قبل ما تفكر تهاجر.......عايز تهاجر ليه؟؟؟احسبها صح تعيشها صح

[ايجيكويب]

الصحف المصرية والعربية

اقتباس المشاركة الأصلية كتبت بواسطة phrma انا عاوز اهاجر عشان اعيش فى وسط نظيف انسانى اخلاقى محترم وسط مفيهوش فساد ولا رشوة ولا دا ابن فلان ودى بنت فلان وسط فيه العلم هو اعلى الاهتمامات مش رقاصات والمطربين وبتوع الكورة اعيش فى بلد الانسان هو الانسان زاى ما ربنا خلقة اعلى الكائنات مرتبة مش اقلها وبيتقطع ويتباع قطع غيار عاوز اهاجر عشان لما اروح لدكتور ميعطنيش مهدئات عشان ارجعله تانى ويموتنى بالبطئ ودا لو لقيت العلاج اصلا اللى هو كاتبه اللى بتكون شركات الادوية حارقة او بيكون موجود بس منتهى الصلاحية او بيكون بتركيزات قليلا جدااااااا يعنى برسب فى كبدى كيماويات على الفاضى عاوز لما اسكن فى عمارة مش ابص الاقى نفسى وانا نايم تانى يوم الصبح فى شارع ونصف العمارة ميت لان العمارة وقعت بينا لانها مش مبنية صح لان المقاول والمهندس ربنا يعمر بيتهم عاوز لما اركب قطار ابقا مطمن مش الاقى نفسى دخلت فى سوق (قطار كفر الدوار ) او الاقى نفسى ولعت وماسك فى الشباك وبقول الحقونى (قطار الصعيد ) ولا الاقى نفسى بخبط فى قطار جاى على نفس الخط ونعمل فركش (قطار العياط) عاوز اروح هناك عشان بيهتموا بمجالى وبالعلم وعارفين ان العلم هو اساس تقدم الامم عاوز اروح عشان اشوف الابتسامة والاحترام ما بين الكل مش انت شغال كذا وانا كذا وانت ساكن هنا وانا ساكن هناك عاوز اسافر عشان اشوف الاقتصاد متوزع ولو بنسبة متعادلة على المجتمع مش هنا 5% تمتلك كل الاقتصاد وباقى الشعب شحاتين عاوز امشى فى شارع اشوف ناس بدون ماسكات كل واحد بيقول انا كدا حابب تتعامل معاى اهلا وسهلا مش هنا تاخد على دماغك من الاخر عاوز مجتمع انسانى اخلاقى علمى

فوق كل ده انا كمان نفسي ولدي يتعلموا تعليم صح ملاقيش الواد مش عارف يكتب ويقرأ وهو فى الثانويه العامة
وكمان نفسي اتجوز بقى انا خلاص هخلل والجواز فى مصر مستحيل لحسن الاقى واحده زي حماتى الاسابقة واعيد التجربة من تاني طبعاً انا حرمت واتعلمت انى معملش الغلطة دي تاني فى مصر

 

 

[Raouf]

انا عايز اهاجر علشان ماشوفش امين شرطة بيغلس على سواق غلبان نفسه يروح لاولاده علشان هو ليه سلطة عليه . علشان ماشوفش شباب انا اعرف امكانيتهم العقلية كويس و هما مش لاقيين حتى يتجوزوا . علشان مايوقفنيش ضابط و انا راجع باليل للبيت لزوجتى و مينجندنيش من ظرفه غير لما يعرف انى دكتور ( المفترض محترم ) و اقعد طول الليل افكر لو حد تانى او لو والدى كان ممكن يضايقه قد ايه .
انا مش عايز فلوس و على رأى اختى ( شوية ورق ملون )
. علشان نفسى ولو مرة واحدة بس فى حياتى احس بالامان و انىمش خايف من المستقبل
علشان مسمعش واحد فى مجلس الشعب طالع يقول ان البلد اقتصادها فى الطالع و ابص حواليا على الناس واحس انه مش بيجى البلد غير زيارات .
( انا عايش فى الخليج ) علشان بجد احس انى بنى ادم مش واحد كل قيمته انه يشتغل ويجيب فلوس ولما نزهق منه نرجعه بلده و نفكه بتلاتة .
الخلاصة
علشان عايز انام و احلم بمستقبل لاولادى
وانا كل الى شايفه دلوقتى ......................................... كوابيس

 

 

[HAMOUDI]

موضوع لطيف وصدقيني انا عملته على ارض الواقع يعني كنت دائما مابسأل الزملاء اللذين اتشرفت بمقابلتهم
وكانت تنحصر في
1 ) تعليم افضل للاولاد
2 )او للاحساس بالامان لان الدوله مسئوله عن الرعايه الصحيه والطبيه والاجتماعيه الخ...
3 )للاحساس بالامان المفقود في بلادنا وماحدش يغالط نفسه ويقول انه عايش في امان سواء كان الامان المفقود نتيجه لاعمال القمع الامنيه او نتيجه للعلاقات السيئه التي تربط الناس ببعضهم البعض نتيجه لضغوط الحياه او للتغيرات في مجتمعنا
4 )البعض يهاجر للهروب من المعاناه التي يعانيها للحصول على اى خدمه او اى مواصله
5)هناك من هرب ليستطيع العباده بحريه بدونمضايقات امنيه ( خصوصا اهل تونس )

اما طرائف الهجره
6 ) فاحد الاعضاء العزاز جدا هنا ولااستطيع الافصاح عنه الا اذا اراد الشرح الوافي لاسباب هجرته يريد الهجره لان في طريق منزله كمين شرطه وهو كارهه لهذا الاسم ويراه رمزا للمهانه
7)واخيرا ومن الطرائف ايضا يوجد من هاجر لانه توجد صوره في مصر لاحد الاشخاص موجوده ومفروضه عليه ان يراها دائما وهي منتشره في جميع المصالح الحكوميه وعلى الطرقات الزراعيه والتي تربط بين المدن وبعضها ولانها زهق من هذا الوجهه واللذي يراه منذ 30 عاما وبعد ان فقد الامل في ان تمحى هذه الصوره فقد قرر الرحيل المهم حاولت اسأل صديقي ده يقصد مين ماقلش حاولت افهمها لوحدي فشلت

 

 

[ايجيكويب]

اقتباس المشاركة الأصلية كتبت بواسطة HAMOUDI موضوع لطيف وصدقيني انا عملته على ارض الواقع يعني كنت دائما مابسأل الزملاء اللذين اتشرفت بمقابلتهم وكانت تنحصر في 1 ) تعليم افضل للاولاد 2 )او للاحساس بالامان لان الدوله مسئوله عن الرعايه الصحيه والطبيه والاجتماعيه الخ... 3 )للاحساس بالامان المفقود في بلادنا وماحدش يغالط نفسه ويقول انه عايش في امان سواء كان الامان المفقود نتيجه لاعمال القمع الامنيه او نتيجه للعلاقات السيئه التي تربط الناس ببعضهم البعض نتيجه لضغوط الحياه او للتغيرات في مجتمعنا 4 )البعض يهاجر للهروب من المعاناه التي يعانيها للحصول على اى خدمه او اى مواصله 5)هناك من هرب ليستطيع العباده بحريه بدونمضايقات امنيه ( خصوصا اهل تونس ) اما طرائف الهجره 6 ) فاحد الاعضاء العزاز جدا هنا ولااستطيع الافصاح عنه الا اذا اراد الشرح الوافي لاسباب هجرته يريد الهجره لان في طريق منزله كمين شرطه وهو كارهه لهذا الاسم ويراه رمزا للمهانه 7)واخيرا ومن الطرائف ايضا يوجد من هاجر لانه توجد صوره في مصر لاحد الاشخاص موجوده ومفروضه عليه ان يراها دائما وهي منتشره في جميع المصالح الحكوميه وعلى الطرقات الزراعيه والتي تربط بين المدن وبعضها ولانها زهق من هذا الوجهه واللذي يراه منذ 30 عاما وبعد ان فقد الامل في ان تمحى هذه الصوره فقد قرر الرحيل المهم حاولت اسأل صديقي ده يقصد مين ماقلش حاولت افهمها لوحدي فشلت

فى حاجة واحده حضرتك نسيتها ياكبير ودى بتخصنى انا :
انا عاوز اتجوز وفشلت اتجوز من مصر بسبب وجود حمة سابقة مميته زات سمية قاتلة وبسببها صرفت نظر عن الجواز من مصر وقولت اتجوز من كندا يمكن العيال يطلعوا ملونين مش ابيض واسود خالي العيال تفرح

 

 

[dana]

انا عارف كويس ان كندا مش هتحوش فيها من الاول ولا حتى 5 سنين بس عندى سؤال انا عاوز فلوس ليه ولادى بيتعلموا ببلاش / تامين صحى مجانى / اعانة بطالة لو مش بشتغل / ولادى بيتعلموا احسن تعليم فى العالم وعايشين فى احسن دول العالم / جنسية محترمة جدا /ولادى هيطلعوا هيشتغلوا فى كندا بسرعة ويتجوزوا ويجيبوا بيت مش زى انا قعدت 2 سنة من غير شغل وبعد كدة اشتغلت ب200ج وقعدت سنتين مع السماسرة علشان اجيب شقة
كل دى اسباب وجيهه تخلينى اختار اعيش كانسان حر بتمتع وبعشق الحياة بحدود ارضاء الله

 

 

[Doudy]

انا لسة ما قدمتش ع الهجرة
بس بجمع كعلومات و ببحث و ربنا ييسر الامور
انا مش هضيف كلام مختلف عن اللى قالوه
زمايلنا الافاضل
احنا فى السعودية من 12 سنة
و بنفكر فى الهجرة
برضه من اجل حياة كريمة للولاد
و كمان معاملة ادمية من اصحاب العمل او المديرين فى العمل
و كمان ما يمنعش اننا ندور على بيئة نظيفة و جو غير ملوث بالمرة
و الاهم بقى ان ابنى الكبير عبد الرحمن
هوة لسة فى الصف السادس الابتدائى
بس عايز يدخل كلية الهندسة
قسم هندسة نووية
و القسم دة موجود بس فى جامعة اسكندرية
و كمان بيفكروا يقفلوه
ربنا ييسر الامور للناس كلها
و بالتوفيق

 

 

[أحمد باشــا]

مع احترامي لكل الأراء و للجميع

لكن انا شايف ان كل اسباب الهجرة هي هروب من واقع غير مرضي

يعني مثلا اللي زعلان من معاملة الشرطة للجمهور فهجرته للخارج لن تصلح هذا الوضع

هو فقط نفد بجلده لكن ترك اهله و ناسه يعانون من عصا الشرطة الغليظة

اقصد ان اوجه سؤال للجميع

هل حل اي مشكلة يتم بطريقة سلبية ام بإيجابية المواجهة و التصحيح ؟؟؟

و عطفا على السؤال السابق ...

هل الهروب من واقع هنا يعني بالضرورة نجاح هناك ؟؟؟

يعني اذا كان الحل بالهروب من المشاكل في مصر جعلنا نهاجر فهل سنهرب ايضا من مشاكل بلد المهجر ... لأنه طبعا موش منطقي ان نسلم بأن بلد المهجر جنة الله في الأرض و بلا أي مشاكل .... ابسطها مشاكل الإغتراب و الوحدة و التأقلم .... طبعا ساعتها المهاجر موش هيهرب من المشاكل و هيواجها حتما و لا بد لأنه عمل زي طارق بن زياد لما حرق المراكب من وراء الجنود و قال لهم العدو من امامكم و البحر من ورائكم .... يعني لازم تنجح و تتغلب على مشاكل الهجرة بدون اي خيارات اخرى

طيب لو المهاجر ده واجه مشكلات بلده بنفس الطريقة .... يعني حرق المراكب و قال لازم انجح في مصر حتما و لابد ... و زي ما قعد يجاهد كام سنة في تعلم لغات و كورسات و شهادات من أجل الفيزا و غيره ... بذمتكم لو نص الشباب فكروا و نفذوا كده و اصروا ان ينهضوا بمصر ... كانت تبقى مين الأفضل مصر و لا كندا

الحقيقة ان نظام الحكم نجح ان يبث في الأجيال الصاعدة فكرة ان مصر بلد الحكومة و موش بلد المصريين ... و راغبي الهجرة بيهاجروا لكي يجدون وطن و جنسية بدلا من وطنهم المفقود

و نجحت الشلة الفاسدة المفسدة في زرع ضعف الإنتماء لمصر في قلوب المصريين علشان محدش يحاسبهم على فسادهم و سرقاتهم لدرجة ان خبر مثل عدم وجود مبلغ تريليون و 272 مليار جنيه مصري من خطة الموازنة اصبح لا يسترعى انتباه احدكم و لا يحس انها امواله التي تسرق و تنهب و يعبث بها في حين انه يحاول معرفة كل صغيرة و كبيرة عن كندا و ان للمولود منحة 150 دولار كندي شهريا

بذمتكم موش حاجة تغيظ ؟؟؟

و معلهش انا بأعتذر لكم ان انا غردت خارج السرب و ازعجتكم .... لكن عذري ان عنوان الموضوع يحمل فكرة مراجعة النفس ... لكن الموضوع نفسه غير ذلك اطلاقا

مع تحياتي

 

 

[yassir]

اقتباس المشاركة الأصلية كتبت بواسطة أحمد باشــا مع احترامي لكل الأراء و للجميع لكن انا شايف ان كل اسباب الهجرة هي هروب من واقع غير مرضي يعني مثلا اللي زعلان من معاملة الشرطة للجمهور فهجرته للخارج لن تصلح هذا الوضع هو فقط نفد بجلده لكن ترك اهله و ناسه يعانون من عصا الشرطة الغليظة

الأخ الكريم أحمد باشا .....لك حق فى تصورك فى ان الهجره هروب و لكن فى الحقيقه ان المقوله الشهيره التى تقول ان يوما واحدا فى السجن انسانى كل ما قرات عن الحريه ترد عليك فرضيتك ....من السهل جدا ان تكون شجاعا على ساحه المنتديات و خلف الكيبورد .....فى كثير من المنتديات و الفيس بوك أسود على الكيبورد و لكن فى الواقع المريض حاول أن تصمد ولا تبتعد و تترك البلد مفروشه للغربان كما قال نجيب سرور ...حاول ان تصمد و تطالب بالتغير و لو بجمع التوكيلات لتأييد مرشح أحتماليه نجاحه للرئاسه تتساوى مع احتماليه عدم عثورك على منتج صينى فى.......... الصين و أبقى أحكى على التفاصيل ....حاول المطالبه بحقك كدافع للضرائب فى محاسبه المسئول عن اى كارئه من كوارثنا الشبه يوميه ...و أبقى قولى النظره التى لن تنساها فى عيون أهلك و انت مكبل بالأغلال فى قبضه الظالم عملت فيك ايه ......
الفرار من وجه الظالم ليس عيبا ...العيب هو عدم مساعدة من لايزال فى قبضه الطاغوت على الفرار ايضا ...العيب هو ان تنسى أهلك هناك و لاتحاول مساعدتهم على الفرار و النجاح هنا أيضا و لو بمعلومه على منتدى أو مكالمه تليفون تجعل الفار من الأتون انه أصبح فى وطنه الجديد و له أخوه و أهل و أصدقاء ........

اقتباس المشاركة الأصلية كتبت بواسطة أحمد باشــا اقصد ان اوجه سؤال للجميع هل حل اي مشكلة يتم بطريقة سلبية ام بإيجابية المواجهة و التصحيح ؟؟؟ مع تحياتي

لو كانت الهجره سلبيه و ليست عمل ايجابى لما أصبح الاقباط شوكه فى ظهر العسكر فى مصر ....لو كانت سلبيه لما جرأ عدلى أبادير ان يقول سوف أجعل فى مصر دارفور أخرى ....
عندما نشات اول جمعيه ربطت أقباط المهجر ببعضهم لم يكن أحد يتصور ان مواطن منهم من الجيل التانى أو التالت حتى سوف يجرؤ ان يقف فى أى مكان فى مصر و يقول أنه لابد من ألغاء الماده التانيه من الدستور و التى تنص على ان الشريعه الأسلاميه المصدر الرئيسى للتشريع .....حتى و لو يكن هذا هو المعمول به ....
لكنهم أستطاعوا ان يتكتلوا فى المهجر وأن يساعدوا بعضهم البعض و لم ينسوا أهلهم فى مصر و أخوان المله و يكفى أن تطل على دليل العمل العربى بتورنتو و المسمى بدليل الراعى الصالح لتجد كل أصحاب الاعمال به من الأقباط....و لن انسى ابدا و انا فى سفار ه كندا فى مصر منذ عقد من الزمان و سألنى شاب لا أعرفه جلس بجوارى .....حضرتك كنيسه أيه ....فأجبت مازحا...الكنيسه المرقصيه ....فأضاف بجديه...حضرتك نازل على أبونا مين ......

اقتباس المشاركة الأصلية كتبت بواسطة أحمد باشــا و عطفا على السؤال السابق ... هل الهروب من واقع هنا يعني بالضرورة نجاح هناك ؟؟؟

نعم ....أعتقد ان السنوات الطويله التى أمضيتها هنا تعطينى الحق فى الحكم بكل صدق على أنه هنا مقومات كثيره للنجاح ليست موحوده فى مصر لان أثق فى الراى القائل ان الله ينصر الامه العادله و لو كانت كافره ....
لو قدمت الى هنا و حملت فى قلبك الثقه بالله عز وجل انه سيكون فى عونك مادمت فى عون أخوتك فى الأسر فى مصر المحروسه ....اذا قدمت و حملت فى قلب هموم المسلمين و حاولت أن تعين اى قادم باى من بسيط الامر ....لو قدمت الى هنا و نسيت كل العنصريه و المقولات الغبيه الموروثه وهذا فلاح و ذالك أسكندرانى ...و غيرها من موروث الشؤم فى بلادنا .....لو قدمت الى هنا محترما قانونا لم يوضع لخدمه رجال الأعمال و تكريس الطبقيه ....لو قدمت اللى هنا محاولا تغيير السىء فى الوطن الذى أخترته لنفسك بدلا من التفاخر الأبله بأنى أسكن فى أجمل منطقه فى المقاطعه الفلانيه و أولادى فى أحسن مدارس و شايفين الجليد قد ايه حلو شاغلا نفسك بتوافه الأمور و الأقصى يموت على فراش سلبيتنا ......لو قدمت بكل هذا بين ضلوعك .....لم لا تنجح.....

اقتباس المشاركة الأصلية كتبت بواسطة أحمد باشــا يعني اذا كان الحل بالهروب من المشاكل في مصر جعلنا نهاجر فهل سنهرب ايضا من مشاكل بلد المهجر ... لأنه طبعا موش منطقي ان نسلم بأن بلد المهجر جنة الله في الأرض و بلا أي مشاكل .... ابسطها مشاكل الإغتراب و الوحدة و التأقلم ....

معك كل الحق .....ليست جنه ...و لكن ليست نارا أيضا .....كل المشاكل التى طرحتها موجوده و لكن حلها كلها واحد .....صحبه الخير ....تجمع الأسر و توادها و تعاطفها ...أنما اللى قافل على نفسه معتقدا انه ان الأوان أن يخرج من جلده متبرءا من كل رابطه تربطه بأخوته الفاريين من المعتقل الجماعى المسمى بمصر المحروسه ...فالوحده أفضل له .....

اقتباس المشاركة الأصلية كتبت بواسطة أحمد باشــا طيب لو المهاجر ده واجه مشكلات بلده بنفس الطريقة .... يعني حرق المراكب و قال لازم انجح في مصر حتما و لابد ... و زي ما قعد يجاهد كام سنة في تعلم لغات و كورسات و شهادات من أجل الفيزا و غيره ... بذمتكم لو نص الشباب فكروا و نفذوا كده و اصروا ان ينهضوا بمصر ... كانت تبقى مين الأفضل مصر و لا كندا ا

يا أخى الفاضل ....حبك لوطنك شىء مشرف و لكنه كالحب فى فيلم حبيبى نائما ...عذرا للطرفه ....الكثير من الشباب يا أخى يحاول و يتعلم و يجتهد و لكن ما أنت بمسمع من فى القبور ....الجسد نخر السوس أعظمه و أوشك على الانهيار ....أتلك هى مصرنا ....عندما كنت صغيرا فى محافظه الأسكندريه كان لى صديق والده كان من قيادات الجيش و كنا عندما نلبى دعوته لمناسبه أجتماعيه كان ماسح الصحون فى المطبخ قبرصى ....و الطباخ ايطالى الجنسيه ....و كان دائما يقول ...لما تروح تختار ولد من على رصيف محطه الرمل علشان الصحون لازم يكون قبرصى ...أحسن ناس تمسح الصجون .....
كان يسكن فى بدروم عماره جدتى بائعا للعرقسوس ....يونانى الجنسيه و كانت جدتى تساعدهم و تقول لى ناس غلابه على قد حالهم .....تخبل ياأخى جاى مصر يبيع عرقسوس .....لست فى حاجه أن أسرد ماذا يعمل المصريين الان فى قبرص و اليونان .....هذا لو المركب التى تحملهم وصلت .....

اقتباس المشاركة الأصلية كتبت بواسطة أحمد باشــا الحقيقة ان نظام الحكم نجح ان يبث في الأجيال الصاعدة فكرة ان مصر بلد الحكومة و موش بلد المصريين ... و راغبي الهجرة بيهاجروا لكي يجدون وطن و جنسية بدلا من وطنهم المفقود

مش عيب أن أن أكون مسلما كنديا .....بل فى الحقيقه شرف كبير .....العيب أن أنسى أن هناك الكثيرين سأكون أسعد جدا لو أصحبوا جيرانى هنا و زادت قوه النتورك و ثقلنا فى المكان الذى أخترناه وطنا و لو بديلا كما أفترضت .....

اقتباس المشاركة الأصلية كتبت بواسطة أحمد باشــا و نجحت الشلة الفاسدة المفسدة في زرع ضعف الإنتماء لمصر في قلوب المصريين علشان محدش يحاسبهم على فسادهم و سرقاتهم لدرجة ان خبر مثل عدم وجود مبلغ تريليون و 272 مليار جنيه مصري من خطة الموازنة اصبح لا يسترعى انتباه احدكم و لا يحس انها امواله التي تسرق و تنهب و يعبث بها في حين انه يحاول معرفة كل صغيرة و كبيرة عن كندا و ان للمولود منحة 150 دولار كندي شهريا بذمتكم موش حاجة تغيظ ؟؟؟ مع تحياتي

اللى يغيظ مش المبلغ المنهوب.....اللى يغيظ أنه لسه فاضل حاجه اساسا يتعمل بيها ميزانيه..... ....هى الميزانيه كلها كام اساسا علشان يتنهب منها المبلغ ده .....
الشاهد فى الموضوع أن الواحد يهتم بما يعنيه و يؤثر فى حياته زى ال 150 دولار علشان لما تلاقيهم غير كافيين تفتكر ده فى الأنتخابات و أنت بتصوت للمرشح القادر على تغيير ده .....لكن بالله عليك لما تشغل بالك بالمبلغ المنهوب ناوى تعمل ايه.... و ياترى حتفضل بره المعتقل علشان تحكيلنا اللى عملته ....تحياتى....

 

 

[أحمد باشــا]

اقتباس المشاركة الأصلية كتبت بواسطة yassir الأخ الكريم أحمد باشا .....لك حق فى تصورك فى ان الهجره هروب و لكن فى الحقيقه ان المقوله الشهيره التى تقول ان يوما واحدا فى السجن انسانى كل ما قرات عن الحريه ترد عليك فرضيتك ....من السهل جدا ان تكون شجاعا على ساحه المنتديات و خلف الكيبورد

الأستاذ ياسر

اتمنى ان لا يكون معنى كلامك موجه لي شخصيا او هو تعميم لكل اهل مصر

فأنا الحمد لله وقفت في وجه الظلم و ناصرت الحق و لم اخشى في قوله الا الله

و ارى و اعرف من هم جديرون بالإحترام و التحية يعملون في صمت لا يراءون و لا ينافقون

و لا اراها شجاعة على الإطلاق بل هو فرض عين على كل مخلوق في طاعة الله

و اؤكد لك يا أخي ان عجلة التغيير قد سارت في مصر و لا سبيل لتوقفها

و معظم ما يقال عن بطش السلطة هو تهويل من السلطة نفسها لإرهاب الجميع

و بإذن الله يكون لنا لقاء آخر في مصر لنرى ماذا تحقق على ارض الواقع و ادعو الله ان يكون قريب

و اقسم بالله انه لو توفرت النية الصادقة لأصبحت مصر جنة يسعى اليها الغريب

مع خالص تحياتي

 

 

[هدوء الليل]

السلام عليكم ورحمة الله وبركاته
موضوع زي العسل و تقريبا اجابتنا واحدة بس باختلاف الاولويات
لينا حق نسمي نفسنا المطاريد
عن نفسي سبب ان نفسي اهاجر ينقسم لشقين
الاول شخصي :1- بقالي 3 سنين راجع من الامارات و نفسي حد يشاورلي علي حاجة واحدة صح توحد الله في اي حاجة و في اي حتة - يمكن انا نايم و مش واخد بالي-كله استفزاز في استفزاز في عدم نظام في قلة ادب في محسوبية في مرور بايظ علي تعليم زفت و طبعا اسعار نااااار
2- نفسي اشتغل مع ناس محترمة تتعامل من مبدأ الكفاءة و لما تخلص شغلك (اللي بتاخد عليه مرتبك)تقولك -Thank you-او you did wellالتقدير المعنوي اهم بكتييير من التقدير المادي -و ده طبعا هنلاقيه في كندا
الثاني عائلي: نفسي انام و انا مش خايف علي مستقبل عيلتي ازاي يعني
1- يعني مبقاش شايل هم مصاريف التعليم و الدروس الخصوصية و كمان بعد كل ده عيقعدوا جنبي
و يار يتهم اتعلموا حاجة من اساسه
2- مبقاش خايف ان حد يمرض و ميكونش معايا تكاليف لا قدر الله العملية او العلاج و لو معايا اقعد ادعي ربنا انه يطلع سليم من اوضة العمليات و ميكونش لقط انفيكشن او فيروس كبد او حتي ايدز من نقل الدم
3- نفسي ابص لعيلتي و الاقيهم مبسوطين و مطمئنين فافرح انا كمان و انام قرير العين
تقلت عليكوا و جبتلكوا كأبة - انا اسف