طابور المدرسة "تحيا جمهورية مصر العربية"

[سهى يافا]

الصحف المصرية والعربية

انا كنت بروح المدرسة اول واحدة
لاقي الباب ليسه مقفول و بعدين يجي الباقي
و نلعب حجلة لغاية ما يفتح الباب
جوه نلعب استغماية لغاية ما الجرس
يضرب ده في الابتدائي
اقف مع صحباتي في الاخر
كانت دايما تيجي الابلة تقولي اقفي كويس
اقول لها ازي يعني ما انا واقفه اهوه
تقولي لا دغري اقول لها ازي وقفت دغري
اوقع يضحكوا البنات طبعا ده في ثانوي

 

 

[سهى يافا]

اقتباس المشاركة الأصلية كتبت بواسطة مدى يعني ايه تحيوا العلم..!

يعني يرفعوا العلم و الكل يقول تحيا جمهورية مصر العربية ثلاث مرات
في ابتدائي كنا كل يوم نقول القسم حد فاكر

 

 

[إكرام يوسف]

اقتباس المشاركة الأصلية كتبت بواسطة مدى يعني ايه تحيوا العلم..!

يااااااااااه.. جه اليوم اللي حد يسأل يعني إيه تحيوا العلم منهم لله اللي بوظوا كل حاجة حلوة.. وضيعوا طعم حاجات كانت مقدسة.. زمااااااااان( مش زمان قوي يعني من 45 سنة واكتر شوية صغيرين) كانت تحية العلم في طابور الصباح شيء مقدس.. وكان اللي يختاروه لتحية العلم يعتبر نفسه بطل قومي.. أنا كنت دايما في الإذاعة ابتدائي وإعدادي وثانوي.. وكنت في ابتدائي أحيانا بابقى ضمن التلاتة اللي بيحيوا العلم (احتياطي يعني لما يغيب التلميذ الأساسي).. وكان اللي يدخل الحوش متأخر يقف مكانه زنهار زي الألف لو ابتدا السلام الجمهوري.. زرعوا في قلوبنا قداسة السلام الجمهوري.. أول ما يبتدي عزف السلام الجمهوري.. كل واحد يقف ثابت مطرح ماهو.. لو جاي من أي حتة أو واقف على السلم.. أو بيعمل اي حاجة يقف مكانه من غير ولا حس ولا همسة .. وأول ما يخلص السلام الجمهوري نبتدي تحية العلم.. مافيش حد فينا كان يجرؤ ما يرفعش صوته بالتحية..من جوانا كنا بنحيي بجد.. ممكن نرغي أثناء تمارين الصباح أو أثناء الإذاعة أو اي حاجة.. إلا أثناء تحية العلم.. ومن جوانا لما نسمع السلام الجمهوري في أي حتة نقف ثابتين.. حتى المدرسين ماحدش منهم يرمش.. كل واحد يقف مكانه ومش ممكن يكلم حد أو يعاقب حد لغاية ما تنتهي تحية العلم.. وبعد كده يعاقبوا المتأخرين.. ومش ممكن حتى في أي حفلة تلاقي السلام الجمهوري بيعزف وحد قاعد أو حد بيتحرك (كان ساعتها السلام الجمهوري أغنية والله زمان ياسلاحي.. دودو دو سي لا سي لاصول..) وكنا حتى واحنا في بيوتنا أو برة المدرسة لو سمعنا السلام الجمهوري نحس برهبة.
بابا كان بيخرجنا من البيت بدري جدا.. وكنا أنا واختي زي سهى كده أول اتنين نوصل والباب مقفول نقعد نلعب على باب المدرسة وكل اللي ييجي يلعب معانا لغاية الفراش ما يفتح الباب..عمري ما اتأخرت عن المدرسة ـ مش بمزاجي.. عشان الجنرال المستبد اللي في البيت (مع انه عمره ما دخل الجيش) ـ.. كمان ما كانش بيسمح بالغياب.. فكنا آخر بنتين نغيب من المدرسة ..لما المدرسين نفسهم يقولولي انا واختي ما تجوش بقى تاني، بنحضر الفصول للجان..
حتى في الشهادات.. كنا بنروح بعد رفع الغياب.. ونقعد نهري المدرسين أسئلة.. ونخليهم يساعدونا في المراجعة غصب عنهم ..وكانوا بيفرحوا بينا لما نجيب لهم أسئلة صعبة ونسألهم في حلها (تصدقوا ده كان حال مدارس الحكومة؟).. وبعد رفع الغياب تلاميذ كتير كانوا بيغيبوا.. فكانوا بيضموا الفصول على بعض ويقعدوا يعملوا معانا مراجعات.. ويفضلوا التلامذة يقلوا تدريجيا.. لغاية قبل الامتحان بأيام تصفصف المدرسة علينا أنا واختي.. ونرجع نقول لبابا "قالولنا ماتجوش تاني".. لولا كده كان يودينا لغاية ما تبتدي لجنة الامتحان
في جيل ولادي حسيت ان حاجات كتير فاتتني زي الوصول متأخر عن الطابور أو التزويغ من المدرسة..أو التهريج في الطابور

 

 

[مزاياإنسانة]

بصراحة يا زوزي الطابور ده أتقل من الهم على القلب
ومع ذلك بنحضره لأنه كمان بيكونوا موكلين لي نشاط أو نشاطين من ضمن الإذاعة الصباحية
من ضمن الأنشطة تلاوة أيات من القرآن الكريم لأنني أعتبر من الأوائل ولله الحمد في التلاوة المجودة الصحيحة
وقراءة بعض المقالات القصيرة والمعلومات أو النكت أو أي شيئ
ولأني نظامية جداً جداً ومابحبش أكون مخالفة وبطبعيتي أصلا مش ممكن أخالف
لأني لابحب أحط مكياج ولا بشيل مشط ولا مراية حتى الآن تخيلوا
لايمكن تلاقي معايا مشط ولا مراية في شنطتي <<<<الثقة حلوة برضك

لو أفنكرت مواقف حآجي أكتبها أكيد

 

 

[حازم حسن]

الطابور ده كان بيفكرني بمعتقلات هتلر اللي عملها لتعذيب اليهود في النمسا وخصوصاً معسكر لينز .. كنا عشان نلحقه ننزل الساعة 6 صباحا في الشتا والدنيا ضلمة ومفيش اي مواصلات ونتلطع فيه اكتر من 40 او 50 دقيقة وكان في طابور تاني في نص اليوم الدراسي وكانت الشمس بتسكعنا بشكل عمودي على راسنا
والبشوات اللي مشغلين الطابور واقفين في الظل واحنا متلقحين في ارض الطابور اللي كلها شمس وممنوع حد يلبس كاب او نضارة شمس والا تبقى جريمة من الدرجة التانية
طيب يا عم اختصر .... أبداً
طيب يا استاذ الشمس حامية .... لايمكن
ولا هوه سائل
والآن مع كلمة مدير المدرسة والآن مع كلمة وكيلة المدرسة والآن مع كلمة واحد معدي من جنب سور المدرسة
على اد ما كانوا بيبذلوا مجهود في الطابور لكنه كان كله على بعضه مكروه من الأول للآخر ومحدش بيسمع حاجة
أنا شايف ان الغاؤه أفضل لنفسية الطفل

 

 

[MFaisal]

الطابور وتحية العلم كانت قمة الأنضباط فى الابتدائى

فى الأعدادى لما ماكنش مدرس يبقى جنبنا نروح مرددين التحية " تحيا جمهورية الفول والطعمية "

فى الثانوى كانو حوالى 5 طلاب فى المدرسة كلها اللى بيرددو تحية العلم والباقى ساكت ... وأمتع جزء هو بعد كلمة المدير والطلبة كلها بتقول يييييييييييييييى

بس الصراحة أكتر وقت كرهت فيه الطابور كان فى اعدادى .. كان عندنا مدرس ومدير ولاد مؤذية وكان مدرس الألعاب الله يرحمه رخم جداااااا وبيتعمد يعذبنا فى الطابور ! كان يعملنا تمارين الذراعين جانبا وأماما ثم عاليا ويروح ثابت على الذراعين عاليا بتاع 10 دقائق كنوع من الرخامة واللى يلاقيه نزل ايده علشان وجعته يروح ضاربه !

السبب الوحيد اللى كان بيخلينى أحضر الطابور هو ان الابواب بتاعة المدرسة بتتقفل فى آخر الطابور والمدرسين ينتشرو على الأسوار علشان محدش ينط من عالسور ...

 

 

[كلزار]

انا بقي كنت بنت مدرس في المدرسه
بس الحق يقال ابويا ولا كان بيعبرني
اننا في ابتدائي في فريق الموسيقي وامسك الطبله والعصيايتبن ولما الطابور يقف نبدأ في الاذاعة المدرسية
ولما خلاص لازم كنت ادق الطبله الصغيرة بالعصايتين لحد اخر تلميذ يدخل الفصل
ومعتاد المارش
ولازم الخطوة المعتاده المنتظمه
يا اما الاستاذ يدي على القفا عدل

اما بالنسبه في الاعدادي والثانوي
كنت بركب القطار وبوصل والبنات داخلين الفصول
لحد ما المعهد اتنل وبقينا نسافر بالمكروباص
ولما العميد يشوفنا واحنا متأخرين لازم يصبح علينا أحلى صباح
ويوم مهبب لو لقي الجلباب فيه زرار او طرحه بيج وفيها دبوس ملون
كان زي المعهد الازهري بني في اعدادي وكحلي في ثانوي
ويكون بكابسين مش زراير
وكان في التزام وحب مع الشدة دي
والله يمسيه بالخير
ويمسيكي يا زهرة القلب يا قلبي

 

 

[كيرمايكل]

من كام يوم كنت عند والدتى ووقفت فى البلكونة المطلة على مدرستى الابتدائية وتذكرت انه بالرغم من ان المدرسة اما المنزل مباشرة الا اننى كثيرا ما اتعاقبت على التاخير .
واتذكر مرة قلت لا انا لازم اروح بدرى مش كل يوم اتهزق لبست بدرى ونزلت دخلت المدرسة وعندما دخلت اتزحلقت ووقعت فى الطين ورجعت البيت اغير ملابسى وبرضوه اتاخرت .

 

 

[Tornado]

كنت بكره المدرسة بسبب الطابور
في الابتدائي كانوا يعذبونا في البرد الصبح علشان الطابور اللي ملوش لزمة والمدير يقعد يقول كلمتين ملهومش لزمة
في الاعدادي كنا بنكبر دماغنا شوية بس لما كان ييجي جنبنا مدرس كنا بنخاف ونحيي العلم
في الثانوي كنا مقضيين الطابور دردشة ولا سمعين حاجة ولا بنحيي العلم والمدرس اللي كان بيزعق او يشتم مكانش بينوله الا
ده كان الطابور ده كل يوم لازم طالب يضرب مدرس او كل يوم الطلبة يضربوا مدرس في الفصل (كانت دفعتنا واللي قبلنا دفعة سوابق )
انا فاكر مرة كان مدير الادارة التعليمية في المدرسة في الطابور وطبعا المدير عاوزنا نشرفه قدامه فكنت انا في تالتة ثانوي فقولنا لازم نحرج المدير ساعة تحية العلم ولا واحد من تالتة نطق بكلمة قام بتوع تانية ثانوي قلدونا وسكتوا هما كمان بس بتوع اولى الخونة باعونا وسابونا في الطابور المدير يتحايل علينا نحيي العلم اي حاجة ونطلع نقوله لا قام مدرس الالعاب خلانا ننزل ضغط طول مدة الحصة الاولى واحنا بنعند (كان طالع عنينا وتعبنا بس العند بقى )
المهم زهقوا مننا وطلعونا الفصول قمنا مزوغين وخلينا شكل المدير عاااااار
كان احلى حاجة في الثانوي ان كل الدفعة بتكون على نفس المسار مهما كانت النتائج سواء فصل او استدعاء ولي امر
كانت ايام

 

 

[Tornado]

اقتباس المشاركة الأصلية كتبت بواسطة مدى يعني ايه تحيوا العلم..!

يعني نقف زي بتوع الجيش والنشيد الوطني يشتغل وبعدين واحد يقف عند سارية العلم ووراه اتنين او تلاتة حرس علم ويقول تحيا جمهورية مصر العربية 3 مرات ونردد وراه

قال يعني هيا دي الوطنية

المدرسين كانوا بيشتغلونا ويهددونا ان اللي مش هيحيي العلم هتبقى قضية امن دولة