -- حيث انة وصل الى 90 صفحة تقريبا -- والذى يريد ان يستفيد بتجربة حضرتك يتوة وسط كم التعليقات -- حيث انك تتذكر انة خلال اربع ساعات فقط كان الموضوع وصل 4 صفحات -- من خلال تعليقات تسجيل المتابعة والسلامات وهكذا --

ولذلك ارجو من الاخوة الاعضاء هنا تترك الاستاذ زناتى يسرد رحلتة ( القصيرة ) الى كندا كاملة ( ويفضل ان تكتب بلون مختلف عن باقى الاعضاء الاحمر مثلا )

حتى يستطيع القارىء الجديد انة يستفيد من الموضوع الاساسى وبعد كدة يكون الجزء الثانى هو النقاش

 

 

[ايجيكويب]

اقتباس المشاركة الأصلية كتبت بواسطة مونتريال اليكس باشمهندس زناتى طبعا الجمبع يعرف حضرتك -- وانا كنت متابع توبيك حضرتك على المحاورات --الذى ارجو الا يتكرر بنفس الشكل هنا -- حيث انة وصل الى 90 صفحة تقريبا -- والذى يريد ان يستفيد بتجربة حضرتك يتوة وسط كم التعليقات -- حيث انك تتذكر انة خلال اربع ساعات فقط كان الموضوع وصل 4 صفحات -- من خلال تعليقات تسجيل المتابعة والسلامات وهكذا -- ولذلك ارجو من الاخوة الاعضاء هنا تترك الاستاذ زناتى يسرد رحلتة ( القصيرة ) الى كندا كاملة ( ويفضل ان تكتب بلون مختلف عن باقى الاعضاء الاحمر مثلا ) حتى يستطيع القارىء الجديد انة يستفيد من الموضوع الاساسى وبعد كدة يكون الجزء الثانى هو النقاش

ايه ال خلاها قصيرة ( انا اعرف انا البداية فى الموضوع هو المعوقات ال بتقابلنا وال بتطلع فى دماغنا فكره الهجرة - طبعاً بأستثناء فكره ان الواحد عاوز يتزوج من اجنبيه - والنهاية معروفة تحت الجليد الكندي بعد عمراً طويل انا شاء الله ؟
المهم التفاصيل جدا عشان نعرف ايه ال بيقابل المهندسيين لما بيروحوا هناك من معوقات وكذلك اخوانهم من باقى التخصصات عشان نستفيد من التجارب السابقة خاصة لعمل المعادلات والحاجات دي وشكراً

 

 

[alaafrench]

باشمهندس زناتى
تنور فى اى مكان ومستنين خبراتك فى اللاندنج
ومشوار الهجرة عموما
وانا من اول الزباين المنتظرين
وربنا يوفق الجميع

 

 

[omaraziz]

منور المطاريد ياباشمهندس....
وان شاء الله ستجد هنا ماتفتقده...
و انا مع راي مونتريال ان احنا نختصر مواضيع المتابعه و الترحيب قدر الامكان او نحاول قدر الامكان الاستفاده من المشاركه و نخليها متابعه و سؤال في نفس الوقت!!!!!

 

 

[محمود قنديل]

كندا بلد جميلة ورائعة ربنا يوفقنا جميعا ان شاء الله

 

 

[تورونتو]

انا متاكد انه حيكون موضوع ناجح..وبسجل متابعة..

 

 

[znaty]

الحلقة الاولي

نبدا الاول بالاسم


أي هجرة في الدنيا طبيعي تبقي نهاية مرحلة وبداية مرحلة جديدة ..بغض النظر باة مين من المرحلتين احلي وانجح

ممكن فعلا تتفهم انها بداية هجروة كندا وفي نفس الوقت خلاص شكرا على كدة وهاتبقي نهاية فكرة الهجرة ..واللي يفهمها كدة مرعوب من الهجرة وعنده استعداد بديهي للخلعان بدري



وممكن تتفهم انها نهاية حياة الخليج وبداية الحياة الرغدة المستقرة في كندا ...وربنا وفق وتمشي الامور بسلاسة واحلى من اروع احلامك ودة ممكن جدا وحصل كتير

او نهاية الدلع والاستقرار في الخليج وبداية الكفاح والتعب والكد في كندا علشان تعرف تثبت نفسك هناك وتعيش زي الناس العايشة هناك وتشيل الفروق والحواجز بينك وبينهم فتعرف تندمج في مجتمع يختلف كلية عن اللي اتربيت عليه ..ودة هايكلف تعب وجهد ومجهود مضني

وكل يغني بأه على ليلاه

بس بالنسبة ليا ..وانا باختار الاسم ...حسيت ان اللي عملته ده ...بداية ونهاية ...وكل الافكار اللي كتبتها الوقتي جت في دماغي ..وحتى هذة اللحظة انا ماعرفش هاكون تحت أي كاتجوري من دول ..لانه فعلا مهما اجتهدت واخدت بالاسباب فدة فعلم الغيب لسة ...بس اكيد هاتبقي واحدة من التلاته

المهم ..سيبكم من الانطباعات الوقتي لسة ماجاش وقتها

نبدا باسم الله العظيم الحلقة الاولي

الترتيبات والاجرائات

تذاكر الطيران كالعادة والسكن هو اول حاجتين بتفكر فيهم اول ماهتاخد التاشيرة

تذاكر الطيران ماتتعبش نفسك ..اكسيبديا فعلا هيا ارخص واوثق موقع لحجز الطيران

بس انا اختلفت اني اعرفت ارخص الاسعار منها وحجزت عند واحد صاحبي مدير شركة سفريات

الراجل قدام عنيا شال كل الارباح وادهاني بالسعر اللي بيتحاسبوا عليه هما مع الشركة الطيران ورغم كدة اكسبيديا كانت ارخص بخمسين ريال ازاي ماااااعرفش

حجزت على طيران الاتحاد لانها بصراحة كانت افضل برنامج قدامي

دمام – ابوظبي وبعدين ترانزيت 3 ساعات يعني تعتبر مافيش.. وبعدين دايركت تورونتو 15 ساعة

والاحلى من كدة انها كانت بتبدا من الفجر وتنتهي بتوقيت كندا الساعة 4.30 المغرب يعني الرحلة كلها في النهار ودي مفيدة لانها بتستغل اليوم وبتمنع عنك احساس الجيت لاج القاتل اللي جابلي تخلف عقلي وانا راجع

وانا راجع طالع 10 بالليل من كندا و 6 ساعات انتظار وصلت الفجر بردة بعد فجرين قبلها فاتهبلت بصراحة

مهم كمان اوي وانت بتختار الرحلة انك تختار معاد فاضي شوية لان لو الطيارة مليانه في رحلة طويلة دة احساس قاتل ...في حين طيارة فاضية هاتقوم وتروح تتفرش على أي 3 كراسي جنب بعض تريح ضهرك ..تتمشي ..تعملك أي منظر

بالنسبة لهدومك جوة الطيارة طبعا تعتمد على توقيت سفرك ..لو مسافر شتا ..يبقي هاتلبس ثيرمال وقميس او بلوفر خفيف ومعاك في شنطة على الطيارة بلوفر تاني تلبسة لما تنزل وجوة الشنط فرو دب والا حاجة وع الكوفية والجوانتي والايس كاب قبل ماتخرج تتلسع من البوابة

وحذاري تلبس شراب تخين لو مسافر دايركت علشان رجليك هاتورم من القعدة ومقاس رجلك هايبقي 90 عاوز جزمة تفصيل لا مؤاخذة

لو مسافر صيف يبقي عادي بقة كله محصل بعضة

..بدات الرحلة ظريفة ومافيش أي مشاكل وبعد ساعات طويلة وصلنا تورونتو بفضل الله ..قبل ما الطيارة توصل بساعة تقريبا وزعوا علينا ورق الجمارك

كل اسرة بتملا ورقة واحدة تتعهد فيها انك ماعكش حاجة ممنوع هاو زيادة عن الحد المطلوب زي اكتر من 10 الاف دولار او 200 سيجارة ا واو ليستة عبيطة كدة مالناش فيها

وبعدين نزلنا منها مشينا ورا الناس بتاع 10 دقائق لغاية ظباط الجوازات

ظابط الجوازات بياخد منك الباسبورات ويختمها وياخد منك ورقة الجوازات يختمها ويسالك الفلوس اللي معاك قد ايه

اوعي تقول اكتر من 10 حتى لو اسرتك مليون واحد

هو مابيسالش على فكرة انت المفروض تجيب كام والا الكلام دة خالص

بس فرضنا فرضا يعني انه سال

ببساطة مافيش مطار في الدنيا يسمح بسفر راكب معاه اكتر من 10 الاف دولار

وماتديش معلومات اكتر من كدة الا لو سالك

فرضنا جدلا سالك ولو اني متاكد مليون في المية انهم موش هايسالوا بس علشان اجاوب الاستفسارات اللي ممكن انتوا تفكروا فيها الوقتي ..طب وبقية المبلغ ..قوله معايا كريدت كارد فيها رصيد ببقية المبلغ وبس خلاص

الحكمة من كدة ان الكلام دة هايتسجل ..وساعة ماتقدم على قرض تعليمي اوساب او الاعانة الاجتماعية الويل فير هايخدوا المبلغ دة في الحسبان ويقل القرض بتاعك

واي مصاصة تجيبها في كندا تحتفظ بفاتورتها علشان لو سالك صرفت فلوسك فين يا حلاوة تقوله جبت بيهم بيبث وادي الفواتير يا اكسلانس

المهم الظابط هايسالك عندك عنوان في كندا ..تفقعه العنوان اللي معاك ..ويستحسن يكون معاك العنوان طابعه كمبيوتر على ورقة بيضا بخد كبير تفاديا للخطا وسهولة في الاستخدام ..هايفرحوا بالحركة دي قوي ..انا قالي ماتش ابريشياتد انك طبعتها كدة

وفي منتهي الذوق والادب والاخلاق العالية اللي ممكن اكتب عنها توبيك لوحدة في البلد دي هايديك الباسبور ويقولك ويلكم انتو كنا ويدلك على مكان ظابط الهجرة

المطار كله يفط تدل النيو اميجرانت يمشوا ازاي ..كانه شغال بس على الهجرة المطار دة ...هاتروح تقف في طوابير قدام ظابط الهجرة

كان عندي راجل هااااااااااااااااادي ورااااااااااااااااااايق خد مني الباسبورات والورقة المكربنة اياها وقعد يتكتك على الكمبيوتر بتاع 10 دقائق واداني الجزء بتاع الورقة اللي يخصني والباسبورات وطبعا طلب مني العنوان بردة وابتسم اويييييي والي ويلكم تو كندا قلته وعلبكم السلام ياخويا ورحمة الله وبركاته

وبعدبن مشيت ورا الاسهم بردة لغاية مكتب تاني خدوا اسامينا وادونا شنطة متحملة بروشورات وكاتالوجات وبلاوي زرقة مافتحتهاش لغاية دلوقتي J

بعدين نزلنا على الجمارك

دول بقة اللي ولا يعرفوا ابوهم ولا بيبتسموا ولا عنده يما ارحميني J

بس بصراحة مع النيو اميجرانت بردة منتهي الذوق

خد مني الباسبورات والبروف اوف لاندنج وورقة الجمارك بتاعة الطيارة

انا كنت مالي استمارة من على النت بتاعة البي 4 دي

قاللي بلها واشرب ميتها موش عاوزينها

وراح هو جاب استمارة من عنده كتب فيها كله تمام من غير مايبص في الشنط ولا يفتحها

وبعدين سالني هاتجيب حاجة تانية بعد كدة

قلتله انا كاتب عريضة على الكمبيوتر في ورقة بيضا

كاتبها بنظام الوصف (ايتم) والسعر التقريبي بالدولار الكندي

قاللي عظيم

بص فيها اوي وبعدين جمع المبلغ اللي فيها وكتبه عنده في الاستمارة وبعدين ختم على الورقة بتاعتي وادهاني تاني

وبعدين اديته صورة كنت مصورها لدهب مراتي كله

قاللي هو الدهب دة معاكم الوقتي ؟

قلتله اه

قاللي وريهوني

شافه وطابقة مع الصورة وقام لاطع الورقة الختم المتين وقالي تقدر تتفضل ومن غير ويلكم تو كندا

وانا كمان من غير السلام عليكم

بس وفجاة

فجاه

فجاه لقيت نفسي واقف في الشارع بره المطار ولاول مرة في حياتي

لاول مرة

اقعد 22 ساعة مادخنش

لاول مرة

هاولع سيجارة ..كنت خرمان مووووت

يتبع يا اخوانا

 

 

[znaty]

الحلقة التانية

خرجنا من المطار وشربت اول سيجلرة خليتني رجعتني مصر موش السعودية ..و رجليا اليمين لفت الشمال واشيل شنطة اوقع التانية ومسخره ..ومراتي قاعده بتضحك عليا
المهم
انا ماكنتش حاجز تاكسي او باص من الاكسبيديا ( بيسموه شاتل ) مع انه ارخص كتير ..بس اخدت بالنصيحة القائلة ان ممكن الحجز يروح عليا في حالة اني اتاخرت في الطلوع
كدة يتبقي خيارين
تاخد تاكسي او تستني باص
او تتصل بالفندق من بره المطار يدلك
انا استسهلت واخترت تاكسي

وقفت زي الشاطر تحت يافطة التاكسي ومستني
وناس كتير وقفة
كل ما ييجي تاكسي الاقي واحد اتخطاني من غير ما يتكلم ويهجم على التاكسي

لغاية ما جه راجل كبرة كدة محترم وقاللي شكلك جديد
قلتله اه لا مؤاخذة
قاللي طب اقف في الطابور
ودة اول درس اتعلمته في كندا
كل حاجة واي حاجة بطوابير ومن غير مزاحمة وبمنتهي النظام
اتاري الناس اللي واقفة متبعترة دي كلها على الرصيف واقفين طابور
كنت هاقع من طولي لما عرفت دوري فين
ايييلمهم
خت تاكسي لداون تاون
اي تاكسي في المطار سعره ثابت والبلد مافيهاش فصال
هما 50 دولار
وهنا نبدا عن اختيار الفندق

في اختيار الفندق باة ماتعتمدش على اكسبيديا
افضل موقع لاختيار الفنادق في العالم هو موقع : https://www.tripadvisor.com/
دي بصراحة نصيحة غالية للكوتش تو
وفيه كمان موقع مهم هو https://travel.yahoo.com/;_ylt=Aogb8hpMRC.DAZc5cmvWQQ8J8b8F
ياهو ترافيل من الاخر يعني
بس الاولاني اوقع
تريب ادفايزور هايرتبلك الفنادق صح وحسب رغابات
والنقط اللي تشوفها وانت بتختار
1- الموقع
موقع فندق دلتا تشيلز من الداون تاون بصراحة خلاني خلصت كل مشاويري الاساية قريبة وخطوات
بس اللي اكتشفته بعد كدة انها موش فارقة خالص وانا اللي خسرت باختياريفندق غالي حوالي 120 دولار في الليلة لانك ممكن توصل للي انت عاوزة بالساب واي وموش فارقة كتير
وبعدين مشاويرك كلها بتخلص في خلال يومين تلاتة وبعدين تقدر تنزل براحتك داون تاون مرة او اتنين كفاية

المهم جدا انك تختار فندق على بعد امتار من محطة ساب واي
والساب واي اصلا مقسم البلد بالتساوي من النص
خط رئيسي من الشمال الى الجنوب تحت شارع يانج اشهر شوارع تورونتو وكندا كلها
ولما يوصل للجنوب قرب بحيرة تونونتو يلف ويرجع تاني على هيئة حرف يو ويطلع للشمال تاني بس من سكة تانية
والمحطات قريبة جدا جدا من بعضها يعني موش هاتمشي كتير

والخط التاني الافقي ماسك من اقصي الشرق وسط سكاربروه المنطقة العربية هناك الى اقصي الغرب ودة ماشي تحت شارع بلور تاني اشهر الشوارع هناك وتقاطع الشارعين دول يعتبر بداية الداون تاون وانت نازل جنوبا
واقصي الغرب من قبل اخر محطة في خط بلور تبدا تركب الاوتوبيسات المتجهة الى ميساساجا والمناطق الغربية
شارع يانج دة مشهور لانه قاسم البلد شرق وغرب
يعني اي عنوان تبص فيه تلاقيه مثلا 25 شارع جيررارد غرب ..معناها تقاطع شارع يانج مع جيرراد ..اتجه غربا ودور على 25
في حين لو اتجهت شرقا هتلاقي بردة نفس الرقم 25 جيررارد بس شرق

كذلك مقسم البلد من حيث اسعار السكن ومستوي النضافة والمتعارف عليه انك كلما تجهت غربا كان افضل
ولو ان سكاربروه استثناء حاحكي عليه بالتفصيل فيما بعد
مع انها شرق بس مالهاش علاقة بيانج اوي وليا عندها وقفة طويلة بعدين بالتفصيل
لكن اللي مافيش اي اختلاف عليه
حذاري من داون تاون شرق يانج حذاري
الا اذا كنت لا مؤاخذة من الهلاسين في الارض
وحتى لو كنت هلاس
انت موش قد الناس دي بصراحة
خد بالك مع ان ميساساجا جميلة بردة بس بعيييييييييييييييدة جداااااااااا ولا انصح بيها في فترة الاستكشاف لانك هاتاخد وقت طويل علشان تنزل مشوار ترونتو من غير عربية فيها ساعتين وباصات وساب واي ودنيا

المهم نرجع للفندق
تاني حاجة تختارها بعد الموقع هو اراء الناس فيه
ودي هتلاقيه واضحة جدا في موقع تريب ادفايزور ولازم تاخدها في الحسبان

تالت حاجة هل بيحاسبك على التليفون المحلي والا لا ؟؟ انا اتبهدلت ..هو فري في اي حته انا حاسبني على دولارين الا ربع للمكالمة
والاهم منه النت
طبعا انتوا عارفين اللي حصللي في النت
بس المهم في النت موش المنتدي والايميل في الفترة دي
المهم هو انك لما تحب تدور على اقرب اي حاجة ليك زي مثلا سيرفيس اونتريو اللي بتعمل منها السوشيال نامبر ,او مثلا اقرب موقع علشان رخصة القيادة , او مثلا اقرب فرع لبنك تي دي كندا تراست او بنك نوفا سكوتشيا او بنك مونتريال او اي بنك هاتفتح فيه حسابك ,او مثلا بتدور على اقرب ووال مارت او زيلر ودول من ارخص المحلات واكثرها انتشارا وبيبيعوا من الابره للصاروخ هناك علشان تشتري هدوم تقيلة او تشتري اكل او اي حاجة , او مثلا بتدور على عنوان واحد صاحبك او مزار سياحي ,او بتدور على المكان اللي هاتقدم فيه على المعادلة او جامعه او او او
اول حاجة هاتعملها انك تعمل سيرش في النت او جوجل ايرث وتطلع العنوان بالكامل
ومنه تفتح الخريطة اللي معاك ودي هتلاقيها بسهولة هيا وخريطة الساب واي وخريطة مسارات الباصات وتحدد موقعه عليها وتبدا تعرف انت هاتركب ايه
يعني من غير نت هاتتبهدل
بصراحة اللي كان قايم بالموضوع ده عني اخويا طارق جمعه الله يجزيه خير

اخر حاجة لو سعادتك مبتلي بالتدخين تاخد بالك فيه غرف للمدخنين والا لا
لان مافيش اربع جدران في كندا مسموح فيها التدخين الا بعض الفنادق النادرة
واي نفس تسول لك نفسك شربه هاتتلطع 500 دولار غرامة
دي بلد في منتهي العنصرية ضد المدخنين

بعد ما تستقر على الفندق ..موقع تريب ادفايزور بيديك الفرصة انك تعمل تشيك على المواقع اللي بتدفع من خلالها وتحجز
زي اكسبيديا او هوتيل دوت كوم او غيرة وغيره
تشيك على كله
لان ممكن فندق تكون اكسبيديا ارخص حجز فيه وممكن فندق تاني يكون هوتيلز دوت كوم مثلا رخص
كله حسب الديل مع الفنادق المختلفة
ودور على العروض والخصومات الخاصة
مثلا انا كان عندي الديلوكس كنج في حالة حجز اكتر من 4 ليالي خصم 30 في المية تبقي شبه الاوضة العادية في السعر

وعايز نصيحتي بقة

انا مافيش حاجة خربت بيتي الا الفنادق دي
شوف اسعار الشقق وحدد عدد غرف مناسب وموقع مناسب من خلال مواقع التاجير اللي محطوطة في التوبيكات المثبته
حتى لو كان سعر الشقة قريب من الفندق خد الشقة
اولا هاتتعذب في الاكل جدا جدا
لما تدفعلك كل يوم 50 والا 60 دولار مطاعم وكمان مطاعمهم اكلها وحش ويجيلك فوبيا ياتري دي فيها بورك (خنزير ) والا لا ..والا معموله على صاج كان معمول مكانه خنزير ..والا محطوط فيها خمره ودي كيفهم هناك وموضوع الدبح الاسلامي ولو ان فيه اقاويل يعني هاتتعذب
وكمان المطاعم الحلال هناك حاجة بشعة ..لا تؤكل صراحة
لكن لو اشتريتوا الاكل وطبختم في البييت هاتوفر ما لا يقل عن 40 في المية من مصاريف الرحلة

طبعا انا باتكلم عن اللي بيعمل لاندنج ويرجع موش اللي هايستقر
لان موضوع الاستقرار من اول مرة دي عندي مبدا مرفوض بالذات بعد رحلتي
ولو انه ممكن يبقي في وجهة نظر البعض مضيعة للوقت بس لما نيجي للانطباعات هاتعرفوا السبب

الخلاصة
شقة موش فندق ...قريبة من محطة ساب واي ...في غرب يانج
خليتكم بالعافية